Ҝәлин Јеһованын исмини бирҝә уҹалдаг

«Ҝәлин мәнимлә бирҝә Рәбби мүгәддәс тутаг, Рәббин исмини бирҝә уҹалдаг» (МӘЗМУР 34:3).

1. Иса Мәсиһ јер үзүндә хидмәт едәркән бизим үчүн һансы ҝөзәл нүмунәни гојмушдур?

БИЗИМ еранын 33-ҹү илинин 14 нисан ҝеҹәси Иса Мәсиһ һәвариләри илә бирликдә Јерусәлимдә бир евин јухары мәртәбәсиндәки отагда Јеһованы һәмд нәғмәләри илә тәрәннүм едирди (Матта 26:30). О сонунҹу дәфә иди ки, һәвариләри илә бирҝә һәмд нәғмәләри охујурду. Ҝөрүшү мәһз белә битирмәси һеч дә тәәҹҹүблү дејилди: јер үзүндә хидмәтинин әввәлиндән ахырына кими Иса Мәсиһ Атасыны иззәтләндирир вә Онун адыны шөвглә һамыја ачырды (Матта 4:10; 6:9; 22:37, 38; Јәһја 12:28; 17:6). Әслинә баханда, о, мәзмурчунун сәмими дә’вәтини тәкрарлајырды: «Ҝәлин мәнимлә бирҝә Рәбби мүгәддәс тутаг, Рәббин исмини бирҝә уҹалдаг» (Мәзмур 34:3). Мәсиһ бизим үчүн чох ҝөзәл нүмунә гојмушдур!

2, 3. а) Һарадан билирик ки, 34-ҹү мәзмур пејғәмбәрлик мәзмурудур? б) Бу вә нөвбәти мәгаләдә нә мүзакирә едиләҹәк?

² Мәсиһлә һәмд нәғмәләри охудугдан бир нечә саат сонра һәвари Јәһја тамам башга бир һадисәнин шаһиди олду. Онун Мүәллими ики ҹинајәткарла бирликдә ишҝәнҹә дирәјиндә е’дам олунурду. Дүз ҝөзүнүн габағында, тез өлсүнләр дејә ромалы әсҝәрләр ҹинајәткарларын ајагларыны сындырдылар. Исанын ајагларыны исә сындырмадылар, чүнки о артыг өлмүшдү. Јәһја гәләмә алдығы мүждәдә изаһ едирди ки, бу һадисә илә 34-ҹү мәзмурда јазылмыш диҝәр пејғәмбәрлик — ‘сүмүјүндән һеч бири зәдәләнмәз’ пејғәмбәрлији јеринә јетди (Јәһја 19:32-36; Мәзмур 34:20).

³ Анҹаг мәсиһчиләр үчүн 34-ҹү мәзмурун әһәмијјәти јалныз бундан ибарәт дејил. Бу вә нөвбәти мәгаләдә Давудун, һаггында данышдығымыз мәзмуру һансы шәраитдә јаздығыны вә мәзмурдакы руһландырыҹы фикирләри нәзәрдән кечирәҹәјик.

Давуд Шаулдан гачыр

4. а) Давуд нәјә ҝөрә Исраилин нөвбәти падшаһы кими мәсһ едилди? б) Неҹә олду ки, «Давуд Шаулун чох хошуна ҝәлди»?

⁴ Давуд ушаг оланда Исраилдә Шаул падшаһлыг едирди. Анҹаг Шаул Јеһованын сөзүндән чыхыр вә Онун лүтфүнү итирир. Бу сәбәбдән Шамуел пејғәмбәр она дејир: «Бу ҝүн Рәбб дә сәндән Исраил падшаһлығыны бу ҹүр гопарыб сәндән дә јахшы олан јахынына верди» (1 Шамуел 15:28). Сонра Јеһова Шамуелә тапшырыр ки, Јессејин ән кичик оғлу Давуду Исраилин нөвбәти падшаһы кими мәсһ етсин. Бу арада, Аллаһын руһундан мәһрум едилмиш Шаул падшаһ тез-тез дилхор олурду. Исте’дадлы мусигичи олан Давуду падшаһа гуллуг етмәк үчүн Ҝивеа шәһәринә ҝәтирирләр. Давудун чалдығы мусиги Шаулу сакитләшдирдијиндән «Давуд Шаулун чох хошуна ҝәлди» (1 Шамуел 16:11, 13, 21, 23).

