Тә’риф руһландырыр
1 “Мәҝәр мән бу ҝүн јахшы гыз олмадым?” — дејәрәк балаҹа гыз ағлаја-ағлаја анасына мүраҹиәт етди. Бу суал ана үчүн ҝөзләнилмәз иди. Доғрудан да о диггәт јетирмишдир ки, гызы өзүнү јахшы апармаг үчүн чох сә’ј ҝөстәрир, лакин ана бир дәфә дә олсун ону тә’рифләмәмишдир. Бу балаҹа гызын ҝөз јашлары бизә хатырлатмалыдыр ки, биз һамымыз — ҝәнҹләр вә јашлылар — тә’рифә мөһтаҹыг. Башгаларыны тә’рифләјирикми? (Сүл. мәс. 25:11).
2 Баҹы-гардашларымызы тә’рифләмәк үчүн һәр заман сәбәб вар. Ағсаггаллар, хидмәти көмәкчиләр вә пионерләр Рәббин ишиндә чох зәһмәт чәкирләр (1 Тим. 4:10; 5:17). Аллаһдан горхан валидејнләр вар ҝүҹү илә ушагларыны Јеһованын јолларына өјрәтмәјә чалышырлар (Ефес. 6:4). Мәсиһчи ҝәнҹләр ‘дүнјанын руһуна’ инадла мүгавимәт ҝөстәрирләр (1 Кор. 2:12; Ефес. 2:1-3). Гоҹалыг, хәстәлик вә диҝәр проблемләрә бахмајараг, чохлары Јеһоваја сәдагәтлә хидмәт етмәјә давам едирләр (2 Кор. 12:7). Бүтүн бу баҹы-гардашлар тә’рифә лајигдирләр. Биз буну дәрк едирикми?
3 Шәхси тә’риф. Бүтүн јығынҹаға даир дејилән тә’рифләри ешитмәк бизә хошдур. Лакин тә’риф шәхсән бизә үнванланырса, бу бизи даһа чох руһландырыр! Мисал үчүн, ромалылара јаздығы мәктубун 16-ҹы фәслиндә Павел Фибинијә, Прискила вә Акилаја, Трифена вә Трифосанаја, Персисијә вә Аллаһын диҝәр хидмәтчиләринә хүсуси миннәтдарлығыны билдирмишдир (Ром. 16:1-4, 12). Павелин сөзләри, еһтимал ки, һәмин сәдагәтли хидмәтчиләри чох руһландырмышды! Бу ҹүр тә’риф бизим баҹы-гардашларымыза ону ҝөстәрир ки, онлар бизә лазымдырлар вә һәмчинин бизи бир-биримизә јахынлашдырыр. Сон заманлар сән кимисә тә’рифләмисәнми? (Ефес. 4:29).
4 Сәмими тә’риф. Тә’риф доғрудан да руһландырыҹы олсун дејә, үрәкдән ҝәлмәлидир. Инсанлар дедикләримизин сәмими олдуғуну вә ја садәҹә олараг ‘диллә јалтагланмағымызы” һисс едирләр (Сүл. мәс. 28:23). Әҝәр биз башгаларында јахшы шејләри ҝөрмәјә өјрәнириксә, онда үрәјимиз онлары тә’рифләмәјә тәшвиг едәҹәк. ‘Вахтында олан сөзүн нә јахшы’ олдуғуну биләрәк, ҝәлин башгаларыны сәмими тә’риф етмәкдә сәхавәтли олаг! (Сүл. мәс. 15:23).