Јеһованын Шаһидләри аиләләри дағыдырмы?
«ҺӘЈАТ ЈОЛДАШЫНДАН бири өз динини дәјишсә, аилә дағылар». Чохлары белә фикирләшир. Һәрдән бу хәбәрдарлыг Јеһованын Шаһиди олмаг истәјән адама үнванланыр. Бәс бу иддиа нә дәрәҹәдә һәгигәтдир?
Ајдындыр ки, аиләли адамын динлә марагланмаға башламасы вә ја дәдә-бабадан галма динини дәјишмәси әкс тәрәфи сарсыда биләр. Бу, тәшвиш, мәјуслуг вә һәтта гәзәбә сәбәб ола биләр.
Адәтән, өз динини дәјишмәјә илк еһтијаҹ дујан гадынлар олур. Әҝәр сизин арвадыныз Јеһованын Шаһидләри илә Мүгәддәс Китабы өјрәнирсә, бу, сизин аиләнизә неҹә тәсир едә биләр? Әҝәр сиз Јеһованын Шаһидләри илә Мүгәддәс Китабы өјрәнирсинизсә, әринизин тәлашыны азалтмаг үчүн нә едә биләрсиниз?
Гәрарын әрә тәсири
Австралијада јашајан Маркын арвады Јеһованын Шаһидләри илә Мүгәддәс Китабы өјрәнмәјә башлајанда, онлар артыг 12 ил иди ки, евли идиләр. Марк дејир: «Мәним хошбәхт аиләм вә јахшы ишим вар иди. Һәјат ҝөзәл иди. Сонра арвадым Јеһованын Шаһидләри илә Мүгәддәс Китабы өјрәнмәк гәрарына ҝәлди. Мән о андаҹа һисс етдим ки, бу гәрар һәјатымызы дәјишдирәҹәк. Әввәл-әввәл арвадымын Мүгәддәс Китабла марагланмасы мәни бир аз нараһат едирди, анҹаг Јеһованын Шаһиди кими вәфтиз олмаг гәрарыны билдирәндә ганым әмәлли-башлы гаралды».
Марк һәјат јолдашынын јени дининә ҝөрә аиләләринин дағылаҹағындан горхмаға башлады. О, һәјат јолдашынын Мүгәддәс Китабы өјрәнмәји дајандырмасыны вә Јеһованын Шаһидләри илә бүтүн әлагәләрини кәсмәсини истәјирди. Анҹаг гәти мүгавимәт ҝөстәрмәјиб, вәзијјәтин бир мүддәт өз ахары илә ҝетмәсинә јол верди. Бәс онун аиләсинин ахыры неҹә олду?
Марк дејир: «Хошбәхтликдән бизим аиләмиз инди әввәлкиндән дә мөһкәмдир. Арвадымын 15 ил әввәл Јеһованын Шаһиди олмасындан бәри мүнасибәтләримиз даһа да јахшылашыб». Онларын никаһынын хошбәхт олмасына нә көмәк етди? Марк дејир: «Кечмишә нәзәр саланда ҝөрүнүр ки, буна даһа чох һәјат јолдашымын Мүгәддәс Китабын фајдалы мәсләһәтләрини тәтбиг етмәси сајәсиндә наил олунуб. О, һәмишә мәнимлә һөрмәтлә давранмаға чалышыб».
Аиләнин хошбәхтлијини горумуш гадынлардан мәсләһәт
Әҝәр сиз Јеһованын Шаһидләри илә Мүгәддәс Китабы өјрәнирсинизсә, һансы сөзләрлә вә һәрәкәтләрлә әринизин кечирдији тәлашы азалда биләрсиниз? Дүнјанын мүхтәлиф јерләриндән олан гадынларын шәрһләри үзәриндә дүшүнүн.
Сакико, Јапонија: «Мән артыг 31 илдир ки, әрдәјәм вә үч оғул анасыјам. 22 ил бундан әввәл Јеһованын Шаһиди олдум. Ејни иманда олмајан әримлә јашамаг һәрдән јүкә чеврилир. Анҹаг ‘ешитмәкдә ити, сөз сөјләмәкдә тәмкинли вә гәзәбдә тәмкинли олун’ мәсләһәтини һәјата кечирмәк үчүн чох чалышырам (Јагуб 1:19). Мән әримә гаршы меһрибан олмаға вә Мүгәддәс Китаб принсипләринә зидд ҝетмәјәндә, истәкләрини һәјата кечирмәјә сәј ҝөстәрирәм. Бу бизим аиләмизин хошбәхтлијинә көмәк едир».
