Шәфгәтдән ирәли ҝәлән хидмәтимиз
1 Иса она гулаг асан издиһамын «чобансыз гојунлар кими тагәтсиз вә дағыныг» олдуғуну ҝөрдү (Мат. 9:36). О, шәфгәт вә мәһәббәтлә Јеһованын јолларыны онлара өјрәдир, тәсәлли верир вә руһани еһтијаҹларыны мәрһәмәтлә өдәјирди. Мәсиһин хидмәти үзәриндә фикирләшәрәк, биз онун кими дүшүнмәји вә һисс етмәји өјрәнирик, бунун сајәсиндә шәфгәт һисси хидмәтимиздә өзүнү ајдын бүрузә верир.
2 Үмидсизлијә гапылмыш инсанлар көмәк үчүн Исаја јахынлашанда, онун вердији ҹаваба диггәт јетир (Лука 5:12, 13; 8:43-48). Мәсиһ хүсуси тәләбаты оланларын вәзијјәтини нәзәрә алырды (Марк 7:31-35). Башгаларынын һиссләрини анлајыр, онлара гајғы ҝөстәрирди. О, заһири ҝөрүнүшә алданмырды (Лука 7:36-40). Бәли, Иса Аллаһымызын мәрһәмәтини мүкәммәл тәрздә әкс етдирирди.
3 «Онлара јазығы ҝәлди». Иса хидмәтини садәҹә борҹ һиссиндән ирәли ҝәләрәк јеринә јетирмирди. Онун инсанлара ‘јазығы ҝәлирди’ (Марк 6:34). Бизим дә мәгсәдимиз, садәҹә олараг, инсанлара хәбәр чатдырмаг дејил, гијмәтли һәјатларыны хилас етмәкдир. Инсанларын нә үчүн бу вә ја башга ҹүр ҹаваб вердикләрини баша дүшмәјә чалыш. Онлары нә нараһат едир? Бәлкә бунун сәбәби јалан дин хадимләринин онларын руһани тәләбатларынын гајғысына галмамасы вә ја онлары алдатмасыдыр? Ҝөстәрдијимиз сәмими мараг адамлары хош хәбәрә гулаг асмаға тәшвиг едә биләр (2 Кор. 6:4, 6).
4 Мәрһәмәт инсанларын үрәјинә тә’сир ҝөстәрир. Белә бир нүмунәјә нәзәр салын: бир гадын үч ајлыг гызынын өлүмүнүн хиффәтини чәкирди. Ики Шаһид онун гапысыны дөјәндә, гадын онлары евә дә’вәт етди ки, Аллаһын әзаблара нә үчүн јол вердијини изаһ едән дәлилләрини јалана чыхарсын. Сонралар исә гадын деди: «Онлар мәни шәфгәтлә динләдиләр, Шаһидләр ҝедәндә артыг өзүмү бир гәдәр јахшы һисс едирдим, буна ҝөрә дә онларын јенидән ҝәлмәсинә разылыг вердим». Хидмәтдә растлашдығын һәр адамла сән дә шәфгәтлә давранмаға чалышырсанмы?
5 Әҝәр шәфгәтли оларыгса, башгаларына һәгигәтән тәсәлли верә биләҹәјик. Белә етмәклә биз ‘мәрһәмәтли Атамыз’ Јеһованы иззәтләндиририк (2 Кор. 1:3).