Шаҝирд һазырламагда сәнә көмәк едәҹәк хүсусијјәтләр јетишдир
«Ҝедин, бүтүн халглары шаҝирдим един» (МАТТА 28:19).
1. Аллаһын гәдимдә јашамыш бә’зи хидмәтчиләринә һансы баҹарыг вә хүсусијјәтләр лазым иди?
ЈЕҺОВАНЫН хидмәтчиләри бә’зән Онун ирадәсини јеринә јетирмәјә көмәк едәҹәк баҹарыг вә хүсусијјәтләр инкишаф етдирмәли олурлар. Мәсәлән, чичәкләнән Ур шәһәрини Аллаһын тапшырығы илә тәрк едән Ибраһим вә Сара чадырларда јашаја билсинләр дејә, мүәјјән хүсусијјәт вә баҹарыға малик олмалы идиләр (Ибраниләрә 11:8, 9, 15). Исраиллиләри Вә’д едилмиш дијара ҝәтириб чыхармаг үчүн Јешуадан ҹәсарәт, Јеһоваја мөһкәм инам вә Онун Гануну билмәк тәләб олунурду (Јешуа 1:7-9). Јеһова Бесалели вә Оһолиавы мүгәддәс мәскәнин тикинтисиндә иштирак вә рәһбәрлик етмәјә тә’јин етдикдән өнҹә, ола билсин, онларын мүәјјән баҹарыглары варды. Амма Аллаһын тапшырығыны Онун истәдији кими јеринә јетирмәк үчүн бу кишиләр өз баҹарыгларыны Аллаһын мүгәддәс руһунун көмәји илә инкишаф етдирмәли идиләр (Чыхыш 31:1-11).
2. Биз шаҝирдләр һазырламаг иши илә бағлы һансы суаллары арашдыраҹағыг?
2 Јүзилликләр сонра Иса Мәсиһ давамчыларына белә бир тапшырыг верди: «Ҝедин, бүтүн халглары шаҝирдим един... сизә әмр етдијим һәр шејә риајәт етмәји онлара өјрәдин» (Матта 28:19, 20). Инсанлара белә бөјүк вә шәрәфли тапшырыг һәлә һеч вахт верилмәмишдир. Шаҝирдләр һазырламаг үчүн һансы кејфијјәтләрә саһиб олмаг лазымдыр? Онлары неҹә јетишдирмәк олар?
Аллаһы бүтүн үрәјинлә севдијини ҝөстәр
3. Шаҝирдләр һазырламаг тапшырығы бизә һансы имканы верир?
3 Инсанларла сөһбәт етмәк вә онлары һәгиги Аллаһа јөнәлтмәк үчүн Јеһоваја дәрин мәһәббәтимиз олмалыдыр. Исраиллиләр Аллаһы севдикләрини Онун ганунларына бүтүн үрәкдән табе олмагла, Она мәгбул гурбанлар ҝәтирмәклә вә мәдһијјәләр охумагла ҝөстәрә биләрдиләр (Ганунун тәкрары 10:12, 13; 30:19, 20; Мәзмур 21:13; 96:1, 2; 138:5). Шаҝирдләр һазырламаг тапшырығы алан бизләр дә Аллаһын ганунларына риајәт едирик, бунунла јанашы, Јеһованы севдијимизи инсанлара Онун вә нијјәтләри һаггында данышмагла да ҝөстәририк. Аллаһын вердији үмидә үрәкдән инандығымызы ҝөстәрмәк үчүн дүзҝүн сөзләр сечәрәк әминликлә данышмалыјыг (1 Салоникилиләрә 1:5; 1 Петер 3:15).
4. Иса нәјә ҝөрә инсанлара Јеһова һаггында өјрәтмәји хошлајырды?
