Бөлүшмәк үчүн гијмәтли хәзинәмиз вар
1 Аллаһын Кәламы бизә әзиз олан руһани хәзинәләрлә зәнҝиндир (Мәз. 12:6; 119:11, 14). Бир дәфә Иса нүмунәләр чәкәрәк Падшаһлығын мүхтәлиф ҹәһәтләрини тәсвир етди, сонра шаҝирдләриндән сорушду: «Бүтүн бу шејләри анладынызмы?» Мүсбәт ҹаваб алдыгда деди: «Беләликлә, Сәмави Сәлтәнәтә өјрәдилмиш һәр дин алими хәзинәсиндән тәзә вә көһнә шејләр чыхаран ев саһибинә бәнзәр» (Мат. 13:1-52).
2 Мүгәддәс Китабы арашдырмаға башлајанда өјрәндијимиз һәгигәтләри көһнә хәзинә һесаб етмәк олар. Мүнтәзәм шәхси өјрәнмә васитәсилә Аллаһын Кәламынын дәринликләринә вардыгҹа Мүгәддәс Китабдан башга һәгигәтләри тапырыг ки, бунлар да бизим үчүн јени кәшф едилмиш хәзинә олур (1 Кор. 2:7). Һәмчинин «садиг вә ағыллы гул» васитәсилә јени һәгигәтләри баша дүшүрүк (Мат. 24:45).
3 Һәм көһнә, һәм дә јени руһани хәзинә бизим үчүн чох гијмәтлидир. Бу бизи тәлим алмаға вә өјрәндијимиз гијмәтли һәгигәтләри сәхавәтлә инсанларла бөлүшәрәк Аллаһын Кәламынын мүәллимләри кими тәҹрүбә әлдә етмәјә тәшвиг едир.
4 Исанын нүмунәсиндән өјрән. Бу хәзинәјә неҹә јанашдығыны ҝөстәрәрәк Иса ону инсанларла бөлүшмәк үчүн әлиндән ҝәләни едирди. Һәтта јорғун оланда да о, ‘амбарындан’ хәзинә чыхармаға давам едирди (Јәһ. 4:6-14).
5 Исанын руһани ҹәһәтдән аҹынаҹаглы вәзијјәтдә оланлара мәһәббәти ону Аллаһын һәгигәтләринин һәјат верән хәзинәсини онларла бөлүшмәјә тәшвиг едирди (Мәз. 72:13). Руһән аҹлара јазығы ҝәлдији үчүн Иса «онлара чох шејләр өјрәтмәјә башлады» (Марк 6:34).
6 Исаны тәглид ет. Биздә олан хәзинәни јүксәк гијмәтләндирсәк, биз дә Иса кими руһани инҹиләри инсанлара бирбаша Мүгәддәс Китабдан ҝөстәрмәјә ҹан атаҹағыг (Сүл. мәс. 2:1-5). Ола биләр, һәрдән јорулаг, анҹаг буна бахмајараг, Мүгәддәс Јазылардан олан һәгигәтләри шөвглә данышаҹағыг (Марк 6:34). Малик олдуғумуз хәзинәјә ҝөрә дәрин миннәтдарлыг һисси бизи әлимиздән ҝәлән һәр шеји етмәјә чалышараг хидмәтимизи һәмишә ҝенишләндирмәјә тәшвиг едәҹәк.