Јеһова әдаләти бәрпа едәҹәкдир

«Мәҝәр Аллаһ Өз сечдикләрини, ҝеҹә-ҝүндүз Ондан имдад истәјәнләри мүдафиә етмәјәҹәкми? Онлар үчүн чохму ҝеҹикәҹәк?» (ЛУКА 18:7).

1. Сәни кимин нүмунәси руһландырыр вә нә үчүн?

БҮТҮН дүнјада Јеһованын Шаһидләри узун илләр боју Аллаһа садиг галан баҹы-гардашларла чијин-чијинә хидмәт етмәкдән севинҹ дујурлар. Сән онлардан шәхсән кимисә таныјырсанмы? Ола билсин ки, јадына чох илләр бундан әввәл вәфтиз олунмуш вә ҝөрүшләри надир һалларда бурахан јашлы бир баҹы дүшүр. Јахуд да чох илләр әрзиндә һәр һәфтә тәблиғдә иштирак едән гоҹа бир гардашы хатырлајырсан. Бу садиг хидмәтчиләрин чоху Һар-Меҝидонун тезликлә ҝәләҹәјини дүшүнүрдүләр. Анҹаг бу әдаләтсиз дүнјанын һәлә дә мөвҹуд олмасы, онларын нә Јеһованын вә’дләринә олан е’тибарыны сарсыдыб, нә дә онлары ‘ахыра гәдәр сәбр етмәк’ гәрарындан дөндәриб (Матта 24:13). Јеһованын бу садиг хидмәтчиләринин мөһкәм иманы бүтүн јығынҹағы руһландырыр (Мәзмур 147:11).

2. Һансы вәзијјәт бизи кәдәрләндирир?

² Лакин һәрдән тамамилә башга бир шејин шаһиди олуруг. Илләрлә хидмәт едән бә’зи мәсиһчиләрин вахт кечдикҹә Јеһоваја иманы зәифләјир вә онлар јығынҹаға ҝәлмәјә сон гојурлар. Кечмиш һәмиманлыларымызын Јеһованы тәрк етмәләри бизи кәдәрләндирир вә бу ‘итән гузуларын’ һәр биринин сүрүјә гајытмасына көмәк етмәк истәјирик (Мәзмур 119:176; Ромалылара 15:1). Мәсиһчиләрин бә’зиләринин иманда мөһкәм галдығыны, диҝәрләринин исә иманларыны итирдијини ҝөрдүкдә биздә суаллар јараныр. Бә’зиләринин иманы зәифләдији һалда, бир чох мәсиһчиләрә Јеһованын вә’дләринә инамы горумаға нә көмәк едир? ‘Јеһованын мөһтәшәм ҝүнүнүн’ јахын олдуғуна инамымызын зәифләмәмәси үчүн нә едә биләрик? (Сефанја 1:14). Ҝәлин «Луканын Мүждәси»ндәки бир мәсәли нәзәрдән кечирәк.

Инсан Оғлу ҝәлән заман јашајанлара хәбәрдарлыг

3. Дул гадын вә һаким мәсәли әсас е’тибарилә кимләрә фајда ҝәтирә биләр вә нә үчүн?

³ «Лука» китабынын 18-ҹи фәслиндә Исанын дул гадын вә һаким мәсәлини охујуруг. Бу мәсәл кечән мәгаләдә мүзакирә едилән, хаһишини тә’кидлә билдирән кишинин мәсәлинә охшајыр (Лука 11:5-13). Лакин контекстдән ајдын олур ки, бу мәсәл әсас е’тибарилә Инсан Оғлу падшаһлыға ҝәлдији заман јашајанлара аиддир, бу дөвр исә 1914-ҹү илдә башламышдыр (Лука 18:8)a.

4. «Лука» китабынын 18-ҹи фәслиндәки мәсәли данышмаздан габаг Иса нә деди?

