Јеһова итәткарлығынызы гијмәтләндирир
«Оғлум, һикмәтли ол, гој гәлбим севинсин» (СҮЛЕЈМАНЫН МӘСӘЛЛӘРИ 27:11).
1. Ҹәмијјәт һансы руһа јолухуб?
ИТАӘТСИЗЛИК вә өзбашыналыг бүтүн дүнјаны бүрүјүб. Һәвари Павел бунун сәбәбини Ефесдәки мәсиһчиләрә јаздығы мәктубунда изаһ едир: «Бир заманлар... бу дүнјанын ҝедишинә, һавадакы һакимијјәтин, јә’ни инди итаәтсиз инсанларда фәал олан руһун һөкмранына ујдунуз» (Ефеслиләрә 2:1, 2). Бәли, ‘һавадакы һакимијјәтин һөкмраны’ Шејтан Иблис, демәк олар ки, бүтүн дүнјаны итаәтсизлик руһуна јолухдуруб. Елә биринҹи әсрдә дә о бунунла мәшғул иди, Биринҹи Дүнја мүһарибәси заманы ҝөјдән јерә атыландан бәри исә бу ишдә даһа да фәалдыр (Вәһј 12:9).
2, 3. Нәјә ҝөрә Јеһоваја итаәт етмәлијик?
2 Биз мәсиһчиләрә исә ајдындыр ки, Јеһова Аллаһ үрәкдән ҝәлән итаәткарлығымыза лајигдир, чүнки О бизим Јараданымыз, һәјатымызын мәнбәји, гајғыкеш Һөкмдар вә Хиласкарымыздыр (Мәзмур 148:5, 6; Һәвариләрин ишләри 4:24; Колослулара 1:13; Вәһј 4:11). Мусанын ҝүнләриндә јашајан исраиллиләр онлара һәјат верәнин вә гуртаранын Јеһова олдуғуну билирдиләр. Елә буна ҝөрә дә Муса онлара демишди: «Аллаһыныз Рәббин сизә әмр етдикләринә диггәтлә әмәл един» (Ганунун тәкрары 5:32). Бәли, Јеһова онларын итаәткарлығына лајиг иди. Анҹаг Исраил халгы тезликлә Һөкмдарынын итаәтиндән чыхды.
3 Каинатын Јараданына итаәт етмәк нә дәрәҹәдә ваҹибдир? Бир дәфә Аллаһ Шамуелә тапшырды ки, «итаәт етмәк гурбандан... даһа јахшыдыр» сөзләрини Шаул падшаһа чатдырсын (1 Шамуел 15:22, 23). Нәјә ҝөрә итаәт етмәк даһа јахшыдыр?
Һансы мә’нада ‘итаәт етмәк гурбандан даһа јахшыдыр’?
4. Јеһоваја верә биләҹәјимиз шеј нәдир?
4 Бир Јарадан кими Јеһова биздә олан һәр шејин саһибидир. Белә олан һалда Она нә исә верә биләрикми? Әлбәттә, өзү дә чох гијмәтли бир шеј. Ашағыдакы нәсиһәтдән бунун нә олдуғуну ҝөрүрүк: «Оғлум, һикмәтли ол, гој гәлбим севинсин, онда мәни утандырана ҹаваб верә биләрәм» (Сүлејманын мәсәлләри 27:11). Јеһоваја верә биләҹәјимиз шеј итаәткарлыгдыр. Мүхтәлиф инсанлар олсаг да, вәзијјәтимиз бир-бириндән фәргләнсә дә, инсанларын сынаглар гаршысында Јеһоваја садиг галмајаҹағыны сөјләјән Шејтан Иблисин мәкрли иддиаларына һәр биримиз ҹаваб верә биләрик. Үзәримизә неҹә дә шәрәфли иш дүшүб!
5. Итаәтсизлик Јарадана неҹә тә’сир едир? Нүмунә чәкин.
