Салеһ инсанлар әбәдијјән Аллаһа һәмд едәҹәкләр
Салеһ инсан һеч заман унудулмаз. ...Сонсузадәк салеһлијиндән дөнмәз [«салеһлији әбәдијјән дурар», КМ]» (МӘЗ. 112:6, 9).
1. а) Аллаһын ҝөзүндә салеһ сајылан инсанлары һансы хошбәхт ҝәләҹәк ҝөзләјир? б) Һансы суал јараныр?
АЛЛАҺЫН ҝөзүндә салеһ олан бүтүн инсанлары неҹә дә ҝөзәл ҝәләҹәк ҝөзләјир! Јеһованын ҝөзәл кејфијјәтләрини өјрәнмәк онлара әбәдијјән зөвг верәҹәк. Онлар Аллаһын јаратдыглары барәдә даһа чох өјрәндикҹә үрәкләри Она һәмд етмәк истәји илә долуб-дашыр. Бу иззәтли ҝәләҹәјә наил олмаг үчүн 112-ҹи мәзмурда әсас тәләбләрдән бири кими вурғуланан ‘салеһлик’ тәләб олунур. Бәс неҹә ола биләр ки, ҝүнаһлы инсанлар мүгәддәс вә салеһ Аллаһ олан Јеһованын ҝөзүндә салеһ сајылсын? Дүзҝүн оланы етмәк үчүн нә гәдәр чалышсаг да, јенә дә сәһвләрә јол веририк, бәзән дә бу сәһвләр ҹидди олур (Ром. 3:23; Јаг. 3:2).
2. Јеһова мәһәббәтдән ирәли ҝәләрәк һансы ики мөҹүзәни ҝөстәрди?
2 Хошбәхтликдән, Јеһова бу мәсәләни әла јолла һәлл етди. Неҹә? Әввәлҹә О, ҝөјләрдә јашајан севимли Оғлунун һәјатыны мөҹүзәли шәкилдә бакирә гызын бәтнинә көчүрдү ки, камил инсан кими дүнјаја ҝәлсин (Лука 1:30-35). Даһа сонра Исанын дүшмәнләри ону өлдүрәндә Јеһова башга бир мөһтәшәм мөҹүзә ҝөстәрди. Аллаһ Исаны иззәтли руһани варлыг кими һәјата гајтарды (1 Пет. 3:18).
3. Нәјә ҝөрә Оғлуна сәмави һәјат мүкафатыны вермәк Аллаһа хош иди?
3 Јеһова Исаја јер үзүнә ҝәлмәз өнҹә малик олмадығы бир шеји — ҝөјдә «мәһведилмәз» (ЈД) һәјат мүкафатыны верди (Ибр. 7:15-17, 28). Јеһова буну бөјүк мәмнунијјәтлә етди, чүнки Иса ән сәрт сынаглар алтында белә камил нөгсансызлығыны горуду. Беләликлә Иса Шејтанын инсанларын Аллаһа худбин нијјәтләрдән ирәли ҝәләрәк хидмәт етдикләринә вә мәһәббәтләринин сарсылмаз олмадығына даир ирәли сүрдүјү јалана Атасынын әлинә ән јахшы вә гәти ҹавабы верә билмәси үчүн Атасынын әлинә әсас верди (Сүл. мәс. 27:11).
4. а) Ҝөјә галхдыгдан сонра Иса бизим үчүн нә етди вә Јеһова буна неҹә мүнасибәт ҝөстәрди? б) Јеһованын вә Исанын сәнин үчүн етдикләри сәндә һансы һиссләри доғурур?