⁴ Иса мәсәли данышмаздан әввәл деди ки, «шимшәк ҝөјүн бир кәнарында чахыб, о бири кәнарына гәдәр неҹә парлајырса», онун Падшаһлыгда иштиракы да елә ајдын билинәҹәк (Лука 17:24; 21:10, 29-33). Буна бахмајараг, ‘ахыр заманда’ јашајан инсанларын чоху бу ајдын әламәтләрә диггәт јетирмәјәҹәк (Даниел 12:4). Һансы сәбәбдән? Нуһун вә Лутун ҝүнләриндәки инсанлар Јеһованын хәбәрдарлыгларына нә үчүн мәһәл гојмамышдыларса, бу инсанлар да елә о сәбәбдән мәһәл гојмајаҹаглар. О дөврдә мәһв инсанлары јахалајана кими онлар «јејир, ичир, алыр, сатыр, әкир, тикирдиләр» (Лука 17:26-29). Башлары ҝүндәлик ишләрә о гәдәр гарышмышды ки, Аллаһын ирадәсинә әһәмијјәт вермирдиләр, буна ҝөрә дә һәјатларыны итирдиләр (Матта 24:39). Бу ҝүн дә үмумиликдә инсанлар ҝүндәлик ишләрә елә гәрг олублар ки, бу аллаһсыз дүнјанын сонунун јахын олдуғуну ҝөстәрән әламәтләри ҝөрмүрләр (Лука 17:30).

5. а) Иса кимләрә хәбәрдарлыг етди вә нә үчүн? б) Бә’зи мәсиһчиләр һансы сәбәбдән иманларыны итирмишләр?

⁵ Ајдындыр ки, Иса давамчылары үчүн нараһат олурду, чүнки Шејтанын дүнјасы онлары о дәрәҹәдә ҹәлб едә биләрди ки, онлар һәтта ‘ҝери дөнә’ биләрдиләр (Лука 17:22, 31). Доғрудан да, бә’зи мәсиһчиләрлә бу баш вериб. Узун илләр әрзиндә онлар Јеһованын пис дүнјаја сон гојаҹағы ҝүнү сәбирсизликлә ҝөзләмишләр. Лакин Һар-Меҝидон ҝөзләдикләри вахтда ҝәлмәдији үчүн мә’јус олмуш, Јеһованын һөкм ҝүнүнүн јахын олмасына инамлары зәифләмишдир. Онлар ҝет-ҝедә хидмәтә аз вахт сәрф етмәјә башламыш вә башлары һәјатын ҝүндәлик ишләринә о гәдәр гарышмышдыр ки, руһани ишләрә вахтлары, демәк олар ки, галмамышдыр (Лука 8:11, 13, 14). Тәәссүфләр олсун ки, онлар тәдриҹән бу дүнјаја ‘ҝери дөнмүшләр’!

‘Даим дуа етмәјин’ ваҹиблији

6-8. а) Дул гадын вә һаким мәсәлини данышын. б) Иса бу мәсәли неҹә тәтбиг етди?

⁶ Јеһованын вә’дләринә инамымызын зәифләмәмәси үчүн нә едә биләрик? (Ибраниләрә 3:14). Иса Шејтанын пис дүнјасына гајытмамаг үчүн шаҝирдләринә хәбәрдарлыг верәндән дәрһал сонра бу суала тохунду.

⁷ Лука нәгл едир ки, Иса «даим дуа етмәк вә һеч руһдан дүшмәмәк лазым олдуғу барәдә... онлара бир мәсәл чәкәрәк, деди: “Бир шәһәрдә Аллаһдан горхмајан вә адамлара һөрмәт етмәјән бир һаким вар иди. Елә һәмин шәһәрдә бир дул гадын да вар иди. Вә гадын онун јанына ҝәлиб деди: ‘Мәни рәгибимдән мүдафиә ет’. Амма һаким хејли мүддәт истәмәди. Сонра исә өз-өзүнә деди: ‘Һәрчәнд мән нә Аллаһдан горхур, нә дә адамлара һөрмәт едирәм, бу гадын мәнә зәһмәт вердији үчүн ону мүдафиә едим ки, о бир даһа ҝәлиб, мәним зәһләми төкмәсин’ ”».

⁸ Иса мәсәли чәкәндән сонра, ону белә тәтбиг етди: «Әдаләтсиз һакимин нә дедијини динләјин. Мәҝәр Аллаһ Өз сечдикләрини, ҝеҹә-ҝүндүз Ондан имдад истәјәнләри мүдафиә етмәјәҹәкми? Онлар үчүн чохму ҝеҹикәҹәк? Сизә дејирәм ки, онлары тезликлә мүдафиә едәҹәкдир. Бәс Инсан Оғлу ҝәлдији заман јер үзүндә иман тапаҹагмы?» (Лука 18:1-8).

«Мәни... мүдафиә ет»

9. Исанын дул гадын вә һаким мәсәлинин әсас мөвзусу нәдир?

