«Башга милләтләрин арасында... нүмунәви давранын»

1. Гаршыдакы конгресләр заманы нүмунәви давранмаг нә үчүн ваҹибдир?

¹ Һәр ил конгресләрдә башгаларынын диггәтини ҹәлб етдијимиз үчүн һәрәкәтләримизлә ибадәт етдијимиз Аллаһы лајигли шәкилдә әкс етдирмәлијик (Лев. 20:26). Нүмунәви давранышымыздан, о ҹүмләдән ҝејимимиздән вә хариҹи ҝөрүнүшүмүздән Мәсиһин әсил давамчылары олдуғумуз ајдын ҝөрүнмәлидир. Буна ҝөрә дә гаршыдакы вилајәт вә ја бејнәлхалг конгрес заманы «башга милләтләрин арасында... нүмунәви» давранаг ки, сәмави Атамыз мәдһ едилсин (1 Пет. 2:12). Бәс буну неҹә едә биләрик?

2. Конгрес заманы мәсиһчи кејфијјәтләрини ҝөстәрмәјимиз үчүн һансы имканлар јараныр?

² Мәсиһчи кејфијјәтләрини әкс етдир. Арамызда олан мәһәббәт вә «кәнар адамлара» мүнасибәтимиз бу дүнјада һөкм сүрән әһвал-руһијјәдән тамамилә фәргләнир (Колос. 3:10; 4:5; 2 Тим. 3:1—5). Биз отел вә ресторан ишчиләри илә, һәтта анлашылмазлыг јаранарса, меһрибан вә сәбирлә давранмалыјыг. Һөрмәт әламәти олараг, биз, һәмчинин хидмәт ҝөстәрән ишчиләрә чај пулу да сахлаја биләрик.

3. Валидејнләр нәјә фикир вермәлидирләр вә нә үчүн?

³ Валидејнләр конгресин әразисиндә, ресторанда вә галдыглары јердә ушагларына диггәтлә нәзарәт етмәлидирләр (Сүл. мәс. 29:15). Бир отел ресторанынын менеҹери бир ҹүтлүјә белә демишди: «Сизин халгыныза вурулдуг. Сизин аиләләриниз вә ушагларыныз олдугҹа тәрбијәли вә нәзакәтлидир. Бурада һамы сиздән ағыздолусу данышыр. Истәјәрдик, һәр һәфтәсону бизим гонағымыз оласыныз».

4. Конгрес кечирилән мүддәтдә нә үчүн ҝөрүнүшүмүзә фикир вермәлијик?

⁴ Әдәбли ҝејим. Конгрес заманы бизим ҝејимимиз мүнасиб вә сәлигәли олмалы, дүнјада ади гәбул олунан әҹаиб стилдә олмамалыдыр (1 Тим. 2:9). Отелдә галмаг үчүн гејдијјатдан кечәндә вә ораны тәрк едәндә, һабелә һәр ҝүн конгресдән әввәл вә ја сонра асудә вахтларымызда һәддән артыг сәрбәст вә ја зөвгсүз ҝејинмәмәлијик. Белә етсәк биз конгрес плакетини алныачыг шәкилдә таха биләҹәјик вә шаһидлик етмәк үчүн фүрсәт дүшәндә дилимиз гыса олмајаҹаг. Бу ил кечириләҹәк конгресләрдә ҝејимимиз вә нүмунәви давранышымыз тәкҹә сәмими инсанлары Мүгәддәс Китабдакы хилас ҝәтирән хәбәрә ҹәлб етмәјәҹәк, ејни заманда Јеһованы севиндирәҹәк (Сеф. 3:17).

2014-ҹү илдә кечирилән конгресләрлә бағлы хатырлатмалар

◼ Конгресин ҹәдвәли. Гапылар саат 8:00-дан ачыг олаҹаг. Падшаһлыг мелодијалары һәр үч ҝүн саат 9:20-дә сәсләнәҹәк. Вахтында јерләримизи тутмалыјыг ки, програм лајигли тәрздә башласын. Програм ҹүмә вә шәнбә ҝүнү 16:55-дә, базар ҝүнү исә саат 15:50-дә јекун маһны вә дуа илә гуртараҹаг.

◼ Бејнәлхалг конгресләр. Бәзи јерләрдә бејнәлхалг конгресләр кечириләҹәк. Јаддан чыхартмајын ки, филиал јерләри, дајанаҹагларын тутумуну вә отелләрдәки отаглары диггәтлә һесабладыгдан сонра бу конгресә конкрет јығынҹаглары вә хариҹи нүмајәндәләри дәвәт етмишдир. Әҝәр тәблиғчиләр бејнәлхалг конгресә дәвәт олунмадан ҝәләрләрсә, бу, дарысгаллыға сәбәб ола биләр. Әҝәр шәраитин дәвәт олундуғун конгресә ҝетмәјә јол вермирсә, јахшы олар ки, бејнәлхалг конгреси сечмәјәсән.

◼ Машын дајанаҹағы. Зәһмәт олмаса, инсанларын дүшмәси үчүн нәглијјат васитәләрини дүз конгрес залынын ҝиришиндә сахламајын. Истисна анҹаг јашлы вә әлил сәрнишинләр үчүндүр. Мүхтәлиф јерләрдә шәраит фәргли ола биләр, буна ҝөрә дә бүтүн сүрүҹүләрдән хидмәтчиләрин ҝөстәришләринә әмәл етмәләри тәләб олунур.

