«Ишиниз үчүн мүкафат алаҹагсыныз»
ОРДУСУНУН өнүндә ҝедән падшаһ Аса ат белиндә сүрәтлә чапараг Јәһуда дағларындан саһилјаны вадијә енир. Вадинин ҝенишләндији јердә Аса ајаг сахлајыб нәфәсини дәрир. Ашағыда олдугҹа бөјүк дүшмән ордусу дүшәрҝә салыб! Кушлуларын, јәни ефиопијалыларын сајы бир милјондур. Асанын ордусу исә бу нәһәнҝ ордунун јарысындан бир аз чохдур.
Дөјүшүн астанасында Аса даһа чох нә барәдә дүшүнүр? Сәркәрдәләринә ҝөстәришләр вермәк, гошунларыны үрәкләндирмәк, јохса аиләсинә мәктуб јазмаг барәдә? Хејр! Белә бир ағыр вәзијјәтлә үз-үзә галан Аса дуа едир!
Онун дуасыны вә бундан сонра баш верән һадисәләри нәзәрдән кечирмәздән өнҹә, ҝәлин Асанын неҹә инсан олдуғуна бахаг. Ону бу ҹүр давранмаға нә тәшвиг етди? Онун Аллаһын она көмәк едәҹәјинә үмид етмәси үчүн әсас вар идими? Асанын һекајәсиндән Јеһованын хидмәтчиләринә неҹә хејир-дуа вермәси барәдә нә өјрәнирик?
АСАНЫН ТАРИХЧӘСИ
Исраил ики падшаһлыға бөлүнәндән 20 ил сонра бүтпәрәст ајин вә адәт-әнәнәләрә гапылан Јәһуда артыг тамамилә позулмушду. Аса ерамыздан әввәл 977-ҹи илдә тахта чыханда һәтта сарај әјанлары белә кәнанлыларын мәһсулдарлыг аллаһларына ибадәт етмәкдән чәкинмирдиләр. Лакин Асанын һөкмранлығы барәдә Аллаһ тәрәфиндән илһамландырылан салнамәләрдә дејилир ки, о, «Аллаһы... [Јеһованын] ҝөзүндә јахшы вә доғру олан ишләр етди». Аса «өзҝә аллаһларын гурбанҝаһларыны вә сәҹдәҝаһлары арадан галдырды вә сүтунлары гырды, Ашера бүтләрини кәсди» (2 Салн. 14:2, 3). Үстәлик, о, дин наминә «мәбәд фаһишәлији илә мәшғул олан кишиләри» Јәһудадан говду. Аса бу кими тәмизлик ишләри апармагла кифајәтләнмәди. О һәм дә халгы аталарынын Аллаһы Јеһованы ахтармаға, еләҹә дә ганун вә әмрләринә әмәл етмәјә тәшвиг етди (1 Пад. 15:12, 13; 2 Салн. 14:4).
Асанын һәгиги ибадәт үчүн гејрәт чәкмәсиндән разы галан Јеһова мүкафат олараг һөкмранлыг етдији илләр әрзиндә она сүлһ бәхш етди. Буна ҝөрә падшаһ демишди: «Биз Аллаһымыз Рәбби ахтардыг, Ону ахтардығымыза ҝөрә Аллаһ бизә һәр тәрәфдән динҹлик верди». Халг бу вәзијјәтдән Јәһуда падшаһлығынын шәһәрләрини мөһкәмләндирмәк үчүн истифадә етди. «Онлар беләҹә уғурла тикдиләр», — дејә Мүгәддәс Китабда гејд едилир (2 Салн. 14:1, 6, 7).
