«Мәнә сәнин ирадәнә әмәл етмәји өјрәт»
«Мәнә Сәнин ирадәнә әмәл етмәји өјрәт, чүнки мәним Аллаһым Сәнсән» (МӘЗ. 143:10).
ЈАДДА САХЛАМАЛЫ ОЛДУҒУМУЗ ӘСАС ФИКИРЛӘР
Давудун јаранан вәзијјәтләрә Јеһованын нөгтеји-нәзәри илә бахдығы нәдән ҝөрүнүр?
Давуда Аллаһын ирадәсини ајырд етмәјә нә көмәк едирди?
Јеһованын лүтфүндә галмаға бизә нә көмәк едә биләр?
1, 2. Аллаһын ирадәсини нәзәрә алмаг бизә һансы фајданы ҝәтирә биләр вә Давуд падшаһдан буна даир нә өјрәнә биләрик?
НӘ ВАХТСА сәјаһәт едәркән ади хәритәдән вә ја компүтерләшдирилмиш хәритә програмындан истифадә етмисәнми? Бу хәритәләрин көмәјилә јерин јухарыдан неҹә ҝөрүндүјүнә бахмаг вә бир јердән башга јерә ҝетмәк үчүн ән әлверишли јолу сечмәк мүмкүндүр. Ејнилә, ваҹиб гәрарлар верәркән мәсәләјә әтрафлы нәзәр салмаг вә ја Аллаһын бу мәсәләјә даир фикрини өјрәнмәк бизим үчүн фајдалы олаҹаг. Бу, бизә Јеһованын ирадәсинин нәдән ибарәт олдуғуну билмәјә вә Она мәгбул олан јолла ҝетмәјә көмәк едәҹәк (Јешаја 30:21).
2 Исраилин гәдим падшаһы Давуд, демәк олар ки, өмрү боју Аллаһын ирадәсинә ујғун јашајыб вә бунунла бизә ҝөзәл нүмунә гојуб. Ҝәлин онун һәјатында баш вермиш бәзи һадисәләри нәзәрдән кечирәк вә үрәји бүтүнлүклә Јеһова Аллаһла олан Давудун давранышларындан өзүмүзә дәрс ҝөтүрәк (1 Пад. 11:4).
ДАВУД ЈЕҺОВАНЫН АДЫНА ДӘРИН ҺӨРМӘТ БӘСЛӘЈИРДИ
3, 4. а) Давуду Голјата гаршы дөјүшмәјә нә вадар етмишди? б) Давуд Аллаһын адына неҹә мүнасибәт бәсләјирди?
3 Ҝәлин Давудун филиштли ҹәнҝавәр Голјатла үз-үзә ҝәлдији һадисәни нәзәрдән кечирәк. Јахшы јарагланмыш вә тәгрибән 3 метр боју олан бу нәһәнҝ ҹәнҝавәрә мејдан охумаға ҝәнҹ Давуду нә вадар етмишди? (1 Шам. 17:4, һашијә). Буну шүҹаәт адландырмаг олар, јохса Аллаһа иман? Хүсусијјәтләрин һәр икиси дә онун бу ҹүр ҹәсарәтли олмасында ваҹиб рол ојнајырды. Лакин Давудун нәһәнҝ пәһләвана гаршы чыхмасына әсас сәбәб Јеһоваја вә Онун бөјүк адына еһтирам бәсләмәси иди. Голјатын Аллаһын халгына гаршы һөрмәтсизлик етдијини ҝөрән Давуд гәзәбләнәрәк сорушду: «Ахы бу сүннәтсиз Филиштли кимдир ки вар олан Аллаһын алајларына мејдан охујур?» (1 Шам. 17:26).
4 Ҝәнҹ Давуд Голјата деди: «Сән мәним үстүмә гылынҹ, низә вә мизрагла ҝәлирсән, лакин мән сәнин үстүнә сөјдүјүн Исраил алајларынын Аллаһы Ордулар Рәббинин исми илә ҝәлирәм» (1 Шам. 17:45). Һәгиги Аллаһа архаланараг Давуд сапанддан атдығы бир дашла филиштли ҹәнҝавәри јерә сәрди. О, јалныз бу һадисәдә јох, өмрүнүн сонунадәк Јеһоваја етибар етдијини вә Онун адына дәрин һөрмәт бәсләдијини ҝөстәриб. Давуд сојдашлары олан исраиллиләри дә Јеһованын «мүгәддәс ады илә фәхр [етмәјә]» чағырырды. (1 Салнамәләр 16:8—10 ајәләрини оху.)