4 Иса ҝөјдә даһа чох ишләр ҝөрдү. О, ‘ганынын’ дәјәри илә ‘уғрумузда Аллаһын һүзурунда зүһур етди’. Ҝөјләрдәки севән Атамыз хејирхаһлыг ҝөстәрәрәк Исанын дәјәрли тәгдимәсини ‘ҝүнаһларымыз үчүн әфв тәмин едән гурбан’ кими гәбул етди. Бунун сајәсиндә биз ‘тәмиз виҹданла’ ‘јашајан Аллаһа мүгәддәс хидмәти иҹра едә билирик’ (ЈД). Бу бизә 112-ҹи мәзмурун илк сөзләри олан «Јаһа һәмд един!» сөзләри илә разылашмаға әсас верир (Мәз. 112:1, ЈД; Ибр. 9:12-14, 24; 1 Јәһ. 2:2).
5. а) Аллаһын ҝөзүндә салеһлијимизи горумаг үчүн нә етмәлијик? б) 111-ҹи вә 112-ҹи мәзмур неҹә тәртиб олунуб?
5 Аллаһын ҝөзүндә салеһлијимизи горумаг үчүн Исанын төкүлән ганына иман ҝәтирмәлијик. Елә бир ҝүнүмүз олмамалыдыр ки, Јеһованын бизи чох севдијинә ҝөрә миннәтдар олмајаг (Јәһ. 3:16). Биз һәмчинин Аллаһын Кәламыны өјрәнмәли вә өјрәндикләримизә мүвафиг јашамаг үчүн әлимиздән ҝәләни етмәлијик. Аллаһ гаршысында тәмиз виҹданы горујуб-сахламаг истәјәнләр үчүн 112-ҹи мәзмурда јахшы мәсләһәтләр вар. Бу мәзмур 111-ҹи мәзмуру тамамлајыр. Һәр икиси дә, орижинал мәтнә әсасән, «Јаһа һәмд един!» ифадәси илә башлајыр вә онларын һәр бири ибрани әлифбасынын 22 һәрфиндән бири илә башланан 22 сәтирдән ибарәтдирa.
Хошбәхтлик үчүн әсас
6. «Зәбур» китабынын 112-ҹи мәзмурунда тәсвир олунан Аллаһдан горхан «инсан» һансы хејир-дуалары алыр?
6 «Нә бәхтијардыр Рәбдән горхан, әмрләриндән зөвг алан инсан! Нәсли јер үзүндә ҝүҹлү олаҹаг, әмәлисалеһләрин өвладлары хејир-дуа алаҹаг» (Мәз. 112:1, 2). Фикир верин ки, мәзмурчу биринҹи ајәдә тәк ‘инсандан’, 2-ҹи ајәнин сонунда исә ҹәм һалында ‘әмәлисалеһләрдән’ данышыр. Бу ҝөстәрир ки, 112-ҹи мәзмурда чохлу инсанлардан ибарәт групдан сөз едилир. Һәвари Павелин Мәзмур 112:9 ајәсини биринҹи әср мәсиһчиләринә тәтбиг етмәјә илһамланмасы буну тәсдиг едир. (2 Коринфлиләрә 9:8, 9 ајәләрини оху.) Бу мәзмур Мәсиһин јер үзүндәки давамчыларынын бу ҝүн нә дәрәҹәдә хошбәхт ола биләҹәкләрини неҹә дә ҝөзәл тәсвир едир!
7. Нәјә ҝөрә Аллаһын хидмәтчиләри Онун гаршысында сағлам горхуја малик олмалыдырлар, бәс сән Аллаһын әмрләринә неҹә јанашмалысан?
7 Мәзмур 112:1 ајәсинин ҝөстәрдији кими, ‘Рәбб горхусунда’ јеримәк бу һәгиги мәсиһчиләрә әсил хошбәхтлик ҝәтирир. Аллаһ гаршысында сағлам горху онлара Шејтан дүнјасынын руһуна гаршы дурмаға көмәк едир. Онлар Аллаһын Кәламыны тәдгиг етмәкдән вә Онун әмрләринә табе олмагдан ‘зөвг алырлар’. Бура Падшаһлыг һаггында хош хәбәри бүтүн дүнјада тәблиғ етмәк әмри дә дахилдир. Онлар бүтүн халглар арасындан шаҝирдләр һазырламагла јанашы, писләрә Аллаһын һөкм ҝүнүнүн ҝәлиши барәдә хәбәрдарлыг едирләр (Јез. 3:17, 18; Мат. 28:19, 20).
