Һикмәт өз әмәлләри илә тәсдиг олунур
1. Фәалијјәтимиз бәзиләри тәрәфиндән неҹә гаршыланыр?
1 Бәзән тәблиғдә инсанлар јанлыш баша дүшдүкләри вә ја Јеһованын Шаһидләри һаггында јанлыш мәлуматландырылдыглары үчүн бизи пис гаршылаја биләрләр. Чох вахт күтләви информасија васитәләриндә һаггымызда гәрәзли фикирләр сөјләнир, һәтта бәзи јерләрдә бизә «тәһлүкәли тәригәт» дамғасы вурулуб. Ола билсин, бир чохларынын бизим һаггымызда фикирләри бу кими јанлыш тәсәввүрләрин тәсири алтында формалашыб. Бу ҹүр тәнгидләрә реаксијамыз неҹә олмалыдыр?
2. Тәнгидләрә туш ҝәләндә мәјуслуға гапылмамаға нә көмәк едәр?
2 Мүсбәт әһвал-руһијјәни итирмә. Биринҹи әсрдә Исаны вә Јеһованын диҝәр хидмәтчиләрини инсанлар чох вахт јанлыш баша дүшүр вә тәнгид атәшинә тутурдулар (Һәв. иш. 28:22). Лакин онлар һеч вахт бу кими тәнгидләрин онлары хидмәтдән чәкиндирмәсинә јол вермирдиләр. Иса демишди ки, һикмәт өз әмәлләри илә тәсдиг олунур (Мат. 11:18, 19). О, Атасынын ирадәсини сәјлә иҹра едир вә һәгигәти ахтаран инсанларын ону гијмәтләндирәҹәјинә әмин иди. Әҝәр биз Аллаһын Оғлунун да бу ҹүр мүнасибәтлә гаршылашдығыны јадда сахласаг, мәјуслуға гапылмарыг.
3. Нәјә ҝөрә мәнфи фикирләр вә мүгавимәтләр бизи тәәҹҹүбләндирмәмәлидир?
3 Иса демишди ки, дүнја она нифрәт етдији кими, давамчыларына да нифрәт едәҹәк (Јәһ. 15:18—20). Буна ҝөрә дә һаггымызда сөјләнилән мәнфи сөзләр вә гаршылашдығымыз мүгавимәтләр бизи тәәҹҹүбләндирмәмәлидир. Сон јахынлашдығындан вә Шејтан ҝет-ҝедә даһа да гәзәбләндијиндән, ајдын мәсәләдир ки, бу кими шејләр ҝүнбәҝүн артаҹаг (Вәһј 12:12). Биз чох севинирик ки, бүтүн бунлар Шејтан дүнјасынын тезликлә мәһв олаҹағына сүбутдур.
4. Хидмәтдә пис мүнасибәтлә гаршылашанда неҹә ҹаваб вермәлијик?
4 Нәвазишлә ҹаваб вер. Хидмәтдә пис мүнасибәт ҝөрәндә ҹавабымыз һәмишә нәвазишли вә һәлим олмалыдыр (Сүл. мәс. 15:1; Колос. 4:5, 6). Әҝәр шәраит јол верәрсә, сәмими инсана Јеһованын Шаһидләри һаггында чохлу тәһриф олунмуш мәлуматларын мөвҹуд олдуғуну демәк, јахуд онун нәјә ҝөрә белә дүшүндүјүнү сорушмаг олар. Һәлим ҹаваб һәмин адамы Јеһованын Шаһидләри һаггында ешитдикләри барәдә суаллар вермәјә вә ҝәлән дәфә Шаһидләрә гулаг асмаға тәшвиг едә биләр. Лакин әҝәр инсан чох гәзәблидирсә, јахшы оларды ки, һөрмәтҹил тәрздә сағоллашыб ораны тәрк едәк. Башгаларынын бизә неҹә мүнасибәт бәсләмәсиндән асылы олмајараг, әмин ола биләрик ки, Јеһова бизим хидмәтимизи гијмәтләндирир (Јешаја 52:7).