Иса Мәсиһ. Онун чатдырдығы хәбәр вә сиз

‘Мән ҝәлдим ки, гојунларымда һәјат, бол һәјат олсун’ (ЈӘҺЈА 10:10).

ИСА МӘСИҺИН јер үзүнә ҝәлмәкдә башлыҹа мәгсәди алмаг јох, вермәк иди. Хидмәти илә о, бәшәријјәтә мисли-бәрабәри олмајан бир һәдијјә, Аллаһ вә Онун нијјәти һаггында һәгигәти чатдыран хәбәр вермишди. Һәмин хәбәрә һај верән инсанларын һәјаты артыг индидән јахшылашыр. Милјонларла һәгиги мәсиһчи буну тәсдиг едә биләрa. Лакин бәшәријјәт үчүн ән дәјәрли һәдијјә Исанын чатдырдығы хәбәрин ән ваҹиб һиссәси — уғрумузда гурбан вердији камил һәјатыдыр. Бизим әбәди рифаһымыз һәмин хәбәрин бу ән ваҹиб һиссәсинә неҹә мүнасибәт бәсләмәјимиздән асылыдыр.

Аллаһын вә Мәсиһин бәшәријјәтә һәдијјәси. Иса билирди ки, дүшмәнләринин әли илә гәддарҹасына өлдүрүләҹәк (Матта 20:17—19). Лакин Јәһја 3:16 ајәсиндә јазылдығы кими, о демишди: «Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун». Иса һәмчинин демишди ки, «бир чохлары үчүн ҹаныны [вә ја һәјатыны] фидјә олараг вермәјә ҝәлмишдир» (Матта 20:28). Нә үчүн о, һәјатынын алынаҹағыны јох, ону верәҹәјини демишди?

Түкәнмәз мәһәббәтдән ирәли ҝәләрәк Аллаһ инсанлары мирас алдыглары ҝүнаһ вә онун нәтиҹәләриндән — гејри-камиллик вә өлүмдән азад етмәк үчүн тәдбир ҝөрдү. Аллаһ ваһид Оғлуну јер үзүнә ҝөндәрди ки, о, өз һәјатыны гурбан версин. Иса көнүллү олараг Она табе олуб камил һәјатыны бизим уғрумузда верди. Фидјә адланан бу тәдбир Аллаһын бәшәријјәтә олан ән бөјүк һәдијјәсидирb. Бу һәдијјә инсанлар үчүн әбәди һәјата јол ачыр.

Сиз нә етмәлисиниз? Фидјә шәхсән сизә верилән һәдијјә ола биләрми? Бу, сиздән асылыдыр. Мисал үчүн, тутаг ки, кимсә сизә һәдијјә вермәк истәјир. Нә гәдәр ки, әлинизи узадыб алмырсыныз, һәдијјә сизин дејил. Ејни тәрздә Јеһова фидјәни сизә тәклиф едир, лакин сиз бу һәдијјәни гәбул етмәјинҹә о, сизин дејил. Неҹә јәни?

Иса демишди ки, әбәди һәјаты ‘она иман едәнләр’ алаҹаг. Иман өзүнә һәјат тәрзини дахил едир (Јагуб 2:26). Исаја иман етмәк онун дедикләринә вә етдикләринә ујғун јашамаг демәкдир. Бунун үчүн сиз Исаны вә онун Атасыны јахшы танымалысыныз. Иса демишдир: «Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар» (Јәһја 17:3).

Тәхминән 2 000 ил бундан әввәл Иса Мәсиһ бүтүн дүнјада јашајан милјонларла инсанын һәјатыны дәјишән бир хәбәри бөлүшмүшдү. Һәмин хәбәр һаггында, еләҹә дә сизин вә севдијиниз инсанларын тәкҹә инди јох, әбәдијјән ондан неҹә фајда әлдә едә биләҹәји барәдә даһа чох өјрәнмәк истәјәрдинизми? Јеһованын Шаһидләри мәмнунијјәтлә бу ишдә сизә көмәк едәрләр.

Нөвбәти мәгаләләрдә сизин һәјатынызы һәмишәлик дәјишә биләҹәк хәбәри тәблиғ едән инсанла, Иса Мәсиһлә бир аз да јахындан таныш олаҹагсыныз.

[Һашијәләр]