Надежда, Русија: «28 илдир ки, аиләлијәм, Јеһованын Шаһиди кими вәфтиз олунмағымдан исә 16 ил кечиб. Мүгәддәс Китабы өјрәнмәздән әввәл әрими аиләнин башчысы кими гәбул етмирдим. Бир чох мәсәләләрә даир өз билдијим кими гәрар чыхармағы хошлајырдым. Анҹаг тәдриҹән Мүгәддәс Китаб принсипләрини тәтбиг етмәјимин аиләмизә хошбәхтлик вә сүлһ ҝәтирдијини ҝөрдүм (1 Коринфлиләрә 11:3). Итаәткарлыг ҝөстәрмәк јаваш-јаваш мәним үчүн асанлашды, әрим дә мәндәки дәјишикләри ҝөрмәјә башлады».
Марли, Бразилија: «Ики өвладым вар вә 21 илдир ки, аилә гурмушам. 16 ил әввәл Јеһованын Шаһиди кими вәфтиз олдум. Өјрәндим ки, Јеһова Аллаһ әрлә арвадын ајрылмасыны јох, бир јердә олмасыны истәјир. Буна ҝөрә дә, мән јахшы һәјат јолдашы олмаға, Јеһованы вә әрими севиндирән тәрздә давранмаға вә данышмаға чалышырам».
Лариса, Русија: «19 ил әввәл Јеһованын Шаһиди оланда анладым ки, һәјатымда мүтләг дәјишиклик етмәлијәм. Әрим Мүгәддәс Китабын мәнә мүсбәт тәсир етдијини — ону даһа чох гијмәтләндирмәјә көмәк етдијини ҝөрүр. Әввәлләр ушагларын тәрбијәси илә бағлы тез-тез мүбаһисәмиз дүшүрдү, анҹаг инди арамызда бу саһәдә фикир ајрылығы јохдур. Әрим ушаглары өзүмлә јығынҹаг ҝөрүшләринә апармаға иҹазә верир, чүнки о баша дүшүр ки, орада ушаглар јалныз јахшы шејләр өјрәнирләр».
Валкерија, Бразилија: «Мән 19 илдир ки, аиләлијәм вә бир оғул анасыјам. Он үч ил бундан әввәл Јеһованын Шаһиди олдум. Әввәл-әввәл әрим тәблиғ етмәјими истәмирди. Анҹаг она мүлајимликлә ҹаваб вермәји өјрәндим вә Мүгәддәс Китабын хасијјәтимә мүсбәт тәсир етмәсини ҝөрмәјә көмәк етдим. Әрим тәблиғ хидмәтиндә иштирак етмәјин мәним үчүн нә дәрәҹәдә ваҹиб олдуғуну тәдриҹән баша дүшдү. Инди о, руһани фәалијјәтимә там дәстәк олур. Узаг әразиләрдә Мүгәддәс Китаб өјрәнмәси кечирәндә һәтта мәни өз машыны илә апарыр вә чөлдә отуруб, сәбирлә өјрәнмәни гуртармағымы ҝөзләјир».
Фајдалы мәсләһәтләр мәнбәји
Әҝәр јолдашыныз Јеһованын Шаһидләри илә Мүгәддәс Китабы өјрәнирсә, бунун аиләнизи дағыдаҹағындан горхмајын. Дүнјанын мүхтәлиф јерләриндән олан бир чох аиләли инсанларын баша дүшдүјү кими, Мүгәддәс Китаб никаһын хошбәхт олмасы үчүн фајдалы мәсләһәтләр мәнбәјидир.