ДӨЈҮШ МЕЈДАНЫНДА
Асанын тарихчәсини нәзәрә алсаг, Мүгәддәс Јазыларда хатырланан ән бөјүк орду илә үз-үзә ҝәлдији заман онун дуа етмәси бизи тәәҹҹүбләндирмәмәлидир. Аса билирди ки, Аллаһ имандан ирәли ҝәлән аддымлары мүкафатландырыр. Дуасында Аса Јеһовадан көмәк диләди. О дәрк едирди ки, әҝәр Аллаһа вә Онун көмәјинә ҝүвәнәрсә, дүшмәнләрин нә гәдәр чох вә нә дәрәҹә гүдрәтли олмасы артыг һеч бир рол ојнамајаҹаг. Бу мәсәлә Јеһованын ады илә бағлы олдуғу үчүн Аса мәһз буну әсас тутараг Она мүраҹиәт етди. Падшаһ дуасында деди: «Ја Рәбб Аллаһымыз, бизә јардым ет, чүнки Сән бизим дајағымызсан вә Сәнин исминлә бу гошунун үстүнә ҝәлмишик. Ја Рәбб, Аллаһымыз Сәнсән, гој инсан Сәнә үстүн ҝәлмәсин» (2 Салн. 14:11). О, санки, белә дејирди: «Еј Јеһова, ефиопијалылар Сәнә һүҹум едирләр. Гојма ки, фани инсанлар халгыны гырмагла адыны бәднам етсин». Бундан сонра «Асанын вә Јәһудалыларын өнүндә Рәбб Кушлулары гырды вә Кушлулар гачды» (2 Салн. 14:12).
Бу ҝүн Јеһованын халгы чохлу гүдрәтли дүшмәнләрлә үзләшир. Биз һәрфи мәнада әлимизә силаһ алараг онларла дөјүш мејданында вурушмуруг. Бунунла белә, әмин ола биләрик ки, Јеһова Онун ады наминә руһани мүһарибәдә мүбаризә апаран бүтүн садиг хидмәтчиләринә гәләбә бәхш едәҹәк! Бизим руһани мүһарибәмизә дүнјаны өз ағушуна алан әхлаги позғунлуға мүгавимәт ҝөстәрмәк, шәхси зәифликләримизлә мүбаризә апармаг, јахуд да аиләмизи пис тәсирләрдән горумаг кими ҹәһдләр дахил ола биләр. Үзләшмәјимиз бәдбәхтликләрдән асылы олмајараг, биз Асанын дуасындан тәсәлли тапа биләрик. Онун гәләбәси Јеһованын гәләбәси иди. Бу, Јеһоваја там ҝүвәнән бүтүн инсанларын Ондан нә ҝөзләјә биләҹәјини ҝөстәрир. Һеч ким вә һеч нә Јеһованын гаршысында дура билмәз.
РУҺЛАНДЫРЫҸЫ СӨЗЛӘР ВӘ ХӘБӘРДАРЛЫГ
Аса дөјүшдән гајыданда гаршысына Азарја чыхды. Бу пејғәмбәр ону һәм руһландырды, һәм дә она хәбәрдарлыг етди: «Еј Аса, бүтүн Јәһудалылар вә Бинјаминлиләр, мәни динләјин! Сиз Рәбб илә бәрабәр оларкән О да сизинләдир. Әҝәр сиз Ону ахтарсаныз, О да Өзүнү сизә ҝөстәрәр. Анҹаг сиз Ону тәрк етсәниз, О да сизи тәрк едәр... Сиз ҹәсарәтли олун вә әлләриниз ҝүҹдән дүшмәсин, чүнки ишиниз үчүн мүкафат алаҹагсыныз» (2 Салн. 15:1, 2, 7).
Бу сөзләр иманымызы мөһкәмләндирә биләр вә ҝөстәрир ки, Јеһоваја садиг олдуғумуз мүддәтдә О, һәр заман бизимлә олаҹаг. Аллаһа көмәк үчүн фәрјад едәндә әмин ола биләрик ки, О, бизи ешидир. Азарја демишди: «Ҹәсарәтли олун». Адәтән, дүзҝүн оланы етмәк үчүн ҹәсарәт тәләб олунур, анҹаг биз билирик ки, Јеһованын көмәјилә буну баҹараҹағыг.
