Аллаһа иззәт ҝәтирән давраныш тәрзи
1. Нәјә ҝөрә Јеһованын Шаһидләри вилајәт конгресләри заманы диггәт мәркәзиндә олурлар?
1 Вилајәт конгресләри заманы биз даһа тез нәзәрә чарпырыг. Конгресләрин кечирилдији әксәр шәһәрләрдә күтләви информасија васитәләри бизим ҝәлишимиз барәдә әһалини мәлуматландырыр. Меһманхана вә ресторанлар чох вахт конгрес иштиракчылары илә долу олур вә һәмин әразидә јашајанлар конгресә ҝәләнләрин чохунун плакетләр тахдығына фикир верирләр. Ашағыда гејд олунан бәзи хатырлатмалар конгрес кечирилән шәһәрдә јахшы давранышымызла Аллаһы иззәтләндирмәјә көмәк едәҹәк (1 Пет. 2:12).
2. Конгрес кечирилән шәһәрдә әдәбли ҝејимимизлә Аллаһы неҹә иззәтләндирә биләрик?
2 Әдәбли ҝејим. Әлбәттә, биз конгрес заманы әдәбли ҝејинмәлијик. Анҹаг ҝејим тәрзимиз диҝәр вахтларда да — меһманханада галаркән, ресторанларда јемәк јејәркән, алыш-вериш едәркән вә саирә кими ишләрлә мәшғул оларкән дә әтрафымыздакы инсанлара ҝүҹлү тәсир бағышлаја биләр. Дүздүр, бу кими һалларда рәсми ҝејинмәк тәләб олунмур, анҹаг әдәбли, ләјагәтли вә сәлигәли ҝејинмәк мүтләгдир. Бизи мүшаһидә едән инсанлар дүнјәвиләрлә арамыздакы фәрги ајдын ҝөрмәлидирләр (Ром. 12:2). Бундан әлавә, конгрес плакетләрини тахмаг да ваҹибдир; чүнки бу, конгресин кечирилдијиндән хәбәр верир, шаһидлик етмәјә вә конгресин диҝәр иштиракчыларынын бизи танымасына имкан јарадыр.
3. Сәбир вә нәзакәт хүсусијјәтләрини неҹә тәзаһүр етдирә биләрик?
3 Сәбирли вә нәзакәтли олун. Бу ҝүн дүнјада инсанларын әксәријјәтинин худбин вә нанкор олдуғу бир вахтда сәбирли вә нәзакәтли олмағымыз бизи мүшаһидә едән инсанлара, еләҹә дә меһманхана вә ресторан ишчиләринә неҹә дә хош олаҹаг! (2 Тим. 3:1—5). Отурмаг үчүн јер тутаркән вә ја конгресдә әдәбијјат алмаг үчүн сыраја дүзүләркән биз өз хејримизи јох, башгаларынын хејрини фикирләшмәлијик (1 Кор. 10:23, 24). Илк дәфә конгресдә иштирак едән бир марагланан киши белә сөзләр демишди: «Һәмин ҝүн сөјләнилән мәрузәләр јадымда галмаса да, Шаһидләрин давранышлары јаддашымдан узун мүддәт силинмәјәҹәк».
4. Әҝәр шәраитимиз јол верирсә, нәјә ҝөрә конгресдә көнүллү кими хидмәт етмәлијик?
4 Көнүллүләр. Һазырлыг руһу ҝөстәрмәк мәсиһчиләрин сәҹијјәви хүсусијјәтидир (Мәз. 110:3). Бәс сән конгресдә көнүллү олараг көмәк етмәјә һазырсанмы? Бир дәфә конгресгабағы ҝөрүшүн кечириләҹәји јерин тәмизләнмәсиндә 600-ә јахын баҹы-гардаш иштирак етмишди. Бу, хидмәт персоналына ҝүҹлү тәәссүрат бағышламышды вә онлар белә сөзләр демишдиләр: «Һеч вахт белә һејрәтамиз бир шејлә растлашмамышдыг! Бүтүн ишчиләрин көнүллү олдуғуна инанмаг чох чәтиндир». Биз 2013-ҹү илин вилајәт конгресини бөјүк сәбирсизликлә ҝөзләјирик. Бу конгрес заманы јалныз динләмәк вә өјрәнмәк јох, һәм дә Аллаһын адыны иззәтләндирмәк имканымыз олаҹаг.
2013-ҹү илин вилајәт конгреси илә бағлы хатырлатмалар
◼ Конгресин ҹәдвәли. Гапылар саат 8:00-дан ачыг олаҹаг. Падшаһлыг мелодијалары һәр ҝүн саат 9:20-дә сәсләнәҹәк. Вахтында јерләримизи тутмалыјыг ки, програм лајигли тәрздә башласын. Програм ҹүмә вә шәнбә ҝүнү 16:50-дә, базар ҝүнү исә саат 15:35-дә јекун маһны вә дуа илә гуртараҹаг.
◼ Машын дајанаҹағы. Зәһмәт олмаса, инсанларын дүшмәси үчүн нәглијјат васитәләрини дүз конгрес залынын ҝиришиндә сахламајын. Истисна анҹаг јашлы вә әлил сәрнишинләр үчүндүр. Мүхтәлиф јерләрдә шәраит фәргли ола биләр, буна ҝөрә дә бүтүн сүрүҹүләрдән хидмәтчиләрин ҝөстәришләринә әмәл етмәләри тәләб олунур.
