‘Аллаһ горхусу илә гүдсијјәтә’ ҹан атын

МҮГӘДДӘС КИТАБ Јеһова «мүгәддәсдир, мүгәддәсдир, мүгәддәсдир!» демәклә ән јүксәк гүдсијјәти, јәни мүгәддәслији Јеһова Аллаһа аид едир (Јешаја 6:3; Вәһј 4:8). Ибрани вә јунан дилиндән мүгәддәслик кими тәрҹүмә едилән сөзләр гүсурсузлуг, јахуд дини тәмизлик, һәр ҹүр мурдарлыгдан узаг олмаг мәнасыны дашыјыр. Аллаһын мүгәддәс олмасы Онун мәнәви ҹәһәтдән тамамилә камил олдуғуну ҝөстәрир.

Мәҝәр мүгәддәс Аллаһ олан Јеһова Өз хидмәтчиләринин мүгәддәс — физики, әхлаги вә руһани ҹәһәтдән тәмиз олмаларыны ҝөзләмирми? Мүгәддәс Китаб ачыг-ајдын ҝөстәрир ки, Јеһова халгынын мүгәддәс олмасыны истәјир. 1 Петер 1:16 ајәсиндә охујуруг: «Мүгәддәс олун, чүнки Мән мүгәддәсәм». Бәс гејри-камил инсанлар Јеһованын мүгәддәслијини тәглид едә биләрләрми? Бәли, мүкәммәл алынмаса да, онлар буну баҹара биләрләр. Әҝәр Аллаһа руһани ҹәһәтдән тәмиз ибадәт едириксә вә Онунла сых мүнасибәтдәјиксә, Аллаһ бизи мүгәддәс һесаб едәҹәк.

Белә исә, әхлаги ҹәһәтдән позғун дүнјада јашајан бизләр неҹә тәмиз гала биләрик? Һансы әмәлләрдән узаг олмалыјыг? Данышығымызда вә давранышымызда һансы дәјишикликләри етмәк лазым ҝәлә биләр? Ҝәлин буну өјрәнмәк үчүн, б. е. ә 537-ҹи илдә Бабилдән вәтәнләринә гајыдан јәһудиләрдән Аллаһын нәји тәләб етдијинә диггәт јетирәк.

«О јол “Мүгәддәс јол” адланаҹаг»

Јеһова пејғәмбәрлик етмишдир ки, Бабилдә сүрҝүндә јашајан халгы доғма дијарына дөнәҹәк. Һәмин пејғәмбәрликдә белә бир зәманәт варды: «Орада бир јол олаҹаг, о јол “Мүгәддәс јол” адланаҹаг» (Јешаја 35:8а). Бу сөзләр ҝөстәрир ки, Јеһова нәинки вәтәнләринә гајытмалары үчүн јәһудиләрә јол ачды, һәм дә онлары јол боју мүдафиә едәҹәјинә әмин етди.

Јеһова јер үзүндәки мүасир хидмәтчиләринә јалан динин дүнја империјасы олан Бөјүк Бабилдән чыхмаг үчүн «Мүгәддәс јол» ачды. 1919-ҹу илдә О, мәсһ едилмиш мәсиһчиләри јалан динин руһани көләлијиндән азад етди вә онлар ибадәтләрини бүтүн јалан тәлимләрдән јаваш-јаваш тәмизләдиләр. Бу ҝүн Јеһованын халгы арасында тәмиз вә динҹ руһани мүһит һөкм сүрүр, бу исә Јеһоваја ибадәт етмәјимизи, һәмчинин Онунла вә инсанларла сүлһ ичиндә јашамағымызы мүмкүн едир.

‘Кичик сүрүнүн’ үзвләри олан мәсһ едилмиш мәсиһчиләр вә сајы ҝет-ҝедә артан ‘башга гојунлардан’ ибарәт ‘бөјүк издиһам’ мүгәддәс јол илә ҝетмәји гәрара алыблар вә диҝәрләрини дә онлара гошулмаға дәвәт едирләр (Лука 12:32; Вәһј 7:9; Јәһ. 10:16). «Мүгәддәс јол» ‘бәдәнләрини дири, мүгәддәс, Аллаһа мәгбул гурбан кими тәгдим етмәк’ истәјән һәр кәс үчүн ачыгдыр (Ром. 12:1).