5. Бу ҝүн бир чох инсанлар, Голјат кими, Јеһоваја неҹә һөрмәтсизлик едирләр?
5 Бәс сән Јеһова кими Аллаһын олдуғу үчүн фәхр едирсәнми? (Јер. 9:24). Гонум-гоншу, иш вә ја синиф јолдашларын Јеһова барәсиндә пис данышанда вә Онун Шаһидләрини лаға гојанда сән неҹә реаксија ҝөстәрирсән? Јеһованын ады тәһгирләрә мәруз галдыгда сәнә дајаг олаҹағына инанараг Ону мүдафиә едирсәнми? Дүздүр, «сусмағын өз вахты» вар, амма биз Јеһованын Шаһиди вә Исанын давамчысы олдуғумуз үчүн утанмамалыјыг (Ваиз 3:1, 7; Марк 8:38). Дүздүр, биз Јеһоваја вә Онун хош хәбәринә пис мүнасибәт бәсләјән инсанларла данышаркән нәзакәтли вә һөрмәтҹил олмалыјыг, бунунла белә, ҝәлин Голјатын ришхәндли сөзләрини ешидиб ваһимәјә дүшән исраиллиләрә бәнзәмәјәк (1 Шам. 17:11). Әксинә, Јеһова Аллаһын адыны мүгәддәс тутмагда гәтијјәтли олаг. Бизим истәјимиз Јеһованын әслиндә неҹә Аллаһ олдуғуну өјрәнмәкдә инсанлара көмәк етмәкдир. Буна ҝөрә дә, чалышырыг ки, Мүгәддәс Китабын васитәсилә Аллаһа јахынлашмағын нә дәрәҹәдә ваҹиб олдуғуну баша дүшмәјә онлара көмәк едәк (Јаг. 4:8).
6. Давуд Голјатла дөјүшә чыхмагла нәјә наил олмаг истәјирди, бәс бизим әсас мәгсәдимиз нә олмалыдыр?
6 Давудла Голјатын һадисәсиндән өзүмүзә башга ваҹиб ибрәт дәрси дә ҝөтүрә биләрик. Давуд дөјүш мејданына ҝәләндә сорушду: «Бу Филиштлини өлдүрүб Исраили бу хәҹаләтдән гуртаран адама нә едиләҹәк?» Халг ҹавабында бир аз әввәл дедији сөзү тәкрар етди: «Ким ону өлдүрсә, падшаһ ону вар-дөвләтә чатдыраҹаг, гызыны она верәҹәк вә атасынын аиләсини Исраилдәки верҝидән азад едәҹәк» (1 Шам. 17:25—27). Анҹаг Давуду марагландыран әсас шеј мүкафат дејилди. Онун даһа ваҹиб мәгсәди вар иди. Давуд һәгиги Аллаһын адыны иззәтләндирмәк истәјирди. (1 Шамуел 17:46, 47 ајәләрини оху.) Бәс бизим һаггымызда нә демәк олар? Әсас мәгсәдимиз вар-дөвләт топламаг вә өзүмүзә ад-сан газанмагдыр? Әлбәттә, биз дә: «Ҝәлин мәнимлә бирҝә Рәбби мүгәддәс тутаг, Рәббин исмини бирҝә уҹалдаг», — дејә охујан Давуд кими олмаг истәјирик (Мәз. 34:3). Буна ҝөрә дә, Аллаһа ҝүвәнәрәк Онун адыны өз адымыздан үстүн тутмалыјыг (Мат. 6:9).
7. Хош хәбәрә һај вермәјән инсанларла гаршылашанда бизә лазым олан мөһкәм иманы неҹә инкишаф етдирә биләрик?
7 Голјатла дөјүшдә ҹәсарәтли олмаг үчүн Давуддан Јеһоваја там етибар етмәк тәләб олунурду. Ҝәнҹ Давудун ҝүҹлү иманы варды. О, чобан оланда Аллаһа архаланмагла бу имана саһиб олмушду (1 Шам. 17:34—37). Хидмәтимизи давам етдирмәк үчүн биз дә мөһкәм имана малик олмалыјыг; белә имана, хүсусилә дә бизә пис мүнасибәт бәсләјән инсанларла гаршылашанда еһтијаҹ дујуруг. Бу ҹүр иманы ҝүндәлик һәјатымызда Аллаһа етибар етмәклә инкишаф етдирә биләрик. Мисал үчүн, нәглијјатда ҝедәркән јанымызда отуран адамла Мүгәддәс Китаб һәгигәтләри барәдә сөһбәтә башлаја биләрик. Һәмчинин, нәјә ҝөрә евдән-евә хидмәт едәркән јолда растлашдығымыз инсанлара да шаһидлик вермәјәк? (Һәв. иш. 20:20, 21).