4 Иса Јеһованы үрәкдән севдији үчүн Онун нијјәтләри, Падшаһлыг вә һәгиги ибадәт һаггында бөјүк мәмнунијјәтлә данышырды (Лука 8:1; Јәһја 4:23, 24, 31). О демишди: «Мәним јемәјим Мәни Ҝөндәрәнин ирадәсини јеритмәк вә Онун ишини тамамламагдыр» (Јәһја 4:34). Мәзмурчунун бу сөзләри Иса һаггында иди: «Еј Аллаһым, Сәнин истәјинә әмәл етмәк мәнә зөвг верир, ганунун гәлбимдәдир. Бөјүк топлантыда салеһлијини ҹар чәкдим, ја Рәбб, Сән билирсән ки, ағзымы јуммадым» (Мәзмур 40:8, 9; Ибраниләрә 10:7-10).
5, 6. Шаҝирдләр һазырламаг ишиндә лазым олан әсас хүсусијјәт һансыдыр?
5 Мүгәддәс Китаб һәгигәтини јени өјрәнәнләр Аллаһы үрәкдән севдикләри үчүн бә’зән Јеһова вә Падшаһлыг һаггында елә әминликлә данышырлар ки, онларын бу әминлији башгаларыны Мүгәддәс Јазылары арашдырмаға тәшвиг едир (Јәһја 1:41). Аллаһа мәһәббәт шаҝирдләр һазырламаг ишиндә иштирак етмәјә тәшвиг едән әсас кејфијјәтдир. Буна ҝөрә дә, ҝәлин мәһәббәтимизи Аллаһын Кәламыны мүнтәзәм охумагла вә үзәриндә дүшүнмәклә горујуб сахлајаг (1 Тимотејә 4:6, 15; Вәһј 2:4).
6 Иса Мәсиһин сә’јли мүәллим олмасына, сөзсүз ки, Јеһоваја мәһәббәти көмәк етмишдир. Амма Падшаһлығын мәһарәтли тәблиғчиси олмасында бу јеҝанә кејфијјәт дејилди. Белә исә, шаҝирдләр һазырламагда Исаны мәһарәтли едән диҝәр хүсусијјәт һансы иди?
Инсанлара мәһәббәтлә гајғы ҝөстәр
7, 8. Иса инсанлара неҹә јанашырды?
7 Иса адамларын гајғысына галыр вә онлара сәмими мараг ҝөстәрирди. Һәтта јер үзүнә ҝәлмәздән әввәл о, Аллаһын ‘ме’мары’ кими бәшәријјәтлә бағлы олан һәр шејдән зөвг алырды (Сүлејманын мәсәлләри 8:30, 31). Јердә хидмәт едәндә исә, инсанлара шәфгәтлә јанашыр, јанына ҝәләнләрә раһатлыг верирди (Матта 11:28-30). Иса Јеһованын мәһәббәтини вә шәфгәтини әкс етдирирди вә бу хүсусијјәтләр инсанлары һәгиги Аллаһа ибадәтә ҹәлб едирди. Инсанларын вәзијјәтинә анлајышла јанашдығы вә мәһәббәтлә гајғыларына галдығы үчүн Исаны динләмәјә һәр ҹүр адам ҝәлирди (Лука 7:36-50; 18:15-17; 19:1-10).
8 Бир киши әбәди һәјаты мирас алмаг үчүн нә етмәк лазым олдуғуну сорушанда Иса она мәһәббәтлә јанашды (Марк 10:17-21). Бејтанјада Исадан тә’лим алан инсанлар һаггында охујуруг: «Иса Мартаны, онун баҹысыны вә Лазары севирди» (Јәһја 11:1, 5). Иса адамларын гејдинә елә галырды ки, һәтта јорғун оланда белә, онлары өјрәтмәкдән ваз кечмирди (Марк 6:30-34). Инсанлара ҝөстәрдији белә мәһәббәтли гајғы сајәсиндә Иса бир чохларыны һәгиги ибадәтә ҝәтирмәкдә ән мәһарәтли мүәллим олмушду.
9. Павел шаҝирд һазырлајаркән инсанлара неҹә јанашырды?