⁹ Бу әјани нүмунәнин әсас мөвзусу ајдындыр. Буну һәм Исанын, һәм дә мәсәлдәки гәһрәманларын сөзләриндән ҝөрмәк олар. Дул гадын «мәни... мүдафиә ет» дејә јалварырды. Һаким өз-өзүнә фикирләшди: «Ону мүдафиә едим». Иса суал верди: «Мәҝәр Аллаһ... мүдафиә етмәјәҹәкми?» Сонра о, Јеһова һаггында деди: «Онлары тезликлә мүдафиә едәҹәкдир» (Лука 18:3, 5, 7, 8). «Мүдафиә етмәк» кими тәрҹүмә олунан јунан сөзүнүн «гисас алмаг, әдаләти бәрпа етмәк» кими мә’налары вардыр. Бәс Јеһова әдаләти нә заман бәрпа едәҹәк?

10. а) Биринҹи әсрдә әдаләт нә вахт бәрпа олунду? б) Аллаһын мүасир хидмәтчиләри үчүн әдаләт нә заман вә неҹә бәрпа олунаҹаг?

¹⁰ Биринҹи әсрдә, ‘гисас ҝүнләри’, јә’ни әдаләтин бәрпа олундуғу ҝүнләр ерамызын 70-ҹи илиндә Јерусәлим вә мә’бәд дармадағын едилән заман ҝәлди (Лука 21:22). Бизим ҝүнләрдә исә Аллаһын халгы үчүн әдаләт ‘Јеһованын мөһтәшәм ҝүнүндә’ (ЈД) бәрпа олунаҹагдыр (Сефанја 1:14; Матта 24:21). О заман Јеһова Өз халгына ‘әзаб верәнләрә әзаб’ верәҹәк, белә ки, ‘Иса Мәсиһ Аллаһы танымајан вә Өзү барәсиндәки Мүждәјә итаәт етмәјәнләрә ҹәза верәҹәк’ (2 Салониклиләрә 1:6-8; Ромалылара 12:19).

11. Әдаләт һансы мә’нада «тезликлә» бәрпа олунаҹагдыр?

¹¹ Бәс Јеһованын «тезликлә» әдаләти бәрпа едәҹәјини неҹә баша дүшмәлијик? Аллаһын Кәламы ҝөстәрир ки, Јеһова чох сәбирли олса да, вахты ҝәләндә Өз һөкмүнү дәрһал һәјата кечирәҹәк (Лука 18:7, 8; 2 Петер 3:9, 10). Нуһун ҝүнләриндә Дашгын ҝәләндә писләр чох тез мәһв олдулар. Буна бәнзәр тәрздә Лутун ҝүнләриндә ҝөјдән од јағанда писләр јох олдулар. Иса демишдир: «Инсан Оғлунун зүһур едәҹәји ҝүндә дә белә олаҹагдыр» (Лука 17:27-30). Пис инсанлар јенә дә «гәфләтән... һәлака уғрајаҹаг» (1 Салониклиләрә 5:2, 3). Әмин ола биләрик ки, Јеһова әдаләтин тәләб етдијиндән бир ҝүн дә артыг Шејтан дүнјасынын мөвҹуд олмасына јол вермәјәҹәкдир.

Јеһова әдаләти бәрпа едәҹәк

12, 13. а) Исанын дул гадын вә һаким мәсәлиндә һансы ваҹиб дәрс вар? б) Јеһованын дуаларымызы динләдијинә вә әдаләти бәрпа едәҹәјинә нә үчүн әмин ола биләрик?

¹² Исанын дул гадын вә һаким мәсәли башга ваҹиб һәгигәтләри дә ачыглајыр. Бу мәсәли тәтбиг едәрәк, Иса деди: «Әдаләтсиз һакимин нә дедијини динләјин. Мәҝәр Аллаһ Өз сечдикләрини... мүдафиә етмәјәҹәкми?» Јеһованы һакимлә мүгајисә етмәклә Иса демәк истәмирди ки, Аллаһ Өз хидмәтчиләри илә һакимин дул гадынла даврандығы кими давраныр. Әксинә, о, Аллаһла һаким арасындакы фәрги ҝөстәрәрәк, давамчыларына Јеһова һаггында ваҹиб шеји өјрәтди. Бәс онлар арасындакы фәрг нәдәдир?