ДАВУД ҮЧҮН ЈЕҺОВАНЫН ИРАДӘСИ ҺӘР ШЕЈДӘН ВАҸИБ ИДИ
8, 9. Шаула олан мүнасибәтиндә Давуд Аллаһын ирадәсинин онун үчүн даһа ваҹиб олдуғуну неҹә ҝөстәрди?
8 Давудун Јеһоваја ҝүвәнмәјә һазыр олдуғуну онун Исраилин биринҹи падшаһы Шаула олан мүнасибәтиндән дә ҝөрмәк олар. Шаул гысганҹлыгдан ирәли ҝәләрәк Давуду дүз үч дәфә низә илә дивара јапышдырмаға чалышмышды, Давуд исә һәр дәфә онун һәмләләриндән јајынырды, ондан әвәз чыхмырды. Сонра да о гачыб Шаулдан ҝизләнди (1 Шам. 18:7—11; 19:10). Шаул исә бүтүн Исраилдән 3000 сечмә адам ҝөтүрүб сәһрада Давуду ахтармаға ҝетди (1 Шам. 24:2). Бир дәфә Шаул өзү дә билмәдән Давудун вә адамларынын олдуғу мағараја ҝирди. Давуд бу фүрсәтдән истифадә едәрәк ону өлдүрмәк истәјән падшаһы мәһв едә биләрди. Ахы Јеһова Өзү Давуду Шаулун јеринә падшаһ тәјин етмишди (1 Шам. 16:1, 13). Давуд адамларынын мәсләһәтинә гулаг ассајды, Шаул өлдүрүлмәли иди. Анҹаг о деди: «Рәббин мәсһ етдији ағама әл галдырыб белә бир иш ҝөрмәји Рәбб мәндән узаг етсин, чүнки о, Рәббин мәсһ олунмушудур». (1 Шамуел 24:4—7 ајәләрини оху.) Шаул һәлә дә Аллаһын мәсһ олунмуш падшаһы иди. Јеһова падшаһлығы Шаулун әлиндән алмајынҹа Давуд ону һакимијјәтдән мәһрум етмәк истәмирди. Садәҹә онун ҹүббәсинин әтәјиндән кәсмәклә Давуд ҝөстәрди ки, она зәрәр вурмаг фикри јохдур (1 Шам. 24:11).
9 Давуд Шаулу ахырынҹы дәфә ҝөрдүјү заман бир даһа она һөрмәт етдијини ҝөстәрди, чүнки о һәлә дә Аллаһын мәсһ олунмушу иди. Давудла Авишај Шаулун ордуҝаһ гурдуғу јерә ҝәлиб ону јатан ҝөрдүләр. Авишај дүшүндү ки, Аллаһ дүшмәнини Давудун әлинә вериб, буна ҝөрә дә Шаулу низә илә јерә јапышдырмағы тәклиф етди, амма Давуд буна јол вермәди (1 Шам. 26:8—11). Давуд үчүн Јеһова Аллаһын нөгтеји-нәзәри даһа ваҹиб олдуғундан, Авишајын дедикләринә бахмајараг, о, Аллаһын ирадәсини јеринә јетирмәк гәтијјәтиндә тәрәддүд белә етмәди.
10. Һансы чәтинликләрлә үзләшә биләрик вә әгидәмиздә мөһкәм галмагда бизә нә көмәк едәҹәк?
10 Бу кими чәтин вәзијјәтләрлә биз дә үзләшә биләрик, мәсәлән, дост-танышларымыз бизи Јеһованын ирадәсини јеринә јетирмәјә јох, инсан дүшүнҹәләринә ујғун һәрәкәт етмәјә тәшвиг едә биләрләр. Авишај кими, онлардан бәзиләри мүәјјән мәсәләләрдә Аллаһын ирадәсини нәзәрә алмамаг үчүн бизә тәзјиг ҝөстәрә биләрләр. Әгидәмиздә мөһкәм галмаг үчүн бу вә ја диҝәр мәсәләләрә даир Јеһованын нөгтеји-нәзәрини ајдын шәкилдә јадымызда сахламалы вә Онун јолларына бағлы галмаг гәтијјәтимиздән дөнмәмәлијик.
11. Давудун Аллаһын ирадәсини һәр шејдән үстүн тутмасындан нә өјрәндиниз?
