Ән јахшы һәјат јолуна хош ҝәлмисиниз!
«Јашајырыгса да, өлүрүксә дә, һәмишә Рәббиник» (РОМ. 14:8).
1. Ән јахшы һәјат јолу барәдә Иса нә өјрәдирди?
ЈЕҺОВАНЫН арзусу одур ки, биз ән јахшы һәјат јолуну сечәк. Дүздүр, һәрә бир јолун јолчусудур, лакин бир јол ән јахшы һәјат јолудур. Мәҝәр Аллаһын Кәламына ујғун јашамагдан вә Онун Оғлу Иса Мәсиһин нүмунәсини изләмәкдән јахшы јол ола биләрми? Иса давамчыларына Аллаһа руһән вә һәгигәтән ибадәт етмәји өјрәтмиш вә онлара шаҝирд һазырламағы тапшырмышды (Мат. 28:19, 20; Јәһ. 4:24). Исанын өјрәтдикләринә ујғун јашамагла биз Јеһованы севиндирир вә Онун хејир-дуаларыны алырыг.
2. Биринҹи әсрдә чохлары Падшаһлыг һаггында хош хәбәрә неҹә һај верирди вә «Јола» мәхсус олмаг нә демәк иди?
2 ‘Үрәји әбәди һәјата мејилли оланлар’ (ЈД) һәгигәтә иман ҝәтириб вәфтиз олунанда онлара «ән јахшы һәјат јолунда сизи ҝөрмәјә шадыг!» демәјә там әсасымыз вар (Һәв. иш. 13:48). Ерамызын биринҹи әсриндә мүхтәлиф милләтләрдән олан минләрлә инсанлар һәгигәти гәбул едиб вәфтиз олунмагла һамынын гаршысында Аллаһа һәср олундугларыны нүмајиш етдирирдиләр (Һәв. иш. 2:41). Һәмин еркән мәсиһчиләрин «Јола» мәнсуб олдуглары дејилирди (Һәв. иш. 9:2; 19:23). Мәсиһин давамчысы оланларын һәјаты она иман етмәк вә нүмунәсини изләмәк әтрафында дөвр етдији үчүн бу сөз чох мүнасиб иди (1 Пет. 2:21).
3. Јеһованын хидмәтчиси олмаг истәјәнләр нәјә ҝөрә вәфтиз олунурлар вә сон он ил әрзиндә нә гәдәр адам вәфтиз олунуб?
3 Јашадығымыз сон ҝүнләрдә шаҝирд һазырламаг иши сүрәтләниб вә һал-һазырда 230-дан чох өлкә вә әразидә һәјата кечирилир. Сон он ил әрзиндә 2 700 000-дән чох адам Јеһоваја хидмәт етмәк гәрары вермиш вә һәср олунмаларыны вәфтиз олунмагла символизә етмишләр. Бу, орта һесабла һәфтәдә 5 000 нәфәр демәкдир! Вәфтиз олунмаг гәрары инсанын Аллаһа мәһәббәтиндән, Мүгәддәс Китаб биликләриндән вә өјрәндикләринә иман етмәсиндән ирәли ҝәлир. Вәфтиз һәјатымызда ән мүһүм һадисәдир, чүнки бу, Јеһова илә сых мүнасибәтләрин башланғыҹыдыр. Һәмчинин бунунла ҝөстәририк ки, Јеһованын кечмишдә хидмәтчиләринә Өз јолу илә јеримәјә көмәк етдији кими, бизим дә Она сәдагәтлә хидмәт етмәјимизә көмәк едәҹәјинә әминик (Јешаја 30:21).
Вәфтиз олунмаг нәјә ҝөрә лазымдыр?
4, 5. Вәфтиз олунмағын ҝәтирдији фајданы вә хејир-дуалары садалајын.
4 Әҝәр сән Аллаһ һаггында билијә јијәләниб һәјатында дәјишикликләр етмисән вә һал-һазырда вәфтиз олунмамыш тәблиғчисәнсә, бу, тәрифәлајигдир. Бәс сән дуада өзүнү Аллаһа һәср етмисәнми вә вәфтиз олунмаға һазырлашырсанмы? Мүгәддәс Китабдан өјрәндијин кими, билирсән ки, өз кефинә јашамаг вә мал-мүлк топламаг әвәзинә, һәјатын боју Јеһоваја һәмд етмәлисән. (Мәзмур 148:11—13 ајәләрини оху; Лука 12:15.) Белә исә, вәфтиз олунмағын һансы фајдасы вар вә бу, һансы хејир-дуалары ҝәтирир?