8. а) Аллаһа садиг халг сәјинә ҝөрә бу ҝүн һансы мүкафаты алыб? б) Јерүзү үмидинә малик оланлары һансы хејир-дуалар ҝөзләјир?
8 Бу әмрләрә табе олдуглары үчүн бу ҝүн јер үзүндә Аллаһын хидмәтчиләринин сајы једди милјону кечиб. Ким инкар едә биләр ки, Онун халгы һәгигәтән дә ‘јер үзүндә ҝүҹлү’ халг олуб? (Јәһ. 10:16; Вәһј 7:9, 14). Аллаһ Өз нијјәтини һәјата кечирдикҹә онлар даһа чох ‘хејир-дуа алаҹаглар’. Јерүзү үмидинә малик оланлар бир груп шәклиндә гаршыдан ҝәлән ‘бөјүк мәшәггәтдә’ хилас едиләҹәкләр ки, ‘салеһлијин өмүр сүрдүјү’ ‘јени јерин’ тәмәлини тәшкил етсинләр. Вахты чатанда Һар-Меҝидондан сағ чыханлар даһа чох «хејир-дуа алаҹаг». Онлар милјонларла дириләнләри гаршыламаға һазыр олаҹаглар. Неҹә дә ҝөзәл үмиддир! Нәһајәт, Аллаһын әмрләриндән ‘зөвг аланлар’ камиллијә чатаҹаг вә ‘Аллаһын өвладларынын иззәтли азадлығындан’ әбәдијјән һәзз алаҹаглар (2 Пет. 3:13; Ром. 8:21).
Сәрвәтиндән мүдрикликлә истифадә ет
9, 10. Һәгиги мәсиһчиләр руһани сәрвәтләриндән неҹә истифадә едирләр вә онларын салеһлији һансы мәнада әбәдијјән дураҹаг?
9 «Евиндән боллуг вә сәрвәт әскилмәз, сонсузадәк салеһлијиндән дөнмәз [«салеһлији әбәдијјән дурар», КМ]. Зүлмәтдә белә, әмәлисалеһ инсанлар үчүн, рәһмли, лүтфкар вә салеһ адамлар үчүн нур доғар» (Мәз. 112:3, 4). Мүгәддәс Китабын јазылдығы дөврләрдә Аллаһын бәзи хидмәтчиләри зәнҝин идиләр. Аллаһын бәјәндији инсанларын һамысы мадди ҹәһәтдән варлы олмасалар да, онлар әсил зәнҝинлијә, руһани зәнҝинлијә малик олурлар. Исанын ҝүнләриндә олдуғу кими, Аллаһ гаршысында тәвазөкар оланларын әксәријјәти касыбдыр вә онлара јухарыдан ашағы бахырлар (Лука 4:18; 7:22; Јәһ. 7:49). Касыб вә ја варлы олмағымыздан асылы олмајараг, руһән зәнҝин олмаг мүмкүндүр (Мат. 6:20; 1 Тим. 6:18, 19; Јагуб 2:5 ајәсини оху).
10 Мәсһ олунмуш мәсиһчиләр вә онларын һәмкарлары өз руһани сәрвәтләрини өзләриндә сахламырлар. Әксинә, онлар Шејтанын зүлмәтә гәрг олмуш дүнјасында «салеһ адамлар үчүн нур» сачырлар: башгаларына гијмәтли руһани мүдрикликдән вә Аллаһ һаггында биликдән фајдаланмаға көмәк едирләр. Дүшмәнләр Падшаһлыг һаггында хош хәбәрин тәблиғини дајандырмаға чалышсалар да, һеч бир уғур газана билмәмишләр. Бунун әвәзиндә, бу салеһ ишин бәһрәси ‘әбәдијјән дураҹаг’. Аллаһын хидмәтчиләри сынаглар алтында салеһликләрини горумагла сонсузадәк јашајаҹагларына, јәни ‘әбәдијјән дураҹагларына’ әмин ола биләрләр.