5 Вердијимиз гәрарлар Јеһова Аллаһ үчүн әһәмијјәтсиз дејил. Итаәтсизлик ҝөстәрмәјимиз Она тә’сир едир. Кимсә сәһв јол тутанда О кәдәрләнир (Мәзмур 78:40, 41). Тәсәввүр един ки, шәкәр хәстәлији олан бир нәфәр һәкимин тә’јин етдији пәһризә мәһәл гојмајараг, сағламлығына зијан олан јемәкләри јејир. Гајғыкеш һәкимин кечирдији һиссләри тәсәввүр етмәк һеч дә чәтин дејил. Әмин ола биләрик ки, инсанлар Јеһованын итаәтиндән чыханда О кәдәрләнир, чүнки ҝөстәрдији јолла ҝетмәмәјин нәјә ҝәтириб чыхараҹағыны билир.
6. Аллаһа итаәткар олмаға нә көмәк едәр?
6 Шәхсән биз неҹә итаәткар ола биләрик? Јахшы олар ки, һәр биримиз Сүлејман падшаһ кими дуаларымызда Аллаһдан «итаәткар үрәк» (ЈД) истәјәк. О, белә үрәји «јахшы илә писи ајырд едиб» исраиллиләрә һөкм етмәк үчүн диләјирди (1 Падшаһлар 3:9). Итаәтсизлијин һөкм сүрдүјү дүнјада јахшы илә писи ајырд етмәк үчүн бизә дә «итаәткар үрәк» лазымдыр. Үрәјимизин итаәткар олмасы үчүн исә Јеһова Аллаһ мәһәббәтлә бизи Өз Кәламы, әдәбијјатлар, мәсиһчи ҝөрүшләри вә јығынҹағын ағсаггаллары илә тә’мин едиб. Бәс биз бунлардан там фајдаланырыгмы?
7. Јеһова нә үчүн итаәткарлығы гурбанлардан үстүн тутур?
7 Унутмајын ки, Јеһова гәдимдә Өз халгына итаәткарлығын һејван гурбанларындан даһа ваҹиб олдуғуну демишди (Сүлејманын мәсәлләри 21:3, 27; Һушә 6:6; Матта 12:7). Әҝәр гурбанлар ҝәтирмәји Јеһованын Өзү әмр етмишдисә, онда нә үчүн О, белә деди? Гурбан ҝәтирәнин нијјәти нәдир: Аллаһы разы салмаг, јохса садәҹә дини ајини јеринә јетирмәк? Әҝәр иманлы инсан һәгигәтән дә Аллаһы разы салмаг истәјирсә, Онун бүтүн әмрләринә табе олаҹаг. Аллаһын һејван гурбанларына еһтијаҹы јохдур, Она верә биләҹәјимиз јеҝанә гијмәтли шеј итаәткарлығымыздыр.
Хәбәрдаредиҹи нүмунә
8. Нәјә ҝөрә Аллаһ Шаулу падшаһ кими рәдд етди?
8 Шаул падшаһын әһвалаты итаәткарлығын нә дәрәҹәдә ваҹиб олдуғуну ҝөстәрир. Шаул һакимијјәтә ҝәләндә «өз ҝөзүндә кичик», јә’ни тәвазөкар вә садә инсан иди. Ҝетдикҹә исә онун гәрарларында мәғрурлуг вә јанлыш мүлаһизә өзүнү ҝөстәрмәјә башлады (1 Шамуел 10:21, 22; 15:17). Бир дәфә Шаул филиштлиләрлә дөјүшмәли иди. Шамуел пејғәмбәр падшаһа ону ҝөзләмәји тапшырды. О ҝәлиб Јеһоваја гурбан кәсәҹәк вә Шаула нә едәҹәјини билдирәҹәкди. Анҹаг Шамуел дедији вахтда ҝәлиб чыхмады вә халг дағылмаға башлады. Буну ҝөрән Шаул јандырма гурбаныны өзү тәгдим етди. Онун һәрәкәти Јеһованын хошуна ҝәлмәди. Шамуел ҝәлиб чыханда падшаһ Јеһованын разылығыны алмаг үчүн јандырма гурбаныны тәгдим етмәјә ‘өзүнү мәҹбур етдијини’ дејәрәк, итаәтсизлијинә бәраәт газандырды. Шаул падшаһ үчүн гурбаны тәгдим етмәк Шамуели ҝөзләмәк тапшырығына гулаг асмагдан даһа ваҹиб иди. Шамуел она деди: «Ағылсызлыг етдин, Аллаһын Рәббин сәнә вердији әмрә әмәл етмәдин». Јеһованын итаәтиндән чыхмаг Шаула падшаһлығы баһасына баша ҝәлди (1 Шамуел 10:8; 13:5-13).