5 Һәср олунмуш мәсиһчи кими, сәнин һәјатында ән бөјүк мәгсәдин олаҹаг. Аллаһын ирадәсини јеринә јетирдијин үчүн хошбәхт олаҹагсан (Ром. 12:1, 2). Јеһованын мүгәддәс руһу сәнә өзүндә сүлһ вә «иман» (ЈД) кими хүсусијјәтләр јетишдирмәјә көмәк едәҹәк (Галат. 5:22, 23). О, сәнин дуаларына ҹаваб верәҹәк вә Кәламына ујғун јашамаг сәјини хејир-дуаландыраҹаг. Хидмәтин сәнә севинҹ ҝәтирәҹәк вә Аллаһа мәгбул һәјат тәрзи сүрмәк әбәди һәјат үмидини мөһкәмләндирәҹәк. Үстәлик, өзүнү Јеһоваја һәср едиб вәфтиз олунсан, бәлли олаҹаг ки, сән һәгигәтән дә Јеһованын Шаһиди олмаг истәјирсән (Јешаја 43:10—12).
6. Вәфтиз олунмагла биз нә ҝөстәририк?
6 Өзүмүзү Јеһоваја һәср едиб вәфтиз олунмагла Она мәхсус олдуғумузу ҝөстәририк. Һәвари Павел јазмышды: «Бизләрдән һеч ким өзү үчүн јашамыр вә һеч ким өзү үчүн өлмүр. Јашајырыгса, Рәбб үчүн јашајырыг; өлүрүксә, Рәбб үчүн өлүрүк. Буна ҝөрә, јашајырыгса да, өлүрүксә дә, һәмишә Рәббиник» (Ром. 14:7, 8). Јеһова бизи ирадә азадлығына лајиг ҝөрүб. Аллаһа мәһәббәтдән ирәли ҝәләрәк Онун бујурдуғу јолла ҝетмәк гәрарыны гәбул етмәклә Онун гәлбини севиндирмиш олуруг (Сүл. мәс. 27:11). Вәфтиз — Аллаһа һәср олунмағымызын символудур. Һәмчинин бунунла биз һамынын гаршысында Јеһованын Рәһбәримиз олдуғуну вә али һөкмранлыг мәсәләсиндә Онун тәрәфини тутдуғумузу ҝөстәририк (Һәв. иш. 5:29, 32). Өз нөвбәсиндә Јеһова да бизимлә олаҹаг. (Мәзмур 118:6 ајәсини оху.) Вәфтиз олунан инсанын гаршысында һәм инди, һәм дә ҝәләҹәкдә бир чох башга руһани хејир-дуалар алмаг имканы ачылыр.
Хејир-дуа: севән гардашлыг
7-9. а) Һәр шејләрини атыб ардынҹа ҝедәнләри Иса нәјә әмин етди? б) Исанын Марк 10:29, 30 ајәләриндәки вәди неҹә һәјата кечир?
7 Һәвари Петер Исаја деди: «Будур, биз һәр шеји атыб Сәнин ардынҹа ҝәлдик; елә исә, бизим нәјимиз олаҹаг?» (Мат. 19:27). Петери өзүнүн вә диҝәр шаҝирдләрин ҝәләҹәји марагландырырды. Өзләрини Падшаһлығын тәблиғ ишинә там һәср етмәк үчүн онлардан бөјүк фәдакарлыг тәләб олунурду (Мат. 4:18—22). Иса онлары нәјә әмин етди?
8 Маркын јаздығы Мүждәјә әсасән исә, Иса шаҝирдләринин руһани гардашлығын бир һиссәси олаҹагларыны гејд етди: «Елә бир адам јохдур ки, Мәним адым вә Мүждә наминә евини, гардашларыны, баҹыларыны, анасыны, атасыны, арвадыны, ушагларыны вә јахуд торпагларыны атмыш олсун, вә инди, бу заманда, әзијјәтләрлә бәрабәр, јүз гат артыг евләр, гардашлар, баҹылар, аталар вә аналар, ушаглар вә торпаглар, ҝәләҹәк дөврдә дә әбәди һәјат алмасын» (Марк 10:29, 30). Исанын вәд етдији кими, биринҹи әсрдәки Лидија, Акила, Прискила вә Гај кими мәсиһчиләр ‘евләрини’ һәмиманлыларына тәгдим етмиш вә онлар үчүн ‘гардаш, баҹы вә ана’ олмушдулар (Һәв. иш. 16:14, 15; 18:2—4; 3 Јәһ. 1, 5—8).
