Мәсиһ кими итаәтли вә ҹәсур олун

«Ҹәсур олун, Мән дүнјаја галиб ҝәлдим» (ЈӘҺ. 16:33).

1. Иса Аллаһа нә дәрәҹәдә итаәт едирди?

ИСА МӘСИҺ һәмишә Аллаһын ирадәсини јеринә јетирирди. Сәмави Атасына итаәтсизлик ҝөстәрмәк онун ағлына белә ҝәлмирди (Јәһ. 4:34; Ибр. 7:26). Лакин јер үзүндә гаршылашдығы сынаглары нәзәрә алсаг, итаәткар галмаг онун үчүн һеч дә һәмишә асан дејилди. Јер үзүндә хидмәтинә башлајанда, Шејтан да дахил олмагла, дүшмәнләри ону салеһлик јолундан дөндәрмәк үчүн мүхтәлиф һијләләрә әл атыр вә ја она һәдә-горху ҝәлирдиләр (Мат. 4:1-11; Лука 20:20-25). Дүшмәнләр Исаја әгли, емосионал вә физики изтираблар чәкдирирдиләр. Нәһајәтдә, онлар онун ишҝәнҹә дирәјиндә едам едилмәсинә мүвәффәг олдулар (Мат. 26:37, 38; Лука 22:44; Јәһ. 19:1, 17, 18). Шиддәтли әзаблара вә сынаглара бахмајараг, Иса «өлүмәдәк итаәткарлыг етди» (Филип. 2:8).

2, 3. Шиддәтли изтираблара бахмајараг сонадәк итаәтли олан Исанын нүмунәсиндән нә өјрәнә биләрик?

² Иса јер үзүндә јашајаркән башына ҝәлән һадисәләрдән итаәткарлығын јени јөнләрини өјрәнмишди (Ибр. 5:8). Елә тәәссүрат јарана биләр ки, Иса Јеһоваја ибадәтлә бағлы һәр шеји билирди. Чүнки о, милјардларла илләр әрзиндә Јеһова илә үнсијјәтдән зөвг алыр вә јарадылыш заманы Онун јанында «маһир уста» (ЈД) кими чалышырды (Сүл. мәс. 8:30). Анҹаг изтираблара бахмајараг, ҹисмани бәдәндә оларкән иманда тәһәммүл ҝөстәрмәси сајәсиндә нөгсансызлығы камала јетишди. Бунун сајәсиндә Атасы илә мүнасибәтләри даһа да мөһкәмләнди. Бәс онун тәҹрүбәсиндән биз нә өјрәнә биләрик?

³ Иса камил олса да, Аллаһ гаршысында мүкәммәл итаәткарлығыны горумагда өзүнә ҝүвәнмирди. Итаәтли галмаг үчүн о, көмәји Аллаһдан диләјирди. (Ибраниләрә 5:7 ајәсини оху.) Аллаһ гаршысында итаәткарлығымызы горумаг үчүн биз дә һәлим олмалы вә мүтәмади олараг Ондан дуада јардым истәмәлијик. Буна ҝөрә дә һәвари Павел мәсиһчиләрә мәсләһәт ҝөрүрдү: ‘Мәсиһ Исада олан фикир сизин аранызда да олсун. О, тәвазөкарлыг ҝөстәрди вә өлүмәдәк итаәткарлыг етди’ (Филип. 2:5-8). Исанын нүмунәси позғун ҹәмијјәтдә инсанын итаәткар галмасынын мүмкүн олдуғуну нүмајиш етдирди. Бәли, Иса камил иди, бәс гејри-камил инсан олан бизләр һаггында нә демәк олар?

Гејри-камиллијимизә рәғмән итаәткар ола биләрик

4. Бизә бәхш едилән ирадә азадлығы үзәримизә һансы мәсулијјәти гојур?

