Јеһованын әфви сәнин үчүн һансы мәнаны кәсб едир?
«[Јеһова] рәһмли вә лүтфкар... һәдсиз сәбирли,.. ҹәзаны, ганунсузлуғу вә ҝүнаһы [бағышлајандыр]» (ЧЫХ. 34:6, 7).
ҸАВАБЛАРЫ ТАП
Давуд вә Менашше ҝүнаһ ишләдәндә Јеһова нә етди вә нәјә ҝөрә?
Јеһова Исраил халгыны нәјә ҝөрә бағышламады?
Јеһованын бизи бағышламасыны истәјириксә, нә етмәлијик?
1, 2. а) Јеһова Исраил халгы үчүн неҹә Аллаһ иди? б) Бу мәгаләдә һансы суал мүзакирә олунаҹаг?
НЕҺЕМЈАНЫН ҝүнләриндә бир груп левили издиһам гаршысында дуа едәрәк аталарынын дәфәләрлә Јеһованын әмрләринә «итаәт етмәк» истәмәдикләрини етираф етди. Анҹаг һәр дәфә Јеһова «бағышламағы севән, лүтфкар, рәһмли, чох сәбирли вә бол мәһәббәти олан Аллаһ» олдуғуну сүбут едирди. Неһемјанын ҝүнләриндә дә Јеһова сүрҝүндән гајыдан исраиллиләрә лүтф ҝөстәрмәјә давам едирди (Неһ. 9:16, 17).
2 Һәр биримиз өзүмүзә белә бир суал вермәлијик: «Јеһованын әфви мәним үчүн һансы мәнаны кәсб едир?» Бу ваҹиб суала ҹаваб тапмаг үчүн ҝәлин Јеһованын әфвиндән фајдаланан ики падшаһын — Давуд вә Менашшенин нүмунәсинә нәзәр салаг.
ДАВУДУН ҸИДДИ ҜҮНАҺЛАРЫ
3-5. Давуд һансы ҹидди ҝүнаһлара јол вермишди?
3 Аллаһдан горхан инсан олмасына бахмајараг, Давуд ҹидди ҝүнаһлара јол вермишди. Бу ҝүнаһларын икиси евли ҹүтлүк олан Урија вә Бат-Шева илә әлагәли иди. Давуд, Урија вә Бат-Шева бу ҝүнаһларын аҹы нәтиҹәләрини даддылар. Буна бахмајараг, Јеһованын Давуда неҹә дүзәлиш етмәсиндән Онун бағышлајан Аллаһ олмасы барәдә чох шеј өјрәнирик. Ҝәлин нә баш вердијинә нәзәр салаг.
4 Давуд Исраил ордусуну аммонлуларын әсас шәһәри олан Раббаны мүһасирәјә алмаг үчүн ҝөндәрди. Бу әрази Јерусәлимин шәргиндән 80 километр аралыда олан Иордан чајынын о тајында јерләширди. Бу вахт Јерусәлимдәки сарајынын дамында ҝәзишән Давуд евли гадын олан Бат-Шеваны чимәркән ҝөрдү. Онун әри орду илә бирликдә узагда иди. Давудда Бат-Шеваја гаршы ҝүҹлү һиссләр јаранды вә ону сараја ҝәтиздириб онунла зина етди (2 Шам. 11:1—4).
5 Давуд Бат-Шеванын һамилә олдуғуну биләндә орду башчысына әмр етди ки, онун әри Уријаны Јерусәлимә ҝери ҝөндәрсин. Давуд Уријанын арвады илә ҹинси јахынлыг едәҹәјинә үмид едәрәк ону евинә ҝөндәрди. Анҹаг Урија һеч евинә ҝирмәди дә. Бу сәбәбдән падшаһ орду башчысына ҝизлиҹә мәктуб јазыб деди ки, Уријаны гызғын дөјүшләрә ҝөндәрсин вә ону өн хәттә гојсун, әсҝәрләрә дә јанындан чәкилмәји тапшырсын. Давудун планлашдырдығы кими, Урија дүшмәнләр тәрәфиндән тез бир заманда өлдүрүлдү (2 Шам. 11:12—17). Падшаһ јалныз әхлагсызлыг етмәди, һәмчинин ҝүнаһсыз адамы өлдүртмәклә ҝүнаһыны даһа да ағырлашдырды.