11, 12. Аллаһын халгы малик олдуғу мадди вәсаитләрдән неҹә истифадә едир?
11 Аллаһын халгыны тәшкил едән мәсһ олунмушлар вә ‘бөјүк издиһамын’ үзвләри әлиачыг инсанлардыр. Мәзмур 112:9 ајәсиндә дејилир: «Әлиачыглыгла фәгирләрә пајлар». Бу ҝүн һәгиги мәсиһчиләр тез-тез һәмиманлыларына вә һәтта еһтијаҹы олан јахынларына мадди көмәклик ҝөстәрирләр. Онлар һәмчинин мадди имканларындан истифадә едәрәк фәлакәтдән зәрәр чәкәнләрә көмәк әли узадырлар. Исанын дедији кими, бу да хошбәхтлик ҝәтирир. (Һәвариләрин ишләри 20:35; 2 Коринфлиләрә 9:7 ајәләрини оху.)
12 Бундан әлавә, 172 дилә тәрҹүмә едилән бу журналын бурахылышына нә гәдәр вәсаит сәрф едилдији барәдә дүшүн. Бу дилләрдә данышан халгларын әксәријјәти нисбәтән касыб јашајырлар. Һәмчинин нәзәрә ал ки, бу журнал лал вә кар инсанларын данышдыглары мүхтәлиф жест дилләриндә, еләҹә дә корлар үчүн Брајл шрифти илә бурахылыр.
Сәхавәтли вә әдаләтли
13. Сәхавәтлә вермәјә даир ән ҝөзәл нүмунәни кимләр вериб вә биз онларын нүмунәсини неҹә тәглид едә биләрик?
13 «Сәхавәтлә борҹ верән... јахшы инсандыр» (Мәз. 112:5). Јәгин фикир вермисән ки, башгаларына көмәк едән инсанлар чох вахт буну сәхавәтлиликдән ирәли ҝәләрәк етмирләр. Бәзиләри верәркән өз вар-дөвләтләрини нүмајиш етдирмәјә чалышыр вә ја буну наразылыгла едирләр. Әлбәттә, инсаны өзүнү алчаг, зәһләтөкән вә ја ағыр јүк һесаб етмәјә вадар едәнләрдән көмәк алмаг һеч дә хош дејил. Анҹаг сәхавәтли инсандан көмәк алмаг һәгигәтән дә хошдур. Јеһова сәхавәтли олмағын, үрәклә вермәјин ән бариз нүмунәсидир (Јаг. 1:5, 17). Иса Мәсиһ Атасынын бу ҝөзәл кејфијјәтини мүкәммәл сурәтдә әкс етдирирди (Марк 1:40-42). Беләликлә, биз Аллаһын ҝөзүндә салеһ олмаг үчүн севинҹлә вә сәхавәтлә веририк, хүсусилә дә башгаларына Јеһова һаггында өјрәнмәји тәклиф едәркән.
14. Һансы мәсәләләрдә ‘ишләримизи әдаләтлә ҝөрмәлијик’?