⁴ Аллаһ Адәмлә Һәвваны јараданда онлара шүур вә ирадә азадлығы бәхш етди. Онларын өвладлары олан бизләр дә ирадә азадлығына маликик. Бу, нә демәкдир? Бу о демәкдир ки, биз һәм јахшы, һәм дә пис гәрарлар гәбул едә биләрик. Башга сөзләрлә десәк, Аллаһ Она итаәт едиб-етмәмәји өз өһдәмизә бурахыб. Белә бөјүк азадлыг үзәримизә ҹидди мәсулијјәт вә ҹавабдеһлик гојур. Мәнәви характер дашыјан гәрарларымыз бизә ја һәјат, ја да өлүм ҝәтирә биләр. Онлар һәмчинин әһатәмиздә оланлара да өз тәсирини ҝөстәрир.

5. Һәр биримиз нә илә мүбаризә апармалы олуруг вә бу мүбаризәдән неҹә башыуҹа чыха биләрик?

⁵ Гејри-камиллији мирас алдығымыздан итаәткарлыг биздә өз-өзүнә әмәлә ҝәлмир. Буна ҝөрә дә Аллаһын ганунларына итаәт етмәк һәмишә асан дејил. Павел дә ејни чәтинликлә мүбаризә апармалы олурду. О јазмышды: «Мән үзвләримдә башга бир ганун да ҝөрүрәм ки, о, ағлымын тәсвиб етдији ганун илә мүбаризә едир вә үзвләримдә олан ҝүнаһ ганунуна мәни әсир едир» (Ром. 7:23). Әлбәттә, һеч бир гурбан тәләб олунмајанда, ағры-аҹы вә ја нараһатчылыг олмајанда итаәтли олмаг даһа асандыр. Бәс итаәткар олмаг истәјимизлә ‘ҹисмани еһтирас вә ҝөзләрин еһтирасы’ бир-биринә зидд ҝедәндә, неҹә? Бу кими пис арзулар гејри-камиллијимиздән вә бизи әһатә едән ‘бу дүнјанын руһунун’ тәсириндән ирәли ҝәлир вә адәтән, чох ҝүҹлү олур (1 Јәһ. 2:16; 1 Кор. 2:12). Онлара мүгавимәт ҝөстәрмәк үчүн биз чәтин вәзијјәтә дүшмәздән вә ја ширникдириҹи тәсирләрлә үзләшмәздән өнҹә ‘үрәјимизи һазырламалы’ вә һәр нә олурса-олсун, Јеһоваја итаәткар галмаг әзминдән дөнмәмәлијик. Мүгәддәс Китабда үрәкләрини һазырладыглары үчүн сынаглардан башыуҹа чыхан бир чох инсанларын нүмунәси јерләшир (Езра 7:10, КМ; Дан. 1:8, КМ).

6, 7. Шәхси өјрәнмәнин мүдрик гәрарлар гәбул етмәкдә бизә неҹә көмәк етдијини нүмунә әсасында ҝөстәрин.

⁶ Үрәјимизи һазырламағын үсулларындан бири Мүгәддәс Јазылары вә она әсасланан нәшрләри чалышганлыгла арашдырмагдыр. Өзүнү белә бир вәзијјәтдә тәсәввүр ет: бир ахшам шәхси өјрәнмә илә мәшғул олдугдан сонра дуада Јеһовадан мүгәддәс руһ истәмисән ки, Онун Кәламындан өјрәндикләрини тәтбиг етмәкдә сәнә көмәк етсин. Нөвбәти ахшам исә телевизорда бир филмә бахмағы планлашдырмысан. Һәмин филмин тәнгидчиләрин мүсбәт рәјини газандығыны, ејни заманда филмдә әхлагсыз вә зоракы сәһнәләрин јер алдығыны билирсән.