5. Шаулун Давуда мүнасибәти нәјә ҝөрә дәјишди вә Давуд нә етмәјә мәҹбур олду?

⁵ Вахт кечдикҹә ајдын олур ки, Јеһова Аллаһ Давудладыр. Мәсәлән, О, Давуда филиштли ҹәнҝавәр Голјата галиб ҝәлмәјә көмәк етмишди. Дөјүшләрдә ҝөстәрдији шүҹаәтинә ҝөрә Исраилдә танынмасы сүбут едирди ки, Давуда дајаг олан Јеһовадыр. Шаул Аллаһын Давуда хејир-дуа вердијини ҝөрәндә она пахыллығы тутур вә һәтта она нифрәт етмәјә башлајыр. Давуд Шаулун гаршысында лира чаланда падшаһ дүз ики дәфә низәсини она атыр. Һәр ики дәфә Давуд низәдән јајыныр. Шаул Давуду үчүнҹү дәфә өлдүрмәјә ҹәһд едәндә Исраилин ҝәләҹәк падшаһы баша дүшүр ки, гачыб ҹаныны гуртармалыдыр. Ахырда ҝөрәндә ки, Шаул ону өлдүрмәк фикриндән әл чәкмир Давуд Исраилдән кәнарда сығынаҹаг ахтармаг гәрарына ҝәлир (1 Шамуел 18:11; 19:9, 10).

6. Шаул нәјә ҝөрә Нов шәһәринин сакинләрини гырдырмышды?

⁶ Исраилдән гачан Давуд Јеһова Аллаһын Һүзур чадырынын јерләшдији Нов шәһәринә ҝәлир. Ҝөрүнүр, бу заман Давуду бир дәстә ҹаван мүшајиәт едирди. Давуд һәм өзү, һәм дә онлар үчүн гида әлдә етмәк истәјир. Шаул баш каһинин Давудла адамларына јемәк вә Голјатын гылынҹыны вердијиндән хәбәр тутанда, гәзәбиндән шәһәрин бүтүн сакинләрини, о ҹүмләдән 85 каһини гылынҹдан кечирир (1 Шамуел 21:1, 2; 22:12, 13, 18, 19; Матта 12:3, 4).

Өлүмүн пәнҹәсиндән нөвбәти гачыш

7. Нәјә ҝөрә Гат шәһәри ҝизләнмәк үчүн мүнасиб јер дејилди?

⁷ Давуд Нов шәһәриндән 40 километр гәрбдә јерләшән вә филиштли Голјатын доғма шәһәри олан Гата, Акиш падшаһын јанына ҝәлир. Јәгин Давуд дүшүнүрдү ки, Шаул чәтин ону бу шәһәрдә ахтарсын. Анҹаг бир аз кечәндән сонра Гат падшаһынын адамлары Давуду таныјырлар. Давуд бундан хәбәр тутанда ‘Гат падшаһы Акишдән чох горхур’ (1 Шамуел 21:10-12).

8. а) Гат шәһәриндә Давудун башына ҝәләнләр һаггында 56-ҹы мәзмурда нә дејилир? б) Давуд ҹаныны өлүмүн пәнҹәсиндән неҹә гуртарды?