14 ‘Һәр ишини әдаләтлә ҝөрүр’ (Мәз. 112:5). Пејғәмбәрлик едилдији кими, Јеһованын әдаләтинә ујғун олараг садиг нөкәрбашы синфи Ағасынын маликанәсинин гејдинә галыр. (Лука 12:42-44 ајәләрини оху.) Бу, бәзән јығынҹагда ҹидди ҝүнаһлара даир мәсәләләри һәлл етмәли олан ағсаггаллара Мүгәддәс Јазылара әсасән верилән рәһбәрликдә әкс олунур. Гул синфинин ишләри әдаләтлә ҝөрдүјүнү һәмчинин бүтүн јығынҹагларын, миссионер вә Бет-Ел евләринин неҹә фәалијјәт ҝөстәрмәли олдуғуна даир Мүгәддәс Китаба әсасән вердији рәһбәрликдән ҝөрмәк олар. Әдаләтли олмаг тәкҹә ағсаггаллардан тәләб олунмур, диҝәр мәсиһчиләр дә бир-бирләри илә вә башга инсанларла мүнасибәтләриндә, еләҹә дә ишҝүзар мәсәләләрдә әдаләтли олмалыдырлар. (Микеја 6:8, 11 ајәләрини оху.)
Салеһләрин алаҹаглары хејир-дуалар
15, 16. а) Дүнјадакы пис хәбәрләр салеһ инсанлара неҹә тәсир едир? б) Аллаһын салеһ хидмәтчиләри нәји етмәјә гәти гәрарлыдырлар?
15 «Белә адам әсла сарсылмаз, салеһ инсан һеч заман унудулмаз. Ону пис хәбәрләр горхутмаз, Рәббә ҝүвәндији үчүн үрәји мөһкәмдир, ҹәсур үрәклидир, дүшмәнләринин сүгутуну ҝөрәнәдәк горхмаз» (Мәз. 112:6-8). Әввәлләр һеч вахт тарихдә мүһарибәләр, терроризм, јени хәстәликләр вә көһнә хәстәликләрин јенидән гајытмасы, ҹинајәткарлыг, јохсуллуг вә әтраф мүһитин чиркләнмәси кими бу гәдәр пис хәбәрләр олмамышды. Бу пис хәбәрләр Аллаһын ҝөзүндә салеһ олан инсанлара да тәсир едир, анҹаг ҝәләҹәк онлары горхузмур. Әксинә, онларын үрәји ‘мөһкәм’ вә ‘ҹәсурдур’, чүнки онлар Аллаһын салеһлик өмүр сүрән јени дүнјасынын јахын олдуғуна әминдирләр. Фәлакәт баш верәндә онлар бунун өһдәсиндән даһа јахшы ҝәлирләр, чүнки Јеһованын дәстәјинә архаланырлар. О, салеһ бәндәләринин ‘сарсылмасына’ һеч вахт јол вермир, таб ҝәтирмәләри үчүн гүввә верир вә көмәк тәгдим едир (Филип. 4:13, И–93).
16 Аллаһын салеһ бәндәләри онлара нифрәт едән дүшмәнләринин јајдыглары јаланлара дөзмәли олурлар, лакин бу, һәгиги мәсиһчиләри һеч вахт дајандыра билмәјәҹәк. Әксинә, Аллаһын хидмәтчиләри Јеһованын онлара тапшырдығы Падшаһлыг һаггында хош хәбәрин тәблиғи вә бу хәбәрә һај верәнләрин һамысына шаҝирд олмаға көмәк етмәк ишиндә мөһкәм вә сарсылмаздырлар. Шүбһәсиз ки, сон јахынлашдыгҹа салеһләр даһа чох мүгавимәтләрлә гаршылашаҹаглар. Дүшмәнләрин нифрәти Магог өлкәсиндән олан Гог — Шејтан Иблис бүтүн дүнјада Аллаһын халгына һүҹум едәндә сон һәддә чатаҹаг. Нәһајәт, о заман биз дүшмәнләрин рүсвајчылыгла мәғлуб олдуғуну ҝөрәҹәјик. Јеһованын адынын тамамилә тәгдис олундуғуну ҝөрмәк неҹә дә бөјүк севинҹ ҝәтирәҹәк! (Јез. 38:18, 22, 23).
«Иззәтлә јүксәләр»
17. Салеһ бәндәләр неҹә ‘иззәтлә јүксәләҹәкләр’?