«Мурдар адам орадан кечмәјәҹәк»

Ерамыздан әввәл 537-ҹи илдә вәтәнләринә гајыдан јәһудиләр бир ваҹиб тәләбә ҹаваб вермәли идиләр. «Мүгәддәс јол» илә јеримәјә лајиг оланлар һагда Јешаја 35:8б ајәсиндә дејилир: «Мурдар адам орадан кечмәјәҹәк, о јол гуртулуш тапанларын јолудур. Ора илә ҝедәнләрдән һеч бири, һәтта ағылсызлар да кечсәләр, әсла јолуну азмајаҹаг». Јәһудиләрин Јерусәлимә гајытмаларында мәгсәд һәгиги ибадәти бәрпа етмәк олдуғу үчүн, худбин мәгсәдләр ҝүдән, мүгәддәс шејләрә һөрмәт етмәјән вә руһән натәмизләрә орада јер јох иди. Гајыданлар Јеһованын јүксәк әхлаг нормаларыны горујуб сахламалы идиләр. Бизим ҝүнләрдә Аллаһын лүтфүнү газанмаг истәјәнләр дә һәмин тәләбә ҹаваб вермәлидирләр. Онлар ‘Аллаһ горхусу илә гүдсијјәтә’ ҹан атмалыдырлар (2 Кор. 7:1). Белә исә биз һансы натәмиз һәрәкәтләрдән узаг олмалыјыг?

Һәвари Павел јазырды: «Ҹисмани тәбиәтин әмәлләри исә бәллидир: Бунлар... ҹинси әхлагсызлыг, мурдарлыг [вә ја натәмизлик], сәфаһәт»дир (Галат. 5:19). Ҹинси әхлагсызлыг ҹинсијјәт органларынын никаһданкәнар истифадә едилмәси илә бағлы бүтүн сексуал һәрәкәтләри, сәфаһәт исә «ҹиловланмајан, позғун, абырсыз, јарамаз һәрәкәтләри» өзүнә дахил едир. Ајдындыр ки, һәм ҹинси әхлагсызлыг, һәм дә сәфаһәт Јеһованын мүгәддәслијинә зиддир. Буна ҝөрә дә, бу ҹүр әмәлләрдән әл чәкмәјән инсанлара мәсиһчи јығынҹағынын үзвү олмаға иҹазә верилмир, јахуд онлар јығынҹагдан кәнар едилирләр. Һәмин шеј кобуд натәмизликлә мәшғул оланлара, јәни «һәр нөв мурдарлығы аҹҝөзлүклә» едәнләрә аиддир (Ефес. 4:19).

«Натәмизлик» бир чох ҝүнаһлары өзүнә дахил едән ҝениш анлајышдыр. Натәмизлик кими тәрҹүмә едилән јунан сөзү алтында, руһани натәмизлик дә дахил олмагла, давранышда вә данышыгда өзүнү бүрузә верән һәр ҹүр натәмизлик нәзәрдә тутулур. Натәмизлијә, мүәјјән һалларда һүгуги тәдбирләр ҝөрмәк лазым ҝәлмәјән әмәлләр дә аиддирa. Бәс бу ҹүр натәмизликлә мәшғул оланлар мүгәддәслијә ҹан атырлармы?

Фәрз едәк ки, мәсиһчи ҝизлиҹә порнографијаја бахмаға башлајыр. Тәдриҹән, натәмиз арзулар баш галдырдыгҹа, онун Јеһованын өнүндә тәмиз галмаг гәтијјәти сарсылыр. Ола билсин ки, онун һәрәкәти һәлә кобуд натәмизлик дәрәҹәсинә чатмајыб, амма даһа ‘пак, етибарлы вә тәрифә лајиг шејләр’ һагда дүшүнмүр (Филип. 4:8). Порнографија натәмиздир вә әлбәттә ки, инсанын Аллаһла мүнасибәтини позур. Һәр нөв натәмизлијин ады арамызда белә чәкилмәмәлидир (Ефес. 5:3).

Диҝәр нүмунәјә нәзәр салаг. Тутаг ки, мәсиһчи онанизмлә (мастурбасија) — истәр порнографијанын мүшајиәти илә, истәрсә дә јох, оргазм төрәтмәк мәгсәдилә өзүнүн ҹинсијјәт органларыны гыҹыгландырмагла мәшғул олур. Мүгәддәс Китабда «онанизм» сөзү истифадә олунмаса да, онун мәнәви вә емосионал ҹәһәтдән мурдар һәрәкәт олдуғуна шүбһә вармы? Мәҝәр мурдарлығын бу нөвү илә мәшғул олмаға давам етмәк инсанын Јеһова илә мүнасибәтинә ҹидди зәрәр вурмурму вә ону Аллаһын ҝөзүндә натәмиз етмирми? Ҝәлин һәвари Павелин «өзүмүзү һәр бир бәдән вә руһ мурдарлығындан тәмизләјәк» вә «дахили варлығынызын дүнјәви јөнләрини — ҹинси әхлагсызлыг, натәмизлик, шәһвәт, пис еһтирас вә... тамаһкарлығы — өлдүрүн» мәсләһәтинә ҹидди јанашаг (2 Кор. 7:1; Колос. 3:5).

