Бизи бирләшдирән мәһәббәт. Иллик ҝөрүш һаггында һесабат

НЈУ-ҸЕРСИ штатынын (АБШ) Ҹерси-Сити шәһәриндәки Јеһованын Шаһидләринин Конгрес Залында севиндириҹи аб-һава һөкм сүрүрдү. 2009-ҹу ил 3 октјабр сәһәри 5 000-дән чох адам Ҝөзәтчи Гүлләси, Мүгәддәс Китаб вә Трактатлар Ҹәмијјәтинин (Пенсилванија) 125-ҹи иллик ҝөрүшүнә топлашмышды. Минләрлә инсан исә Бирләшмиш Штатлардакы Бет-Елин үч комплексиндә вә Канада Бет-Елиндә аудио- видеоәлагә васитәсилә програма гулаг асыр вә ја бахырды. Үч саат давам едән бу ҝөрүшдән Јеһоваја мәһәббәтин бирләшдирдији 13 235 инсан фајдаланмышдыр.

Ҝөрүшә Рәһбәрлик Шурасынын үзвү Ҹефри Ҹексон сәдрлик едирди. О, ҝөрүшү јени маһны китабындан нәғмәләр ифа едән Бет-Ел хоруну тәгдим етмәклә ачды. Хорун рәһбәри Рәһбәрлик Шурасынын диҝәр үзвү Девид Сплејн иди. О, мусигинин тәмиз ибадәтдә ојнадығы ваҹиб ролу гысаҹа мүзакирә етди. Гардаш аудиторијаны јени үч маһныны охумаға дәвәт етди; әввәлҹә маһныны хор ифа едир, сонра исә хорла бирҝә аудиторија охујурду. Хор јалныз бу хүсуси ҝөрүш үчүн тәшкил олунмушду — бу о демәк дејил ки, јығынҹаг вә конгресләрдә дә бу кими хорлар тәшкил едилмәлидир.

Филиалларын һесабаты

Ҝөрүшдә иштирак едән филиалларын Комитә үзвләри беш филиалын һесабатыны тәгдим етдиләр. Кеннет Литтл гејд етди ки, тезликлә АБШ вә Канада үчүн нәзәрдә тутулан журналларын әксәр һиссәсини Канада филиалы чап етмәјә башлајаҹаг вә нәтиҹәдә филиалын иши онгат артаҹаг. Бунун үчүн тәзә алынмыш чап машыны икинөвбәли иш режиминдә ҝүндә 16 саат ишләјәҹәк.

Рајнер Томпсон Падшаһлыг ишинин Доминикан Республикасындакы ҝедишатындан, Алберт Оли исә Ниҝеријадакы фәалијјәтимиздән данышды. Мозамбик филиалынын Комитә үзвү Емил Критсинҝер Јеһованын Шаһидләринин бу өлкәдә онилликләр әрзиндә тәгиб олундугдан сонра 1992-ҹи илдә гејдијјата алындығыны деди. Бу үч өлкәнин һәр бириндә сон вахтлар тәблиғчиләрин сајы хејли артмышдыр. Австралија филиалында хидмәт едән Вив Моритс бу филиалын нәздиндә олан Шәрги Тимордакы наилијјәтләримиздән сөз ачды.

Рәһбәрлик Шурасынын комитәләри

1976-ҹы илдән етибарән Јеһованын Шаһидләринин бүтүн фәалијјәти Рәһбәрлик Шурасынын алты комитәсинин нәзарәти алтында һәјата кечирилир. Бир гәдәр сонра башга гојунларын үзвләри онлара көмәк үчүн тәјин едилди. Һал-һазырда бу көмәкчиләрин сајы 23 нәфәр тәшкил едир. Онларын алтысындан мүсаһибә ҝөтүрүлдү. Үмуми ҝөтүрдүкдә, онларын һамысы 341 ил, орта һесабла исә, һәр бири 57 ил таммүддәтли хидмәтдә олмушдур.

1943-ҹү илдә Бет-Елдә хидмәт етмәјә башлајан Дон Адамс изаһ етди ки, Координаторлар комитәси галан беш комитәнин координаторларындан тәшкил олунуб вә онун мәгсәди — бүтүн комитәләрин низамлы вә еффектив шәкилдә фәалијјәт ҝөстәрмәсини тәмин етмәкдир. Бу комитә бүтүн дүнјада фөвгәладә һаллар, тәгибләр, тәбии фәлакәтләр заманы зәрәр чәкән, еләҹә дә мәһкәмә ишләри вә бу кими чәтинликләрлә бағлы Јеһованын Шаһидләринә јардым ҝөстәрилмәсинә ҹавабдеһдир.