Асанын нәнәси Маака «Ашера үчүн ијрәнҹ бир бүт дүзәлтмишди». Аса үчүн чәтин олмасына бахмајараг, о, нәнәсини «мәләкәликдән» мәһрум етди, үстәлик, һәмин бүтү јандырыб күлә дөндәрди (1 Пад. 15:13). Аса әзмкарлыг вә ҹәсарәтлә даврандығына ҝөрә Аллаһ тәрәфиндән хејир-дуаландырылды. Биз дә, гоһумларымызын Аллаһа садиг олуб-олмамаларындан асылы олмајараг, Јеһоваја вә Онун салеһ ганунларына бағлы галмагда әзмли олмалыјыг. Әҝәр белә етсәк, Јеһова садиг давранышымыза ҝөрә бизи мүкафатландыраҹаг.
Дөнүк онгәбиләли Исраил падшаһлығынын бир чох сакинләри Јеһованын Аса илә олдуғуну ҝөрәндә Јәһудаја ахышмаға башладылар. Бунун шаһиди олмаг да Аса үчүн бир мүкафат иди. Тәмиз ибадәт онлар үчүн о гәдәр әзиз иди ки, Јеһованын хидмәтчиләри арасында јашамаг хатиринә онлар евләриндән белә имтина етмәкдән ваз кечмәдиләр. Аса вә бүтүн Јәһуда Јеһованы «бүтүн үрәкләри илә вә бүтүн ҹанлары илә ахтармаг үчүн» севинҹлә Онунла әһд кәсдиләр. Јеһова да, өз нөвбәсиндә, халгына «Өзүнү ҝөстәрмишди» вә «онлара һәр тәрәфдән динҹлик вермишди» (2 Салн. 15:9—15). Салеһлији севәнләр һәгиги ибадәти гәбул едәндә бизим дә үрәјимиз фәрәһлә долур!
Лакин пејғәмбәр Азарјанын Асаја сөјләди сөзләрин башга тәрәфи дә вар иди. Пејғәмбәр падшаһа хәбәрдарлыг етмишди: «[Јеһованы] тәрк етсәниз, О да сизи тәрк едәр». Гој һеч вахт бу, бизим башымыза ҝәлмәсин, чүнки бунун нәтиҹәси чох аҹынаҹаглы ола биләр (2 Пет. 2:20—22). Мүгәддәс Китабда Јеһованын нәјә ҝөрә Асаја белә хәбәрдарлыг етдијинин сәбәби ачыгланмыр. Амма падшаһ бу хәбәрдарлығы гулагардына вурду.
«АҒЫЛСЫЗЛЫГ ЕТДИН»
Асанын һөкмранлығынын 36-ҹы илиндә Исраил падшаһы Бааша Јәһудаја һүҹум етди. Бааша Јерусәлимдән 8 километр шималда јерләшән Рама шәһәрини мөһкәмләндирмәјә башлады. Еһтимал ки, о, буну тәбәәләринин Асанын вә тәмиз ибадәтин тәрәфинә кечмәләринин гаршысыны алмаг мәгсәдилә етмишди. Ефиопијалылар өлкәјә һүҹум едәндә Аса Јеһовадан көмәк истәмишди. Бу дәфә дә Она мүраҹиәт етмәк әвәзинә, о, инсанлара үз тутду. Аса Сурија падшаһына бәхшишләр ҝөндәрди вә ондан онгәбиләли Исраил падшаһлығына һүҹум етмәји хаһиш етди. Суријалылар бир нечә дәфә исраиллиләрә һүҹум етдикдән сонра Бааша Рамадан ҝери чәкилди (2 Салн. 16:1—5).