ДАВУД ДҮШҮНҸӘСИНИ ДӘЈИШДИ
6. Аллаһ Давудун ҝүнаһларына неҹә мүнасибәт ҝөстәрди вә бу, Јеһова барәдә бизә нәји ачыглајыр?
6 Әлбәттә, Јеһова һәр шеји ҝөрүрдү, һеч нә Онун диггәтиндән јајынмамышды (Сүл. мәс. 15:3). Сонрадан Бат-Шева илә евләнсә дә, «Давудун ҝөрдүјү бу иш Рәббин ҝөзүндә пис иди» (2 Шам. 11:27). Бәс Јеһова ҹидди ҝүнаһлара јол верән Давудла неҹә рәфтар етди? О, Натан пејғәмбәри Давудун јанына ҝөндәрди. Јеһова бағышлајан Аллаһ олдуғундан Давуда лүтф ҝөстәрмәк истәјирди. Сәнҹә, Јеһованын бу ҹүр давранмасы руһландырыҹы дејил? О, Давуду етираф етмәјә мәҹбур етмәди, садәҹә Натан онун ҝүнаһларынын нә гәдәр пис олдуғуну ҝөстәрән һадисә данышды. (2 Шамуел 12:1—4 ајәләрини оху.) Давудун әсил һиссләрини үзә чыхармаг үчүн бу неҹә дә ҝөзәл үсул иди!
7. Натанын чәкдији нүмунә Давуда неҹә тәсир етди?
7 Натанын нүмунәси падшаһда әдаләт һисси ојатды. Давуд мәсәлдәки варлы адама гәзәбләниб Натана деди: «Вар олан Рәбб һаггы, буну едән адам өлүмә лајигдир». Үстәлик, о деди ки, бу әдаләтсизлијин гурбаны олан адама итирдијинин әвәзи өдәнилмәлидир. «О адам сәнсән!» — дејә Натан билдирди. Бу, Давуд үчүн ҝүҹлү бир зәрбә олду. Натан һәмчинин деди ки, онун һәрәкәтләринин нәтиҹәси — «гылынҹ» вә фәлакәт евиндән ајрылмајаҹаг. Бундан әлавә, о, сәһвләринә ҝөрә һамы гаршысында алчалмалы иди. Давуд һәрәкәтләринин нә гәдәр ҹидди олдуғуну баша дүшдү вә пешманчылыг чәкәрәк етираф етди: «Мән Рәббә гаршы ҝүнаһ етдим» (2 Шам. 12:5—14).
ДАВУД ДУА ЕТДИ, АЛЛАҺ ДА ОНУ БАҒЫШЛАДЫ
8, 9. Давудун 51-ҹи мәзмуру онун дәрин дүшүнҹәләрини неҹә үзә чыхарыр вә биз бундан Јеһова барәдә нә өјрәнирик?
8 Сонралар Давуд 51-ҹи мәзмуру бәстәләди. Бу мәзмурун сөзләри онун неҹә ҝүҹлү виҹдан әзабы чәкдијини ҝөстәрир. Давуд Јеһоваја јалварараг Ондан көмәк диләди. Анҹаг о, садәҹә сәһвләрини етираф етмәклә кифајәтләнмәди, һәмчинин ҝүнаһларындан төвбә етди. Давуд, илк нөвбәдә, Аллаһла мүнасибәтләринә ҝөрә нараһат иди. «Сәнә, јалныз Сәнә гаршы ҝүнаһ ишләтмишәм», — дејә о етираф етди. О, Јеһоваја јалварырды: «Еј Аллаһ, мәндә тәмиз үрәк јарат, дахилимә јенидән сәдагәт руһуну вер... Хиласынын севинҹини мәнә гајтар, итаәткарлыг руһу вериб мәнә дајаг ол» (Мәз. 51:1—4, 7—12). Дуада Јеһоваја сәһвләрин барәдә данышаркән сән дә сәмими вә дүрүст олурсанмы?