9. Шаул Аллаһа неҹә итаәтсизлик ҝөстәрди?
9 Падшаһ бундан өзүнә дәрс ҝөтүрдүмү? Хејр. Сонралар Јеһова Шаула әввәлләр сәбәбсиз јерә Исраилә һүҹум едән амалеглиләрин көкүнү кәсмәји әмр етди. Шаулун һеч онларын мал-гарасына да һејфи ҝәлмәли дејилди. Онун итаәти ‘Шура чатана гәдәр Амалеглиләри гырмагдан’ ибарәт олду. Шамуел Шаулу гаршыламаға чыханда гәләбә чалдығы үчүн кефи јахшы олан падшаһ деди: «Гој Рәбб сәнә хејир-дуа версин, мән Рәббин сөзүнә әмәл етдим». Анҹаг Шаул вә адамлары Аллаһын ајдын ҝөстәришләринә зидд давранараг Агаг падшаһы вә ‘ән јахшы гојунлары, өкүзләри, көкәлдилмиш һејванлары, гузулары вә јахшы шејләрин һамысыны’ сахлады. Шаул итаәтсизлијинә һагг газандырмаг үчүн деди: «Халг сәнин Аллаһын Рәббә гурбан етмәк үчүн гојунларла өкүзләрин ән јахшыларыны сахлајыб» (1 Шамуел 15:1-15).
10. Шаул нәји дәрк етмәди?
10 Шамуел падшаһа деди: «Рәбб Өз сөзүнә итаәт едилмәсиндән хошу ҝәлдији гәдәр јандырма гурбаны вә башга гурбанлардан хошу ҝәләрми? Бах итаәт етмәк гурбандан, гулаг асмаг гочларын ич пијиндән даһа јахшыдыр» (1 Шамуел 15:22). Јеһова бүтүн бу һејванларын мәһв едилмәсинә гәрар вердији үчүн онлар гурбан ҝәтирилмәјә јарамырдылар.
Һәр шејдә итаәткар олун
11, 12. а) Аллаһы разы салмаға чалышанда О буна неҹә јанашыр? б) Инсан әслиндә Аллаһа итаәтсизлик едә-едә Аллаһын ирадәсини јеринә јетирдијини дүшүнәрәк өзүнү неҹә алдада биләр?
11 Садиг хидмәтчиләринин тә’гибләр заманы мәтанәтли галдығыны, инсанларын лагејдлијинә бахмајараг, хош хәбәри тәблиғ етдијини вә ҝүҹ-бәла илә чөрәк пулу газанмалы олсалар да, мәсиһчи ҝөрүшләрини бурахмадыгларыны ҝөрмәк Јеһоваја неҹә дә хошдур! Мәсиһчи һәјатынын бу ваҹиб саһәләриндә Аллаһа итаәткар олмағымыз Онун үрәјини севиндирир! Мәһәббәтлә етдијимиз хидмәти Јеһова гијмәтләндирир. Инсанлар чәкдијимиз зәһмәтә мәһәл гојмаја биләрләр, анҹаг Аллаһ үрәкдән етдијимиз гурбанлары ҝөрүр вә јадда сахлајыр (Матта 6:4).
12 Аллаһы там разы салмаг үчүн һәјатымызын бүтүн саһәләриндә Она итаәт етмәлијик. «Онсуз да башга саһәләрдә Аллаһын дедијини едирәм, бә’зи шејләрдә өз билдијими етсәм дә, олар» фикри илә һеч вахт өзүмүзү алдатмамалыјыг. Мәсәлән, инсан дүшүнә биләр ки, әҝәр о, Аллаһ үчүн нә исә едирсә, әхлагсызлыг вә диҝәр ҝүнаһлара јол версә, ҹәзасыз галаҹаг. Белә фикирләшмәк неҹә дә сәһв оларды! (Галатијалылара 6:7, 8).
13. Јеһоваја итаәткарлығымыз тәк оланда неҹә сынаға чәкилә биләр?