11 Давуд Јеһова Аллаһа дуа едәрәк демишди: «Мәнә Сәнин ирадәнә әмәл етмәји өјрәт». (Мәзмур 143:5, 8, 10 ајәләрини оху.) Өз дүшүнҹәләринә архаланмаг вә ја башгаларынын дедикләри илә отуруб-дурмаг әвәзинә, Давуд Аллаһдан тәлим алмаға үстүнлүк верирди. О дејирди: «Сәнин бүтүн ишләрини дәриндән дүшүнүрәм, әмәлләрин барәдә һеј фикирләширәм». Давуд кими, биз дә Аллаһын ирадәсинин нәдән ибарәт олдуғуну өјрәнмәк үчүн Мүгәддәс Јазылары дәриндән арашдырмалы вә Јеһованын кечмишдә инсанларла неҹә рәфтар етдији барәдә дүшүнмәлијик.
ДАВУД ГАНУНУН ӘСАСЫНЫ ТӘШКИЛ ЕДӘН ПРИНСИПЛӘРИ БАША ДҮШҮРДҮ
12, 13. Үч нәфәрин ҝәтирдији сују Давуд нәјә ҝөрә јерә төкмәк гәрарына ҝәлди?
12 Давуд Ганунун әсасында дуран принсипләри баша дүшүрдү вә онун бу ганунлара ујғун јашамаг истәји тәглид едилмәјә лајигдир. Ҝәлин Давуд Бетлеһем гујусундан су ичмәк истәдијини билдирәндә баш вермиш һадисәјә нәзәр салаг. Давудун ордусундан олан үч нәфәр һәјатларыны тәһлүкәјә атараг филиштлиләрин ишғалы алтында олан шәһәри јарыб су ҝәтирдиләр. Лакин «Давуд сују ичмәк истәмәди вә Рәббә тәгдим олараг јерә төкдү». Нәјә ҝөрә? О изаһ едир: «Аллаһым буну етмәкдән мәни узаг еләсин. Бу адамларын ганыны ичәҹәјәмми? Ахы ҹанларыны тәһлүкәјә салараг бу сују ҝәтирдиләр» (1 Салн. 11:15—19).
13 Давуд Мусанын ганунундан билирди ки, ган Јеһоваја тәгдим олараг јерә төкүлмәли вә јејилмәмәлидир. О, һәмчинин бу ганунун нә үчүн верилдијини дә баша дүшүрдү. Давуд билирди ки, «һәр мәхлуга һәјат верән гандыр». Бәс ахы бу ган јох, су иди?! Давуд нәјә ҝөрә ону ичмәкдән имтина етди? О, бу ганунун архасында дуран принсипи вә Аллаһын ганы гијмәтләндирдијини баша дүшүрдү. Һәмин инсанлар су ҝәтирәркән һәјатларыны итирә биләрдиләр, буна ҝөрә дә Давуд бу сују ичмәклә онларын ганына һөрмәтсизлик едәҹәјини дүшүнүрдү. Мәһз бу сәбәбдән о, сују јерә төкмәк гәрарына ҝәлди (Лев. 17:11; Ганун. т. 12:23, 24).
14. Јеһованын дүшүнҹә тәрзинә јијәләнмәјә Давуда нә көмәк етди?
14 Аллаһын ганунлары Давудун һәјатында мүһүм јер тутдуғундан о, Јеһованы тәрәннүм едирди: «Сәнин ирадәни јеринә јетирмәк мәнә зөвг верир, ганунун гәлбимдәдир» (Мәз. 40:8). Давуд Аллаһын ганунларыны арашдырыр вә өјрәндикләринин үзәриндә дәриндән дүшүнүрдү. О, Аллаһын әмрләринә риајәт етмәјин она фајда ҝәтирәҹәјинә инанырды. Буна ҝөрә дә, Давуд Мусанын ганунуну садәҹә нөгтәбәнөгтә јеринә јетирмәклә кифајәтләнмир, һәмчинин ганунун маһијјәтини дәрк едәрәк она ујғун давранмаға чалышырды. Биз дә Мүгәддәс Китабы арашдыраркән охудугларымызын үзәриндә дүшүнмәлијик. Бунунла биз өјрәндијимиз принсипләрин ҝүндәлик һәјатымызын ваҹиб бир һиссәси олдуғуну ҝөстәрәҹәк вә Јеһованы разы салан гәрарлар гәбул едәҹәјик.
15. Сүлејманын Аллаһын ганунларына һөрмәтсизлик етдији нәдән ҝөрүнүрдү?
