Планларыныз Аллаһын нијјәтинә ујғундурму?

ҸӨВҮЗГЫРАН ады илә танынан гуш Шимали Американын гәрбиндәки мешәләрдә сүзән боз рәнҝли, охујан гушдур. О, сәрт гыш мөвсүмүнә һазырлыг ҝөрмәк үчүн илдә 33 000 тохум јығыб, 2 500 јердә басдырыр. Һәгигәтән дә, бу гушун ҝәләҹәк үчүн тәдарүк ҝөрмәкдә инстинктив ‘һикмәти’ вар (Сүлејманын мәсәлләри 30:24).

Инсанлар исә даһа ҝөзәл габилијјәтә маликдирләр. Јеһованын јер үзүндә јаратдығы бүтүн ҹанлыларын ичиндә тәкҹә инсанлар кечмишдәки һадисәләрдән нәтиҹә чыхармаг вә алдығы ибрәт дәрсләрини ҝәләҹәк планларына тәтбиг етмәк кими мисилсиз габилијјәтә маликдирләр. Мүдрик падшаһ Сүлејман мүшаһидә етмишдир: «Инсанын гәлбиндә чох амалы вар» (Сүлејманын мәсәлләри 19:21).

Бунунла белә, үмумиликдә инсанларын сечимләри аздыр, чүнки онлар еһтимала әсасланараг ҝәләҹәклә бағлы план гурурлар. Мәсәлән, сиз сабаһкы ишләринизи ҝүнүн чыхаҹағы вә һәлә дә сағ олаҹағыныз еһтималы илә планлашдырырсыныз. Биринҹи еһтималын тәмәли мөһкәм олдуғу һалда, икинҹиси һаггында буну демәк чәтиндир. Мүгәддәс Китаб јазычысы Јагуб бу һәгигәти белә ифадә етмишди: «Сабаһ нә баш верәҹәјини билмирсиниз» (Јагуб 4:13, 14).

Јеһова Аллаһ үчүн белә мәһдудијјәтләр мөвҹуд дејил. О, «ахыры әввәлдән» билир. Онун ағзындан чыхан нијјәти мүтләг јеринә јетәҹәк. О бәјан едир: «Нијјәтим баш тутаҹаг, истәдијим һәр шеји едәҹәјәм» (Јешаја 46:10). Бәс инсанларын планлары Аллаһын нијјәтинә зидд ҝедәндә нә баш верир?

Инсанлар Аллаһын нијјәтинә мәһәл гојмајанда

Тәхминән 4 000 ил әввәл Бабил гүлләсини тикәнләр инсан нәслинин бир әразидә мәскун олмасыны планлашдырырдылар. Онлар дејирдиләр: «Ҝәлин өзүмүзә бир шәһәр вә башы ҝөјләрә чатан бир гүллә тикиб ад чыхараг, даһа бүтүн јер үзүнә јајылмајаг» (Јарадылыш 11:4).

Анҹаг Аллаһын јер үчүн нијјәти тамам башга иди. О, Нуһла оғулларына тапшырмышды: «Төрәјиб чохалын вә јер үзүнү бүрүјүн» (Јарадылыш 9:1). Аллаһ Бабилин үсјанкар әһалисинин мәгсәдинин гаршысыны неҹә алды? Онларын дилини гарышдырды ки, бир-бирләрини баша дүшмәсинләр. Бәс бунун нәтиҹәси нә олду? «Рәбб онлары орадан бүтүн јер үзүнә јајды» (Јарадылыш 11:5-8). Бу һадисә Бабил гүлләсини тикәнләрә әмәллиҹә дәрс олду. Инсанын планлары Аллаһын нијјәтиндән фәргләнәндә ‘Рәббин нијјәти һәјата кечир’ (Сүлејманын мәсәлләри 19:21). Бәс сиз кечмишин бу кими дәрсләриндән өзүнүзә нәтиҹә чыхарырсынызмы?

Варлы адамын ағылсызлығы

Бәлкә дә, сиз гүллә уҹалтмағы планлашдырмырсыныз, анҹаг бу ҝүн чохлары бөјүк банк һесабы ачмағы вә мадди вәсаитләр топламағы планлашдырырлар ки, гоҹаланда, јахуд тәгаүдә чыханда раһат јашасынлар. Зәһмәтин бәһрәсиндән зөвг алмаг истәји тәбиидир. Сүлејман јазырды: «Һәр кәсин јејиб-ичмәји вә ҝөрдүјү ишдән зөвг алмағы Аллаһын бәхшишидир» (Ваиз 3:13).

