Мәсиһин мүкәммәл рәһбәрлијинә табе ол
БУ ДҮНЈАНЫН һөкмдарларына ҝүвәнән инсанлар ҝеҹ-тез мәјус олурлар. Амма Мәсиһин рәһбәрлијинә табе оланлар һагда буну демәк олмаз. Иса демишди: «Еј бүтүн зәһмәткешләр вә јүкү ағыр оланлар, јаныма ҝәлин, мән сизә тәравәт верәҹәјәм. Бојундуруғуму үзәринизә ҝөтүрүн вә мәнә бахыб өјрәнин, чүнки мән һәлим вә гәлбән тәвазөкарам. Онда ҹаныныз тәравәтләнәр» (Мат. 11:28, 29). Исанын рәһбәрлијинә табе оланлар өзләрини хошбәхт һисс едирләр вә үрәкләриндә раһатлыг дујурлар. О, фағыр, јүкләри ағыр олан инсанлара гаршы лагејд дејил. Буна ҝөрә дә Иса онлары раһат бојундуруғу алтына ҝирмәјә дәвәт едир. Белә исә, Мәсиһин рәһбәрлијинә табе олмаг нә демәкдир?
Һәвари Петер јазмышды: «Мәсиһ дә сизин уғрунузда әзаб чәкди вә сизә нүмунә гојду ки, онун изи илә ҝедәсиниз» (1 Пет. 2:21). Исанын изләри илә ҝетмәк нә дәрәҹәдә ваҹибдир? Тәсәввүр ет ки, сән бир групла бирҝә миналанмыш әразидән кечмәлисән вә тәһлүкәсиз јол јалныз бир нәфәрә мәлумдур. Мәҝәр сән онун ардынҹа ҝетмәјәҹәксән? Әлбәттә ки, ҝедәҹәксән, һәтта ола билсин, ајагларыны онун ајаг изләринә гојаҹагсан. Ејнилә, бизим фираван ҝәләҹәјимиз һәјат тәрзимизи Исанын һәјат тәрзинә ујғунлашдырмағымыздан асылыдыр. Бунун үчүн биз она гулаг асмалы вә табе олмалыјыг, һәмчинин онун тәмсилчиләри илә әмәкдашлыг етмәлијик.
Гулаг ас вә табе ол
Иса Дағүстү тәблиғинин сонуна јахын демишди: «Мәним сөзләрими ешидиб онлара әмәл едән евини даш үзәриндә тикмиш ағыллы адама бәнзәјир. Јағыш јағды, сел олду, шиддәтли күләк әсди вә евин үзәринә ҝәлди, лакин ев учмады, чүнки тәмәли даш үзәриндә гојулмушду» (Мат. 7:24, 25).
Иса онун сөзләрини ешидиб онлара әмәл едән инсанлары «ағыллы» адландырды. Бәс биз үрәкдән Мәсиһә табе олмагла онун нүмунәсини гијмәтләндирдијимизи ҝөстәририкми? Јохса јалныз бизә сәрф едән вә ја чәтин олмајан әмрләринә табе олуруг? Иса демишди: «Мән һәмишә Онун [Аллаһын] бәјәндији ишләри ҝөрүрәм» (Јәһ. 8:29). Ҝәлин биз дә онун кими давранаг.
Биринҹи әсрдә јашајан һәвариләр Исанын рәһбәрлијинә табе олмагла бизә ҝөзәл нүмунә гојублар. Бир дәфә Петер Исаја деди: «Бах, биз һәр шеји гојуб сәнин ардынҹа ҝәлмишик» (Марк 10:28). Бәли, һәвариләр Исанын рәһбәрлијини о дәрәҹәдә јүксәк гијмәтләндирирдиләр ки, онун ардынҹа ҝетмәк үчүн һәр шејләрини гурбан вердиләр (Мат. 4:18—22).
Мәсиһин тәмсилчиләри илә әмәкдашлыг ет
Биз Исанын рәһбәрлијинә даһа неҹә табе ола биләрик? Өлүмүндән бир аз әввәл о демишди: «Ҝөндәрдијим адамы гәбул едән мәни гәбул едир» (Јәһ. 13:20). Иса мәсһ олунмуш тәмсилчиләрини өз ‘гардашлары’ адландырмышды (Мат. 25:40). О дирилиб ҝөјә гајыданда ‘гардашлары’ онун ишини давам етдирмәјә тәјин едилдиләр вә инди онлар «Мәсиһин адындан хидмәт едән» сәфирләр кими фәалијјәт ҝөстәрәрәк башгаларыны Јеһова Аллаһла барышмаға чағырырлар (2 Кор. 5:18—20). Әҝәр биз Мәсиһин рәһбәрлијини гәбул едириксә, онда онун гардашларына табе олаҹағыг.