13 Буна ҝөрә дә өзүмүздән соруша биләрик: «Ҝүндәлик ишләрдә, һәтта шәхси ҝөрүнән мәсәләләрдә дә Јеһоваја итаәт едирәмми?» Иса демишди: «Ән балаҹа бир ишдә садиг олан, бөјүк ишдә дә садигдир, лакин ән балаҹа бир ишдә садиг олмајан, бөјүк ишдә дә садиг дејил» (Лука 16:10). ‘Евимиздә’ бизи һеч ким ҝөрмәјәндә нөгсансызлығымызы горујуругму? (Мәзмур 101:2). Бәли, нөгсансызлығымыз өз евимиздә дә сынаға чәкилә биләр. Компүтерин һәр евдә олдуғу јерләрдә әдәбсиз шәкилләрә бахмаг һеч дә чәтин дејил. Бир нечә ил бундан әввәл белә шејләри јалныз пис ад чыхармыш јерләрдә ҝөрмәк оларды. Биз Исанын «бир гадына шәһвәтлә бахан һәр адам, артыг үрәјиндә онунла зина етмиш олур» сөзләринә ҹидди јанашаҹағыгмы? Әдәбсиз шәкилләрә бахмагдан имтина едәҹәјикми? (Матта 5:28; Әјјуб 31:1, 9, 10; Мәзмур 119:37; Сүлејманын мәсәлләри 6:24, 25; Ефеслиләрә 5:3-5). Бәс зоракылыгла долу верилишләр һаггында нә демәк олар? Биз дә ‘зоракылығы севәнә’ нифрәт едән Аллаһымыз кими дүшүнүрүкмү? (Мәзмур 11:5, КМ). Јахуд тәк галанда һәддиндән артыг чох ички ичмәк неҹә? Мүгәддәс Китаб сәрхошлуғу мүһакимә едир, ејни заманда, мәсиһчиләри «шәраб дүшкүнү» олмагдан чәкиндирир (Титуса 2:3; Лука 21:34, 35; 1 Тимотејә 3:3).
14. Пул мәсәләләриндә Аллаһа табе олдуғумузу неҹә ҝөстәрә биләрик?
14 Ајыг-сајыглығы горумалы олдуғумуз диҝәр саһә пул мәсәләләри илә бағлыдыр. Мәсәлән, тез варланмаг үчүн фырылдагчылыға јахын олан ишләрә әл атаҹағыгмы? Верҝиләрдән јајынмаға мејллијикми? Јохса виҹданла «һәр адама һаггыны верин: верҝи исә верҝини» әмринә табе олуруг? (Ромалылара 13:7).
Мәһәббәтдән ирәли ҝәлән итаәткарлыг
15. Сиз нә үчүн Јеһованын әмрләринә табе олурсунуз?
15 Аллаһын өјүд-нәсиһәтинә гулаг асмаг хејир-дуа ҝәтирир. Мәсәлән, әҝәр биз сигарет чәкмир, әхлаги тәмиз һәјат сүрүр вә ганын мүгәддәслијинә һөрмәт едириксә, мүәјјән хәстәликләрдән өзүмүзү горујаҹағыг. Бундан әлавә, һәјатын башга саһәләриндә Мүгәддәс Китаба ујғун даврананда доланышығымызда, инсанларла мүнасибәтдә вә аилә һәјатында бир чох проблемләрдән гачаҹағыг (Јешаја 48:17). Бүтүн бунлары Аллаһын ганунларынын практики олдуғуну сүбут едән хејир-дуалар кими гијмәтләндирмәк олар. Анҹаг Јеһоваја Ону севдијимиз үчүн итаәт едирик. Биз Аллаһа худбин нијјәтлә ибадәт етмирик (Әјјуб 1:9-11; 2:4, 5). Кимә табе олаҹағымызы сечмәкдә Аллаһ бизә азадлыг вериб. Биз Јеһованы разы салмаг вә дүзҝүн јашамаг истәдијимиз үчүн Она табе олмағы сечирик (Ромалылара 6:16, 17; 1 Јәһја 5:3).
16, 17. а) Иса Аллаһа мәһәббәтлә табе олдуғуну неҹә ҝөстәрирди? б) Исадан неҹә нүмунә ҝөтүрә биләрик?
