Кор инсанлара Јеһова һагда өјрәнмәјә көмәк ет
1. Иса кор инсанлара шәфгәтлә јанашдығыны неҹә ҝөстәрмишди?
1 Исанын өлүмүнә бир нечә ҝүн галмышды. О, Әриһа шәһәриндән чыханда ики кор диләнчи гышгырды: «Аға,.. бизә рәһм ет!» Исанын фикри ону ҝөзләјән чәтинликләрдә олса да, ајаг сахлады, онлары јанына чағырды вә сағалтды (Мәт. 20:29—34). Бәс биз Исадан нүмунә ҝөтүрәрәк кор инсанлара неҹә шәфгәт ҝөстәрә биләрик?
2. Иҹтимаи јердә кор инсанла растлашанда она неҹә шаһидлик етмәк олар?
2 Көмәјинә јет. Иҹтимаи јердә кор инсанла растлашанда өзүнү тәгдим ет вә әҝәр лазымдырса, көмәјини тәклиф ет. Адәтән, белә инсанлардан истифадә едирләр, буна ҝөрә дә о, әввәлҹә еһтијат едә биләр. Анҹаг достјана мүнасибәтин вә сәмимијјәтин онун шүбһәләрини гова биләр. Һәмчинин јадда сахла ки, корлуғун дәрәҹәләри мүхтәлиф олур вә инсанын нә дәрәҹәдә көмәјә еһтијаҹы олдуғу бундан асылы ола биләр. Она көмәк етдикдән сонра Мүгәддәс Китаб үзрә маарифләндирмә иши илә мәшғул олдуғуну вурғулаја биләрсән. Онун үчүн Мүгәддәс Китабдан ајә, мәсәлән Зәбур 146:8, јахуд Әшија 35:5, 6 ајәләрини охуја биләрсән. Әҝәр о, Брајл шрифти илә охуја билирсә, ондан Мүгәддәс Китаб һагда даһа чох өјрәнмәк үчүн Брајл шрифтиндә олан нәшрләри әлдә етмәк истәдијини соруш. Она һәмчинин jw.org сајтындан аудио јазылары јүкләмәјә көмәк етмәк олар. Әҝәр онун компүтериндә мәтни монитордан охујан програм варса, jw.org сајтындан мәгаләләри вә нәшрләри ону үчүн RTF форматда јүкләмәк олар. («Кор адама көмәк едәркән» адлы чәрчивәјә бах.)
3. Әразимиздә кор инсанлары неҹә ахтара биләрик?
3 Кор инсанлары ахтар. Ев-ев тәблиғ едәркән кор инсанларла надир һалларда гаршылашырыг. Белә ки, онларын әксәријјәти гапыларына ҝәлән јад адамларла сөһбәт етмәји хошламырлар. Буна ҝөрә дә бу ҹүр инсанлары ахтарыб онлара шаһидлик етмәк үчүн әмәлли-башлы сәј ҝөстәрмәк лазымдыр (Мәт. 10:11). Иш вә ја мәктәб јолдашларын арасында кор оланы вар? Өзүн јахынлашыб онунла сөһбәт ет. Әҝәр сизин әразидә корлар үчүн мәктәб варса, онда Брајл шрифтиндә чыхан нәшрләримиздән бир нечәсини мәктәбин китабханасына верә биләрсән. Аиләсиндә кор адам олан кимисә таныјырсан? Јашадығын јердә корлара хидмәт ҝөстәрән ҹәмијјәтләр, јахуд корлар еви вармы? Онларын аилә үзвүнә, гәбул шөбәсиндә ишләјәнә вә ја мүдирә билдир ки, Јеһованын Шаһидләри сәмими-гәлбдән кор инсанлара көмәк етмәк истәјир. Сонра исә Брајл шрифтиндә олан нәшрләр вә ја аудио материаллар ҝәтирмәји тәклиф ет. Она Мүгәддәс Китабдан Аллаһын тезликлә корларын ҝөзләрини ачаҹағы вәдини оху. Сән һәмчинин jw.org сајтындан «Билмирәм, онсуз нә едәрдим» адлы видеону ҝөстәрә биләрсән. Бу видео Брајл шрифтиндә Мүгәддәс Китабдан јарарланан бир кор киши һагдадыр. Ҝәлишинин мәгсәдини изаһ етсән, корларла раһат әлагә сахламаг мүмкүн ола биләр.
4. Ҹанетин нүмунәсиндән нә өјрәнирик?
4 Ҹанет адлы кор бир баҹы корлар евинә баш чәкмишди. Орада ҝәнҹ бир гадынла сөһбәтә башламышды. Ҹанет она демишди: «Иса корлары сағалдараг ҝөстәрмишди ки, ҝәләҹәкдә корлара шәфа верәҹәк». Онлар Вәһј 21:3, 4 ајәләрини мүзакирә етдикдән сонра Ҹанет Аллаһын Падшаһлығы алтында јашајанда бу вәдин неҹә јеринә јетәҹәјини изаһ етмишди. Гадын әввәлҹә сүкута гәрг олмуш, сонра исә демишди: «Мән буну һеч вахт кор адамын дилиндән ешитмәмишдим. Инсанларын чоху елә фикирләшир ки, корлар ја өзләринин, ја да дәдә-бабаларынын ҝүнаһынын ҹәзасыны чәкирләр». Ҹанет «Мүгәддәс Китаб өјрәдир» китабынын линкини гадынын електрон үнванына ҝөндәрди, инди онлар һәфтәдә ики дәфә Мүгәддәс Китабы арашдырырлар.
5. Корлара шәфгәтлә јанашсаг, онлара һансы көмәјимиз дәјә биләр?
5 Дүздүр, биз, Иса кими, инсанларын ҝөзләрини ача билмәрик. Анҹаг зеһни бу дөврүн аллаһы тәрәфиндән кор едилмиш инсанлара, еләҹә дә әсил корлара Аллаһын Кәламындакы һәгигәти баша сала биләрик (2 Кор. 4:4). Иса Әриһа јахынлығындакы һәмин о ики кора јазығы ҝәлдији үчүн онлары сағалтмышды (Мәт. 20:34). Әҝәр биз дә кор инсанлара шәфгәтлә јанашсаг, онлардан кимләрәсә корлуғу әбәдијјән јох едәҹәк Јеһова Аллаһ һаггында өјрәдә биләрик.