⁸ Филиштлиләр Давуду јахалајырлар. Ҝөрүнүр, елә бу вахт Давуд 56-ҹы мәзмуру јазмышды. Бу мәзмурда о, Јеһоваја үрәкдән јалварырды: «Ҝөз јашларымы тулуғуна јығ» (Мәзмур 56:8 вә ҝириш сөзләри). Бу сөзләрлә Давуд Јеһоваја ҝүвәндијини билдирирди. О әмин иди ки, Јеһова онун чәкдији изтираблары унутмајаҹаг, әксинә севә-севә гејдинә галыб, ону мүдафиә едәҹәк. Давуд һәмчинин Филишт падшаһыны алдатмаг үчүн фәнд гурур: өзүнү дәлилијә вурур. Буну ҝөрән Акиш падшаһ јанына ‘дәли’ ҝәтирдикләри үчүн хидмәтчиләринә тәпинир. Сөзсүз, Давудун гурдуғу фәндә Јеһова хејир-дуа вермишди. Давуд шәһәрдән говулуб, ҝүҹ-бәла илә ҹаныны өлүмүн пәнҹәсиндән гуртарыр (1 Шамуел 21:13-15).

9, 10. Давудун 34-ҹү мәзмуру јазмасына һансы һадисә сәбәб олду вә бу мәзмуру јазаркән Давуд, ҝөрүнүр кимләри нәзәрдә тутурду?

⁹ Силаһдашларынын Давудла бирликдә Гат шәһәринә гачдығы јахуд да ону мүдафиә етмәк үчүн јахынлыгдакы Исраил кәндләриндә пусгу гурдуглары һагда Мүгәддәс Китабда һеч бир шеј дејилмир. Һәр неҹә олса да, Давуд Јеһованын ону өлүмдән гуртардығыны данышанда силаһдашлары чох севинирләр. Ҝириш сөзләриндән ҝөрүндүјү кими, Давудун 34-ҹү мәзмуру јазмасына мәһз бу һадисә сәбәб олмушду. Мәзмурун илк једди ајәсиндә Давуд ону гуртардығы үчүн Аллаһа һәмд едир вә силаһдашларыны да даима халгынын дадына чатан Јеһованы уҹалтмаға сәсләјир (Мәзмур 34:3, 4, 7).

¹⁰ Давуд адамлары илә бирҝә Гат шәһәриндән тәхминән 15 километр шәргдә, Исраилин дағлыг бөлҝәсиндә јерләшән Адуллам мағарасында ҝизләнир. Шаул падшаһын һакимијјәтиндән наразы оланлар ҝәлиб она гошулурлар (1 Шамуел 22:1, 2). Ола биләр, Мәзмур 34:8-22 ајәләрини јазаркән Давуд бу инсанлары нәзәрдә тутурду. Бу ајәләрдәки фикирләр бу ҝүн бизим үчүн дә әһәмијјәт кәсб едир вә бу ҝөзәл мәзмурун әтрафлы арашдырылмасынын бизә фајдасы дәјәҹәк.

Сизин үчүн һәјатда ән ваҹиб олан нәдир?

11, 12. Јеһова Аллаһа даима һәмд етмәјә һансы сәбәбләримиз вар?

¹¹ «Һәр заман Рәббә алгыш едәҹәјәм, Она даим мәним дилим һәмд едәҹәк» (Мәзмур 34:1). Јурдундан дидәрҝин дүшмүш Давудун јәгин ки, мадди бахымдан чох шејә еһтијаҹы вар иди. Анҹаг бу сөзләрдән ҝөрүнүр ки, онун ҝүндәлик гајғылары Јеһова Аллаһа һәмд етмәк гәтијјәтини һеч вахт көлҝәдә гојмурду. Ҝәлин биз дә дара дүшдүјүмүз заман Давуддан нүмунә ҝөтүрәк. Мәктәбдә, ишдә, һәмиманлыларла вә ја хидмәтдә оларкән бизим ән үмдә арзумуз Јеһоваја һәмд етмәк олмалыдыр. Бунун үчүн сајсыз-һесабсыз сәбәбләримиз вар. Мисал үчүн, Јеһова Аллаһын Јарадан кими ҝөрдүјү е’ҹазкар ишләр һаггында бир дүшүнүн. Биз һеч вахт бу ишләри сона гәдәр арашдырыб гуртара билмәјәҹәјик, онларын ҝәтирдији севинҹин исә һеч вахт сону олмајаҹаг. Аллаһын Өз тәшкилатынын јер үзүндәки һиссәси васитәсилә нәләри һәјата кечирдији барәсиндә дә дүшүнүн! Хидмәтчиләри гејри-камил олсалар да, бүтүн бунлара наил олмаг үчүн Јеһова мәһз бу садиг инсанлардан истифадә едир. Һеч бу дүнјада пәрәстиш едилән адамларын ишләри Аллаһын ишләри илә мүгајисә олуна биләрми? Мәҝәр «Еј Худавәнд, аллаһлар арасында Сәнин кимиси јохдур, әмәлләрин кими әмәл јохдур» дејән Давудла сиз дә разылашмырсынызмы? (Мәзмур 86:8).

