Аилә хошбәхтлијинин ачарлары

Проблемләрин һәлл едилмәси

Әр: «Билмирсән, гызларымыз һарададырлар?»

Арвад: «Мағазаја, өзләринә пал-палтар алмаға ҝедибләр».

Әр: [Һирсләнәрәк уҹа сәслә] «Неҹә јәни “пал-палтар алмаға”? Мәҝәр онлар палтары кечән ај алмамышдылар?!»

Арвад: [Өзүнә һагг газандырараг инҹик сәслә] «Ахы мағазада ендирим вар. Һәм дә онлар мәндән иҹазә истәдиләр, мән дә онлары бурахдым».

Әр: [Өзүндән чыхыб гышгырараг] «Сән билирсән ки, гызларымыз мәним иҹазәм олмадан пул хәрҹләјәндә хошума ҝәлмир! Нәјә ҝөрә әввәлҹә мәнимлә мәсләһәтләшмәдин?»

НЕҸӘ дүшүнүрсүнүз, бу әр-арвадын һансы проблемләри јараныб? Ајдындыр ки, әр өз гәзәбини ҹиловламагда чәтинлик чәкир. Бундан савајы, ушагларына нә гәдәр азадлыг вермәк мәсәләсиндә араларында фикир ајрылығы мөвҹуддур. Һәмчинин, ҝөрүнүр, бир-бирләрини дә јахшы баша дүшмүрләр.

Һеч бир аилә мүкәммәл дејил. Һәр биринин өз проблеми вар. Истәр кичик, истәр бөјүк олсун, әр-арвадын јаранан һәр проблеми һәлл етмәји өјрәнмәси олдугҹа ваҹибдир. Нәјә ҝөрә?

Һәлл едилмәмиш проблемләр уҹбатындан әрлә арвад арасындакы анлашылмазлыг ҝет-ҝедә бөјүјә биләр. Мүдрик падшаһ Сүлејман фикир вермишдир ки, ‘гапысы ҹәфтәли гала кими’ олан давалар баш верир (Сүлејманын мәсәлләри 18:19). Проблемләри һәлл етмәк үчүн анлајышлы үнсијјәтә неҹә «гапы ачмаг» олар?

Никаһда үнсијјәти дамарларда ахан ганла, мәһәббәт вә һөрмәти исә үрәк вә ағ ҹијәрлә мүгајисә етмәк олар (Ефеслиләрә 5:33). Проблем јарананда, мәһәббәт әрлә арвады кечмишдә олан сәһвләри вә инҹикликләри јада салмамаға вә фикирләрини һал-һазырда үзләшдикләри проблемин һәллинә ҹәмләмәјә тәшвиг едәҹәк (1 Коринфлиләрә 13:4, 5; 1 Петер 4:8). Гаршылыглы һөрмәтин һөкм сүрдүјү аиләләрдә әр-арвад бир-бирләринә фикирләрини сәрбәст ифадә етмәјә јол верир вә бири диҝәрини баша дүшмәјә чалышыр.

Проблемин һәлли үчүн дөрд аддым

Ашағыда ҝәтирилән дөрд аддымы нәзәрдән кечирин вә Мүгәддәс Китаб принсипләринин аилә проблемләринизи мәһәббәтлә вә һөрмәтҹил тәрздә һәлл етмәјә неҹә көмәк етдијинә диггәт јетирин.

1. Проблеми мүзакирә етмәк үчүн вахт тәјин един. «Һәр шејин өз вахты вар... Сусмағын өз вахты, данышмағын өз вахты» (Ваиз 3:1, 7). Мәгаләнин әввәлиндәки мүбаһисәдән ҝөрдүјүмүз кими, бәзи проблемләр ҝүҹлү гәзәбә сәбәб ола биләр. Әҝәр бу баш верирсә, һәјат јолдашынызын гәзәби ҹошмасын дејә, өзүнүзү әлә алараг сөһбәти дајандырын вә хатырлајын ки, «сусмағын өз вахты» вар. Мүгәддәс Китабын нөвбәти мәсләһәтини тәтбиг етсәниз, мүнасибәтләринизи бир чох зәрбәләрдән хилас етмиш оларсыныз: «Даванын башланмасы су бәндинин ачылмасына бәнзәр, дава башланмамыш мүнагишәни тәрк ет» (Сүлејманын мәсәлләри 17:14).

Амма «данышмағын [да] өз вахты вар». Проблемләрә етинасыз јанашанда онлар алаг оту кими чохалыр. Буна ҝөрә проблемин өз-өзүнә һәлл олунаҹағына үмид едәрәк она ҝөз јуммајын. Әҝәр сөһбәтинизи башга вахта кечирмәји тәклиф едибсинизсә, һәјат јолдашыныза һөрмәтдән ирәли ҝәләрәк, проблеми мүзакирә етмәк үчүн конкрет вахт тәјин един. Бу, Мүгәддәс Китабын «гој сиз гәзәбләниркән ҝүнәш батмасын» мәсләһәтинә әсасән давранмагда һәр икинизә көмәк едәҹәк (Ефеслиләрә 4:26). Әлбәттә, сонра сөзүнүзүн үстүндә дурмалысыныз.