9 Һәвари Павел дә тәблиғ етдији инсанлара сәмими мараг ҝөстәрирди. Мәсәлән, Салоник шәһәриндәки мәсиһчиләрә јазмышды: «Бу јолла үрәкдән сизин һәсрәтинизи чәкән бизләр, сизә јалныз Аллаһын Мүждәсини дејил, өз ҹанларымызы да вермәк истәдик. Чүнки сиз бизим үчүн чох әзиз олдунуз». Павелин севҝиси вә сә’ји нәтиҹәсиндә Салоникдә јашајанларын бә’зиләри ‘һәгиги Аллаһа гуллуг етмәк үчүн бүтләрдән үз чевирдиләр’ (1 Салоникилиләрә 1:9, 10; 2:8). Иса вә Павел кими, биз дә инсанлара сәмими мараг ҝөстәририксә, хош хәбәрин әбәди һәјаты истәјәнләрин үрәјинә јол тапдығыны ҝөрмәкдән севинҹ дујаҹағыг (Һәвариләрин ишләри 13:48).
Фәдакарлыг руһу тәзаһүр етдир
10, 11. Шаҝирдләр һазырламаг ишиндә нәјә ҝөрә фәдакарлыг руһу тәләб олунур?
10 Шаҝирд һазырламагда мәһарәтли оланлар фәдакарлыг руһуна маликдирләр. Белә тәблиғчиләр, әлбәттә ки, вар-дөвләт далынҹа гачмырлар. Иса шаҝирдләринә демишди: «Сәрвәти оланлар Аллаһын Сәлтәнәтинә нә чәтинликлә ҝирәҹәкләр!» Бу сөзләри ешидән шаҝирдләр тәәҹҹүбләндиләр, анҹаг Иса деди: «Өвладларым! Сәрвәтә ҝүвәнәнләр үчүн Аллаһын Сәлтәнәтинә ҝирмәк нә гәдәр чәтиндир! Дәвәнин ијнә дешијиндән кечмәси, варлы адамын Аллаһын Сәлтәнәтинә ҝирмәсиндән даһа асандыр» (Марк 10:23-25). Фикирләрини шаҝирдләр һазырламаг ишинә ҹәмләјә билсинләр дејә, Иса давамчыларына садә һәјат тәрзини мәсләһәт ҝөрүрдү (Матта 6:22-24, 33). Шаҝирдләр һазырламаг ишиндә фәдакарлыг руһу бизә неҹә көмәк ола биләр?
11 Исанын әмр етдији һәр шеји инсанлара өјрәтмәк үчүн бөјүк сә’ј тәләб олунур. Шаҝирдләр һазырламаг истәјән тәблиғчи чалышаҹаг ки, мараг ҝөстәрән адамла һәр һәфтә Мүгәддәс Китаб өјрәнмәси кечирсин. Сәмими инсанлары тапмаг имканларыны ҝенишләндирмәк үчүн бә’зи тәблиғчиләр ишләрини дәјишәрәк јарымҝүнлүк ишә дүзәлирләр. Минләрлә мәсиһчиләр әразиләриндә јашајан әҹнәбиләрә тәблиғ етмәк үчүн хариҹи дил өјрәнмишләр. Диҝәр тәблиғчиләр исә бичиндә даһа чох иштирак етмәк мәгсәдилә доғма дијарларыны тәрк едиб башга әрази вә ја өлкәјә көчмүшләр (Матта 9:37, 38). Бүтүн бунлар фәдакарлыг тәләб едир. Амма шаҝирд һазырламагда мәһарәтли олмаг үчүн даһа бир шеј дә лазымдыр.
Сәбирли ол, амма вахтыны бош јерә сәрф етмә
12, 13. Нәјә ҝөрә шаҝирд һазырламаг ишиндә сәбирли олмаг бу гәдәр зәруридир?