Асанын бу һәрәкәтини бәјәнмәјән Јеһова буну она демәк үчүн јанына пејғәмбәр Хананини ҝөндәрди. Аса Јеһованын ефиопијалылары дармадағын етмәсиндән сонра баша дүшмәли иди ки, Јеһованын «ҝөзләри јер үзүнү сејр едир ки, үрәји бүтүнлүклә Онунла оланлары гүввәтләндирсин». Ола билсин, Аса пис мәсләһәт алмышды, јахуд Баашанын вә онун ордусунун тәһлүкәли олдуғуну һесаб етмирди вә фикирләширди ки, онун өһдәсиндән тәкбашына да ҝәлә биләр. Сәбәб нә олурса-олсун, Аса инсан дүшүнҹәсинә гапылды вә Јеһоваја ҝүвәнмәди. Буна ҝөрә дә Ханани она деди: «Ағылсызлыг етдин. Индидән сәнә мүһарибә олаҹаг» (2 Салн. 16:7—9).
Бу сөзләри ешидән Аса бәрк гәзәбләнди вә пејғәмбәри зиндана атыб «ајағына күндә вурду» (2 Салн. 16:10, ЈД). Ола биләрми ки, Аса бу ҹүр дүшүнсүн: «Аллаһа узун илләр сәдагәтлә хидмәт едән мәним кими адам һеч мәзәммәтә лајигдир?» Бәлкә, гоҹалмыш падшаһ артыг сағлам мәнтиг јүрүдә билмирди? Мүгәддәс Китабда бу барәдә һеч нә дејилмир.
Һөкмранлығынын 39-ҹу илиндә Аса шиддәтли ајаг ағрыларына тутулду. Мүгәддәс Китабда дејилир: «[Аса] хәстә олдугда Рәбби дејил, анҹаг һәкимләри ахтарды». Ҝөрүнүр, бу вахт о, руһани сағламлығына артыг фикир вермирди. Еһтимал ки, мәһз белә вәзијјәтдә вә дүшүнҹә тәрзи илә Аса падшаһлығынын 41-ҹи илиндә өлдү (2 Салн. 16:12—14).
Ҝөрүнүр, Асанын ҝөзәл хүсусијјәтләри вә тәмиз ибадәтин гејрәтини чәкмәси онун сәһвләрини үстәләјирди. О, Јеһоваја ибадәт етмәкдән һеч вахт әл чәкмәмишди (1 Пад. 15:14). Онун һәјатына мәһз бу јөндән бахсаг, нә өјрәнә биләрик? Биз кечмишдә Јеһованын бизә неҹә көмәк етдијинин үзәриндә дүшүнмәјин ваҹиб олдуғуну дәрк етмәлијик, чүнки белә гијмәтли хатирәләр бизә јени сынагларла үзләшәндә Ондан дуада көмәк диләмәјә тәшвиг едәҹәк. Бунунла белә, биз дүшүнмәмәлијик ки, әҝәр узун мүддәт Аллаһа сәдагәтлә хидмәт едириксә, Мүгәддәс Китаб мәсләһәтләринә еһтијаҹымыз јохдур. Әввәлләр Јеһоваја садиг галмағымыздан асылы олмајараг, биз сәһв едәндә О, бизә дүзәлиш верәҹәк. Биз Онун мәсләһәтләрини мүлајим шәкилдә гәбул етмәлијик ки, онлардан јарарлана биләк. Ән ваҹиби исә одур ки, сәмави Атамыза садиг олдуғумуз мүддәтдә О, һәмишә бизимлә олаҹаг. Јеһованын ҝөзләри бүтүн јер үзүнү сејр едир ки, Она садиг оланлары тапсын. Аллаһ белә инсанлары Өз ҝүҹүндән онларын хејри үчүн истифадә етмәклә мүкафатландырыр. Јеһова буну Аса үчүн етмишди вә бизим үчүн дә едә биләр.
[9–ҹу сәһифәдәки јазы]
Јеһова руһани мүһарибәдә иштирак едән садиг хидмәтчиләрини мүкафатландырыр
[10–ҹу сәһифәдәки јазы]
Јеһованын ҝөзүндә дүзҝүн оланы етмәк үчүн ҹәсарәт лазымдыр