9 Јеһова Давудун ҝүнаһынын аҹы нәтиҹәләрини арадан галдырмады. О, өмрүнүн сонуна кими етдији ҝүнаһлара ҝөрә әзијјәт чәкди. Лакин Давуд «сынан вә пешман олан үрәјә» саһиб олдуғу үчүн Јеһова ону бағышлады. (Мәзмур 32:5 ајәсини оху; Мәз. 51:17.) Күлли-Ихтијар Аллаһ инсанын әсил һиссләрини вә ону ҝүнаһа сүрүкләјән сәбәбләрин нә олдуғуну баша дүшүр. Јеһова јол вермәди ки, Давудла Бат-Шева, Мусанын ганунуна әсасән, һакимләр тәрәфиндән өлүмә мәһкум едилсин (Лев. 20:10). Аллаһ һәтта онларын оғлу Сүлејманы Исраилин нөвбәти падшаһы тәјин етди (1 Салн. 22:9, 10).
10. а) Јеһованын Давуду бағышламаг үчүн башга һансы сәбәби вар иди? б) Јеһованын әфвини газанмаг үчүн инсан нә етмәлидир?
10 Еһтимал ки, Јеһованын Давуду бағышламасынын диҝәр сәбәби онун Шаула мәрһәмәт ҝөстәрмәси иди (1 Шам. 24:4—7). Исанын гејд етдији кими, биз башгалары илә неҹә рәфтар едириксә, Јеһова да бизимлә елә рәфтар едир. О демишди: «Бәсдирин инсанлары мүһакимә етдиниз, јохса өзүнүз дә мүһакимә олунаҹагсыныз. Чүнки һансы һөкмлә мүһакимә едирсинизсә, о һөкмлә дә мүһакимә олунаҹагсыныз. Һансы өлчү илә өлчүрсүнүзсә, һәмин өлчү илә дә сизә өлчәҹәкләр» (Мат. 7:1, 2). Јеһованын ән ҹидди ҝүнаһларымызы, һәтта зина вә гатиллији белә бағышладығыны билмәк неҹә дә тәсәлливериҹидир! О, јалныз башгаларыны бағышламаға һазыр олдуғумуз, ҝүнаһларымызы етираф етдијимиз вә пис әмәлләримизә гаршы дүшүнҹә тәрзимизи дәјишдијимиз тәгдирдә бизи бағышлајаҹаг. Биз ҝүнаһларымыздан сәмими гәлбдән төвбә едәндә Јеһовадан «тәравәт мөвсүмү» ҝәлир. (Һәвариләрин ишләри 3:19 ајәсини оху.)
МЕНАШШЕ ҸИДДИ ҜҮНАҺЛАР ЕТДИ, АНҸАГ СОНРАДАН ПЕШМАН ОЛДУ
11. Менашше Аллаһын ҝөзүндә һансы пис ишләри ҝөрмүшдү?
11 Ҝәлин Јеһованын бағышламаға һазыр олдуғуну ҝөстәрән башга бир Мүгәддәс Китаб нүмунәсинә нәзәр салаг. Давуд падшаһлыг етмәјә башладыгдан тәхминән 360 ил сонра Јәһуданын падшаһы Менашше олду. О, 55 иллик һакимијјәти дөврүндә төрәтдији вәһшиликләрә вә ијрәнҹ әмәлләрә ҝөрә Јеһованын гәзәбинә туш ҝәлмишди. Мәсәлән, о, Баала гурбанҝаһлар гурмуш, «бүтүн сәма ҹисимләринә» сәҹдә етмиш, оғулларыны ода гурбан вермиш вә инсанлары спиритизмә ҹәлб етмишди. Бәли, о, «Рәббин ҝөзүндә чохлу пис ишләр» ҝөрмүшдү (2 Салн. 33:1—6).
12. Неҹә олду ки, Менашше Јеһоваја тәрәф дөндү?
