Бичилмәк үчүн ағармыш тарлалар
1. Инди һансы ваҹиб иш һәјата кечирилир?
1 Иса самаријалы гадына шәһадәтлик етдикдән сонра өз шаҝирдләринә демишди: «Ҝөзләринизи галдырын, бичилмәк үчүн ағармыш тарлалара бахын» (Јәһја 4:35, 36). Руһани бичин артыг башламышды вә Иса бунун дүнја мигјасында баш верәҹәјини ҝөрүрдү. Һал-һазырда ҝөјләрдә олмасына бахмајараг, о, бичин ишиндә фәал сурәтдә иштирак едир (Мат. 28:19, 20). Сонун јахынлашдығы мүддәтдә бу ишин даһа да ҝүҹләндијини нә ҝөстәрир?
2. Үмумдүнја бичин ишинин сүрәтләндијини һесабатдан неҹә ҝөрмәк олар?
2 Үмумдүнја бичин иши. 2009-ҹу ил хидмәт или әрзиндә бүтүн дүнјада тәблиғчиләрин сајында 3,2 фаиз артым олмушдур. Тәблиғ ишинә мәһдудијјәт гојулмуш өлкәләрдә исә артым 14 фаиз тәшкил етмишдир. Ајлыг һесабата әсасән, Мүгәддәс Китабы өјрәнәнләрин сајы 7 619 000 нәфәри кечмишдир. Бу сај өтән илә нисбәтән тәблиғчиләрин ән јүксәк сајындан чохдур, еләҹә дә Мүгәддәс Китабы өјрәнәнләрин сајындан тәхминән јарым милјон артыгдыр. Дүнјанын бир чох јерләриндә бу иш сүрәтлә ҝенишләндикҹә Ҝилеад мәктәбиндә тәлим кечмиш миссионерләрә тәләбат артыр. Бир чох өлкәләрдә әҹнәбидилли әразиләрдә бөјүк артым мүшаһидә олунур. Ҝөрүндүјү кими, бичинин сонуна јахын Јеһова бу иши сүрәтләндирир (Јешаја 60:22). Сән өз саһәнә неҹә јанашырсан?
3. Бәзиләри тәблиғ етдикләри әрази һаггында һансы нәтиҹәјә ҝәлә биләрләр?
3 Бәс сәнин тәблиғ етдијин әрази һагда нә демәк олар? «Мәним тәблиғ етдијим әрази бир о гәдәр дә сәмәрәли дејил», — дејә кимсә фикирләшә биләр. Доғрудан да, бәзи әразиләр диҝәрләри кими сәмәрәли дејил вә ја әввәлки гәдәр бәһрә ҝәтирмир. Буна ҝөрә бәзи тәблиғчиләр белә гәнаәтә ҝәлә биләрләр ки, һәмин әразидә артыг бичин баша чатыб вә онларын иши анҹаг јердә галанлары топламагдан ибарәтдир. Бу, һәгигәтән дә, беләдир?
4. Хидмәтимизә һансы дүзҝүн мүнасибәти инкишаф етдирмәлијик вә неҹә?
4 Бичин әввәлдән ахыра кими гызғын фәалијјәт дөврүдүр. Исанын сөзләриндән бу ишин нә дәрәҹәдә тәҹили олдуғуну ҝөрмәк олар: «Мәһсул бол, ишчи исә аздыр. Буна ҝөрә дә бичин Саһибинә јалварын ки, мәһсулу јығмаг үчүн бичинчи ҝөндәрсин» (Мат. 9:37, 38). Мәһсулун нә вахт вә һарада олаҹағы бичинин Саһиби Јеһовадан асылыдыр (Јәһ. 6:44; 1 Кор. 3:6—8). Бәс бизим ишимиз нәдән ибарәтдир? Мүгәддәс Китаб ҹаваб верир: «Тохумуну сәһәр вахты сәп, ахшама гәдәр дә әлин бош дурмасын» (Ваиз 11:4—6). Бәли, бичинин гызғын вахтында әлимизи-әлимизин үстүнә гојуб отурмағын вахты дејил!