9 Исанын бу вәди һал-һазырда даһа бөјүк мигјасда јеринә јетир. Давамчыларынын атдыглары «торпаглар» мүхтәлиф өлкәләрдә Падшаһлығын марагларыны ирәлиләтмәк үчүн чохларынын, о ҹүмләдән миссионерләрин, бет-еллиләрин, бејнәлхалг програм хидмәтчиләринин вә башгаларынын көнүллү олараг ҝеридә гојдуглары газанҹ мәнбәјинә аиддир. Бир чох баҹы-гардашлар һәјатларыны садәләшдирмәк мәгсәди илә доғма евләриндән имтина етмишләр; Јеһованын онларын гајғысына неҹә галдығыны вә хидмәтләринин онлара неҹә севинҹ ҝәтирдијини ҝөстәрән һадисәләр барәдә ешитмәк бизи чох севиндирир (Һәв. иш. 20:35). Үстәлик, Јеһованын бүтүн вәфтиз олунмуш хидмәтчиләри, үмумдүнја мәсиһчи гардашлығынын үзвләри кими, ‘әввәлҹә Аллаһын Сәлтәнәтини вә Онун салеһлијини ахтармағын’ ҝәтирдији хејир-дуалардан зөвг ала билирләр (Мат. 6:33).
«Һагг-Тааланын пәнаһында» тәһлүкәсизлик
10, 11. ‘Һагг-Тааланын пәнаһы’ нәдир вә биз ора неҹә дахил ола биләрик?
10 Өзләрини Аллаһа һәср едиб вәфтиз олунанларын алдыглары дәјәрли хејир-дуалардан бири дә ‘Һагг-Тааланын пәнаһында јашамаг’ шәрәфинә лајиг ҝөрүлмәләридир. (Мәзмур 91:1 ајәсини оху.) Бу, инсаны руһани зәрәрдән горујан символик мәнада тәһлүкәсиз бир јер, јәни вәзијјәтдир. Руһани ҝөзләри олмајан вә ја Аллаһа етибар етмәјәнләр бу јерин һарада олдуғундан хәбәрсиздирләр. Һәср олунмағымыза ујғун јашамагла вә Јеһоваја там етибар етмәклә биз, маһијјәт етибарилә, дејирик: «О мәним сығынаҹағымдыр, галамдыр, Аллаһымдыр, Она ҝүвәнирәм» (Мәз. 91:2). Јеһова Аллаһ бизим тәһлүкәсиз сығынаҹағымыз олур (Мәз. 91:9). Мәҝәр бундан да тәһлүкәсиз вә јахшы јер ола биләрми?
11 Јеһованын ‘пәнаһына’ дахил олмаг Онунла сых мүнасибәт инкишаф етдирмәк имканы әлдә етмәк демәкдир. Бу, һәср олунма вә вәфтиздән сонра башлајыр. Даһа сонра биз Јеһова илә мүнасибәти Она јахынлашмагла, јәни Мүгәддәс Китабы охумагла, үрәкдән дуа етмәклә вә Она там етибар етмәклә гуруруг (Јаг. 4:8). Јарадана етибары һеч вахт сарсылмајан Иса гәдәр Јеһоваја јахын олан олмајыб (Јәһ. 8:29). Буна ҝөрә дә ҝәлин Јеһоваја, һәмчинин Онун һәср олунма андымыза ујғун јашамаға көмәк етмәк истәдијинә вә буну баҹардығына һеч вахт шүбһә етмәјәк (Ваиз 5:4). Аллаһын Өз халгына бәхш етдији руһани әнамлар Онун бизи һәгигәтән дә севдијинә вә хидмәтдә уғур газанмағымызы истәдијинә данылмаз сүбутдур.
Руһани ҹәннәтимизи гијмәтләндир
12, 13. а) Руһани ҹәннәт нәдир? б) Јығынҹагда јениләрә неҹә көмәк едә биләрик?
12 Һәср олунма вә вәфтиз һәм дә гаршымызда Аллаһ тәрәфиндән хејир-дуаландырылан руһани ҹәннәтдә јашамаг имканыны ачыр. Бу, бизим Јеһова Аллаһла вә һәмиманлыларымызла сүлһдә јашадығымыз надир руһани мүһитдир (Мәз. 29:11; Јешаја 54:13). Дүнјада һеч бир шеј бизим руһани ҹәннәтимизлә мүгајисәјә ҝәлә билмәз. Буну хүсусилә дә бир чох милләтләрдән, дилләрдән вә етник груплардан олан баҹы-гардашлар арасында әмин-аманлыг, бирлик вә гардашлыг мәһәббәтинин һөкм сүрдүјү бејнәлхалг конгресләрдә ҝөрмәк олар.