◼ Јерләр. Хаһиш олунур, һәр сәһәр гапылар ачылан кими, хошунуз ҝәлән јерләри тутмаг үчүн бир-биринизлә јарыша чыхмајасыныз. Фәдакарлыг руһу бизи тәшвиг едәҹәк ки, әсил мәсиһчи кими давранараг башгаларынын хејрини дүшүнәк, кәнардан баханлар да буну ҝөрүб Аллаһы мәдһ едәҹәкләр (Јәһ. 13:34, 35; 1 Кор. 13:4, 5; 1 Пет. 2:12). Әлавә јерләри анҹаг бир машында ҝәлдијиниз вә ја ејни мәнзилдә галдығыныз, јахуд да Мүгәддәс Китабы өјрәтдијиниз адамлар үчүн тутмаг олар.

◼ Наһар. Хаһиш олунур ки, фасилә заманы наһар етмәк үчүн башга јерә ҝетмәк әвәзинә, өзүнүзлә јемәк ҝәтирәсиниз. Лазым ҝәлсә, өз отураҹағынызын алтына гоја биләҹәјиниз кичик сојудуҹу чанта ҝәтирә биләрсиниз. Конгресә бөјүк аиләви чанталар, шүшә габлар ҝәтирмәк олмаз.

◼ Көнүллү ианәләр. Конгресә ҝөрә миннәтдарлығымызы орада үмумдүнја ишинә көнүллү ианә етмәклә ҝөстәрә биләрик.

◼ Дәрманлар. Әҝәр һәкимин мәсләһәти илә давамлы шәкилдә һансыса дәрманы гәбул едирсинизсә, зәһмәт олмаса, онлары өзүнүзлә ҝөтүрмәји унутмајын, чүнки конгресдә һәмин дәрманлар верилмир. Шәкәр хәстәләри үчүн олан ијнәләр тәһлүкәли олдуғундан истифадә етдикдән сонра онлары галдығымыз евин вә ја конгресин кечирилдији залын зибил гутуларына атмаг олмаз; бу заман мүвафиг ҝөстәришләрә риајәт етмәк лазымдыр.

◼ Тәһлүкәсизлик тәдбирләри. Һәр ил, хүсусилә дә дикдабан ајаггабылар уҹбатындан травма аланлар олур. Ајаггабы садә вә мүнасиб олмалыдыр ки, пилләкәнләрдә, торлу дәмир дөшәмәләрдә вә башга јерләрдә јеримәк раһат олсун.

◼ Ушаг арабалары вә ачылыб-јығылан стуллар. Конгресин кечирилдији јерә ушаг арабасы вә ачылыб-јығылан стуллар ҝәтирмәк олмаз. Анҹаг валидејнин отурдуғу јерин јанындакы јерә тәһлүкәсиз ушаг отураҹағыны јерләшдирмәк олар.

◼ Әтирләр. Бәзи конгресләр һаваландырма системи зәиф олан өртүлү јерләрдә кечирилир. Буна ҝөрә тәнәффүс јоллары вә бу кими хәстәликләрдән әзијјәт чәкән баҹы-гардашлары нәзәрә алараг кәскин гохусу олан әтир вә одеколонларын истифадәсини мәһдудлашдырмаг бизим тәрәфимиздән хејирхаһлыг оларды (1 Кор. 10:24).

◼ «Зәһмәт олмаса, бу адама баш чәк» (С-43) бланкы. Конгрес заманы гејри-формал шаһидлик верәркән мараг ҝөстәрән һәр бир адам һаггында мәлумат вермәк үчүн «Зәһмәт олмаса, бу адама баш чәк» (С-43) бланкындан истифадә ет. Долдурулмуш бланклары ја әдәбијјат шөбәсинә, ја да конгресдән гајыдандан сонра јығынҹағын катибинә вермәк олар. («Бизим Падшаһлыг Хидмәтимиз» вәрәгәсинин 2011-ҹи ил мај сајынын 3-ҹү сәһифәсинә бахын.)

◼ Кафе вә ресторанлар. Белә јерләрдә ҝөзәл давранышынла Јеһованын адыны иззәтләндир. Әҝәр белә бир адәт варса, хидмәт ҝөстәрәнләрә чајпулу сахла.

◼ Јерләшдирилмә. Шәхси мәнзилдә галмағы сифариш едәркән нөвбәти мәгамлары нәзәрә алмаг лазымдыр:

1) бүтүн һалларда мәнзил сифариши үчүн «Хүсуси тәләбатлы шәхсләр үчүн мәнзил сорғусу» (CO-5а) бланкындан истифадә един;

2) хаһиш олунур, јадда сахлајын ки, галмаг үчүн евләр анҹаг конгрес мүддәтинә тәгдим олунур;

3) ушагларыныза нәзарәт един вә онлары һеч вахт тәк бурахмајын;

4) һәмиманлыларымыз гонагпәрвәрлик ҝөстәрәркән миннәтдарлыг билдирмәји унутмајын;

5) әҝәр мәнзил сифаришинизи ләғв етмәк мәҹбуријјәтиндәсинизсә, бу һагда јығынҹағынызын катибинә мәлумат вермәји ҝеҹикдирмәјин.

◼ Көнүллүләрин хидмәти. Конгресдә көнүллү кими хидмәт етмәк истәјән һәр кәс конгресин көнүллүләрин хидмәти шөбәсинә мүраҹиәт етмәлидир. 16 јашындан ашағы олан ушаглар да валидејнләринин, јахуд онлара ҹавабдеһ олан башга бөјүкләрин нәзарәти алтында ишләјәрәк өз төһфәләрини верә биләрләр.