Иса Мәсиһдән нә өјрәнирик?
Башгалары илә неҹә рәфтар етмәк һагда
Нәјә ҝөрә хејирхаһ олмалыјыг?
Инсанлар сизинлә пис рәфтар едәндә дә онларла хејирхаһлыгла давранырсынызмы? Әҝәр Иса Мәсиһи тәглид етмәк истәјириксә, бизә нифрәт едәнләрә гаршы да хејирхаһ олмалыјыг. О демишдир: «Әҝәр сизи севәнләри севирсинизсә, һансы тәшәккүрә лајигсиниз? Чүнки ҝүнаһкарлар да онлары севәнләри севирләр... Амма дүшмәнләринизи севин... вә сиз Һагг-Тәаланын оғуллары олаҹагсыныз. Чүнки О, нанкорлара вә пис адамлара гаршы да хејирхаһдыр» (Лука 6:32-36; 10:25-37).
Нәјә ҝөрә бағышламалыјыг?
Биз сәһв едәндә Аллаһын бизи бағышламасыны истәјирик. Мәсиһ өјрәдирди ки, бизи бағышламасы үчүн Аллаһа дуа етмәк дүзҝүндүр (Матта 6:12). Анҹаг Иса һәмчинин демишди ки, Аллаһ бизи јалныз башгаларыны бағышладығымыз тәгдирдә бағышлајаҹаг. О демишдир: «Инсанларын тәгсирләрини бағышласаныз, сәмави Атаныз сизи дә бағышлар. Амма сиз инсанларын ҝүнаһларыны бағышламасаныз, Атаныз да сизин ҝүнаһларынызы бағышламаз» (Матта 6:14, 15).
Аиләдә хошбәхтлијә неҹә наил олмаг олар?
Иса Мәсиһ һеч вахт аилә гурмаса да, аилә һәјатыны хошбәхт етмәк һагда ондан чох шеј өјрәнә биләрик. О һәм сөзләри, һәм дә һәрәкәтләри илә бизә нүмунә гојуб. Ҝәлин нөвбәти үч мәгамы нәзәрдән кечирәк:
1. Әр арвадыны өз бәдәни кими севмәлидир. Иса әрләр үчүн нүмунә гојуб. О өз шаҝирдләринә демишдир: «Сизә бир-биринизи севәсиниз дејә јени бир әмр верирәм». Онлар бир-бирләрини неҹә севмәли идиләр? Исанын онлары севдији кими (Јәһја 13:34). Мүгәддәс Китаб бу принсипи әрләрә тәтбиг едәрәк дејир: «Әрләр, арвадларынызы севин, неҹә ки, Мәсиһ дә иманлылар ҹәмијјәтини севди вә онун уғрунда Өзүнү фәда етди... Беләҹә әрләр дә өз арвадларыны, өз бәдәнләри гәдәр севмәлидирләр. Өз арвадыны севән өзүнү севир. Чүнки һеч ким һеч заман өз бәдәнинә нифрәт етмәмишдир, лакин Рәбб ҹәмијјәти етдији кими, ону једирир вә бәсләјир» (Ефеслиләрә 5:25, 28, 29).
2. Әрлә арвад бир-биринә сәдагәтли олмалыдырлар. Никаһдан кәнар ҹинси әлагә Аллаһа гаршы ҝүнаһдыр вә аиләни дағыдыр. Иса Мәсиһ демишдир: «Охумамысынызмы... “Буна ҝөрә инсан ата-анасыны бурахаҹаг вә арвадына бағланаҹагдыр. Икиси дә бир бәдән олаҹагдыр. Белә ки, онлар артыг ики дејил, бир бәдәндирләр. Беләликлә, Аллаһын бирләшдирдијини инсан ајырмамалыдыр”... Мән сизә дејирәм: Ким ҹинси әхлагсызлыгдан башга сәбәблә арвадыны бошајыб башгасы илә евләнәрсә, зина едәр» (Матта 19:4-9).
3. Ушаглар валидејнләринә итаәт етмәлидирләр. Мәсиһ өзүнүн камил, валидејнләринин исә гејри-камил олмасына бахмајараг, ушаг оланда онлара табе олурду. Мүгәддәс Китабда 12 јашлы Иса һагда дејилир: «Иса онларла [валидејнләри илә] ҝетди вә Назаретә ҝәлди; вә онлара итаәт едирди» (Лука 2:51; Ефеслиләрә 6:1-3).
Нәјә ҝөрә бу принсипләри тәтбиг етмәк лазымдыр?
Мәсиһ шаҝирдләринә өјрәтдикләринә даир демишди: «Әҝәр бу шејләри билирсиниз вә онлара әмәл едирсинизсә, бәхтијарсыныз» (Јәһја 13:17). Һәгиги мәсиһчи олмаг үчүн биз Исанын башгалары илә неҹә рәфтар етмәјә даир вердији мәсләһәтә риајәт етмәлијик. О демишди: «Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк» (Јәһја 13:35).
Даһа әтрафлы мәлуматы «Мүгәддәс Китаб әслиндә нә өјрәдир?»a китабынын 14-ҹү фәслиндән ала биләрсиниз.
[Һашијә]
a Јеһованын Шаһидләри тәрәфиндән дәрҹ едилмишдир.
[16-ҹы сәһифәдәки шәкил]
Исанын исрафчыл оғул һагда мәсәли хејирхаһлығын вә бағышламағын ваҹиб олдуғуну өјрәдир (Лука 15:11-32)
[17-ҹи сәһифәдәки шәкил]
Әрлә арвад бир-биринә садиг олмалыдырлар