Аллаһын валеһедиҹи ишләринә гаршы диггәтли олун
“Ја РӘБ Аллаһым [“Јегова”, ЈД], јаратдығын харигәләр [“валеһедиҹи ишләрин”, ЈД] вә бизим үчүн дүшүнҹәләрин чохдур; сәнә бәнзәјән јохдур” (МӘЗМУР 40:5).
1, 2. Аллаһын валеһедиҹи ишләринә шәһадәт едән нәдир вә бу бизи нәјә тәшвиг етмәлидир?
МҮГӘДДӘС Китабы охујаркән, Аллаһын өз гәдим халгы Исраил үчүн етдији валеһедиҹи ишләр һаггында өјрәнирик (Јешу 3:5; Мәзмур 106:7, 21, 22). Бизим ҝүнләрдә Јегова, инсанларын ишинә бу ҹүр гејри-ади тәрздә мүдахилә етмәсә дә, әтраф мүһит Онун валеһедиҹи ишләри һаггында парлаг сурәтдә шәһадәт едир. Мәзмурчунун сөзләринә гошулараг, уҹадан: “Ја РӘБ, ишләрин нә чохдур! Онларын һамысыны һикмәтлә етдин; Јер сәнин сәрвәтинлә долу” демәјә бизим дә там әсасымыз вар (Мәзмур 104:24; 148:1—5).
2 Бу ҝүн инсанларын чоху Јараданын фәалијјәтинин ашкар сүбутларыны ҝөрмүр вә ја онлары инкар едирләр (Ромалылара 1:20). Анҹаг Аллаһын валеһедиҹи ишләри үзәриндә дүшүнмәк, бизим үчүн чох фајдалы оларды. Бу бизә, Аллаһын јанында һансы мөвгеји тутдуғумузу анламаға вә Онун гаршысында олан мәс’улијјәтимизи дәрк етмәјә көмәк едәҹәкдир. Бу ишдә, “Ејуб” китабынын 38-дән 41-ә гәдәр олан фәсилләри ҝөзәл бир көмәк кими хидмәт едир. Һәмин фәсилләрдә Јегова Ејубу, өзүнүн бә’зи валеһедиҹи ишләринә диггәт јетирмәјә дә’вәт едир. Беләликлә, ҝәлин Јегованын бунунла әлагәдар Ејуба вердији бә’зи ваҹиб суаллары нәзәрдән кечирәк.
Бөјүк гүввә һаггында шәһадәт едән валеһедиҹи ишләр
3. Ејуб 38:22, 23, 25—29 ајәләринә әсасән, Аллаһ Ејуба һансы суаллары верди?
3 Аллаһ Ејубдан сорушур: “Гарын хәзинәләринә ҝирдинми вә долунун хәзинәләрини ҝөрдүнмү? Мән онлары сыхынты вахты үчүн, ҹәнҝ вә һәрб ҝүнү үчүн сахламагдајам”. Чох јерләрдә гар вә долу ади бир һалдыр. Сонра Аллаһ давам едир: “Јағмурун сели үчүн архы, илдырым үчүн дә јолу ким ачды? Та ки, инсансыз јерин үзәринә, ичиндә адам олмајан чөл үзәринә јағдырсын; чөлү вә бош јери дојурсун вә тәзә от битирсин. Јағмурун атасы вармы? Јахуд шеһ дамлаларынын атасы ким? Буз кимин бәтниндән чыхды? Вә ҝөјләрин гыровуну ким доғурду?” (Ејуб 38:22, 23, 25—29).
4-6. Нәјә ҝөрә инсанлар гар һаггында һәр шеји билмәк игтидарында дејилләр?
4 Сүр’әтли һәјат темпи хас олан ҹәмијјәтдә, бә’зиләри гарын һәрәкәт етмәк үчүн манечилик төрәтдијини дүшүнүрләр. Чохлары исә гары, гыш ҝөзәлликләринә вә бир чох башга әјләнҹәли мәшғулијјәтләрә имкан јарадан бир шеј кими гәбул едирләр. Лакин ҝәлин Аллаһын суалыны хатырлајараг, онун үзәриндә дүшүнәк: биз гары, һеч олмазса онун заһири ҝөрүнүшүнү јахшымы өјрәнмишик? Биз һамымыз, истәр тәбиәтин өзүндә, истәрсә дә шәкилләрдә гар јығыны ҝөрмүшүк. Бәс ајры-ајры гар дәнәләри һаггында нә демәк олар? Бизләрдән ким гар дәнәләрини “хәзинәләриндә” тәдгиг едиб вә онларын һәр биринин ҝөрүнүшүнүн неҹә олдуғуну билир?