¹² Үрәјимиз бизи сөвг едир ки, мисилсиз ишләринә ҝөрә Јеһова Аллаһа дурмадан һәмд едәк. Бундан әлавә, Аллаһын Падшаһлығынын артыг Давудун әбәди Вариси — Иса Мәсиһин әлиндә олдуғуну билмәк бизи риггәтә ҝәтирир (Вәһј 11:15). Бу о демәкдир ки, јашадығымыз системин сону јахындыр вә алты милјард инсанын әбәди ҝәләҹәји тәһлүкә алтындадыр. Аллаһын Падшаһлығынын бәшәријјәт үчүн тезликлә нә едәҹәјини инсанлара сөјләмәјә вә онларын да бизимлә бирликдә Јеһоваја һәмд етмәсинә көмәк етмәјә һәлә һеч вахт бу гәдәр бөјүк еһтијаҹ дујулмамышдыр. Инсанларын ‘Мүждәни’ гәбул етмәси үчүн әлимиздән ҝәләни етмәк һәјатда ән ваҹиб ишимиз олмалыдыр, јохса сонра ҝеҹ олаҹаг (Матта 24:14).

13. а) Давуд ким илә фәхр едирди вә бунун нәтиҹәсиндә Јеһоваја неҹә адамлар ҹан атырдылар? б) Бу ҝүн «мәзлумлар» мәсиһчи јығынҹағына неҹә ахышырлар?

¹³ «Рәблә көнлүм фәхр едир, еј мәзлумлар, ешидиб севинин!» (Мәзмур 34:2). Давуд бурада шәхси наилијјәтләри илә фәхр етмирди. Мисал үчүн, о, Гат падшаһыны алдатдығына ҝөрә өзүнү өјмүрдү. О дәрк едирди ки, Гатда оланда ону горујан Јеһова иди вә Онун көмәји олмаса иди, бу шәһәрдән гача билмәзди (Сүлејманын мәсәлләри 21:1). Беләликлә, Давуд өзү илә дејил, Јеһова Аллаһла фәхр едирди. Бунун ­нәтиҹәсиндә мәзлумлар Аллаһа ҹан атырдылар. Иса Мәсиһ дә Јеһова Аллаһын исмини мүгәддәс тутдуғу үчүн һәлим, өјрәнмәјә ҹан атан инсанлар Аллаһа јахынлашмаг истәјирдиләр. Бу ҝүн бүтүн милләтләрдән олан «мәзлумлар» Башы Иса Мәсиһ олан мәсһ олунмушларын бејнәлхалг мәсиһчи јығынҹағына ахышырлар (Колослулара 1:18). Һәлим хидмәтчиләрин Аллаһын адыны иззәтләндирдијини ешидәндә, һабелә, Аллаһын мүгәддәс руһунун көмәји илә хош хәбәри дәрк едәндә онларын үрәји риггәтә ҝәлир (Јәһја 6:44; Һәвариләрин ишләри 16:14).