◼ Јерләр. Әлавә јерләри анҹаг бир машында ҝәлдијиниз вә ја ејни мәнзилдә галдығыныз, јахуд да Мүгәддәс Китабы өјрәтдијиниз адамлар үчүн тутмаг олар. Јашлы вә хәстә инсанлар үчүн јерләр мәһдуд олдуғундан бүтүн аилә үзвләринин онларла отурмасы мүмкүн олмаја биләр. Хаһиш едирик, бу јерләри јашлы вә хәстә баҹы–гардашлар, еләҹә дә онлара көмәк едәнләр үчүн сахлајын (1 Кор. 13:5).
◼ Наһар. Хаһиш олунур ки, фасилә заманы наһар етмәк үчүн башга јерә ҝетмәк әвәзинә, өзүнүзлә јемәк ҝәтирәсиниз. Лазым ҝәлсә, өз отураҹағынызын алтына гоја биләҹәјиниз кичик сојудуҹу чанта ҝәтирә биләрсиниз. Конгресә бөјүк аиләви чанталар, шүшә габлар вә спиртли ичкиләр ҝәтирмәк олмаз.
◼ Көнүллү ианәләр. Вилајәт конгресләринин тәшкилинә мүәјјән гәдәр вәсаит сәрф едилир. Буна ҝөрә миннәтдарлығымызы конгресдә үмумдүнја ишинә көнүллү ианә етмәклә ҝөстәрә биләрик.
◼ Дәрманлар. Әҝәр һәкимин мәсләһәти илә давамлы шәкилдә һансыса дәрманы гәбул едирсинизсә, зәһмәт олмаса, онлары өзүнүзлә ҝөтүрмәји унутмајын, чүнки конгресдә һәмин дәрманлар верилмир. Шәкәр хәстәләри үчүн олан ијнәләр тәһлүкәли олдуғундан истифадә етдикдән сонра онлары галдығымыз евин вә ја конгресин кечирилдији залын зибил гутуларына атмаг олмаз; бу заман мүвафиг ҝөстәришләрә риајәт етмәк лазымдыр.
◼ Ајаггабы. Һәр ил ајаггабылар уҹбатындан травма аланлар олур. Ајаггабы садә вә мүнасиб олмалыдыр ки, пилләкәнләрдә, торлу дәмир дөшәмәләрдә вә башга јерләрдә јеримәк раһат олсун.
◼ Ушаг арабалары вә ачылыб-јығылан стуллар. Конгресин кечирилдији јерә ушаг арабасы вә ачылыб-јығылан стуллар ҝәтирмәк олмаз. Анҹаг валидејнин отурдуғу јерин јанындакы јерә тәһлүкәсиз ушаг отураҹағыны јерләшдирмәк олар.
◼ Әтирләр. Конгресләрин бәзиләри өртүлү јерләрдә кечирилир. Буна ҝөрә тәнәффүс јоллары вә бу кими хәстәликләрдән әзијјәт чәкән баҹы-гардашлары нәзәрә алараг кәскин гохусу олан әтир вә одеколонларын истифадәсини мәһдудлашдырмаг бизим тәрәфимиздән хејирхаһлыг оларды (1 Кор. 10:24).
◼ «Зәһмәт олмаса, бу адама баш чәк» (С-43) бланкы. Конгрес заманы гејри-формал шаһидлик верәркән мараг ҝөстәрән һәр бир адам һаггында мәлумат вермәк үчүн «Зәһмәт олмаса, бу адама баш чәк» (С-43) бланкындан истифадә ет. Долдурулмуш бланклары ја әдәбијјат шөбәсинә, ја да конгресдән гајыдандан сонра јығынҹағын катибинә вермәк олар. («Бизим Падшаһлыг Хидмәтимиз» вәрәгәсинин 2011-ҹи ил мај сајынын 3-ҹү сәһифәсинә бахын.)
◼ Кафе вә ресторанлар. Белә јерләрдә ҝөзәл давранышынла Јеһованын адыны иззәтләндир. Әҝәр белә бир адәт варса, хидмәт ҝөстәрәнләрә чајпулу сахла.
◼ Јерләшдирилмә. Шәхси мәнзилдә галмағы сифариш едәркән нөвбәти мәгамлары нәзәрә алмаг лазымдыр:
1) бүтүн һалларда мәнзил сифариши үчүн «Хүсуси тәләбатлы шәхсләр үчүн мәнзил сорғусу» (CO-5a) бланкындан истифадә един;
2) хаһиш олунур, јадда сахлајын ки, галмаг үчүн евләр анҹаг конгрес мүддәтинә тәгдим олунур;
3) ушагларыныза нәзарәт един вә онлары һеч вахт тәк бурахмајын;
4) һәмиманлыларымыз гонагпәрвәрлик ҝөстәрәркән миннәтдарлыг билдирмәји унутмајын;
5) әҝәр мәнзил сифаришинизи ләғв етмәк мәҹбуријјәтиндәсинизсә, бу һагда јығынҹағынызын катибинә мәлумат вермәји ҝеҹикдирмәјин.
◼ Көнүллүләрин хидмәти. Конгресдә көнүллү кими хидмәт етмәк истәјән һәр кәс конгресин Көнүллүләрин хидмәти шөбәсинә мүраҹиәт етмәлидир. 16 јашындан ашағы олан ушаглар да валидејнләринин, јахуд онлара ҹавабдеһ олан башга бөјүкләрин нәзарәти алтында ишләјәрәк өз төһфәләрини верә биләрләр.