¹³ Мәсәлдәки һаким «әдаләтсиз» олдуғу һалда, «Аллаһ адил һакимдир» (Мәзмур 7:11; 33:5). Дул гадын һакими марагландырмырды, Јеһова исә һәр биримизлә марагланыр (2 Салнамәләр 6:29, 30). Һаким дул гадына көмәк етмәк истәмирди, анҹаг Јеһова Она хидмәт едәнләрә көмәк етмәји нәинки истәјир, һәтта буна ҹан атыр (Јешаја 30:18, 19). Биз бурадан һансы дәрси ҝөтүрүрүк? Әҝәр әдаләтсиз һаким дул гадынын хаһишләрини динләјиб әдаләти бәрпа етдисә, Јеһованын Өз халгынын дуаларыны динләјиб, әдаләти бәрпа едәҹәји даһа чох јәгин дејилми! (Сүлејманын мәсәлләри 15:29).

14. Аллаһын һөкм ҝүнүнүн ҝәләҹәјинә инамымызы нә үчүн итирмәмәлијик?

¹⁴ Буна ҝөрә дә Јеһованын һөкм ҝүнүнүн ҝәләҹәјинә инамларыны итирәнләр ҹидди сәһвә јол верирләр. Нәјә ҝөрә? ‘Јеһованын мөһтәшәм ҝүнүнүн’ јахын олдуғуна инамы итирәнләр, әслиндә, Јеһованын вә’дләринә садиг галаҹағына шүбһә етдикләрини ҝөстәрирләр. Лакин Аллаһын садиглијини шүбһә алтына алмаға һеч кимин һаггы јохдур (Әјјуб 9:12). Әсас мәсәлә бизим садиг галыб-галмајаҹағымыздадыр. Иса дул гадын вә һаким мәсәлинин сонунда мәһз бу мәсәләјә тохунду.

«Бәс Инсан Оғлу... јер үзүндә иман тапаҹагмы?»

15. а) Иса һансы суалы верди вә нә үчүн? б) Биз өзүмүзә һансы суалы вермәлијик?

¹⁵ Иса мараглы бир суал верди: «Бәс Инсан Оғлу ҝәлдији заман јер үзүндә иман тапаҹагмы?» (Лука 18:8). «Иман» дедикдә, Иса үмумијјәтлә иманы дејил, дул гадынын иманына бәнзәр иманы нәзәрдә тутурду. О өзү өз суалына ҹаваб вермәди. Суалы верди ки, шаҝирдләрин һәр бири өз иманы һаггында дүшүнсүн. Онларын иманы тәдриҹән зәифләмирди ки? Онлар үчүн бу дүнјаја ҝери дөнмәк тәһлүкәси јаранмамышды ки? Јохса онларын иманы дул гадынын иманына бәнзәјирди? Биз дә өзүмүздән сорушмалыјыг: «Бәс “Инсан Оғлу” мәним үрәјимдә неҹә иман тапаҹаг?»

16. Дул гадын неҹә имана саһиб иди?

¹⁶ Әҝәр Јеһованын бизим үчүн дә әдаләти бәрпа етмәсини истәјириксә, о заман иманымыз дул гадынын иманына бәнзәмәлидир. О неҹә имана саһиб иди? Онун иманы дәфәләрлә һакимин јанына ҝедиб әдаләти тәләб етмәјиндән ҝөрүнүрдү. Бу гадын әдаләтсиз инсандан тә’кидлә әдаләт тәләб едирди. Аллаһын хидмәтчиләри дә әмин ола биләрләр ки, онларын ҝөзләдијиндән чох чәксә дә, Јеһова әдаләти бәрпа едәҹәк. Бундан башга, онлар Аллаһын вә’дләринә инандыгларыны тә’кидлә дуа етмәклә, јә’ни ‘ҝеҹә-ҝүндүз Ондан имдад истәмәклә’ ҝөстәрирләр (Лука 18:7). Доғрудан да, мәсиһчи әдаләтин бәрпа олунмасы һагда дуа етмәјә сон гојса, Јеһованын Өз хидмәтчиләри наминә јахын заманларда тәдбир ҝөрәҹәјинә инамыны итирдијини ҝөстәрмиш олар.

17. Һансы сәбәбләрдән дуада мәтанәтли олмалы вә Јеһованын һөкм ҝүнүнүн ҝәләҹәјинә әминлијимизи горумалыјыг?