5. Нәјә ҝөрә сәмәрәсиз кими ҝөрүнән әразиләрдә белә сәјлә тәблиғ етмәјә давам етмәлијик?
5 Бичмәјә давам един. Тәблиғ етдијимиз әразинин дәфәләрлә ишләнмәсинә вә сәмәрәсиз кими ҝөрүнмәсинә бахмајараг, бичин ишиндә чалышганлыгла вә јубанмадан иштирак етмәк үчүн әсаслы сәбәбләримиз вар (2 Тим. 4:2). Дүнјада баш верән һадисәләр инсанлары өз дүшүнҹә тәрзләрини дәјишмәјә вә ҝәләҹәкләри һагда дүшүнмәјә вадар едир. Ушаглар бөјүдүкҹә тәһлүкәсизлик вә гәлб раһатлығы ахтармаға башлаја биләрләр. Јахуд бизим әзмли олмағымыз кимләрәсә тәсир едә биләр. Бәли, әввәлләр бизә гулаг асмајанлар сонралар хош хәбәрә һај верә биләрләр. Һәтта ҝәтирдијимиз хәбәрә биләрәкдән гулаг асмаг истәмәјәнләр белә хәбәрдар олунмалыдырлар (Јез. 2:4, 5; 3:19).
6. Әҝәр әразимиздә инсанлар хош хәбәрә һај вермирләрсә, сәјимизи горумагда бизә нә көмәк едәҹәк?
6 Әҝәр бизим әразидә дә инсанлар хош хәбәрә һај вермирләрсә, сәјимизи горумагда бизә нә көмәк едәҹәк? Биз евдән-евә тәблиғдән савајы, хидмәтин диҝәр нөвләриндә иштирак едә биләрик: мәсәлән, ишҝүзар әразиләрдә вә ја телефон васитәсилә шаһидлик едә биләрик. Јахуд тәгдимәләримиздә дәјишиклик едәрәк хидмәтә јанашма тәрзимиз јахшылашдыра биләрик. Графикимиздә дәјишиклик едә биләр вә хидмәтә ахшам вә ја инсанларын евдә олдуглары башга вахтда чыха биләрик. Хош хәбәри даһа чох инсанлара чатдырмаг үчүн гаршымыза јени дил өјрәнмәк мәгсәди гоја биләрик. Биз даими пионер хидмәтинә башламагла хидмәтимизи ҝенишләндирә биләрик. Јахуд бичинчиләрә тәләбат олан әразиләрә көчә биләрик. Бичин ишинә дүзҝүн мүнасибәт бәсләсәк, бу ваҹиб ишдә там иштирак етмәк үчүн вар гүввәмизлә чалышаҹағыг.
7. Мәһсул јығымында нә вахтаҹан иштирак едәҹәјик?
7 Әкинчинин мәһсулу јығмаг үчүн вахты аз олдуғундан о, ишини битирмәмиш истираһәт едә вә ја ләнҝијә билмәз. Ејнилә руһани бичиндә дә јубанмаг олмаз. Бәс мәһсул јығымында нә вахтаҹан иштирак едәҹәјик? «Дөврүн јекунуна» вә «сон» ҝәлинҹәјә гәдәр (Мат. 24:14; 28:20). Јеһованын ән ҝөркәмли Хидмәтчиси кими, биз дә бизә һәвалә олунан иши сона чатдырмаг истәјирик (Јәһ. 4:34; 17:4). Буна ҝөрә дә ҝәлин сон ҝәлинҹәјә гәдәр хидмәтимизи сәјлә, севинҹлә вә мүсбәт әһвал-руһијјә илә јеринә јетирәк (Мат. 24:13). Бичин иши һәлә сона чатмајыб!
[2-ҹи сәһифәдәки јазы]
Бичин әввәлдән ахыра кими гызғын фәалијјәт дөврүдүр