Ден Молхан бүтүн дүнјада 19 851 бет-еллинин руһани вә физики фираванлығынын гејдинә галан Кадрлар комитәсинин фәалијјәтиндән бәһс етди. Девид Синклер Нәшријјат комитәсинин филиалларын материал вә аваданлыгла тәҹһиз олунмасына неҹә нәзарәт етдији һагда данышды. Сонра тәхминән 60 ил Бет-Елдә хидмәт едән Роберт Уоллен Хидмәти комитәнин Јеһованын халгынын тәблиғ хидмәтинә вә јығынҹаг фәалијјәтинә нәзарәт етмәсиндән сөз ачды. Уилјам Маленфант конгрес програмларынын һазырланмасында Тәлим комитәсинин чәкдији әмәкдән данышды. Сонда Ҹон Вишук Јазы комитәсинин нәшрләр үчүн материалларын һазырланмасына нәзарәт етмәсиндән бәһс етдиa.

2010-ҹу илин иллик ајәси мәһәббәт һаггындадыр

Нөвбәти үч мәрузәни Рәһбәрлик Шурасынын үзвләри тәгдим етди. Герит Лөш нитгинә: «Башгаларынын сизи севмәсини истәјирсинизми?» — суалы илә башлады. Гардаш изаһ етди ки, һәр бир кәсин мәһәббәтә еһтијаҹы вар вә мәһәббәт инсаны, санки, чичәкләндирир. Биз мәһәббәт сајәсиндә мөвҹудуг, чүнки Јеһова бизи тәмәннасыз мәһәббәтдән ирәли ҝәләрәк јарадыб. Тәблиғ вә тәлим ишиндә иштирак етмәјимизин әсас сәбәби дә Јеһоваја мәһәббәтдир.

Мүгәддәс Китаб принсипләринә әсасланан мәһәббәти јалныз јахынларымыза дејил, дүшмәнләримизә дә тәзаһүр етдирмәлијик (Мат. 5:43—45). Гардаш динләјиҹиләри Исанын бизим уғрумузда нәләрдән кечдији үзәриндә дүшүнмәјә тәшвиг етди: о дөјүлдү, истеһзалара мәруз галды, үзүнә түпүрүлдү вә бәдәни дешилди. Буна бахмајараг, Иса ону едам едән әсҝәрләр үчүн дуа етди. Мәҝәр бу, бизи ону даһа чох севмәјә тәшвиг етмирми? Лөш гардаш 1 Коринфлиләрә 13:7, 8 ајәләринә әсасланан 2010-ҹу илин иллик ајәсини елан етди: ‘Мәһәббәт һәр шејә таб ҝәтирәр. Мәһәббәт әсла түкәнмәз’. Бизим нәинки әбәди јашамаг үмидимиз, һәм дә әбәдијјән севиб-севилмәк имканымыз вар.

Јанаҹаг бакын долудурму?

Самуел Һерд нитгинә әјани нүмунә илә башлады. Тәсәввүр ет ки, достунла машында ҝедирсән вә сиз 50 километр јол гәт етмәлисиниз. Бирдән ҝөстәриҹидә јанаҹағын битмәк үзрә олдуғуну ҝөрүрсән. Достуна бу һагда хәбәр верәндә о дејир ки, нараһат олмаға дәјмәз, чүнки һәлә дөрд литр вар. Анҹаг чох кечмир ки, галан бензин дә гуртарыр. Јанаҹағын јары јолда гуртараҹағыны вә јолда галмаг еһтималынын олдуғуну билдијин һалда јола давам етмәк мүдриклик олардымы? Бакы мүнтәзәм олараг долдурмаг даһа јахшы олмаздымы? Мәҹази диллә десәк, бакымызы даим јанаҹагла долу сахламалыјыг; јанаҹаг — Јеһова һаггында биликдир.

Бунун үчүн «бакымызы» мүнтәзәм олараг долдурмалыјыг. Бунун дөрд үсулу вар. Биринҹиси, биз шәхси өјрәнмә илә мәшғул олмалы вә Мүгәддәс Китабы јахшы билмәк үчүн ону һәр ҝүн охумалыјыг. Садәҹә үздән охумаг кифајәт дејил, охудугларымызын маһијјәтинә вармалыјыг. Икинҹиси, аиләви ибадәт ахшамларыны сәмәрәли кечирмәк лазымдыр. Биз һәр һәфтә дајаныб билик «бакымызы» гәдәринҹә долдуруруг, јохса азҹа долдурмагла кифајәтләнирик? Үчүнҹүсү, јығынҹаг ҝөрүшләри дә дахил олмагла, Падшаһлыг Залында кечирилән бүтүн тәдбирләрдә иштирак етмәлијик. Дөрдүнҹүсү, сакит вә раһат бир шәраитдә Јеһованын јоллары үзәриндә дәриндән дүшүнмәлијик. Мәзмур 143:5 ајәсиндә дејилир: «Гәдим дөврләр јадыма дүшүр, Сәнин бүтүн ишләрини дәриндән дүшүнүрәм».