Бу бәхшишдән неҹә истифадә етмәјимизә ҝөрә Јеһованын гаршысында мәсулијјәт дашыјырыг. Тәхминән 2 000 ил бундан әввәл Иса Мәсиһ бу мәгамы шаҝирдләринә бир мәсәллә баша салды. О деди: «Варлы бир адамын торпағы бол мәһсул верди; о өзү-өзлүјүндә дүшүнүрдү: “Нә едим? Мәһсулумун бәһрәсини гојмаға јерим јохдур”. Вә деди: “Белә едәрәм: анбарларымы сөкүб даһа бөјүкләрини тикәрәм вә бүтүн мәһсулуму вә бүтүн дөвләтими ораја топларам. Вә ҹаныма дејәрәм: Еј ҹаным! Узун илләр үчүн топланмыш чохлу дөвләтин вар: раһат ол; је, ич, кеф чәк”» (Лука 12:16-19). Бу варлы адамын мәгсәди ағлабатан ҝөрүнүр, елә дејилми? Јухарыда адыны чәкдијимиз ҹөвүзгыран гушу кими, мәсәлдәки киши дә санки ҝәләҹәк үчүн тәдарүк ҝөрүрдү.

Анҹаг онун дүшүнҹә тәрзиндә јанлышлыг вар иди. Иса сөзүнә давам етди: «Амма Аллаһ она деди: “Ағылсыз! Сәнин ҹаныны елә бу ахшам алаҹаглар; сәнин һазырладығын шејләр бәс кимә галаҹаг?”» (Лука 12:20). Исанын сөзләри Сүлејманын иш вә онун јахшы бәһрәләринин Аллаһын бәхшиши олмасы һагда дедикләринә зидд идими? Хејр. Бәс Исанын сөзүнүн ҹаны нә иди? О деди: «Аллаһ гаршысында зәнҝин олмаг әвәзинә, өзү үчүн дөвләт топлајан һәр бир адамын агибәти белә олур» (Лука 12:21).

Иса динләјиҹиләринә баша салырды ки, Јеһова һәр бир инсанын Ону нәзәрә алараг план гурмасыны истәјир. Варлы адам Аллаһ јолуна бағлылығы, һикмәти вә мәһәббәти артырмаға чалышмагла Аллаһ гаршысында зәнҝин ола биләрди. Бу адамын сөзләриндән ҝөрүнүр ки, онун нә белә шејләрә, нә касыбларын јығмасы үчүн мәһсул сахламаға, нә дә Јеһоваја тәгдим гурбанлары ҝәтирмәјә марағы вар иди. Бу ҹүр руһани мәгсәдләрә вә фәдакарлыға онун һәјатында јер јох иди. Онун бүтүн планлары өз истәк вә раһатлығы әтрафында дөвр едирди.

Бу ҝүн бир чох инсанларын мәгсәдләринин Исанын мәсәлиндәки варлы адамынкына бәнзәдијини мүшаһидә етмисинизми? Истәр варлы олаг, истәрсә касыб, ҝүндәлик еһтијаҹларын вә истәкләрин руһани тәләбатлары боғмасына јол верәрәк чох асанлыгла вар-дөвләтә һәрислијин тәләсинә дүшә биләрик. Бу тәләдән неҹә гачмаг олар?

«Нормал» һәјат арзусу

Ола биләр, Исанын мәсәлиндәки варлы адамдан фәргли олараг, сиз мадди ҹәһәтдән корлуг чәкирсиниз. Буна бахмајараг, әҝәр аиләлисинизсә, аиләнизин ҝүндәлик тәләбатларыны тәмин етмәјә, мүмкүнсә, өвладларыныза әсас тәһсили вермәјә чалышырсыныз. Әҝәр субајсынызса, чох еһтимал ки, планларыныза башгаларына јүк олмамаг үчүн иш тапмаг вә ја ишинизи итирмәмәк дахилдир. Бунлар тәрифәлајиг мәгсәдләрдир (2 Салоникилиләрә 3:10-12; 1 Тимотејә 5:8).

