Аллаһын Падшаһлығы һансы ишләри һәјата кечирәҹәк?
Иса Мәсиһ шаҝирдләринә Падшаһлығын ҝәлмәси үчүн дуа етмәји өјрәтмишди, чүнки билирди ки, јер үзүндә баш верән дәһшәтли һадисәләр Аллаһа хош дејил вә Аллаһын Падшаһлығы бу вәзијјәти дүзәлдә билән јеҝанә һөкумәтдир. Бәс Аллаһын Падшаһлығы нәләри һәјата кечирәҹәк?
АЛЛАҺЫН ПАДШАҺЛЫҒЫ ҺАНСЫ ИШЛӘРИ ҜӨРҮБ?
Әввәлки мәгаләдә Иса Мәсиһин вердији әламәтдән данышдыг. Бу әламәт Падшаһы Иса Мәсиһ олан Падшаһлығын ҝөјдә тәсис олундуғуна ајдын сүбутдур.
Мүгәддәс Китабда дејилир ки, Иса Мәсиһ һакимијјәтә ҝәләндә Шејтаны вә ҹинләри ҝөјдән говду. Онлар јалныз јерин һүдудларында фәалијјәт ҝөстәрә билирләр. 1914-ҹү илдән вәзијјәтин писләшмәсинин бир сәбәби дә елә будур (Вәһј 12:7, 9).
Дүнјада вәзијјәтин ҝүнү-ҝүндән писләшмәсинә бахмајараг, Аллаһын Падшаһлығында Падшаһ олан Иса Мәсиһ бүтүн јер үзүндә инсанларын рифаһы үчүн чох иш ҝөрүр. Иса Мәсиһин габагҹадан хәбәр вердији үмумдүнја маарифләндирмә ишинин сајәсиндә чохлары Мүгәддәс Китабдакы мәсләһәтләри өјрәниб һәјатында тәтбиг едир (Әшија 2:2—4). Милјонларла инсан ишә таразлы јанашмағы өјрәниб, аилә телләрини мөһкәмләндириб вә маддијјата гул олмадан мадди шејләрдән һәзз алмағы өјрәниб. Бу инсанлар һәм инди хошбәхт јашамағы, һәм дә Аллаһын Падшаһлығынын тәбәәси олмаға лајиг инсан олмағы өјрәнирләр.
АЛЛАҺЫН ПАДШАҺЛЫҒЫ ДАҺА НӘЛӘР ЕДӘҸӘК?
Иса Мәсиһ артыг ҝөјдә идарә етсә дә, јер үзүнү һәлә дә инсан һөкумәтләри идарә едир. Аллаһ Иса Мәсиһә бујурмушду: «Ҝет, дүшмәнләринин арасында һакимијјәт сүр» (Зәбур 110:2). Тезликлә Иса Мәсиһ бүтүн дүшмәнләрини тамамилә мәғлуб едәҹәк, Аллаһа сидги-үрәкдән табе оланлара исә гуртулуш бәхш едәҹәк.
Һәмин дөврдә Аллаһын Падшаһлығы нөвбәти ишләри һәјата кечирәҹәк:
Јалан динин көкүнү кәсәҹәк. Аллаһ һаггында јаланлар өјрәдән вә инсанларын һәјатыны ағырлашдыран динләр олмајаҹаг. Мүгәддәс Китабда јалан дин фаһишә кими тәсвир олунур. Онун мәһв едилмәси чохларыны дәһшәтә ҝәтирәҹәк (Вәһј 17:15, 16).
Инсан һакимијјәтинә сон гојаҹаг. Аллаһын Падшаһлығы бүтүн инсан һакимијјәтинә сон гојаҹаг (Вәһј 19:15, 17, 18).
Пис инсанлары мәһв едәҹәк. Шәр ишләрдән әл чәкмәјәнләрин, Аллаһа табе олмаг истәмәјәнләрин агибәти неҹә олаҹаг? «Писләрин... көкү јер үзүндән кәсиләҹәк» (Мәсәлләр 2:22).
Шејтаны вә ҹинләри буховлајаҹаг. Шејтан вә ҹинләр халглары аздыра билмәјәҹәк (Вәһј 20:3, 10).
Бүтүн бунларын Аллаһын Падшаһлығынын тәрәфиндә олан инсанлара һансы тәсири олаҹаг?
АЛЛАҺЫН ПАДШАҺЛЫҒЫ БӘШӘРИЈЈӘТ ҮЧҮН НӘЛӘР ЕДӘҸӘК?
Иса Мәсиһ ҝөјдә падшаһлыг едәндә инсан һөкмдарларынын едә биләҹәјиндән гат-гат артыг ишләр ҝөрәҹәк. Инсанларын арасындан сечилмиш 144 000 нәфәр онунла бирҝә һакимијјәт сүрүб, она көмәк едәҹәк (Вәһј 5:9, 10; 14:1, 3). О диггәт јетирәҹәк ки, Аллаһын ирадәси јер үзүндә јеринә јетсин. Аллаһын Падшаһлығы јер үзүнүн сакинләри үчүн нә едәҹәк?
Хәстәлији вә өлүмү арадан галдыраҹаг. «Һеч бир сакин “хәстәјәм” демәјәҹәк», «артыг өлүм олмајаҹаг» (Әшија 33:24; Вәһј 21:4).
Һәгиги сүлһ вә тәһлүкәсизлик һөкм сүрәҹәк. «Оғулларынын әмин-аманлығы битиб-түкәнмәјәҹәк» вә «һәр кәс өз мејнәсинин, өз әнҹир ағаҹынын алтында отураҹаг, онлары горхудан олмајаҹаг» (Әшија 54:13; Микә 4:4).
Инсанларын мәналы иши олаҹаг. «Сечилмишләрим әлләринин зәһмәтиндән дојунҹа зөвг алаҹаг. Онлар наһаг јерә әлләшмәјәҹәк» (Әшија 65:22, 23).
Әтраф-аләмлә бағлы проблемләр һәлл олунаҹаг. «Сәһра вә гураг торпаг севинәҹәк, дүзләр шадланаҹаг, зәфәрантәк чичәкләнәҹәк» (Әшија 35:1).
Инсанлар әбәди јашамаг үчүн билик алаҹаг. «Әбәди һәјат одур ки, Сәни, тәк ҝерчәк Аллаһы вә ҝөндәрдијин Иса Мәсиһи танысынлар» (Јәһја 17:3).
Аллаһ истәјир ки, сиз дә бу немәтләри аланлардан оласыныз (Әшија 48:18). Нөвбәти мәгаләдән өјрәнәҹәксиниз ки, ҝөзәл ҝәләҹәјин сизә нәсиб олмасы үчүн индидән нә едә биләрсиниз.