5 Бә’зи алимләр, артыг онилликләрдир ки, гар дәнәләрини өјрәнир вә онларын шәкилләрини чәкирләр. Гар дәнәсинин һәр бири, формасына ҝөрә сонсуз дәрәҹәдә мүхтәлиф, кичик вә гәшәнҝ олан 100-ә јахын буз кристалларындан ибарәт ола биләр. Бир китабда белә сөзләр охујуруг: “Гар дәнәләринин сонсуз мүхтәлифлији һамыја мә’лумдур. Алимләр иддиа едирләр ки, гар дәнәләринин бир-биринә бәнзәр олмасына тәбиәтин һеч бир гануну мане олмур, анҹаг буна бахмајараг һәлә ки, һеч ким охшар гар дәнәләринә тәсадүф етмәмишдир. Гар дәнәләрини 40 илдән артыг өјрәнмиш вә микроскоп алтында онларын шәкилләрини чәкмиш... Уилсон Бентли мигјасына ҝөрә бөјүк тәдгигат апармышдыр. Бунунла белә, о, ејнилә бир-биринә бәнзәјән ики гар дәнәси тапмамышдыр” (“Атмоспһере”). Лакин бирдән ики ејни ҹүр гар дәнәси тапылсајды, мәҝәр бу вәзијјәт, бу ҹүр гејри-ади мүхтәлифлијин мө’ҹүзәсини гијмәтдән сала биләрдими?
6 Аллаһын вердији суалы хатырлајаг: “Гарын хәзинәләринә ҝирдинми?” Чохлары дүшүнүрләр ки, булудлар гарын хәзинәсидир. Белә бир хәзинәјә ҝирмәк вә сонсуз дәрәҹәдә мүхтәлиф олан гар дәнәләрини сијаһыја алмаг, јахуд онларын неҹә әмәлә ҝәлдијини анламаг ағлабатан ишдирми? Тәбиәтшүнаслыг үзрә бир енсиклопедијада дејилир: “Булуддакы су дамлаларынын -40°С температурда донмасына сәбәб олан буз кристаллары нүвәсинин хассәси вә әмәлә ҝәлмәси һәлә дә мә’лум дејил” (Мәзмур 147:16, 17; Ишаја 55:9, 10).
7. Инсанларын јағыш һаггындакы биликләри нә дәрәҹәдә ҝенишдир?
7 Бәс јағмур һаггында нә демәк олар? Аллаһ Ејубдан сорушду: “Јағмурун атасы вармы? Јахуд шеһ дамлаларынын атасы ким?” Тәбиәтшүнаслыг үзрә һәмин енсиклопедијада гејд олунур: “Атмосфердә һава күтләләринин јердәјишмә мүрәккәблијини, һавада рүтубәт вә зәррәҹикләрин сахланылмасынын дәјишкәнлијини нәзәрә алараг, булудларын формалашмасы вә јағынтынын төкүлмәси илә әлагәдар әтрафлы универсал нәзәријјә јаратмаг гејри-мүмкүн ҝөрүнүр”. Алимләр бунунла әлагәдар мүхтәлиф нәзәријјәләр ирәли сүрсәләр дә, онлардан һеч ким јағышын неҹә әмәлә ҝәлдијини әтрафлы олараг изаһ етмәк игтидарында дејилдир. Бунунла белә, һәјат үчүн ваҹиб олан јағыш торпағы сулајыр, биткиләрә һәјат верир вә һәјатымызын нәинки мүмкүн олмасы үчүн, һәтта онун хош кечмәси үчүн шәраит јарадыр.
8. Павелин Һәвариләрин ишләри 14:17 ајәсиндә јаздығы сөзләрлә нәјә ҝөрә разылашмаг олар?