16 Иса Јеһоваја мәһәббәтлә табе олмагда мүкәммәл нүмунә гојуб (Јәһја 8:28, 29). Јердә оларкән Иса «чәкдији изтирабларла итаәтли олмағы өјрәнди» (Ибраниләрә 5:8-10). Неҹә? О, ‘тәвазөкарлыг ҝөстәрди вә өлүмәдәк итаәткарлыг етди’ (Филипилиләрә 2:7, 8). Иса һәлә ҝөјдә икән итаәткар олса да, онун итаәткарлығы сонралар јердә дә сынаға чәкилди. Әмин ола биләрик ки, Иса һәм өз руһани гардашларына, һәм дә иман ҝәтирән башга инсанлара Баш Каһин кими хидмәт етмәк үчүн јахшы һазырланыб (Ибраниләрә 4:15; 1 Јәһја 2:1, 2).
17 Бәс биз? Биз исә Аллаһын ирадәсинә табе олмағы әсас тутараг Исаны тәглид едә биләрик (1 Петер 2:21). Әтрафдакылар башга ҹүр давранмағымыз үчүн бизә тәзјиг ҝөстәрәндә вә ја өзүмүздә белә мејл јарананда, мәһәббәтдән ирәли ҝәләрәк Јеһованын әмрләринә табе оларыгса, мәмнунлуг дујаҹағыг (Ромалылара 7:18-20). Биз, һәмчинин һәгиги ибадәтдә үзәринә мәс’улијјәт дүшән гардашлара, гејри-камил олсалар да, һәвәслә табе олаҹағыг (Ибраниләрә 13:17). Шәхси һәјатымызда Јеһованын әмрләринә табе олмағымыз Онун ҝөзүндә чох гијмәтлидир.
18, 19. Аллаһа үрәкдән итаәт етмәјин бәһрәси нә олур?
18 Јеһоваја итаәт етмәк нөгсансызлығы горумаг үчүн тә’гибләрә таб ҝәтирмәји дә өзүнә дахил едир (Һәвариләрин ишләри 5:29). Јеһованын тәблиғ едиб шаҝирдләр һазырламаг әмринә итаәт етмәјимиз бу системин сонунадәк дөзмәји тәләб едир (Матта 24:13, 14; 28:19, 20). Дүнја чох ҝүҹлү тәзјиг ҝөстәрдијиндән гардашларымызла бир јерә топлашмаға давам етмәк үчүн мәтанәтли олмалыјыг. Мәһәббәтли Аллаһымыз бу саһәләрдә итаәткар олмаг үчүн ҝөстәрдијимиз бүтүн сә’јләрдән хәбәрдардыр. Лакин Аллаһа там итаәткар олмаг үчүн јахшы шејләрә ҝөрә миннәтдарлығымызы артырмагла јанашы, ҝүнаһлы бәдәнимизлә мүбаризә апармалы вә писликдән үз дөндәрмәлијик (Ромалылара 12:9).
19 Јеһоваја мәһәббәтлә вә миннәтдарлыгла хидмәт едәрәк Ону ахтардығымыз үчүн О бизә «мүкафат верир» (Ибраниләрә 11:6). Аллаһа мәгбул гурбан ҝәтирмәк һәм ваҹибдир, һәм дә Она хошдур. Анҹаг Јеһованын ән чох гијмәтләндирдији мәһәббәтдән ирәли ҝәлән там итаәткарлыгдыр (Сүлејманын мәсәлләри 3:1, 2).
Неҹә ҹаваб верәрдиниз?
• Нәјә ҝөрә демәк олар ки, Јеһоваја нә исә верә биләрик?
• Шаул һансы сәһвләрә јол верди?
• Итаәткарлығын гурбандан јахшы олдуғуна инандығыны неҹә ҝөстәрә биләрсән?
• Сәни Јеһоваја итаәт етмәјә тәшвиг едән нәдир?
[12-ҹи сәһифәдәки шәкил]
Гајғыкеш һәким хәстәнин мәсләһәтә гулаг асмадығыны ҝөрәндә һансы һиссләри кечирәрди?
[14-ҹү сәһифәдәки шәкил]
Нәјә ҝөрә Шаул падшаһ Јеһованын лүтфүндән мәһрум олду?
[16-ҹы сәһифәдәки шәкил]
Евдә тәк оланда Аллаһын әмрләринә итаәт едирсәнми?