17 Шејтан вә онун дүнјасы тәрәфиндән мүгавимәтләрлә үзләшмәдән Јеһоваја бирҝә һәмд етмәк неҹә дә мәмнунедиҹи олаҹаг! Аллаһын өнүндә салеһлијини горујан һәр бир кәс әбәдијјән севинҹлә Јеһованы иззәтләндирәҹәк. Онлар рүсвајчылыға вә мәғлубијјәтә уғрамајаҹаглар, чүнки Јеһова сөз верир ки, салеһләрин «гүввәти иззәтлә јүксәләр» (Мәз. 112:9, КМ). Јеһованын салеһ бәндәләри Онун али һакимијјәтинин дүшмәнләринин мәғлубијјәтини ҝөрүб шадлыг едәҹәкләр.
18. «Зәбур» китабынын 112-ҹи мәзмурунун сон сөзләри неҹә јеринә јетәҹәк?
18 «Пис адамса буну ҝөрүб гәзәбләнәр, дишләрини гыҹыдар, јаныб-төкүләр, писләрин үмидләри пуч олар» (Мәз. 112:10). Аллаһын халгына мүгавимәт ҝөстәрәнләрин һамысы тезликлә пахыллыг вә нифрәтләри илә бирҝә ‘јаныб төкүләҹәкләр’. Онларын өзләри илә бирликдә ишимизә сон гојмаг үмидләри дә гаршыдан ҝәлән ‘бөјүк мәшәггәтдә’ пуч олуб ҝедәҹәк (Мат. 24:21).
19. Нәјә әмин ола биләрик?
19 Сән һәмин бөјүк гәләбәни гејд едәнләр арасында олаҹагсанмы? Јахуд Шејтан дүнјасынын сону ҝәлмәздән өнҹә хәстәлик вә ја гоҹалыг уҹбатындан һәјатыны итирсән, дирилдиләҹәк «салеһ» инсанларын арасында олаҹагсанмы? (Һәв. иш. 24:15). Әҝәр 112-ҹи мәзмурда тәсвир олунан салеһ ‘инсанын’ тәмсил етдији адамлар кими Исанын фидијә гурбанлығына иман ҝәтирмәјә вә Јеһованы тәглид етмәјә давам етсән, бу суаллара мүсбәт ҹаваб верәҹәксән. (Ефеслиләрә 5:1, 2 ајәләрини оху.) Јеһова белә инсанлары ‘унутмајаҹаг’ вә онларын салеһ әмәлләринә хор бахмајаҹаг. Онлары сонсузадәк хатырлајаҹаг вә севәҹәк (Мәз. 112:3, 6, 9).
[Һашијә]
a Бу ики мәзмурун бир-бирини тамамламасы онларын гурулушундан вә мәзмунундан ҝөрүнүр. Мәзмур 111:3, 4 вә Мәзмур 112:3, 4 ајәләрини мүгајисә етдикдә ҝөрүрүк ки, Аллаһын 111-ҹи мәзмурда мәдһ едилән кејфијјәтләри 112-ҹи мәзмурда һаггында данышылан Аллаһдан горхан ‘инсан’ тәрәфиндән тәглид едилир.
Дүшүнмәк үчүн суаллар
• «Һалелуја» дејә нида етмәк үчүн һансы сәбәбләримиз вар?
• Бу ҝүн әлдә едилән һансы наилијјәтләр һәгиги мәсиһчиләрин хошбәхт олмаларына сәбәб олур?
• Јеһова неҹә ианәләри гәбул едир?
[25-ҹи сәһифәдәки шәкил]
Аллаһын ҝөзүндә салеһлијимизи горумаг үчүн Исанын төкүлән ганына иман тәзаһүр етдирмәлијик
[26-ҹы сәһифәдәки шәкилләр]
Үрәкдән едилән ианәләр јардым ҝөстәрмәк ишиндә вә Мүгәддәс Китаба әсасланан әдәбијјатларын чап олунмасында истифадә олуна биләр