Аллаһа јахынлашын

Аллаһы даһа јахшы танымаг неҹә мүмкүндүр?

ЈЕҺОВА АЛЛАҺ бизә бөјүк бир хәзинә әлдә етмәк имканы вериб вә О, үрәкдән истәјир ки, биз буна наил олаг. Бу хәзинә инсана мадди зәнҝинлик јох, дүнјанын бүтүн пулларыны бир јерә јығсалар белә алмаг мүмкүн олмајан дахили сакитлик, мәмнунлуг вә хошбәхт һәјат бәхш едир. Сөһбәт һансы хәзинәдән ҝедир? Бу суалын ҹавабыны мүдрик Сүлејман падшаһын Сүлејманын мәсәлләри 2:1—6 ајәләриндә гејд олунан сөзләриндән тапа биләрик.

Сүлејман Аллаһы танымағы — Онун һаггында һәгигәти вә Мүгәддәс Китабда ачыгланан нијјәтини хәзинәјә бәнзәдир (5-ҹи ајә). Бу хәзинә өзүндә бир нечә саһәни ҹәмләшдирир.

Һәгиги тәлимләр. Мүгәддәс Китаб ашағыдакы суаллара ҹаваб верир: Аллаһын ады нәдир? (Мәзмур 83:18). Инсан өләндә нә баш верир? (Мәзмур 146:3, 4). Биз нә үчүн мөвҹудуг? (Јарадылыш 1:26—28; Мәзмур 115:16) Һәгигәтән дә, бу ваҹиб суалларын ҹавабыны тапа билмәк үчүн инсан нәләри вермәз?!

Мүдрик мәсләһәтләр. Мүгәддәс Китаб бизә ән ҝөзәл һәјат јолуну өјрәдир. Никаһызы узунөмүрлү етмәк үчүн нә едә биләрсиниз? (Ефеслиләрә 5:28, 29, 33). Неҹә едә биләрсиниз ки, ушагларыныз мәсулијјәтли бөјүсүнләр? (Ганунун тәкрары 6:5—7; Ефеслиләрә 6:4). Һәјатда хошбәхтлији неҹә тапмаг олар? (Матта 5:3; Лука 11:28). Неҹә дүшүнүрсүнүз, бу кими мәсәләләрә даир етибарлы мәсләһәтләр алмаг нә дәрәҹәдә ваҹибдир?

Аллаһын неҹә варлыг олдуғу вә хүсусијјәтләри барәдә дәрин биликләр. Мүгәддәс Китаб Аллаһ һаггында дәгиг биликләрин әсас мәнбәјидир. Аллаһы неҹә тәсәввүр етмәк олар? (Јәһја 1:18; 4:24). О, бизим гејдимизә галырмы? (1 Петер 5:6, 7). Онун хүсусијјәтләриндән бәзиләри һансылардыр? (Чыхыш 34:6, 7; 1 Јәһја 4:8). Мәҝәр Јараданымыз һаггында бу һәгигәтләр мисилсиз дәрәҹәдә гијмәтли дејил?!

Аллаһы танымаг, Онун һаггында билик әлдә етмәк, сөзүн әсил мәнасында, бир хәзинәдир. Ону неҹә әлдә етмәк олар? 4-ҹү ајәдә Сүлејман бу биликләри «ҝизли хәзинә» илә мүгајисә едир. Мисал үчүн, әлимизи әлимизин үстүнә гојуб отурсаг, хәзинә һазыр-һалва гуҹағымыза дүшән дејил. Ону тапмаг үчүн ҝүҹ сәрф етмәк лазымдыр. Ејнилә, Аллаһ һаггында билик Аллаһын Кәламы олан Мүгәддәс Китабда ҝизләдилиб, бу хәзинәни тапмаг үчүн биз вар ҝүҹүмүзлә чалышмалыјыг.

Сүлејман Аллаһ һаггында билији тапмаг үчүн нә етмәли олдуғумузу ҝөстәрир. «Сөзләрими гәбул етсән» вә «үрәјини... мејл етдирсән» кими ифадәләрдән ајдын олур ки, биз өјрәнмәјә һазыр үрәјә малик олмалыјыг (1, 2-ҹи ајәләр). «Сәсләсән», «ахтарсан», «арасан» сөзләриндән исә ҝөрүндүјү кими, биз әлимиздән ҝәләни етмәли вә сәјлә тәшәббүс ҝөстәрмәлијик (3, 4-ҹү ајәләр). Хәзинәни тапмаг үчүн Мүгәддәс Китабы үрәкдән, чалышганлыгла арашдырмалыјыг (Лука 8:15).

Әҝәр бу ҹүр тәшәббүс ҝөстәрсәк, Јеһова хәзинә тапмагда бизә көмәк едәҹәк. 6-ҹы ајәдә дејилдији кими, «Рәбб һикмәт верир». Биз јалныз Аллаһын көмәјилә Мүгәддәс Китабдакы һәгигәтләри там мәнимсәјә биләрик (Јәһја 6:44; Һәвариләрин ишләри 16:14). Бир шејә әмин ола биләрсиниз ки, сидги-үрәкдән Аллаһын Кәламыны арашдырсаныз, Аллаһ һаггында билик әлдә едәҹәк вә Ону таныјаҹагсыныз, бу да һәјатынызы һәддән зијадә зәнҝинләшдирәҹәк (Сүлејманын мәсәлләри 2:10—21)a.

[Һашијә]