12 Шаҝирдләр һазырламагда бизә көмәк едән диҝәр кејфијјәт сәбирдир. Мүждәни тә’хирә салмадан тәблиғ едирик, амма шаҝирд һазырламаг үчүн адәтән хејли вахт вә сәбир тәләб олунур (1 Коринфлиләрә 7:29). Иса өҝеј гардашы Јагубла сәбирлә давранырды. Јагуб Исанын тәблиғ фәалијјәтилә јахшы таныш олса да, онун давамчысы олмасына нә исә мане олурду (Јәһја 7:5). Лакин Мәсиһин өлүмү вә ерамызын 33-ҹү илинин Пентикост ҝүнү арасындакы гыса мүддәт әрзиндә Јагубун Исанын шаҝирди олмасы еһтимал едилир. Чүнки Мүгәддәс Китаба әсасән белә гәнаәтә ҝәлмәк олар ки, анасы, гардашлары вә һәвариләр дуа етмәк үчүн бир јерә топлашанда Јагуб да онларын арасына олмушдур (Һәвариләрин ишләри 1:13, 14). Јагуб руһән инкишаф етди вә бир гәдәр сонра мәсиһчи јығынҹағында она ҹидди мәс’улијјәтләр һәвалә едилди (Һәвариләрин ишләри 15:13; 1 Коринфлиләрә 15:7).
13 Әкинчиләр кими, мәсиһчиләр дә инсанларда адәтән јаваш-јаваш бөјүјән шејләри јетишдирирләр. Бураја Аллаһын Кәламынын дәрк едилмәси, Јеһоваја мәһәббәт вә мәсиһчи руһу дахилдир. Бунун үчүн сәбир тәләб олунур. Јагуб јазырды: «Еј гардашлар, Рәббин ҝәлишинә [«иштиракына», ЈД] кими сәбирли дурун. Будур, әкинчи илк вә сон јағынтыны алынҹајадәк, торпагдан гијмәтли мәһсулу сәбирлә ҝөзләјир. Сиз дә сәбирли олун, үрәкләринизи мөһкәмләдин, чүнки Рәббин ҝәлиши јахындыр» (Јагуб 5:7, 8). Јагуб һәмиманлыларыны ‘Рәббин иштиракына кими сәбирли дурмаға’ тәшвиг едирди. Шаҝирдләр нәји исә баша дүшмәјәндә Иса буну сәбирлә изаһ едир вә ја әјани нүмунәләр чәкирди (Матта 13:10-23; Лука 19:11; 21:7; Һәвариләрин ишләри 1:6-8). Мәсиһин иштиракы дөврүндә јашајан бизләр дә шаҝирд һазырламаға сә’јлә чалышараг ејни сәбри ҝөстәрмәлијик. Бизим ҝүнләрдә Исанын давамчысы оланлары сәбирлә өјрәтмәк тәләб олунур (Јәһја 14:9).
14. Биз сәбирли олсаг да, шаҝирд һазырламаг ишиндә вахтымыздан неҹә мүдрикликлә истифадә едә биләрик?
14 Һәтта сәбирли олсаг белә, Мүгәддәс Китаб өјрәнмәси башладығымыз инсанларын әксәријјәтиндә кәлам сәмәрә вермир (Матта 13:18-23). Буна ҝөрә дә, онлара көмәк етмәк үчүн әлимиздән ҝәләни етдикдән сонра, онларла өјрәнмәни дајандырыб, Мүгәддәс Китаб һәгигәтини даһа чох гијмәтләндирәҹәк инсанлары ахтармаг мүдрик давраныш оларды (Ваиз 3:1, 6). Әлбәттә, һәтта белә инсанлара да бахышларында, хасијјәтләриндә вә һәјатда нәјә үстүнлүк вермәләриндә дәјишиклик етмәләри үчүн әлавә көмәк лазым ҝәлә биләр. Беләликлә, Иса шаҝирдләринин дүзҝүн дүшүнҹә тәрзи инкишаф етдирмәләри үчүн вахт тәләб олундуғуну нәзәрә алыб онларла сәбирлә даврандығы кими, биз дә сәбирли олмалыјыг (Марк 9:33-37; 10:35-45).
Өјрәтмәк баҹарығыны инкишаф етдир
15, 16. Өјрәнмәјә јахшы һазырлашмаг вә мөвзуну садә тәрздә изаһ етмәк нәјә ҝөрә ваҹибдир?
