«Буну мәни анмаг үчүн един»
Исанын өлүмүнү апрелин 2-дә гејд едәҹәјик
1. Нәјә ҝөрә 2007-ҹи ил, апрелин 2-си ваҹиб тарихдир?
1 Бүтүн дүнјада милјонларла инсан 2007-ҹи ил апрелин 2-дә, Исанын һәјатыны гурбан верәрәк өлдүјүнү гејд етмәјә топлашаҹаг. Иса сәмави Атасынын һөкмранлығынын мүдафиәчиси кими өлмәклә, Шејтан Иблисин инсанларын Аллаһа јалныз өз мәнфәәтләрини ҝүдәрәк хидмәт етдикләри иддиасынын јалан олдуғуну сүбут етди (Әјј. 2:1-5). Рәббин ахшам јемәји, һәмчинин бизә хатырладыр ки, Иса өз камил, ҝүнаһсыз һәјатыны гурбан етмәклә, «бир чохлары үчүн ҹаныны фидијә олараг» вермишдир (Мат. 20:28). Буна ҝөрә дә, Иса шаҝирдләринә әмр етмишди: «Буну мәни анмаг үчүн един» (Лука 22:19). Аллаһын бу дәјәрли һәдијјәсинә ҝөрә миннәтдарлыг һисси сәни ән үстүн мәһәббәтин тәзаһүрүнү әкс етдирән мәрасимдә иштирак етмәјә һазырлашмаға тәшвиг едибми? (Јәһ. 3:16).
2. Үрәјимизи Хатирә Ҝеҹәсинә неҹә һазырлаја биләрик?
2 Үрәјини һазырла. Биз, Исанын јер үзүндәки һәјатынын сон ҝүнләринин һәр бириндә баш верән һадисәләри нәзәрдән кечирмәклә, үрәјимизи Хатирә Ҝеҹәси мәрасиминә һазырлаја биләрик (Езра 7:10, КМ). Бу саһәдә бизә, 2007-ҹи ил үчүн олан «Мүгәддәс Јазыларын ҝүндәлик арашдырылмасы» брошүрасында вә 2007-ҹи илин тәгвиминдә (рус.) Мүгәддәс Китабын хүсуси парчаларынын охунмасына даир верилән ҹәдвәл көмәк едә биләр. Бу оху ҹәдвәли, бу ҝүн бизим истифадә етдијимиз тәгвим әсасында Исанын өлүмүнү тәсвир едән һадисәләри ҝөстәрән ҝүнләрә чох ујғун ҝәлир. Мүгәддәс Китабда хатырланан ҝүнләр вә тарихләр ибрани тәгвиминә әсасланыр. Бу тәгвимдә ҝүнләр ҝүнбатандан ҝүнбатана һесабланырды. Бу ҝүнләри һесаблама үсулу нәзәрә алыныб вә Хатирә Ҝеҹәси илә әлагәдар Мүгәддәс Китабын охунмасы ҹәдвәлиндә әкс олунуб. Бу ҹәдвәлдә верилән мә’луматы нәзәрдән кечирмәк вә Аллаһын дәрин мәһәббәти үзәриндә дуа едәрәк дүшүнмәк Хатирә Ҝеҹәсиндән там фајдаланмагда бизә көмәк едәҹәк.
3. Мараглананларын вә гејри-фәал оланларын Хатирә Ҝеҹәсиндән фајдаланмаларына неҹә көмәк едә биләрик?
3 Башгаларыны дә’вәт ет. «Бизим Падшаһлыг Хидмәтимиз»ин феврал сајында бу ваҹиб мәрасимә даһа чох инсан дә’вәт етмәк үчүн сә’ј ҝөстәрмәјә тәшвиг олунурдуг. Дә’вәт етдијин инсанлары вә башга мараглананлары саламламаг үчүн Хатирә Ҝеҹәсинә вахтындан әввәл ҝәлмәји планлашдыр. Јахшы оларды ки, дә’вәт етдијин инсанларын јанында отурсан вә онларын Мүгәддәс Китабларынын вә маһны китабларынын олмасынын гајғысына галасан. Онлары јығынҹагда башгалары илә таныш ет. Програмдан сонра онларын суалларына ҹаваб вермәк үчүн вахт ајыр. Апрелин 15-дә сөјләнәҹәк хүсуси мә’рузәјә дә’вәт ет. Ағсаггаллар хүсусилә гајғы ҝөстәрмәлидирләр ки, јығынҹаға ҝәләнләр, лакин һазырда гејри-фәал оланлар Хатирә Ҝеҹәсинә вә хүсуси мә’рузәјә дә’вәт олунсунлар.
4. Инсанларын Хатирә Ҝеҹәси мәрасиминдән сонра да руһән инкишаф етмәләринә неҹә көмәк едә биләрик?
4 Јени мараглананларын вә гејри-фәалларын инкишаф етмәләринә көмәк ет. Хатирә Ҝеҹәсиндә чыхыш едән натиг евдә тәмәннасыз Мүгәддәс Китаб өјрәнмәси кечирмәји тәклиф етдијимизи гыса изаһ едәҹәк вә јени мараглананлары Јеһова һаггында өјрәнмәји давам етмәјә тәшвиг едәҹәк. Сән дә’вәт етдијин инсанлара Јеһова һаггында даһа чох өјрәнмәји тәклиф етмәк үчүн, натигин шәрһини әсас кими истифадә едә биләрсән. Әҝәр онлар һазырда Мүгәддәс Китабы өјрәнмирләрсә, Хатирә Ҝеҹәсиндән тез сонра мүтләг онлара баш чәк вә тәмәннасыз Мүгәддәс Китаб өјрәнмәсинин неҹә кечирилдијини ҝөстәр. Онларын руһән инкишаф етмәләри үчүн, һәмчинин јығынҹаг ҝөрүшләринә ҝәлмәләри дә лазымдыр (Ибр. 10:24, 25). Буна наил олмаг үчүн, онлары мүнтәзәм олараг ҝөрүшләрә ҝәлмәјә тәшвиг ет. Ағсаггаллар тәдбир ҝөрмәлидирләр ки, Хатирә Ҝеҹәсинә ҝәлән гејри-фәал мәсиһчиләрә баш чәкәрәк, онлара мә’рузәдәки фикирләрин үзәриндә дәриндән дүшүнмәјә көмәк етсинләр. Бу онлары јығынҹагда фәалијјәтләрини бәрпа етмәјә руһландыра биләр.
5. Хатирә Ҝеҹәси бизә һансы фајданы ҝәтирә биләр?
5 Хатирә Ҝеҹәси мәрасими ҝөзәл имкан јарадыр ки, Јеһованын вә Исанын бизим үчүн етдикләринин үзәриндә ҹидди дүшүнәк. Бу ҹүр дүшүнмәјин сајәсиндә онлара олан мәһәббәтимиз ҝүҹләнир вә бу, давраныш тәрзимизә тә’сир ҝөстәрир (2 Кор. 5:14, 15; 1 Јәһ. 4:11). Артыг инди һәм өзүмүзү, һәм дә мараглананлары ‘Рәббин өлүмүнү е’лан едән’ бу ваҹиб мәрасимә һазырламаг үчүн мүнасиб вахтдыр (1 Кор. 11:26).