13 Бизим јашадығымыз руһани ҹәннәт аҹынаҹаглы вәзијјәтин һөкм сүрдүјү дүнјадан кәскин сурәтдә фәргләнир. (Јешаја 65:13, 14 ајәләрини оху.) Биз Падшаһлыг һагда тәблиғ етмәклә башгаларыны бу руһани ҹәннәтә дәвәт етмәк шәрәфинә маликик. Јығынҹаға ҝәлән вә хидмәтдә тәлим алан јениләрә көмәк етмәк дә шәрәфдир. ‘Рәбб јолуну [Аполлоса] даһа дәгиг изаһ едән’ Акила вә Прискила кими, бизә дә ағсаггалларын рәһбәрлији алтында имана тәзә ҝәлән бәзи инсанлара көмәк етмәк имканы верилә биләр (Һәв. иш. 18:24—26).
Исадан өјрәнмәјә давам ет
14, 15. Исадан даима өјрәнмәк үчүн һансы тутарлы сәбәбләримиз вар?
14 Исадан даима өјрәнмәјимиз ваҹибдир. Чүнки јер үзүнә ҝәлмәздән өнҹә, сајсыз-һесабсыз минилликләр әрзиндә о, Атасы илә чијин-чијинә чалышмышды (Сүл. мәс. 8:22, 30). Иса билирди ки, һәјатда ән јахшы јол Аллаһа хидмәт етмәк вә һәгигәт һаггында шаһидлик етмәкдир (Јәһ. 18:37). Она ајдын иди ки, башга ҹүр јашамаг худбинлик вә ағылсызлыгдыр. О, ағыр сынаглара мәруз галаҹағыны вә өлдүрүләҹәјини билирди (Мат. 20:18, 19; Ибр. 4:15). Нүмунәмиз олан Иса бизә нөгсансызлығы неҹә горумағы өјрәтди.
15 Вәфтиз олундугдан тез сонра Шејтан ону ән јахшы һәјат јолундан дөндәрмәк истәди, амма һәр шеј боша чыхды (Мат. 4:1—11). Бундан өјрәнирик ки, Шејтанын нәјә әл атмасындан асылы олмајараг, биз нөгсансызлығымызы горуја биләрик. Онун һәдәфи вәфтиз олунмаға һазырлашанлар вә јениҹә вәфтиз олунанлардыр (1 Пет. 5:8). Јанлыш мәлуматлары олан аилә үзвләримиз јахшы нијјәтдән ирәли ҝәләрәк бизә мүгавимәт ҝөстәрә биләрләр. Бу кими сынаглар суаллара ҹаваб верәндә вә ја шаһидлик едәндә һөрмәт вә нәзакәт кими ҝөзәл мәсиһчи кејфијјәтләри тәзаһүр етдирмәк үчүн фүрсәтдир (1 Пет. 3:15). Бу, бизә гулаг асанлара мүсбәт тәсир ҝөстәрә биләр (1 Тим. 4:16).
Ән јахшы һәјат јолуна бағлан!
16, 17. а) Ганунун тәкрары 30:19, 20 ајәләриндә јашамаг үчүн һансы үч тәләб садаланыр? б) Иса, Јәһја вә Павел Мусанын сөзләрини неҹә тәсдиг етдиләр?
16 Иса јер үзүнә ҝәлмәздән тәхминән 1 500 ил әввәл, Муса исраиллиләри о вахт мүмкүн олан ән јахшы јолу сечмәјә тәшвиг етди: «Гаршынызда һәјатла өлүмү, бәрәкәтлә ләнәти гојдуғум үчүн бу ҝүн ҝөјү вә јери сизә шаһид тутурам. Һәјаты сечин ки, сиз вә өвладларыныз јашаја биләсиниз. Аллаһыныз Рәбби севин, сөзү гулағынызда галсын вә Она бағланын» (Ганун. т. 30:19, 20). Исраиллиләр Аллаһа сәдагәтсиз чыхдылар, амма Мусанын јашамаг үчүн садаладығы үч әсас тәләб дәјишилмәјиб. Мусанын бу сөзләрини Иса вә диҝәрләри башга ҹүр ифадә етдиләр.