Јеһованын Шаһиди олмајан бир әр сәмими етираф етмишди: «Арвадым Јеһованын Шаһидләринин етигадыны гәбул едәндә әввәлҹә ганым гаралмышды, анҹаг инди нәтиҹәни ҝөрәндә баша дүшүрәм ки, чәтин дә олса, етдијим дәјишикликләрә дәјәрмиш». Бир башгасы арвады һаггында белә демишди: «Арвадымын садиглији, гәтијјәтлилији, нөгсансызлығы мәндә Јеһованын Шаһидләринә гаршы бөјүк рәғбәт һисси ојадыб. Онун дини етигадларынын аиләмизә бөјүк фајдасы дәјди. Биз бир-биримизи нәзәрә алыр вә никаһымыза өмүрлүк бирлик кими бахырыг».
[25-ҹи сәһифәдәки чәрчивә/шәкил]
Јеһованын Шаһидләри никаһа неҹә бахырлар?
Јеһованын Шаһидләри Мүгәддәс Китаба Аллаһын илһамланмыш Кәламы кими бахырлар. Буна ҝөрә дә, онлар никаһ һаггында орада дејиләнләрә ҹидди јанашырлар. Мүгәддәс Китабын нөвбәти суаллара неҹә ҹаваб вердијинә диггәт јетирин:
▪ Јеһованын Шаһидләри һәмиманлыларыны Шаһид олмајан һәјат јолдашындан ајры јашамаға тәшвиг едирләрми? Хејр. Һәвари Павел јазырды: «Әҝәр бир гардашымызын арвады иманлы дејилсә, амма онунла јашамаға разыдырса, әри ону бошамасын. Вә еләҹә дә бир арвадын әри иманлы дејилсә, амма онунла јашамаға разыдырса, арвады ондан бошанмасын» (1 Коринфлиләрә 7:12, 13). Јеһованын Шаһидләри бу әмрә табе олурлар.
▪ Јеһованын Шаһиди олан гадын, әҝәр әри иманына шәрик дејилсә, онун истәкләринә мәһәл гојмамаға тәшвиг олунурму? Хејр. Һәвари Петер јазырды: «Еј гадынлар, сиз дә ејни шәкилдә өз әрләринизә табе олун ки, бәзиләри кәлама итаәт етмәзләрсә, еһтирам ичиндә тәмиз һәјатынызы мүшаһидә едәрәк, сиз арвадларын рәфтары илә һеч бир сөз сөјләнмәдән фәтһ едилсинләр» (1 Петер 3:1, 2).
▪ Јеһованын Шаһидләри әрин мүтләг һакимијјәтә саһиб олдуғунуму өјрәдир? Хејр. Һәвари Павел демишди: «Буну да билмәнизи истәјирәм ки, һәр әрин башы Мәсиһ, арвадын башы әр, Мәсиһин башы исә Аллаһдыр» (1 Коринфлиләрә 11:3). Мәсиһчи гадын әринә аиләнин башчысы кими һөрмәт едир. Бунунла белә, әрин һакимијјәти нисбидир. О, Аллаһа вә Мәсиһә һесабат верәҹәк. Буна ҝөрә дә, әр арвадындан Аллаһын ганунуну позаҹаг тәрздә һәрәкәт етмәји тәләб едәрсә, мәсиһчи гадын ‘инсанлардан артыг, Аллаһа итаәт едәҹәк’ (Һәвариләрин ишләри 5:29).
▪ Јеһованын Шаһидләри бошанмағы гадаған едирләрми? Хејр. Иса Мәсиһ демишдир: «Мән сизә дејирәм: Ким ҹинси әхлагсызлыгдан башга сәбәблә арвадыны бошајыб башгасы илә евләнәрсә, зина едәр» (Матта 19:9). Буна ҝөрә дә Јеһованын Шаһидләри Исанын нөгтеји-нәзәрини рәһбәр тутараг дүшүнүрләр ки, хәјанәт бошанмаға әсас верир. Анҹаг онлар һәм дә там әминдирләр ки, тутарлы олмајан сәбәбләрә ҝөрә никаһы позмаг олмаз. Онлар өз һәмиманлыларыны Исанын нөвбәти сөзләринә әмәл етмәјә тәшвиг едирләр: «Инсан ата-анасыны бурахаҹаг вә арвадына бағланаҹагдыр. Икиси дә бир бәдән олаҹагдыр... Беләликлә, Аллаһын бирләшдирдијини инсан ајырмамалыдыр» (Матта 19:5, 6).