⁷ Сән Павелин Ефеслиләрә 5:3 ајәсиндә јазылмыш мәсләһәти үзәриндә дүшүнүрсән: «Ҹинси әхлагсызлығын вә һәр ҹүр натәмизлијин, јахуд тамаһын гој аранызда ады белә чәкилмәсин, чүнки бунлар мүгәддәсләрә јарашмаз». Сән һәм дә онун Филипилиләрә 4:8 ајәсиндә јазылан мәсләһәтини дә јадына салырсан. (Ајәни оху.) Аллаһдан илһам алмыш бу мәсләһәтләри ҝөтүр-гој едәрәк өзүндән сорушурсан: «Әҝәр мән билә-билә бу кими филмләрә бахмагла үрәјими вә зеһними тәһлүкәјә мәруз гојурамса, демәк олармы ки, Аллаһа там итаәткарлыг ҝөстәрән Исанын нүмунәсини тәглид едирәм?» Сән нә едәҹәксән? Јенә дә филмә бахмаг фикриндә галаҹагсан?

8. Нәјә ҝөрә биз јүксәк руһани вә әхлаг нормаларына һәмишә риајәт етмәлијик?

⁸ Зоракы вә әхлагсыз әјләнҹәләр кими пис достлугларын тәсиринә мүгавимәт ҝөстәрмәк үчүн кифајәт гәдәр ҝүҹлү олдуғумузу дүшүнәрәк Јеһованын руһани вә әхлаг нормаларыны дәјәрдән салмагла бөјүк сәһв етмиш олардыг. Биз өзүмүзү вә өвладларымызы Шејтанын руһунун позуҹу тәсириндән һифз етмәлијик. Истифадәчиләр өз компүтерләрини мәлуматы мәһв едән, әмәлијјат системинә хәләл јетирән вә һәтта бир компүтердән диҝәринә кечә билән вируслардан горумаг үчүн габаглајыҹы тәдбирләр ҝөрүрләр. Өзүмүзү Шејтанын ‘һијләләриндән’ горумаг үчүн мәҝәр биздән даһа чох сајыг олмаг тәләб олунмурму? (Ефес. 6:11).

9. Нәјә ҝөрә Јеһоваја һәр ҝүн табе олмаг гәтијјәтиндән дөнмәмәлијик?

⁹ Демәк олар ки, һәр ҝүн Јеһованын ирадәсинә ујғун давраныб-давранмамаг сечими гаршысында дуруруг. Хиласа наил олмаг үчүн биз Аллаһа итаәткар олмалы вә Онун салеһ принсипләринә әсасән јашамалыјыг. Һәтта «өлүмәдәк» садиг галараг Мәсиһин итаәткарлыг нүмунәсини изләмәклә әсил имана малик олдуғумузу ҝөстәририк. Јеһова садиглијимизи мүтләг мүкафатландыраҹаг. Иса вәд етмишдир: «Ахыра гәдәр сәбр едән хилас олаҹагдыр» (Мат. 24:13). Ајдындыр ки, бу, Исанын тәзаһүр етдирдији әсил ҹәсарәти өзүмүздә инкишаф етдирмәји тәләб едир (Мәз. 31:24).

Иса ән бөјүк ҹәсарәт нүмунәсидир

10. Биз һансы тәзјигләрлә үзләшә биләрик вә белә һалларда нә етмәлијик?

¹⁰ Биз Шејтанын дүшүнҹә вә давраныш тәрзинин һөкм сүрдүјү дүнјада јашајырыг, буна ҝөрә дә онун позуҹу тәсиринә ујмамаг үчүн бизә ҹәсарәт ҝәрәкдир. Мәсиһчиләр әхлаги, иҹтимаи, мадди вә дини ҹәһәтдән тәзјигләрлә үзләширләр ки, бу да өз нөвбәсиндә, онларын Јеһованын салеһ јолларындан узаглашмасына ҝәтириб чыхара биләр. Чохлары аилә үзвләри тәрәфиндән тәгибләрә мәруз галырлар. Бәзи өлкәләрдә тәһсил мүәссисәләриндә тәкамүл нәзәријјәси даһа исрарла тәдрис олунур вә атеизм ҝениш вүсәт алыр. Бу кими ҝүҹлү тәзјигләрлә үзләшән бизләр садәҹә әлимизи әлимизин үстүнә гојуб отура билмәрик. Биз мүгавимәт ҝөстәрмәк үчүн һәрәкәт етмәли вә бунунла да өзүмүзү горумалыјыг. Исанын нүмунәси неҹә мүвәффәгијјәт газана биләҹәјимизи ҝөстәрир.