15 Аллаһа мәһәббәт, инсанларын гајғысына галмаг, фәдакарлыг руһу вә сәбир шаҝирд һазырламагда мүвәффәгијјәтли олмаг үчүн әсас амилләрдир. Мөвзулары ајдын вә садә тәрздә баша сала биләк дејә, өјрәтмә габилијјәтимизи инкишаф етдирмәлијик. Мисал үчүн, Бөјүк Мүәллимимиз Иса Мәсиһ садә дилдә данышдығына ҝөрә онун дедикләринин бир чоху хүсусилә ҝүҹлү тә’сирә малик иди. Јәгин, онун бу сөзләри сәнин јадындадыр: «Өзүнүзә ҝөјдә хәзинәләр јығын», «мүгәддәс сајдығынызы көпәкләрә вермәјин», ‘һикмәт өз әмәлләри илә тәсдиг олунур’, «гејсәринкини гејсәрә, Аллаһынкыны Аллаһа верин» (Матта 6:20; 7:6; 11:19, И–93; 22:21). Әлбәттә, Иса өз фикирләрини јалныз гыса формада сөјләмирди. О, јери ҝәләндә, мүәјјән мәсәләјә ҝениш изаһат верирди. Бәс Исанын өјрәтмә тәрзини сән неҹә тәглид едә биләрсән?
16 Јахшы-јахшы һазырлашмаг садә вә ајдын тәрздә өјрәтмәкдә әсас рол ојнајыр. Һазырлашмајан тәблиғчи чох данышмаға мејлли олур. О, чох данышдығына вә мөвзу һагда билдикләрини бир дәфәјә сөјләдијинә ҝөрә мәсәләнин мәғзи гаранлыгда гала биләр. Јахшы һазырлашмыш тәблиғчи исә өјрәтдији инсан барәдә фикирләшир, арашдырылаҹаг мөвзу үзәриндә дүшүнүр вә јалныз лазым олан мә’луматы изаһ едир (Сүлејманын мәсәлләри 15:28; 1 Коринфлиләрә 2:1, 2). О, өјрәтдији адамын билијини вә өјрәнмә заманы вурғуланаҹаг фикирләри нәзәрә алыр. Бу тәблиғчијә мөвзуја даир бир чох мараглы тәфсилатлар мә’лум ола биләр, ајдынлыг исә лазым олмајан мә’луматлары мүзакирәјә дахил етмәмәји тәләб едир.
17. Инсанлара Мүгәддәс Китабын үзәриндә дүшүнмәјә неҹә көмәк едә биләрик?
17 Иса садәҹә фактлар ҝәтирмәклә кифајәтләнмәјиб, инсанлара дүшүнмәјә дә көмәк едирди. Мәсәлән, бир дәфә о сорушду: «Шимон! Сән неҹә дүшүнүрсән? Јерин һөкмдарлары ҝөмрүк вә јахуд верҝини кимдән алырлар? Өз оғулларынданмы, јохса кәнар адамларданмы?» (Матта 17:25). Ола билсин, биз Мүгәддәс Китабы изаһ етмәји чох севирик, амма Мүгәддәс Китабы өјрәнән адамын өз фикирләри илә бөлүшмәјә вә ја өјрәнмәдә арашдырылан мөвзуну изаһ етмәјә имканы олсун дејә, өзүмүзү чох данышмагдан сахлајырыг. Тәбии ки, биз инсанлары суалларла јүкләмәли дејилик. Әксинә, нәзакәтлә, јахшы әјани нүмунәләрлә вә дүшүнүлмүш суалларла Мүгәддәс Китаба әсасланан нәшрләримиздәки фикирләри баша дүшмәкдә онлара көмәк едә биләрик.
18. Өјрәтмәк баҹарығыны неҹә инкишаф етдирә биләрик?
18 Мүгәддәс Јазыларда ‘өјрәтмәк баҹарығындан’ (ЈД) данышылыр (2 Тимотејә 4:2, Титуса 1:9). Белә баҹарыға бир кимсәјә фактлары јадда сахламаға көмәк етмәкдән даһа чох шеј дахилдир. Биз Мүгәддәс Китабы өјрәнән адама һәгигәтлә јалан, јахшы илә пис, һикмәтлә ағылсызлыг арасындакы фәрги баша дүшмәјә көмәк етмәјә чалышмалыјыг. Буну етсәк вә инсанын үрәјиндә Јеһоваја мәһәббәт инкишаф етдирмәјә чалышсаг, о, Аллаһа нә үчүн табе олмаг лазым олдуғуну анлаја биләр.