Шејтанын идарә етдији бу дүнја натәмиз һәрәкәтләрә ҝөз јумур, һәтта онлары етмәјә тәшвиг едир. Натәмиз әмәлләрлә мәшғул олмаг сынағы илә мүбаризә апармаг чох чәтин ола биләр. Лакин һәгиги мәсиһчиләр ‘ағылларынын бош дүшүнҹәләринә ҝөрә давранан бүтпәрәстләр кими һәрәкәт етмәмәлидирләр’ (Ефес. 4:17). Ҝизли вә ја ачыг-ашкар төрәдилмәсиндән асылы олмајараг, јалныз натәмиз әмәлләрдән узаг дурдуғумуз тәгдирдә Јеһова бизә «Мүгәддәс јол» илә јеримәјә давам етмәјимизә иҹазә верәҹәк.

«Орада ширләр олмајаҹаг»

Мүгәддәс Јеһова Аллаһын лүтфүнү итирмәмәк үчүн һәм давранышда, һәм дә данышыгда көклү дәјишикликләр етмәк лазым ҝәлә биләр. Јешаја 35:9 ајәсиндә дејилир: «Орада ширләр олмајаҹаг, јыртыҹы һејванлар о јола [јәни ‘Мүгәддәс јола’] чыхмајаҹаг». Һәрәкәт вә сөзләриндә зоракы вә тәҹавүзкар инсанлар вәһши һејванлара бәнзәдилирләр. Онлара Аллаһын јени әдаләтли дүнјасында јер олмајаҹаг (Јешаја 11:6; 65:25). Буна ҝөрә дә чох ваҹибдир ки, Аллаһын лүтфүнү газанмаг истәјәнләр вәһшилији характеризә едән хүсусијјәтләри атыб, мүгәддәслијә ҹан атсынлар.

Мүгәддәс Јазылар нәсиһәт верир: «Гој һәр ҹүр кин, һиддәт, гәзәб, чығырты, күфр, һәр нөв пис нијјәтлә бәрабәр сиздән узаг олсун» (Ефес. 4:31). Колослулара 3:8 ајәсиндә охујуруг: «Гәзәб, һиддәт, кин, ифтира, ағзыныздан чыхан әдәбсиз сөзләр кими шејләрин һамысыны бир јана гојун». Бу ајәләрдәки «күфр» вә «ифтира» әсас етибарилә тәһгирамиз, алчалдыҹы данышыға аиддир.

Бу ҝүн аҹы, тәһгирамиз данышығы һәр јердә, һәтта евдә белә ешитмәк олар. Әрлә арвад бир-биринә, јахуд ушагларына аҹы, кәскин вә алчалдыҹы сөзләр јағдырыр. Бу ҹүр данышыг тәрзи мәсиһчи аиләләриндә јолверилмәздир (1 Кор. 5:11).

‘Аллаһ горхусу илә гүдсијјәтә’ ҹан атмаг хејир-дуадыр!

Мүгәддәс Јеһова Аллаһа хидмәт етмәк әсл шәрәфдир! (Јешуа 24:19). Јеһованын бизи ҝәтирдији руһани ҹәннәт олдугҹа дәјәрлидир. Давранышымызы Јеһованын ҝөзүндә мүгәддәс сахламаг ән ҝөзәл һәјат јолудур.

Чох тезликлә Аллаһын Ҹәннәт һаггындакы вәди ҝерчәкләшәҹәк (Јешаја 35:1, 2, 5-7). Ҹәннәтин һәсрәтини чәкәнләр вә мүгәддәслијә ҹан атанлар орада мәскунлашаҹаглар (Јешаја 65:17, 21). Буна ҝөрә ҝәлин вар ҝүҹүмүзлә руһани ҹәһәтдән тәмиз олараг Аллаһа ибадәт етмәјә давам едәк вә Онунла сых мүнасибәти горујуб сахлајаг.

[26-ҹы сәһифәдәки шәкил]

«Мүгәддәс јол» илә ҝетмәк үчүн јәһудиләрдән нә тәләб олунурду?

[27-ҹи сәһифәдәки шәкил]

Порнографија инсанын Јеһова илә мүнасибәтинә зәрәр вурур

[28-ҹи сәһифәдәки шәкил]

«Гој... чығырты, күфр... сиздән узаг олсун»