11. Исанын нүмунәси үзәриндә дүшүнмәк бизи неҹә ҹәсарәтләндирә биләр?

¹¹ Иса өз шаҝирдләринә демишди: «Дүнјада кәдәриниз олаҹагдыр; амма ҹәсур олун, Мән дүнјаја галиб ҝәлдим» (Јәһ. 16:33). О, һеч вахт дүнјанын тәсиринә ујмурду. О, һеч вахт јол вермирди ки, дүнја ону тәблиғ етмәк тапшырығындан јајындырсын вә ја Аллаһын дүзҝүн давраныш вә һәгиги ибадәт үчүн гојдуғу нормалара хор бахмасына сәбәб олсун; буна биз дә јол вермәмәлијик. Иса дуасында шаҝирдләри һаггында демишди: «Мән дүнјадан олмадығым кими, онлар да дүнјадан дејилләр» (Јәһ. 17:16). Мәсиһин ҹәсарәт нүмунәсини арашдырмаг вә онун үзәриндә дүшүнмәк бу дүнјадан узаг дурмаг үчүн бизә лазыми ҹәсарәт верәҹәк.

Исадан ҹәсарәтли олмағы өјрәнин

12-14. Исанын ҹәсарәтли олмасына даир нүмунәләр ҝәтирин.

¹² Иса јер үзүндәки хидмәти бојунҹа бөјүк ҹәсарәт ҝөстәрмишди. О, Аллаһын Оғлу кими малик олдуғу сәлаһијјәтиндән истифадә едәрәк ҹәсарәтлә «Аллаһын мәбәдинә ҝирди вә мәбәддәки сатыҹыларын вә алыҹыларын һамысыны говду; сәррафларын масаларыны вә ҝөјәрчин сатанларын күрсүләрини чевирди» (Мат. 21:12). Јер үзүндәки сонунҹу ҝеҹәсиндә әсҝәрләр ону һәбс етмәјә ҝәләндә о, шаҝирдләрини мүдафиә етмәк мәгсәдилә горхмадан габаға чыхыб деди: «Әҝәр Мәни ахтарырсынызса, бунлары бурахын ҝетсинләр» (Јәһ. 18:8). Сонра о, Петерә гылынҹыны гынына гојмағы әмр етди вә бунунла һансыса силаһа дејил, Јеһоваја бел бағладығыны ҝөстәрди (Јәһ. 18:11).

¹³ Иса дашүрәкли јаланчы дин рәһбәрләрини вә онларын јанлыш тәлимләрини ҹәсарәтлә ифша едирди. Иса онлара дејирди: «Вај һалыныза, дин алимләри вә фәрисејләр, икиүзлүләр! Чүнки сиз Сәмави Сәлтәнәти инсанларын үзүнә гапајырсыныз... Ганунун даһа ваҹиб ишләрини, әдаләти, мәрһәмәти вә иманы атырсыныз... Сиз финҹанын вә чанағын чөлүнү тәмизләјирсиниз, лакин онларын ичи сојғунчулуг вә тамаһкарлыгла долудур» (Мат. 23:13, 23, 25). Исанын шаҝирдләринә дә бу ҹүр ҹәсарәтли олмаг лазым ҝәләҹәкди, чүнки јаланчы дин рәһбәрләри онлары да тәгиб едәҹәк вә бәзиләрини өлдүрәҹәкдиләр (Мат. 23:34; 24:9).