Јығынҹаг ҝөрүшләри иманымызы мөһкәмләндирир

14. а) Давуд Јеһова Аллаһа тәкликдә һәмд етмәклә гәнаәтләнирдими? б) Иса Мәсиһ ибадәт ҝөрүшләри илә әлагәдар бизә һансы нүмунәни гојуб?

¹⁴ «Ҝәлин мәнимлә бирҝә Рәбби мүгәддәс тутаг, Рәббин исмини бирҝә уҹалдаг» (Мәзмур 34:3). Давуд Јеһова Аллаһа тәкликдә һәмд етмәклә гәнаәтләнмирди. О, јолдашларыны Аллаһын адыны онунла бирҝә уҹалтмаға үрәкдән сәсләјирди. Давуддан бөјүк олан Иса Мәсиһ дә Јеһоваја инсанларын гаршысында — синогогда, бајрамлар заманы мә’бәддә, јолдашлары илә бирликдә оланда — һәмд етмәкдән севинҹ дујурду (Лука 2:49; 4:16-19; 10:21; Јәһја 18:20). Исадан нүмунә ҝөтүрәрәк, хүсусилә дә инди, «о Ҝүнүн јахынлашдығыны ҝөрдүјүмүз нисбәтдә» һәр фүрсәтдән истифадә едиб һәмиманлыларымызла бирликдә Јеһова Аллаһа һәмд етмәк неҹә дә севиндириҹидир! (Ибраниләрә 10:24, 25).

15. а) Давудун шәхси нүмунәси јолдашларына неҹә тә’сир бағышлады? б) Јығынҹаг ҝөрүшләринин бизә һансы фајдасы вар?

¹⁵ «Рәббә үз тутдум, О мәнә ҹаваб верди, О һәр бир дәһшәтдән мәни хилас етди» (Мәзмур 34:4). Јалварышларына ҹаваб алмасы Давуд үчүн бөјүк әһәмијјәт кәсб едирди. Бу сәбәбдән о давам едирди: «Бу мәзлум чағырды вә Рәбб ешитди вә бүтүн сыхынтыларындан ону гуртарды» (Мәзмур 34:6, КМ). Чәтинликләрә таб ҝәтирмәк үчүн Јеһованын бизә неҹә көмәк етдијини һәмиманлыларымыза даныша биләрик. Давудун сөзләри онун јолдашларынын иманыны мөһкәмләндирдији кими, бу ҹүр сөһбәтләр дә һәмиманлыларымызын иманыны мөһкәмләндирир. Давудун јолдашлары ‘Рәббә бахыб нур сачыр, онларын үзләри гызармырды’ (Мәзмур 34:5). Онлар Шаул падшаһдан гачдыгларына ҝөрә хәҹаләт чәкмирдиләр. Чүнки архајын идиләр ки, Рәбб Давуда дајагдыр. Елә буна ҝөрә дә үзләри ‘нур сачырды’. Бизим ҝүнләрдә дә, истәр һәгигәтлә јениҹә мараглананлар, истәрсә дә, Аллаһа узун мүддәт хидмәт едәнләр Јеһоваја бел бағлајырлар. Јеһованын көмәјини шәхсән дујдуглары үчүн онларын нур сачан үзү ҝөстәрир ки, бу јолу сәдагәтлә давам етдирмәк әзминдәдирләр.

Мәләкләрин көмәјинә ҝөрә миннәтдарыг

16. Јеһова Аллаһ мәләкләрин васитәсилә дадымыза неҹә чатыр?