12 Нәтиҹәдә, Менашше әсир ҝөтүрүлдү, вәтәниндән Бабилә апарылыб орада һәбсә атылды. Ола билсин, орада о, Мусанын Исраил халгына дедији бу сөзләри хатырлады: «Әзабда оларкән, бүтүн бу һадисәләр башыныза ҝәләркән, нәһајәт, Рәббә дөнүб Она гулаг асаҹагсыныз» (Ганун. т. 4:30). Менашше Јеһоваја тәрәф дөндү. Неҹә? О, «өзүнү чох алчалтды» вә «Аллаһа дуа етди» (21-ҹи сәһифәдә тәсвир олундуғу кими) (2 Салн. 33:12, 13). Мүгәддәс Китабда Менашшенин дуада дедији сөзләр дәгиг гәләмә алынмаса да, еһтимал ки, Давуд падшаһын 51-ҹи мәзмурдакы сөзләринә охшар иди. Һәр неҹә олса да, Менашше дүшүнҹә тәрзини тамамилә дәјишди.
13. Јеһова Менашшени нәјә ҝөрә бағышлады?
13 Јеһова Менашшенин дуаларына неҹә ҹаваб верди? Аллаһ «онун дуасыны гәбул етди вә јалварышыны ешитди». Давуд кими, Менашше дә ҝүнаһларынын ҹиддилијини анлады вә сәмими гәлбдән төвбә етди. Мәһз буна ҝөрә дә Аллаһ Менашшени бағышлады вә ону Јерусәлимдәки падшаһлығына гајтарды. Нәтиҹәдә, Менашше баша дүшдү ки, Јеһова «һәгиги Аллаһдыр» (2 Салн. 33:13). Мәрһәмәтли Аллаһымызын үрәкдән пешман оланлары бағышладығыны билмәк неҹә дә севиндириҹидир!
ЈЕҺОВА ҺӘМИШӘМИ БАҒЫШЛАЈЫР?
14. Јеһованын ҝүнаһ ишләдән инсаны бағышлајыб-бағышламајаҹағыны нә мүәјјән едир?
14 Ола билсин, бу ҝүн Аллаһын халгынын үзвләриндән чох аз адам Давуд вә Менашше кими ҹидди ҝүнаһлара ҝөрә әфв диләмәли олсун. Лакин Јеһованын бу ики падшаһы бағышламасындан өјрәнирик ки, инсан һәтта ән ағыр ҝүнаһлара јол версә белә, үрәкдән төвбә етдији тәгдирдә Аллаһ ону бағышлајыр.
15. Јеһованын ҝүнаһлары автоматик олараг бағышламадығыны һарадан билирик?
15 Әлбәттә, биз Јеһованын инсанларын бүтүн ҝүнаһларыны автоматик олараг бағышладығы гәнаәтинә ҝәлә билмәрик. Буна ҝөрә дә ҝәлин Давудла Менашшенин әһвал-руһијјәсини инадкар Исраил вә Јәһуда халгынын әһвал-руһијјәси илә мүгајисә едәк. Аллаһ Натаны Давудун јанына ҝөндәрди вә она дүшүнҹә тәрзини дәјишмәк имканы верди. Давуд миннәтдарлыгла бу имкандан истифадә едәрәк төвбә етди. Ејнилә, Менашше дә дара дүшдүјүнү һисс едәндә үрәкдән төвбә етмәјә тәшвиг олунду. Исраилин вә Јәһуданын сакинләри исә чох вахт төвбә етмирдиләр. Бу сәбәбдән, Јеһова онлары бағышламады. Әксинә, Онун халгын итаәтсиз давранышларына неҹә јанашдығыны пејғәмбәрләр дәфәләрлә бәјан етмишдиләр. (Неһемја 9:30 ајәсини оху.) Һәтта Бабил әсарәтиндән гајытдыгдан сонра да Јеһова каһин Езра вә пејғәмбәр Малаки кими садиг елчиләрини онларын јанына ҝөндәрмәјә давам едирди. Халг Јеһованын ирадәсинә ујғун даврананда бөјүк севинҹ әлдә едирди (Неһ. 12:43—47).
16. а) Төвбә етмәјән Исраил халгы илә нә баш верди? б) Јеһова Исраил халгынын ајры-ајры үзвләринә һансы имканы вермишди?