¹⁴ Иса һәтта ҹинләрә гаршы да ҹәсарәтли мөвге тутурду. Бир дәфә о, һеч кимин зәнҹирләјә билмәдији ҝүҹлү ҹинә тутулмуш бир адама раст ҝәлди. Иса һәмин адамы өз тәсирләри алтында сахлајан чохсајлы ҹинләрдән азад етди (Марк 5:1-13). Бу ҝүн Аллаһ мәсиһчиләрә бу кими мөҹүзәләр етмәк гүввәси вермир. Буна бахмајараг, биз дә тәблиғ едәркән вә өјрәдәркән ‘имансызларын ҝөзүнү кор едән’ Шејтана гаршы руһани мүһарибә апармалыјыг (2 Кор. 4:4). Исанын һадисәсиндә олдуғу кими, силаһларымыз «ҹисмани дејилдир, лакин истеһкамлары», јәни дәрин көк салмыш јалан дини тәлимләри «јыхмаг үчүн Аллаһын гүдрәтинә маликдирләр» (2 Кор. 10:4). Исанын нүмунәсиндән бу руһани силаһлардан неҹә истифадә етмәк барәдә чох шеј өјрәнирик.

15. Исаја ҹәсарәт верән нә иди?

¹⁵ Иса өзүнү ҝөстәрмәк үчүн дејил, имандан ирәли ҝәләрәк ҹәсарәт ҝөстәрирди. Бизим дә ҹәсарәтимиз имана әсасланмалыдыр (Марк 4:40). Әсил имана неҹә јијәләнә биләрик? Јенә дә Исанын нүмунәси көмәјимизә ҝәлир. О, Мүгәддәс Јазылары мүкәммәл билир вә онлара зәррә гәдәр дә шүбһә етмирди. Бир силаһ кими әлиндә әсил гылынҹ јох, руһун гылынҹы олан Аллаһын Кәламыны тутурду. О, өз тәлимләрини тәсдигләмәк мәгсәдилә дәфәләрлә Мүгәддәс Јазылара истинад едирди. О, чох вахт сөзүнә: «Јазылмышдыр»,— дејә башлајараг Аллаһын Кәламындан ситат ҝәтирирдиa.

16. Даһа бөјүк имана неҹә јијәләнә биләрик?

¹⁶ Исанын шаҝирди олдугдан сонра инсанын сынагларла үзләшмәси гачылмаздыр вә онлара таб ҝәтирәҹәк иман инкишаф етдирмәк үчүн биз ҝүндәлик олараг Мүгәддәс Китабы охујуб арашдырмалы вә јығынҹаг ҝөрүшләринә ҝәлмәлијик ки, иманымызын әсасыны тәшкил едән һәгигәтләр зеһнимиздә һәкк олунсун (Ром. 10:17). Бу биликләр үрәјимизә тәсир етсин дејә һәмчинин өјрәндикләримизин үзәриндә дәриндән дүшүнмәлијик. Јалныз ҹанлы иман бизи ҹәсарәтли аддымлар атмаға тәшвиг едә биләр (Јаг. 2:17). Үстәлик, биз мүгәддәс руһ алмаг үчүн дуа етмәлијик, чүнки ‘инам’ (ЈД) руһун сәмәрәсинин тәркиб һиссәләриндән биридир (Галат. 5:22).

17, 18. Ҝәнҹ бир баҹы мәктәбдә неҹә ҹәсарәт ҝөстәрди?