МӘСЛӘҺӘТ: Аилә проблемләринизи мүзакирә етмәк үчүн һәфтәдә мүәјјән ҝүн вә вахт тәјин един. Әҝәр ҝүнүн мүәјјән вахты, мәсәлән, ишдән гајыданда, јахуд аҹ оланда мүбаһисәјә ҝиришмәјә мејллисинизсә, проблеми һәмин вахт мүзакирә етмәјин. Буну һәр икинизин јахшы әһвал-руһијјәси оланда етмәк даһа мүнасиб олар.

2. Фикринизи дүз вә һөрмәтлә сөјләјин. «Һәр бириниз өз гоншусуна һәгигәти сөјләсин» (Ефеслиләрә 4:25). Әҝәр евлисинизсә, сизин ‘гоншунуз’, јәни сизә ән јахын олан адам һәјат јолдашыныздыр. Буна ҝөрә дә һиссләринизи доғру вә сизи нараһат едән мәсәләни конкрет сөјләјин. 26 илдир ки аилә һәјаты гуран Маргаритаa дејир: «Јени евләнәндә дүшүнүрдүм ки, проблем јарананда ағзымы ачмамыш әрим һиссләрими баша дүшмәлидир. Тезликлә бунун белә олмадығыны анладым. Мән фикир вә һиссләрими инди ајдын шәкилдә ифадә етмәјә чалышырам».

Унутмајын ки, проблеми мүзакирә етдијиниз заман мәгсәдиниз, давада галиб ҝәлмәк вә ја дүшмәни мәғлуб етмәк дејил, фикирләринизи һәјат јолдашыныза билдирмәкдир. Буну јахшы етмәк үчүн сизин фикринизҹә проблемин нәдән ибарәт олдуғуну, онун нә заман баш вердијини вә сиздә һансы һиссләр доғурдуғуну баша салын. Тутаг ки, һәјат јолдашынызын сәлигәсизлији сизи мәјус едир. Һөрмәтлә она демәк олар: «Билирсән, ишдән евә ҝәлиб палтарларыны јерә атанда [проблем нә заман јараныр вә нәдән ибарәтдир], мәнә елә ҝәлир ки, еви тәмиз сахламаг үчүн ҝөстәрдијим зәһмәти гијмәтләндирмирсән [һансы һиссләри кечирдијини конкрет ҝөстәрир]». Сонра проблеми арадан галдырмаг үчүн өз тәклифләринизи нәзакәтлә дејә биләрсиниз.

МӘСЛӘҺӘТ: Һәјат јолдашынызла сөһбәт етмәздән өнҹә фикирләринизи ајдынлашдырын вә зәннинизҹә проблемин нәдән ибарәт олдуғуну, ону неҹә һәлл етмәк истәдијинизи кағыз үзәриндә гејд един.

3. Динләјин вә һәјат јолдашынызын һиссләрини баша дүшүн. Шаҝирд Јагуб јазырды ки, һәр бир мәсиһчи «ешитмәкдә ити, сөз сөјләмәкдә тәмкинли вә гәзәбдә тәмкинли» олмалыдыр (Јагуб 1:19). Инсан ҝөрәндә ки, һәјат јолдашы онун һиссләрини баша дүшмүр, бу ону мәјус етмәјә билмәз. Буна ҝөрә чалышын ки, әриниздә, јахуд арвадынызда белә тәәссүрат јаранмасын (Матта 7:12).

35 ил евли олан Волфганг дејир: «Проблемләри мүзакирә едәндә дахилимдә ҝәрҝинлик һисс едирәм, хүсусилә арвадымын мәни баша дүшмәдијини ҝөрәндә». 20 ил әрдә олан Диана етираф едир: «Әримә тез-тез ҝилејләнирәм ки, проблеми мүзакирә едәндә о, әслиндә мәнә гулаг асмыр». Бунун өһдәсиндән неҹә ҝәлә биләрсиниз?

Дүшүнмәјин ки, һәјат јолдашынызын фикир вә һиссләриндән аҝаһсыныз. Аллаһын Кәламында дејилир: «Тәкәббүрдән анҹаг мүнагишә јаранар, јахшы нәсиһәтә гулаг асанын һикмәти вар» (Сүлејманын мәсәлләри 13:10). Һәјат јолдашыныза һөрмәтлә јанашдығынызы онун сөзүнү кәсмәдән ахырадәк диггәтлә динләмәклә ҝөстәрин. Сонра исә ону баша дүшдүјүнүзә әмин оласыныз дејә, дедикләрини ришхәнд етмәдән вә сакитҹә тәкрар един. Әҝәр һәјат јолдашынызы сәһв баша дүшдүнүзсә, онун сизә дүзәлиш вермәсинә имкан верин. Данышан јалныз сиз олмајын. Мәсәләјә даир бир-биринизин фикирләрини вә һиссләрини ахырадәк баша дүшдүјүнүзә әмин олунҹаја гәдәр нөвбә илә данышын.