Һәтта белә олдугда да, нормал һесаб олунан һәјат тәрзи — ишләмәк, јемәк, ичмәк нәтиҹәсиндә инсан Аллаһын ирадәсинә зидд даврана биләр. Бу неҹә мүмкүндүр? Иса демишдир: «Нуһун ҝүнләри неҹә идисә, Инсан Оғлунун ҝәлиши дә елә олаҹагдыр. Чүнки Нуһун ҝәмијә ҝирдији ҝүнә гәдәр, туфандан әввәлки ҝүнләрдә, инсанлар јејиб, ичиб, евләниб, әрә ҝедирдиләр. Вә туфан ҝәлиб һамысыны апарынҹаја гәдәр неҹә бихәбәр идиләрсә [«фикир вермирдиләрсә», ЈД], Инсан Оғлунун ҝәлиши дә бу ҹүр олаҹагдыр» (Матта 24:37-39).

Дашгындан габаг, үмумиликдә инсанлар нормал һесаб етдикләри һәјаты јашајырдылар. Анҹаг проблем онда иди ки, онлар Аллаһын дашгын ҝөндәрәрәк пис дүнјаны мәһв етмәк нијјәтинә ‘фикир вермирдиләр’. Шүбһә јохдур ки, онлар Нуһун гејри-нормал һәјат сүрдүјүнү дүшүнүрдүләр. Амма Дашгын ҝәләндә мәлум олду ки, мәһз Нуһ вә онун аиләси мүдрик һәјат тәрзи сүрүр.

Бу ҝүн бүтүн әламәтләр сүбут едир ки, биз дөврүн сонунда јашајырыг (Матта 24:3-12; 2 Тимотејә 3:1-5). Тезликлә Аллаһын Падшаһлығы һазыркы системи «әзиб-дағыдаҹаг» (Даниел 2:44). Һәмин Падшаһлығын һакимијјәти алтында јер үзү ҹәннәтә чевриләҹәк. О, хәстәлик вә өлүмү арадан галдыраҹаг (Јешаја 33:24; Вәһј 21:3-5). Јер үзүндәки бүтүн варлыглар әмин-аманлыгда јашајаҹаг, һеч вахт аҹлыг ҝөрмәјәҹәкләр (Мәзмур 72:16; Јешаја 11:6-9).

Анҹаг Јеһова нијјәт едиб ки, фәалијјәтә кечмәздән әввәл Падшаһлыг һаггында хош хәбәр ‘халгларын һамысына шәһадәт олараг бүтүн дүнјада тәблиғ олунсун’ (Матта 24:14). Аллаһын нијјәтинә ујғун олараг, тәхминән једди милјон Јеһованын Шаһиди 236 өлкә вә әразидә дөрд јүздән чох дилдә хош хәбәри тәблиғ едир.

Јеһованын Шаһидләринин һәјат тәрзи дүнјадакы инсанлара гәрибә, һәтта ҝүлмәли ҝөрүнә биләр (2 Петер 3:3, 4). Дашгындан әввәл јашајанлар кими, бу ҝүн дә инсанларын әксәријјәтинин башы ҝүндәлик ишләрә гарышыб. Онлар бу ҝүн ҹәмијјәтин нормал һесаб етдији кими јашамаг истәмәјәнләри ағылсыз һесаб едирләр. Анҹаг Аллаһын вәдләринә иман едән инсанларын нөгтеји-нәзәринҹә, әсл ағыллы һәјат Аллаһа хидмәтә ҹәмләшән һәјатдыр.

Буна ҝөрә дә, касыб, варлы вә ја орта тәбәгәдән олмағымыздан асылы олмајараг, јахын ҝәләҹәклә бағлы планларымызы вахташыры нәзәрдән кечирмәк јахшы оларды. Белә етдикҹә, өзүнүздән сорушун: «Планларым Аллаһын нијјәтинә ујғундурму?»

[11-ҹи сәһифәдәки шәкил]

Инсанларын планлары Аллаһын нијјәти илә тутушмајанда, һәјата кечән Јеһованын нијјәти олур

[12-ҹи сәһифәдәки шәкил]

Исанын мәсәлиндәки варлы адам план гуранда Аллаһын нијјәтини нәзәрә алмамышды