¹⁷ Ҝәнҹ баҹымыз Китти әсил иманын инсаны һәрәкәтә неҹә тәшвиг етдијини өз тәҹрүбәсиндән билир. О, ушаглыгдан билирди ки, хош хәбәри мәктәбдә тәблиғ етмәјә ‘утанмамалыдыр’ вә о, һәгигәтән дә, синиф јолдашларына јахшы шаһидлик вермәк истәјирди (Ром. 1:16). Илләр өтүрдү, анҹаг Китти хош хәбәри башгаларына данышмаға тәрәддүд едирди, чүнки онун буна ҹәсарәти чатмырды. Јухары синифләрдә охујаркән о, башга мәктәбә кечди. О, өз-өзүнә деди: «Бу дәфә фүрсәти әлдән вермәјәҹәјәм». Китти Мәсиһә хас олан ҹәсарәт, еләҹә дә мүдриклик вә әлинә фүрсәт дүшмәси барәдә Аллаһа дуа етди.

¹⁸ Илк дәрс ҝүнү шаҝирдләрдән өзләрини бир-бир тәгдим етмәји хаһиш етдиләр. Бир нечә нәфәр һансы динә мәнсуб олдуғуну, анҹаг һеч бир ајиндә иштирак етмәдијини сөјләди. Китти анлады ки, бу, онун дуасына ҹавабдыр. Нөвбә она чатанда о, әминликлә деди: «Мән Јеһованын Шаһидијәм, руһани вә әхлаги мәсәләләрдә Мүгәддәс Китабы әлдә рәһбәр тутурам». О данышанда бәзи шаҝирдләр она чәп-чәп бахмаға башладылар. Амма диҝәрләри диггәтлә гулаг асыб, сонра суаллар вердиләр. Мүәллим һәтта Киттини өз иманыны мүдафиә етмәкдә јахшы нүмунә олдуғуну билдирди. Ҝәнҹ баҹымыз Исанын ҹәсарәт нүмунәсини изләдији үчүн чох севинир.

Мәсиһә хас олан иман вә ҹәсарәт тәзаһүр етдирин

19. а) Әсил имана саһиб олмаг нә демәкдир? б) Биз Јеһованы неҹә севиндирә биләрик?

¹⁹ Һәвариләр дә ҹәсарәтдән ирәли ҝәләрәк етдикләри һәр бир шејин имана әсасланмалы олдуғуну дәрк едирдиләр. Онлар Исаја јалварыб дедиләр: «Иманымызы артыр!» (Лука 17:5, 6 ајәләрини оху.) Әсил имана малик олмаг садәҹә Аллаһын мөвҹудлуғуна инанмаг демәк дејил. Бу, балаҹа ушагла хејирхаһ вә мәһәббәтли атасы арасындакы мүнасибәтләр кими, Јеһова илә сых вә етибарлы мүнасибәт инкишаф етдирмәк демәкдир. Аллаһдан илһам алараг Сүлејман јазмышдыр: «Оғлум, үрәјин һикмәтлидирсә, Мәним дә үрәјим севинәр. Дилиндән дүз сөзләр чыхарса, көнлүм севинҹдән ҹуша ҝәләр» (Сүл. мәс. 23:15, 16). Ејнилә, салеһ принсипләри ҹәсарәтлә мүдафиә етмәјимиз Јеһованын гәлбини севиндирир вә буну билмәк бизи даһа да үрәкләндирир. Буна ҝөрә дә ҝәлин салеһлији ҹәсарәтлә мүдафиә едәрәк һәр заман Исанын нүмунәсини изләјәк!

[Һашијә]

Изаһ едә биләрсинизми?

• Гејри-камиллијимизә бахмајараг, нәјин сајәсиндә итаәткар гала биләрик?

• Әсил иман нәјә әсасланыр вә бу, бизә ҹәсарәтли олмагда неҹә көмәк едә биләр?

• Иса кими итаәтли вә ҹәсарәтли олмаг һансы фајданы ҝәтирир?

[13-ҹү сәһифәдәки шәкил]

Ширникдириҹи тәсирләрә мүгавимәт ҝөстәрмәк үчүн сән ‘үрәјини һазырлајырсанмы’?

[15-ҹи сәһифәдәки шәкил]

Иса кими, биз дә имандан ирәли ҝәлән ҹәсарәти ҝөстәрә биләрик