16 Иса јер үзүнә ҝәлиб һәјатыны бәшәријјәт үчүн камил фидјә гурбаны кими тәгдим етдикдән сонра Јеһова исраиллиләрин һејван гурбанларыны гәбул етмәди (1 Јәһ. 4:9, 10). Јер үзүндә оланда Исанын Јерусәлим барәдә дедикләри Јеһованын нөгтеји-нәзәрини әкс етдирирди. О демишди: «Еһ, Јерусәлим, Јерусәлим! Пејғәмбәрләри гәтлә јетирән вә сәнә ҝөндәриләнләри даша басан Јерусәлим! Тојуг ҹүҹәләрини ганадынын алтына топладығы кими, мән дә нечә дәфә сәнин өвладларыны бир јерә јығмаг истәдим. Һејф, сиз истәмәдиниз!» Бу сәбәбдән о бәјан етмишди: «Бу Ев тәрк едилиб сизә бош галаҹаг» (Мат. 23:37, 38). Беләликлә, ҝүнаһларындан төвбә етмәјән халг руһани Исраиллә әвәз олунду (Мат. 21:43; Галат. 6:16). Бәс ҹисмани Исраилин ајры-ајры үзвләри барәдә нә демәк олар? Онлар Јеһоваја вә Иса Мәсиһин фидјә гурбанлығына иман ҝәтирдикләри үчүн Онун әфвини вә лүтфүнү газанырдылар. Јер үзүндә дирилмә баш верән заман Јеһова ҝүнаһларындан төвбә етмәдән өлән инсанлара да бу ҹүр лүтф ҝөстәрәҹәк (Јәһ. 5:28, 29; Һәв. иш. 24:15).
ЈЕҺОВАНЫН ӘФВИНДӘН ФАЈДАЛАНЫН
17, 18. Јеһованын бизи бағышламасы үчүн нә едә биләрик?
17 Јеһова бизи бағышламаға һазыр олдуғу үчүн биз нә етмәлијик? Сөзсүз ки, Давуд вә Менашше кими биздән дә төвбә етмәк тәләб олунур. Биз ҝүнаһлы олдуғумузу етираф етмәли, етдијимиз сәһвләрә ҝөрә пешман олмалы, Јеһовадан әфв диләмәли вә биздә тәмиз үрәк јаратмасыны хаһиш етмәлијик (Мәз. 51:10). Әҝәр ҹидди ҝүнаһ ишләтмишиксә, һәмчинин јығынҹаг ағсаггалларындан руһани көмәк истәмәлијик (Јаг. 5:14, 15). Ҝүнаһларымызын нә дәрәҹәдә ҹидди олмасындан асылы олмајараг, Јеһованын Муса васитәсилә Өзү һаггында дедији сөзләри јадда сахламаг бизә тәсәлли верә биләр: «Рәһмли вә лүтфкар Рәбб Аллаһам. Мән һәдсиз сәбирли, бол мәһәббәтли вә сәдагәтлијәм, минләрлә нәслинә мәһәббәтими ҝөстәрәрәм, ҹәзаны, ганунсузлуғу вә ҝүнаһы бағышлајарам». Јеһова инди дә дәјишмәјиб (Чых. 34:6, 7).
18 Ҝүҹлү мүгајисәдән истифадә едәрәк Јеһова төвбә едән исраиллиләрә вәд етди ки, онларын «гыпгырмызы» ҝүнаһларыны тамамилә арадан галдырараг «гар кими ағ» едәҹәк. (Јешаја 1:18 ајәсини оху.) Бәс онда биз Јеһованын әфвиндән неҹә фајдалана биләрик? Ҝүнаһларымызын вә сәһвләримизин тамамилә бағышланмасы үчүн Јеһованын әфвинә ҝөрә миннәтдар олмалы вә сәмими гәлбдән төвбә етмәлијик.
19. Нөвбәти мәгаләдә нәји нәзәрдән кечирәҹәјик?
19 Бәс биз бағышлајан Аллаһымыз Јеһованы неҹә тәглид едә биләрик? Ҹидди ҝүнаһ ишләтдикдән сонра сәмими гәлбдән төвбә едәнләри бағышламамаг руһундан неҹә гача биләрик? Нөвбәти мәгалә үрәјимизи јохламаға көмәк едәҹәк. Беләҹә, биз хејирхаһ вә бағышлајан Јеһова Атамызы тәглид етмиш олаҹағыг (Мәз. 86:5).
[24–ҹү сәһифәдәки шәкил]
Бағышлајан Аллаһ олдуғу үчүн Јеһова Менашшени Јерусәлимдәки падшаһлығына гајтарды