Исанын дүшүнҹә тәрзини тәглид ет
1. Иса Мәсиһ һансы дүшүнҹә тәрзинә малик иди?
1 Биз Аллаһын Оғлуну һеч заман ҝөрмәсәк дә, Мүгәддәс Китабда онун һәјаты вә хидмәти һаггында јазыланларын сајәсиндә ону севә билмишик (1 Пет. 1:8). Атасынын ирадәсини јеринә јетирмәк үчүн, Иса ҝөјдәки јүксәк вәзифәсини гојуб, јерә ҝәлмишдир. Инсан икән о, башгаларына фәдакарҹасына хидмәт етмиш вә сонра исә бәшәр наминә өз һәјатыны гурбан вермишдир (Мат. 20:28). Аллаһын Кәламы бизи чағырыр: “Мәсиһ Исада олан фикир сизин аранызда да олсун”. Онун фәдакарлыг руһуну биз неҹә тәглид едә биләрик? (Филип. 2:5-8).
2. Чох мәсиһчиләр үчүн нә асан дејил вә онлар бу чәтинлијин өһдәсиндән неҹә ҝәлә биләрләр?
2 Јорғунлуг һисс едән заман. Иса камил олса да, јорулурду. Бир дәфә о, јол јорғуну олмасына бахмајараг, самаријалы бир гадына шаһидлик етди (Јәһ. 4:6). Бу ҝүн бир чох мәсиһчиләр дә ејни шеји јашајырлар. Ҝәрҝин иш һәфтәсиндән сонра, ола билсин, тәблиғә ҝетмәк үчүн гүввә әлдә етмәк асан дејил. Лакин мүнтәзәм олараг тәблиғә ҝедәриксә, ҝөрәҹәјик ки, мәсиһчи хидмәти бизи руһән тәравәтләндирир (Јәһ. 4:32-34).
3. Исанын тә’лим вермәјә һазырлығыны неҹә тәглид едә биләрик?
3 Башга бир заман, Иса вә онун шаҝирдләри бир аз истираһәт етмәк үчүн сакит јерә чәкилирләр. Лакин бөјүк издиһам онларын һарада олдугларындан хәбәр тутуб, онлары габагламаг үчүн гачыр. Аҹыгланмаг әвәзинә, Исанын ‘онлара јазығы ҝәлир’ вә “онлара чох шејләр өјрәтмәјә” давам едир (Марк 6:30-34). Мүгәддәс Китаб өјрәнмәсинә башламаг вә ону давам етдирмәк дә ејни әһвал-руһијјә тәләб едир. Бу, һәмчинин сарсылмаз сә’ј вә инсанлара сәмими мәһәббәт тәләб едир. Әҝәр һал-һазырда Мүгәддәс Китаб өјрәнмәси кечирмирсәнсә, руһдан дүшмә, ону тапмаға чалыш.
4. Көмәкчи пионер хидмәти Мәсиһин дүшүнҹә тәрзини тәглид етмәјимизә неҹә көмәк едә биләр?
4 Руһани мараглары биринҹи јерә гој. Көмәкчи пионер хидмәти диггәти руһани мараглара ҹәмләшдирмәјә көмәк едә биләр. Бир ҝәнҹ баҹы јазмышдыр: “Рәфигәләримдән биринин анасы бизим һәр икимизи онунла бәрабәр көмәкчи пионер кими хидмәт етмәјә тәшвиг етмишди. Мән разылыг вермәјимә чох шадам. Баҹы-гардашларымызла даһа јахшы таныш олдум вә бир аздан онлар мәним үчүн бир аиләјә чеврилдиләр. Мәним һәмчинин башга инсанлара Јеһова һаггында даһа чох данышмаг вә онлара Падшаһлығын ҝөзәл һәгигәтләрини өјрәтмәк имканым да варды. Бүтүн бунлар мәни Јеһоваја вә Онун тәшкилатына даһа да јахынлашдырды” (Мәз. 34:8).
5. Нәјә ҝөрә Мәсиһин дүшүнҹә тәрзини тәглид етмәк үчүн даима сә’ј ҝөстәрмәлијик?
5 Һәр биримиз гејри-камил бәдәнимизлә Јеһованы разы салмаг истәјимиз арасында мүбаризә апарырыг (Ром. 7:21-23). Биз өзүнү јазыгламаг ҹәһдинә гаршы дурмалыјыг (Мат. 16:22, 23). Јеһова Өз мүгәддәс руһунун васитәсилә бизә бу саһәдә көмәк едә биләр (Галат. 5:16, 17). Инди исә нә гәдәр ки, Аллаһын јени әдаләтли дүнјасы ҝәлмәјиб, ҝәлин Падшаһлығын вә башга инсанларын марагларыны өз марагларымыздан үстүн тутараг, Исанын дүшүнҹә тәрзини тәглид едәк (Мат. 6:33; Ром. 15:1-3).