¹⁶ «Рәбдән горханлары Онун мәләји мүдафиә едәр, онлара зәфәр верәр» (Мәзмур 34:7). Давуд елә фикирләшмирди ки, Јеһова јалныз ону хилас едир. Дүздүр, Давуд Јеһова Аллаһын мәсһ ­етдији ҝәләҹәк падшаһ иди. Амма о билирди ки, Јеһова мәләкләри васитәсилә ҹәмијјәтдәки мөвгејиндән асылы олмајараг, бүтүн сәдагәтли хидмәтчиләрины горујур. Бизим ҝүнләрдә дә һәгиги мәсиһчиләр бунун доғрулуғуну өз тәҹрүбәләри илә тәсдиг едә биләрләр. Насист Алманијасында, о ҹүмләдән Ангола, Малави, Мозамбик вә бир чох башга өлкәләрдә һаким даирәләри Јеһованын Шаһидләринин көкүнү кәсмәк үчүн әлләриндән ҝәләни етмишләр. Лакин онларын ҝөрдүјү тәдбирләр нәтиҹәсиз галмышдыр. Бу өлкәләрдә Аллаһын ады уҹалдыгҹа Јеһованын Шаһидләринин сајы артыр. Бу нәјин сајәсиндә мүмкүн олур? Јеһова мүгәддәс мәләкләринин васитәсилә халгыны горујур вә она рәһбәрлик верир (Ибраниләрә 1:14).

17. Мәләкләр бизә неҹә көмәк едирләр?

¹⁷ Бундан әлавә, мәләкләр һадисәләри елә истигамәтләндирә биләрләр ки, башгаларыны бүдрәдән шәхсләр Јеһованын халгындан кәнар едилсин (Матта 13:41; 18:6, 10). Һәтта һәмин вахт хәбәримиз олмаса белә, мәләкләр хидмәтимизә әнҝәл төрәдә биләҹәк манеәләри арадан галдырыр, Јеһова илә мүнасибәтләримизи тәһлүкә алтына гојан шејләрдән бизи мүдафиә едирләр. Ән әсасы исә, мәләкләр ‘әбәди Мүждәни’ һәр јердә, о ҹүмләдән тәблиғ ишинин чәтин шәраитдә апарылдығы јерләрдә бәјан едилмәси үчүн бизә рәһбәрлик верирләр (Вәһј 14:6). Јеһованын Шаһидләринин Мүгәддәс Китаба әсасланан нәшрләриндә мәләкләрин ҝөстәрдикләри көмәкдән тез-тез бәһс едилирa. Белә һадисәләр о гәдәр чохсајлыдыр ки, онлары ади тәсадүф һесаб етмәк олмаз.

18. а) Мәләкләрин бизә һәмишә көмәк етмәси үчүн нә етмәлијик? б) Нөвбәти мәгаләдә нә мүзакирә едиләҹәк?

¹⁸ Мәләкләрин бизә һәмишә көмәк етмәси үчүн, тә’гибләрлә гаршылашанда белә Јеһова Аллаһын адыны уҹалтмалыјыг. Унутмајын, Аллаһын мәләји јалныз ‘[Јеһовадан] горханлары мүдафиә едир’. Бәс Аллаһ горхусу нә демәкдир вә биз белә горхуја неҹә саһиб ола биләрик? Нәјә ҝөрә мәһәббәт долу Аллаһ Ондан горхмамызы истәјир? Бу суаллар нөвбәти мәгаләдә арашдырылаҹаг.

[Һашијә]

Неҹә ҹаваб верәрдиниз?

• Ҝәнҹ икән Давуд һансы сынагларла үзләшмишди?

• Давуд кими, бизим үчүн дә һәјатда ән ваҹиб олан нәдир?

• Биз јығынҹаг ҝөрүшләринә неҹә јанашырыг?

• Јеһова мәләкләри васитәсилә бизә неҹә көмәк едир?

[25-ҹи сәһифәдәки хәритә]

(Хәритәјә нәшрин өзүндә бахын)

Рама

Гат

Зиглаг

Ҝивеа

Нов

Јерусәлим

Бет-Лехем

Адуллам

Геила

Хеврон

Зиф

Хореш

Кармел

Маон

Ен-Ҝеди

Дуз дәнизи

[Иҹазә илә]

Хәритә: Based on maps copyrighted by Pictorial Archive (Near Eastern History) Est. and Survey of Israel

[25-ҹи сәһифәдәки шәкил]

Давуд гачаг дүшсә дә, Јеһова Аллаһын адыны һәмишә уҹалдырды.