Мүгәддәс Китаба әсасланан нәшрләримиздә вахтлы-вахтында верилән мәсләһәтләрә неҹә һај вердијимизи јохламалыјыг. Мүгәддәс Јазылары арашдыранда вә јығынҹаг ҝөрүшләриндә иштирак едәндә биз Мәсиһин әмрләрини јаддашымызда тәзәләјирик (2 Пет. 3:1, 2). Әҝәр биз руһани гиданы мүнтәзәм олараг гәбул едириксә, демәли, ону гијмәтләндиририк. Бәс һансыса мәсләһәт нәшрләримиздә тез-тез тәкрарланырса, буна мүнасибәтимиз неҹә олмалыдыр? Мәсәлән, Аллаһын Кәламында дејилир ки, мәсиһчи јалныз «Ағамызын хидмәтчиси» олан кәслә аилә гурмалыдыр (1 Кор. 7:39). Артыг јүз илдән чохдур ки, бу мөвзу «Ҝөзәтчи Гүлләси»ндә вахташыры олараг мүзакирә олунур. Мәсиһин гардашлары бу вә диҝәр Мүгәддәс Китаб мәсләһәтләринә әсасланан мәгаләләр чап етмәклә руһани фираванлығымыза ҝөрә сәмими-гәлбдән нараһат олдугларыны ҝөстәрирләр. Бу хатырлатмалара диггәт јетирмәклә биз камил Рәһбәримиз олан Иса Мәсиһи изләдијимизи ҝөстәририк.
Сүлејманын мәсәлләри 4:18 ајәсиндә дејилир: «Салеһләрин јолу... дан јери тәк шәфәг сачар, нуруну артырараг ҝүндүзә говушар». Рәһбәримиз олан Иса даима иш башындадыр. Бәзән «садиг вә ағыллы нөкәр»ин нәшрләриндә дәгигләшдирилмиш Мүгәддәс Китаб һәгигәтләри чап олунур. Онлары гәбул етмәк Мәсиһин ‘гардашлары’ илә әмәкдашлыг етмәјин диҝәр үсулудур (Мат. 24:45).
Һәмчинин мәсиһчи јығынҹағында тәјин олунмуш ағсаггалларла әмәкдашлыг етмәклә дә биз Мәсиһин ‘гардашларына’ табе олдуғумузу ҝөстәририк. «Сизә рәһбәрлик едәнләрә итаәт един вә табе олун, ахы онлар... ҝеҹә-ҝүндүз сизин рифаһынызы дүшүнүрләр», — дејә һәвари Павел јазмышды (Ибр. 13:17). Мәсәлән, ағсаггал аиләви ибадәтин мүнтәзәм кечирилмәсинин ваҹиблији илә бағлы бизә һәр һансы бир мәсләһәт верә биләр. Јахуд да тәблиғ хидмәтимизин мүәјјән саһәләрини неҹә јахшылашдыра биләҹәјимизә даир тәклифләр ирәли сүрә биләр. Вә ја ола билсин, сәјјар нәзарәтчи мәсиһчи һәјат тәрзи илә бағлы Аллаһын Кәламына әсасланан практики ҝөстәришләр версин. Онларын мәсләһәтләрини ҹанла-башла гәбул едәндә Исанын бизим Рәһбәримиз олдуғуну ҝөстәририк.
Бу дүнјада јахшы рәһбәрлик тапмаг гејри-мүмкүндүр. Нә јахшы ки, биз Мәсиһин мәһәббәт долу рәһбәрлијини изләјирик! Ҝәлин бундан сонра да Рәһбәримизә табе олаг вә онун тәмсилчиләри илә әмәкдашлыг едәк.
[27-ҹи сәһифәдәки шәкилләр]
Мүгәддәс Китабын имансызларла ејни бојундуруға ҝирмәмәк мәсләһәтинә әмәл едирсәнми?