Бәли, һәјат јолдашыныза диггәтлә гулаг асмаг вә онун фикрини баша дүшмәк үчүн тәвазөкарлыг вә сәбир тәләб олунур. Әҝәр һөрмәт ҝөстәрмәкдә һәјат јолдашынызы габагласаныз, о да сизә һөрмәт ҝөстәрмәјә тәшвиг олунаҹаг (Матта 7:2; Ромалылара 12:10).

МӘСЛӘҺӘТ: Һәјат јолдашынызы дүзҝүн баша дүшдүјүнүзә әмин олмаг үчүн ондан ешитдикләринизи тәкрарлајанда һәр шеји сөзбәсөз демәјин. Һәјат јолдашынызын сөзләрини вә һиссләрини неҹә баша дүшдүјүнүзү она мүлајимликлә тәсвир етмәјә чалышын (1 Петер 3:8).

4. Үмуми разылыға ҝәлин. «Ики адам бир адамдан јахшыдыр, чүнки зәһмәтләри үчүн јахшы музд алаҹаглар. Әҝәр бири јыхылса, о бири јолдашыны галдырар» (Ваиз 4:9, 10). Әҝәр әрлә арвад бир-биринә көмәк етмир вә дәстәк олмурса, чәтин ки, проблемләр арадан галдырылсын.

Дүздүр, Јеһова әри аиләнин башчысы тәјин едиб (1 Коринфлиләрә 11:3; Ефеслиләрә 5:23). Лакин башчы олмаг диктатор олмаг демәк дејил. Мүдрик әр һәјат јолдашынын фикрини нәзәрә алмадан гәрар гәбул етмәјәҹәк. 20 ил евли олан Дејвид дејир: «Арвадымла бирҝә ортаг мәхрәҹә вә һәр икимиз үчүн мүнасиб олан гәрара ҝәлмәјә чалышырыг». Артыг једди ил әрдә олан Танја дејир: «Мәсәлә кимин доғру вә ја сәһв олмасында дејил. Садәҹә олараг бәзән бир проблемин һәллинә мүхтәлиф бахышлар олур. Анладым ки, мәсәләни мүвәффәгијјәтлә һәлл етмәк үчүн ҝүзәштә ҝетмәји вә мүлајим олмағы баҹармаг лазымдыр».

МӘСЛӘҺӘТ: Гој аранызда әмәкдашлыг руһу олсун вә проблемләрдән мүхтәлиф чыхыш јоллары ахтарын вә һамысыны вәрәгәдә јазын. Сонра онлара бир даһа нәзәр салыб, һәр икинизи дә гане едән гәрары сечин. Даһа сонра, алдығыныз гәрара һәр икинизин нә гәдәр риајәт етдијинизи вә бунун нәтиҹәсинин нә дәрәҹәдә сәмәрәли олуб-олмадығыны јохламаг үчүн вахт тәјин един.

Ајры-ајрылыгда јох, бирҝә чалышын

Иса никаһы ‘бојундуругла’ (ЈД) мүгајисә етди (Матта 19:6). Онун ҝүнләриндә ики һејванын бојнуна ағаҹдан бојундуруг тахырдылар ки, онлар бирҝә ишләсинләр. Һејванларын һәрәси бир тәрәфә ҝедәндә, онларын ишләриндән һеч бир фајда олмурду вә бојундуруг бојунларыны сүртүб јара едирди. Лакин бир јердә ишләмәклә јүк дашыја вә торпағы шумлаја билирдиләр.

Ејнилә, бир-бири илә әмәкдашлыг етмәјән әр-арвад үчүн дә никаһ әзабвериҹи бојундуруг олаҹаг. Амма әр-арвад бир-бири илә әмәкдашлыг етмәји өјрәнәрсә, демәк олар ки, һәр проблеми һәлл едә вә бир чох јахшы шејләрә наил ола биләр. Хошбәхт аиләси олан Калала дејир: «Арвадымла мән артыг 25 илдир ки, ачыг данышмагла, өзүмүзү башгасынын јеринә гојмагла, Јеһовадан көмәк диләмәклә вә Мүгәддәс Китаб принсипләринә әмәл етмәклә проблемләримизин өһдәсиндән ҝәлирик». Сиз дә бу ҹүр даврана биләрсинизми?

ӨЗҮНҮЗДӘН СОРУШУН...

▪ Һәјат јолдашымла даһа чох һансы проблеми мүзакирә етмәк истәјирәм?

▪ Неҹә әмин ола биләрәм ки, һәјат јолдашымын бу проблемлә бағлы һиссләрини баша дүшүрәм?

▪ Әҝәр һәмишә өз истәдијимә тәкид едирәмсә, бу һансы проблемләри јарада биләр?