Нуһ вә Үмумдүнја дашгыны ујдурма дејил, фактдыр
ИНСАНЛАРЫН бир-бирләри илә әмин-аманлыг ичиндә јашадыглары, мүһарибә, ҹинајәт вә зүлмкарлыг олмајан ҝөзәл бир дүнјада јашамаг истәрдинизми? Елә исә, чох еһтимал ки, јахшы билдијиниз тарихи бир һадисә сизә тәсәлли верә биләр. Бу, Нуһ һаггында олан һекајәдир. О, чох јахшы инсан иди вә пис инсанларын мәһв олундуғу Үмумдүнја дашгынындан өзүнүн вә аиләсинин хилас олмасы үчүн ҝәми тикди.
Бу һекајә, демәк олар ки, дүнјанын һәр јериндә мәлумдур. Нуһла баш верән һадисәни Мүгәддәс Јазыларын «Јарадылыш» китабынын 6-9-ҹу фәсилләриндә охумаг олар. Бу һагда Гуранда вә јер үзүндә јашајан сајсыз-һесабсыз халгларын әфсанәләриндә дә нәгл едилир. Дашгын доғрудан да олубму, јохса бу, садәҹә, инсанлары дүз давранмаға тәшвиг етмәк үчүн ујдурулан бир рәвајәтдир? Илаһијјатчылар вә алимләр әсрләр боју бу суалын үзәриндә мүбаһисә едирләр. Амма Аллаһын Кәламы олан Мүгәддәс Китаб бүтүн шүбһәләри арадан галдырыр. Орада Дашгынын ујдурма дејил, факт олдуғу дејилир. Ҝәлин бәзи тәфәррүатлара нәзәр салаг.
«Јарадылыш» китабында Дашгынын башламасынын или, ајы вә ҝүнү, ҝәминин нә вахт вә һарада дајанмасы, һәмчинин јер үзүнүн нә заман гурумасы барәдә конкрет мәлумат верилир. Ҝәми һаггында јазылан тәфсилатлар — планы, өлчүләри вә тикинтисиндә истифадә олунан материаллар барәдә верилән мәлумат да дәгигдир. Әфсанәләр исә адәтән гејри-мүәјјән олур.
Мүгәддәс Китабдакы ики нәсил шәҹәрәси Нуһун реал шәхс олдуғуну тәсдигләјир (1 Салнамәләр 1:4; Лука 3:36). Онлары тәртиб едән Езра вә Лука сон дәрәҹә дәгиг тәдгигатчы олмушлар. Лука Иса Мәсиһин нәсил шәҹәрәсиндә Нуһун да адыны чәкир.
Нуһ вә ја Үмумдүнја дашгыны һаггында Јешаја вә Језекел пејғәмбәрләрин, һәмчинин һәвари олан Павел илә Петерин јазыларында хатырланыр (Јешаја 54:9; Језекел 14:14, 20; 1 Петер 3:19, 20; 2 Петер 2:5; Ибраниләрә 11:7).
Иса Мәсиһ Дашгына истинад едәрәк дејирди: «Нуһун ҝүнләриндә неҹә олдуса, Инсан Оғлунун ҝүнләриндә дә елә олаҹагдыр. Нуһун ҝәмијә ҝирдији ҝүнә гәдәр, инсанлар јејир, ичир, евләнир, әрә ҝедирдиләр. Сонра туфан ҝәлиб һамысыны мәһв етди» (Лука 17:26, 27). Дашгын тарихи факт олмасајды, Исанын ‘Инсан Оғлунун ҝүнләри’ барәдә дедикләри мәнасыз оларды.
Һәвари Петер пејғәмбәрлик етмишдир ки, Мүгәддәс Китабда јазыланлара ҝүлән «ришхәндчиләр» олаҹаг. Петер јазыр ки, ‘белә дүшүнәнләр о заманкы [Нуһун ҝүнләриндәки] дүнјанын суларла боғулуб мәһв едилмәси’ фактыны нәзәрдән гачырырлар. Бәс бизим барәмиздә нә демәк олар? Тарихдә баш вермиш бу һадисәјә лагејд јанашмалыјыгмы? Әлбәттә ки, јох! Петер давам едир: «Индики ҝөјләр вә јер исә ода верилмәк үчүн ејни кәлам илә сахланыб, аллаһсыз адамларын мәһкәмә вә һәлак ҝүнүнә гәдәр һифз олунурлар» (2 Петер 3:3-7).
Аллаһ бир даһа писләри мәһв едәҹәк, амма јенә дә сағ галанлар олаҹаг. Нуһун нүмунәсини тәглид етмәклә ҝөзәл дүнјада јашамаг үчүн хилас едиләҹәк салеһ инсанлар арасында ола биләрик.