«Салеһләр... ҝүнәш кими парлајаҹаглар»

Ҹон Барр үчүнҹү вә јекун мәрузә илә чыхыш едәрәк Исанын дәлиҹә вә буғда мәсәлини изаһ етди (Мат. 13:24—30, 38, 43). Бу мәсәлдә «бичин» заманы ‘Сәмави Сәлтәнәтин оғулларынын’ јығымы вә дәлиҹәләрин ајрылыб јандырылмасындан бәһс едилир.

Барр гардаш ајдын ҝөстәрди ки, јығым сонсузадәк давам етмәјәҹәк. О, Матта 24:34 ајәсини әсас ҝәтирди: «Бүтүн бу шејләр баш веринҹәјә гәдәр, бу нәсил кечиб ҝетмәјәҹәкдир». О, нөвбәти сөзләри ики дәфә охуду: «Ҝөрүнүр, Иса демәк истәјирди ки, 1914-ҹү илдә әламәт ајдын олан заман ону ҝөрән мәсһ олунмушларын һәјаты илә бөјүк мәшәггәтин башланғыҹыны ҝөрәҹәк мәсһ олунмушларын һәјаты гисмән кәсишәҹәк». ‘Бу нәслин’ нә гәдәр давам едәҹәјини билмирик, амма бу нәсил һәјатлары мүәјјән вахт әрзиндә кәсишән ики груп инсанлардан ибарәтдир. Мәсһ олунмушларын јашы мүхтәлиф олса да, нәсли тәшкил едән бу ики груп сон ҝүнләр әрзиндә јашајан бир дөврүн адамларыдыр. Неҹә дә тәсәлливериҹидир ки, 1914-ҹү илдә әламәт ајдын олан заман ону дәрк едән мәсһ олунмушлары ҝөрән јашҹа кичик мәсһ олунмушларын һамысы бөјүк мәшәггәтә гәдәр өлмәјәҹәк!

‘Сәмави Сәлтәнәтин оғуллары’ бөјүк сәбирсизликлә сәмави мүкафатларыны ҝөзләјирләр. Бунунла белә, һәр биримиздән сонадәк ҝүнәш кими парлајараг садиглијимизи горумаг тәләб олунур. Бу ҝүн ‘буғда’ јығымынын шаһиди олмаг бизим үчүн неҹә дә бөјүк шәрәфдир!

Ахырынҹы нәғмә ифа едилдикдән сонра Рәһбәрлик Шурасынын үзвү Теодор Јарач дуа илә ҝөрүшә јекун вурду. Иллик ҝөрүшүн програмы һәгигәтән дә чох руһландырыҹы олду!

[Һашијә]

[5-ҹи сәһифәдәки чәрчивә]

АҒСАГГАЛЛАР ҮЧҮН МӘКТӘБ

Рәһбәрлик Шурасынын үзвү Ентони Морис иллик ҝөрүш заманы елан етди ки, јығынҹаг ағсаггаллары үчүн тәлим програмы тәшкил олунаҹаг. АБШ-дан олан ағсаггаллар үчүн мәктәб 2008-ҹи илин әввәлләриндә Патерсондакы (Нју–Јорк штаты) тәдрис мәркәзиндә фәалијјәт ҝөстәрмәјә башлајыб. 72-ҹи синфи тәзәҹә сона чатан бу мәктәбдә индијә гәдәр 6 720 ағсаггал тәлим алыб. Лакин ҝөрүләси ишләр һәлә чохдур. Тәкҹә АБШ-да 86 000-дән чох ағсаггал вар. Буна ҝөрә дә Рәһбәрлик Шурасы 2009-ҹу ил декабр ајынын 7-дән башлајараг Бруклиндә (Нју–Јорк) әлавә мәктәбин кечирилмәсинә разылыг вериб.

Ики ај әрзиндә дөрд сәјјар нәзарәтчи Патерсонда мүәллим кими тәлим алыб. Онлар тәлим вермәк үчүн Бруклинә көчүб, бундан савајы, даһа дөрд гардаш тәлим кечиб. Сонра онлар Бруклиндәки мәктәбдә, илк дөрд гардаш исә Конгрес вә Падшаһлыг Залларында тәлим вермәјә башлајыб. АБШ-да һәр һәфтә инҝилис дилиндә алты мәктәб кечирмәк үчүн 12 гардаш, испан дилиндә мәктәб кечирмәк үчүн исә даһа дөрд гардаш тәлим алыб. Бу мәктәб Падшаһлыг Хидмәти Мәктәбини әвәз етмәјәҹәк, онун мәгсәди ағсаггаллара һәгигәтдә тәрәгги етмәјә көмәк етмәкдир. Бүтүн дүнјада исә филиаллар бу мәктәби 2011-ҹи хидмәт илиндә Конгрес вә Падшаһлыг Залларында кечирмәјә башлајаҹаглар.

[4-ҹү сәһифәдәки шәкилләр]

Иллик ҝөрүш «Јеһованы нәғмәләрдә тәрәннүм един» адлы јени маһны китабындан ифа олунан нәғмәләрлә ачылды