Шаҝирдләр һазырламагда сә’јлә иштирак ет
19. Шаҝирд һазырламаг ишиндә бүтүн мәсиһчиләрин көмәји нәдән ибарәтдир?
19 Мәсиһчи јығынҹағы шаҝирдләр һазырламагла мәшғулдур. Аллаһын Кәламыны өјрәнән адам шаҝирд оланда, буна јалныз ону тапан вә Мүгәддәс Китаб тә’лимләрини она өјрәдән Шаһид севинмир. Мәсәлән, итән ушағы тапмаг үчүн ахтарыш групу тәшкил олунанда, ону јалныз бир нәфәр тапа биләр. Анҹаг ушаг валидејнләринә говушанда онун ахтарышында иштирак едәнләрин һамысы севинир (Лука 15:6, 7). Буна бәнзәр тәрздә, шаҝирдләр һазырламаг ишиндә јығынҹаг бирҝә иштирак едир. Бүтүн мәсиһчиләр Исанын шаҝирдләри олаҹаг инсанларын ахтарышында иштирак едирләр. Белә адамлар Падшаһлыг Залында кечирилән ҝөрүшләрә ҝәлмәјә башлајанда, јығынҹағын һәр бир үзвү һәгиги ибадәти гијмәтләндирмәкдә она көмәк едир (1 Коринфлиләрә 14:24, 25). Буна ҝөрә дә, һәр ил јүз минләрлә шаҝирд һазырландығы үчүн бүтүн мәсиһчиләр севинә биләр.
20. Әҝәр инсанлара Мүгәддәс Китаб һәгигәтини өјрәтмәк истәјирсәнсә, нә етмәлисән?
20 Бир чох садиг мәсиһчиләр кимәсә Јеһова вә һәгиги ибадәт барәдә өјрәтмәјә шад олардылар. Анҹаг онларын бүтүн сә’јләринә бахмајараг, һәлә буна наил олмамышлар. Әҝәр сәнин дә вәзијјәтин беләдирсә, Јеһова Аллаһа олан мәһәббәтини мөһкәмләндирмәјә, инсанлара мәһәббәтлә гајғы ҝөстәрмәјә, фәдакар вә сәбирли олмаға, өјрәтмәк баҹарығыны инкишаф етдирмәјә давам ет. Ән ваҹиби исә, башгаларына һәгигәти өјрәтмәк истәјин барәдә даима Јеһоваја дуа ет (Ваиз 11:1). Руһдан дүшмә, чүнки Јеһоваја хидмәтдә етдијин һәр шеј шаҝирд һазырламаг ишинә көмәк едир, бу исә Јеһоваја иззәт ҝәтирир.
Изаһ едә биләрсинизми?
• Нәјә ҝөрә шаҝирд һазырламаг ишиндә иштирак етмәјимиз Аллаһа мәһәббәтимизи ҝөстәрир?
• Шаҝирд һазырлајан мәсиһчиләрдә һансы хүсусијјәтләр олмалыдыр?
• Өјрәтмәк баҹарығы нә демәкдир?
[22-ҹи сәһифәдәки шәкил]
Мәсиһчиләр шаҝирд һазырламагла Јеһованы севдикләрини ҝөстәрирләр.
[23-ҹү сәһифәдәки шәкил]
Нәјә ҝөрә шаҝирд һазырлајанлар инсанлара мараг ҝөстәрмәлидирләр?
[24-ҹү сәһифәдәки шәкил]
Шаҝирд һазырламаг ишиндә ваҹиб олан бә’зи хүсусијјәтләр һансылардыр?
[25-ҹи сәһифәдәки шәкил]
Шаҝирд һазырламагда әлдә едилән наилијјәтләр бүтүн мәсиһчиләри севиндирир.