17 Биринҹиси, биз ‘Аллаһымыз олан Рәбби [Јеһованы] севмәлијик’. Ону севдијимизи салеһ јолларына ујғун јашамагла ҝөстәририк (Мат. 22:37). Икинҹиси, биз Аллаһын Кәламыны арашдырмагла вә Онун әмрләринә риајәт етмәклә Онун ‘сөзүнү гулағымызда’ сырға етмәлијик (1 Јәһ. 5:3). Бунун үчүн биздән мүнтәзәм олараг Мүгәддәс Китабын арашдырылдығы јығынҹаг ҝөрүшләриндә иштирак етмәк тәләб олунур (Ибр. 10:23—25). Үчүнҹүсү, биз Јеһоваја ‘бағланмалыјыг’. Үзләшдијимиз чәтинликләрдән асылы олмајараг, ҝәлин һәмишә Аллаһа иман ҝәтирәк вә Онун Оғлунун ардынҹа ҝедәк (2 Кор. 4:16—18).
18. а) «Ҝөзәтчи Гүлләси» журналында 1914-ҹү илдә һәгигәт неҹә изаһ едилирди? б) Бу ҝүн руһани нура неҹә јанашмалыјыг?
18 Мүгәддәс Китаб һәгигәтинә ујғун јашамаг әсил хејир-дуадыр! 1914-ҹү илдә «Ҝөзәтчи Гүлләси»ндә чох ваҹиб фикир јазылмышды: «Мәҝәр биз хошбәхт вә бәхтијар халг дејиликми? Аллаһымыз садиг Аллаһ дејилми? Кимсә бундан јахшы нә исә билирсә, гој ону гәбул етсин. Әҝәр сизләрдән кимсә бундан да јахшы бир шеј тапса, үмид едирик ки, ону бизә дә хәбәр верәҹәк. Биз Аллаһын Кәламында јазыланлардан даһа јахшы вә ја онун јарысы гәдәр дә јахшы олан бир шеј билмирик... Һәгиги Аллаһ һаггында ајдын биликләрин гәлбимизә вә һәјатымыза ҝәтирдији әмин-аманлығы, севинҹи вә хејир-дуалары һеч бир сөзлә вә ја гәләмлә ифадә етмәк мүмкүн дејил. Аллаһын мүдриклијиндән, әдаләтиндән, гүввәсиндән вә мәһәббәтиндән бәһс едән Кәлам зеһнимизин вә үрәјимизин тәләбатларыны там өдәјир. Биз даһа һеч нә ахтармырыг. Бу ҝөзәл Кәламы даһа ајдын баша дүшмәкдән башга, арзуолунан һеч нә јохдур» («Ҝөзәтчи Гүлләси», 1914-ҹү ил 15 декабр, сәһифәләр 377, 378, инҝ.). Биз инди дә руһани ишыг вә һәгигәт үчүн Јеһоваја миннәтдарыг. Һәгигәтән дә, инди Јеһованын «нурунда» јеримәјимиз үчүн севинмәјә даһа чох сәбәбләримиз вар (Јешаја 2:5; Мәз. 43:3; Сүл. мәс. 4:18).
19. Нәјә ҝөрә вәфтиз үчүн тәләбләрә ҹаваб верәнләр бу аддымы атмағы тәхирә салмамалыдырлар?
19 Әҝәр Јеһованын «нурунда» јеримәк истәјирсәнсә, амма һәлә өзүнү Јеһоваја һәср едиб, вәфтиз олунмамысанса, буну тәхирә салма. Мүгәддәс Китабын вәфтиз олунмаг истәјәнләр үчүн тәләбләринә ҹаваб вермәк үчүн лазым олан һәр шеји ет, бу, Аллаһын вә Мәсиһин бизим үчүн етдикләри һәр шејә ҝөрә миннәтдарлығыны билдирмәјин ән ҝөзәл јолудур. Малик олдуғун ән дәјәрли шејини — һәјатыны Јеһоваја вер. Ҝөстәр ки, Аллаһын Оғлунун ардынҹа ҝетмәклә Онун ирадәсини јеринә јетирмәјә һазырсан (2 Кор. 5:14, 15). Бәли, бу ән јахшы һәјат јолудур!
Неҹә ҹаваб верәрдиниз?
• Вәфтиз нәјин символудур?
• Һәср олунма вә вәфтиз һансы хејир-дуалары ҝәтирир?
• Нәјә ҝөрә Исадан өјрәнмәк чох ваҹибдир?
• Ән јахшы һәјат јолуна бағлы галмагда бизә нә көмәк едәҹәк?
[25-ҹи сәһифәдәки шәкил]
Вәфтиз олунмагла сән ән јахшы һәјат јолуну сечдијини ҝөстәрирсән
[26-ҹы сәһифәдәки шәкилләр]
Сән ‘Һагг-Тааланын пәнаһындасанмы’?