15 Јеһова Давудун оғлу Сүлејмана бол-бол хејир-дуа вермишди. Анҹаг сонралар о, Аллаһын ганунуна итаәтсизлик ҝөстәрди. Сүлејман Јеһованын Исраил падшаһларына чох арвад алмамаг барәдә вердији әмрә мәһәл гојмады (Ганун. т. 17:17). О, чохлу јаделли арвадлар алды. Бу гадынлар «гоҹалыг чағында онун үрәјини башга аллаһлара тәрәф аздырдылар». Сүлејманын өз итаәтсизлијинә неҹә бәраәт газандырмасындан асылы олмајараг, о, «Рәббин ҝөзүндә пис олан ишләр етди вә атасы Давуддан фәргли олараг Рәббә тамамилә хидмәт етмәди» (1 Пад. 11:1—6). Бизим дә Аллаһын Кәламындакы ганун вә принсипләрә табе олмағымыз неҹә дә ваҹибдир! Мисал үчүн, бу, евләнмәк кими ваҹиб мәсәләләрә дә аиддир.
16. Јеһованын «Ағамызын хидмәтчиси» илә аилә гурмаг тәләбиндән нә өјрәнә биләрик?
16 Әҝәр иманымыза шәрик олмајан бир инсан тәрәфиндән бизә романтик мүнасибәт гурмаг тәклиф олунарса, бу мәсәләјә неҹә јанашаҹағыг? Давуд кими һәр шејдә Јеһованын фикирләрини нәзәрә алаҹағыг, јохса Сүлејман кими итаәтсизлик ҝөстәрәҹәјик? Исанын һәгиги давамчыларына «Ағамызын хидмәтчиси» илә аилә гурмаг тапшырылыб (1 Кор. 7:39). Аилә гурмағы планлашдыран мәсиһчи һәмиманлысы илә евләнмәлидир. Әҝәр бу ајәдәки тәләбин мәғзини баша дүшүрүксә, о заман нәинки иманымыза шәрик олмајан инсанла аилә гурмајаҹағыг, һәтта бизимлә романтик мүнасибәт гурмаг ҹәһдләринә белә һај вермәјәҹәјик.
17. Порнографија тәләсинә дүшмәмәјә бизә нә көмәк едәҹәк?
17 Һәмчинин ҝәлин ҝөрәк Аллаһын рәһбәрлијини сәјлә ахтаран Давудун нүмунәси порнографик шәкилләрә бахмаг һәвәсинин өһдәсиндән ҝәлмәјә неҹә көмәк едир. Нөвбәти ајәләри охујун, онлара аид олан принсипләрин үзәриндә дүшүнүн вә Јеһованын бу мәсәләјә даир нөгтеји-нәзәрини ајырд етмәјә чалышын. (Мәзмур 119:37; Матта 5:28, 29; Колослулара 3:5 ајәләрини оху.) Јеһованын јүксәк әхлаг нормалары үзәриндә дүшүнмәк бизи порнографија тәләсиндән горујаҹаг.
АЛЛАҺЫН НӨГТЕЈИ-НӘЗӘРИНИ ҺӘМИШӘ ЈАДЫНЫЗДА САХЛАЈЫН
18, 19. а) Гејри-камил олмасына бахмајараг, Јеһованын лүтфүндә галмаға Давуда нә көмәк етди? б) Сән нә етмәк әзминдәсән?
18 Давуд бир чох саһәләрдә нүмунәви давранса да, бәзи ҹидди ҝүнаһлара јол вермишди (2 Шам. 11:2—4, 14, 15, 22—27; 1 Салн. 21:1, 7). Анҹаг о, етдији ҝүнаһлара ҝөрә һәмишә төвбә едирди. Давуд «үрәк бүтөвлүјү» илә Аллаһла јеријирди (1 Пад. 9:4). Нәјә әсасән белә демәк олар? О, јаранан вәзијјәтләрә Јеһованын нөгтеји-нәзәри илә бахыр вә Ону разы салмаға чалышырды.
19 Гејри-камил олсаг да, Јеһованын лүтфүндә гала биләрик. Биз Аллаһын Кәламыны сәјлә вә дәриндән арашдырмалы, өјрәндикләримизи тез бир заманда һәјатымызда тәтбиг етмәлијик. Беләҹә, биз дә Јеһоваја тәвазөкарлыгла: «Мәнә Сәнин ирадәнә әмәл етмәји өјрәт», — дејән мәзмурчу кими дуа едә биләрик.
[5–ҹи сәһифәдәки шәкил]
Шаулу өлдүрмәк имканы јаранса да, Давуду буну етмәкдән нә чәкиндирди?
[6–ҹы сәһифәдәки шәкил]
Адамларынын ҝәтирдији сују Давудун јерә төкмәсиндән нә өјрәнә биләрик?