¹⁷ Дул гадынын вәзијјәтиндән ҝөрүрүк ки, дуада мәтанәтли олмаг үчүн башга сәбәбләримиз дә вар. Онун вәзијјәти илә бизимки арасындакы фәргә диггәт јетирин. Гадыны һеч ким тәшвиг етмәсә дә, о, һакимә дәфәләрлә мүраҹиәт етмишди. Аллаһын Кәламы исә бизи дөнә-дөнә ‘дуада мәтанәтли олмаға’ тәшвиг едир (Ромалылара 12:12). Дул гадын хаһишинин јеринә јетириләҹәјинә архајын дејилди, лакин Јеһова әдаләтин бәрпа олунаҹағына бизи әмин едир. Јеһова Өз пејғәмбәри васитәсилә дејир: «Санки ҝеҹикир, амма ҝөзләјин, чүнки һөкмән ҝәләҹәк, ҝеҹикмәјәҹәк» (Һабаггуг 2:3; Мәзмур 97:10). Гадынын һакимин јанына хаһишә ҝөндәрмәјә һеч кими јох иди. Бизим исә, ‘Аллаһын сағында отуруб, бизим үчүн вәсатәт едән’ Иса Мәсиһ кими гүдрәтли көмәкчимиз вар (Ромалылара 8:34; Ибраниләрә 7:25). Әҝәр гадын вәзијјәтинин чәтинлијинә бахмајараг, әдаләтин бәрпа олаҹағына үмид едәрәк һакимә тә’кидлә мүраҹиәт едирдисә, биз Јеһованын һөкм ҝүнүнүн мүтләг ҝәләҹәјинә нә дәрәҹәдә иман етмәлијик?!

18. Дуа һансы һалда иманымызы мөһкәмләдәҹәк вә бизим үчүн әдаләтин бәрпа олунмасына көмәк едәҹәк?

¹⁸ Дул гадын һаггында мәсәлдән ајдын олур ки, дуа иманла сых бағлыдыр, һәмчинин тә’кидлә дуа етмәклә иманымызы зәифләдә билән тә’сирләрә гаршы дура биләрик. Әлбәттә, бу о демәк дејил ки, ријакарҹасына едилән дуалар иманымызы горујаҹаг (Матта 6:7, 8). Дуа бизи, тамамилә Аллаһдан асылы олдуғумузу баша дүшдүјүмүз үчүн дуа етдијимиз тәгдирдә Аллаһа јахынлашдырыр вә иманымызы мөһкәмләндирир. Хилас үчүн иман зәрури олдуғундан, тәәҹҹүблү дејил ки, Иса шаҝирдләрини ‘даим дуа етмәјә вә һеч руһдан дүшмәмәјә’ тәшвиг етмәји ваҹиб санды (Лука 18:1). Дүздүр, ‘Јеһованын мөһтәшәм ҝүнүнүн’ ҝәлиши бизим дуа едиб-етмәмәјимиздән асылы дејил — о мүтләг ҝәләҹәк. Анҹаг бизим үчүн әдаләтин бәрпа олунмасы вә Аллаһын мүһарибәсиндән сағ чыхмағымыз иманымыздан вә дуа етмәклә јанашы, салеһ һәјат сүрмәјимиздән асылыдыр.

19. Аллаһын әдаләти бәрпа едәҹәјинә әмин олдуғумузу неҹә сүбут едә биләрик?

¹⁹ Јадыныздадырса, Иса: «Инсан Оғлу ҝәлдији заман јер үзүндә иман тапаҹагмы?» дејә сорушмушду. Бу мараглы суала неҹә ҹаваб вермәк олар? Неҹә дә хошдур ки, бу ҝүн бүтүн дүнјада Јеһованын милјонларла садиг хидмәтчиси өз дуалары, сәбир вә мәтанәтилә белә имана саһиб олдугларыны сүбут едирләр! Беләликлә, Исанын суалына мүсбәт ҹаваб вермәк олар. Бәли, һазырда Шејтанын дүнјасындакы һагсызлыглардан әзаб чәксәк дә, там әминик ки, Аллаһ сечдикләри үчүн әдаләти бәрпа едәҹәк.

[Һашијә]

Хатырлајырсынызмы?

• Бә’зи мәсиһчиләр нә үчүн иманларыны итирмишләр?

• Јеһованын һөкм ҝүнүнүн ҝәләҹәјинә нә үчүн там әмин ола биләрик?

• Дуада мәтанәтли олмағымыза һансы сәбәбләримиз вар?

• Тә’кидлә дуа едәрәк иманымызы неҹә горуја биләрик?

[19-ҹу сәһифәдәки шәкилләр]

Бу ҝүн милјонларла инсан Аллаһын әдаләти бәрпа едәҹәјинә мөһкәм инаныр.