Тәблиғдә биз нәјә наил олуруг?
1. Јеһова бизим хидмәтимизә неҹә бахыр вә инсанлар хош хәбәрә неҹә мүнасибәт ҝөстәрирләр?
1 Аллаһын Кәламында мәсиһчиләрин хидмәти Јеһованын шәрәфинә едилән «мүзәффәр јүрүш» кими тәсвир олунур (2 Кор. 2:14-16). Аллаһ һаггындакы билији јајмагла, Јеһова үчүн әтирли бухура бәнзәр һәмд гурбаны ҝәтиририк. Бә’зи инсанлар үчүн Падшаһлыг һаггындакы хәбәрин әтри хошдур, диҝәрләри исә ондан имтина едирләр. Лакин әксәр инсанларын хош хәбәрдән имтина етмәси, һеч дә демәк дејил ки, бизим әмәјимиз әбәсдир. Ҝәлин ҝөрәк, бизим тәблиғ етмәјимиз һансы фајданы ҝәтирир.
2. Тәблиғ хидмәтимизлә биз нәји сүбут едә биләрик?
2 Јеһованы иззәтләндиририк. Иблис иддиа едир ки, инсанлар Аллаһа худбин мәгсәдлә хидмәт едирләр (Әјј. 1:9-11). Мәсиһчи хидмәти Аллаһа тәмәннасыз садиг олдуғумузу сүбут етмәјә имкан јарадыр. Шәхси чәтинликләрә вә инсанларын е’тинасызлығына бахмајараг, бир чох тәблиғчиләр тәблиғ етмәк вә шаҝирдләр һазырламаг тапшырығыны сәдагәтлә јеринә јетирирләр. Белә садиг вә мәтанәтли хидмәтчиләри олдуғуна Јеһова неҹә дә севинир! (Сүл. мәс. 27:11).
3. Аллаһын адыны вә нијјәтләрини дајанмадан бәјан етмәк нәјә ҝөрә бу гәдәр зәруридир?
3 Һәмчинин бизим хидмәтимиз Аллаһын нијјәтинин јеринә јетмәсиндә дә рол ојнајыр. Шејтанын дүнјасынын мәһв едиләҹәји барәдә Јеһова дејир: «Милләтләр биләҹәкләр ки, Мән Рәббәм [«Јеһовајам», ЈД]» (Јез. 39:7). Бу сөзләрин јеринә јетмәси үчүн, Аллаһын хидмәтчиләри дајанмадан Онун адыны вә нијјәтләрини «һәр милләтә, һәр гәбиләјә, һәр дилә вә һәр халга» бәјан етмәлидирләр (Вәһј 14:6, 7).
4. Тәблиғ иши һансы мә’нада һөкм үчүн әсас верир?
4 Һөкм үчүн әсас. Бундан әлавә, хош хәбәрин тәблиғ едилмәси һөкм үчүн әсас верир. Һәвари Павел демишдир ки, Иса Мәсиһ «Аллаһы танымајан вә Рәббимиз Иса барәсиндәки Мүждәјә итаәт етмәјәнләрә ҹәза верәҹәкдир» (2 Салон. 1:8, 9, И–93). Инсанлар, хош хәбәрә ҝөстәрдикләри мүнасибәтләри әсасында һөкм едиләҹәкләр. Бу, Аллаһын хидмәтчиләринин үзәринә неҹә дә бөјүк мәс’улијјәт гојур! Ган төкүлмәдә ҝүнаһкар олмамаг үчүн, биз Падшаһлыг һаггындакы хиласедиҹи хәбәри јорулмадан бәјан етмәлијик (Һәв. иш. 20:26, 27).
5. Бизим хидмәтимиз һансы мә’нада Аллаһын мәрһәмәтинин тәзаһүрүдүр?
5 Јахынларымызын Аллаһын илтифатына саһиб олмалары үчүн даима ҝөстәрдијимиз сә’ј, Јеһованын мәрһәмәтини ифадә едир (1 Тим. 2:3, 4). Инсанларын һәјатынын ҝүндән-ҝүнә дәјишдијини анладығымыз үчүн, һәлә ки вахт вар, биз онларын јанына тәкрар-тәкрар ҝәлир вә Јеһованы ахтармаға тәшвиг едирик. Белә етмәклә, биз, Аллаһын дәрин мәрһәмәтини әкс етдиририк, чүнки О «истәјир ки, һамы төвбәјә ҝәлсин вә кимсә һәлак олмасын» (Лука 1:78; 2 Пет. 3:9).
6. Диггәтимизи Јеһоваја етдијимиз хидмәтә мәркәзләшдирәндә һансы фајданы әлдә едирик?
6 Фајда әлдә едирик. Әҝәр биз диггәтимизи Јеһоваја етдијимиз хидмәтә мәркәзләшдирмишиксә, бу, бизи горујар. Беләликлә биз «Аллаһын Ҝүнүнүн зүһуруну» јаддашымызда мөһкәм сахлајыр вә өзүмүзү бу натәмиз дүнјадан ләкәсиз сахлајырыг (2 Пет. 3:11-14; Тит. 2:11, 12). Буна ҝөрә дә, чәкдијиниз әмәјин әбәс јерә олмадығыны биләрәк, ҝәлин, мөһкәм вә сарсылмаз олаг, һәр заман Рәббин ишиндә чох чалышаг (1 Кор. 15:58).