8 Һәвари Павелин чыхардығы нәтиҹә илә ким разы олмаз? О, инсанлары бу валеһедиҹи ишләрдә, онлары јарадан Шәхс һаггында дәлилләри ҝөрмәјә тәшвиг едир. Павел, Јегова Аллаһ һаггында дејир: “Ҝөјдән бизә јағмурлар вә сәмәрәли мөвсүмләр верәрәк, үрәкләримизи гида вә севинҹлә долдуруб, јахшылыг едәрәк, Өзүнү шаһидсиз гојмамышдыр” (Һәвариләрин ишләри 14:17; Мәзмур 147:8).
9. Аллаһын валеһедиҹи ишләри Онун гүввәси һаггында неҹә шәһадәт едир?
9 Бу валеһедиҹи вә фајдалы ишләрин Јараданынын бөјүк мүдриклијә вә гүввәјә малик олмасына шүбһә етмәјә еһтијаҹ јохдур. Онун гүввәси илә әлагәдар бунлары дүшүнүн: һәр ҝүн тәхминән 45 000, јә’ни илдә 16 милјондан артыг туфан олур. Һал-һазырда бүтүн дүнјада 2 000-ә јахын туфан баш верир. Јалныз бир туфана сәбәб олан булудларын мәҹмусу, Икинҹи дүнја мүһарибәси заманы тәтбиг едилән он вә ја даһа артыг нүвә бомбасынын дашыдығы енержијә маликдир. Бу енержи гисмән һејранедиҹи илдырым шәклиндә ајрылыр. Бу гүдрәтли илдырымлар горху һисси ојатмагдан әлавә, торпаға дүшәркән биткиләр үчүн тәбии ҝүбрә кими хидмәт едән азот нөвләринин әмәлә ҝәлмәсинә дә сәбәб олур. Бәли, илдырымлар јалныз енержини ҝөрмәјә имкан јаратмыр, һәмчинин чохлу фајда да ҝәтирир (Мәзмур 104:14, 15).
Валеһедиҹи ишләрин үзәриндә дүшүнмәк сизи нәјә тәшвиг едир?
10. Ејуб 38:33—38 ајәләриндә ифадә олунмуш суаллара сиз неҹә ҹаваб верәрдиниз?
10 Өзүнүзү Ејубун јеринә гојараг, Гадир Аллаһын сизә суаллар вердијини тәсәввүр един. Јәгин чохумуз разылашаҹағыг ки, адәтән инсанлар Аллаһын валеһедиҹи ишләринә аз диггәт јетирирләр. Ејуб 38:33—38 ајәләриндә Јегованын сорушдуглары барәдә охујуруг: “Ҝөјләрин ганунларыны билирсәнми? Онун һөкумәтини јер үзүндә гура биләрсәнми? Сәсини булудлара јүксәлдә биләрсәнми ки, су боллуғу сәни өртсүн? Шимшәкләри чыхара биләрсәнми ки, чыхсынлар вә сәнә: Будур бурадајыг, десинләр? Ким үрәјә һикмәт гојду? Јахуд зеһнә ким анлајыш верди? Ким булудлары һикмәтлә саја биләр? Вә ҝөјләрин долчаларыны ким бошалда биләр? О заман ки, торпаг ҝил кими сәртләшәр вә торпаглар бир-биринә јапышар?”
11, 12. Аллаһын, валеһедиҹи ишләрин Јараданы олмасына даир һансы сүбутлар вар?
11 Биз, Елиһунун Ејубла бөлүшдүјү јалныз бир нечә фикрә тохундуг вә сонра “киши кими” ҹаваб вермәси үчүн Јегованын Ејуба вердији бә’зи суаллара диггәт јетирдик (Ејуб 38:3). Она ҝөрә “бә’зи” дејирик ки, “Ејуб” китабынын 38-ҹи вә 39-ҹу фәсилләриндә Јегова өз јаратдыгларынын диҝәр диггәтәлајиг јөнләри һаггында да данышыр. Мәсәлән, О, улдузлар топасы барәдә сөз салыр: онларын низамнамәсини вә ганунларыны ким билир? (Ејуб 38:31—33). Јегова, Ејубун диггәтини бә’зи һејванлара — диши аслана вә гарғаја, дағкечисинә вә зебраја (ЈД), вәһши өкүзә (ЈД) вә дәвәгушуна, һәмчинин гартала вә ата јөнәлдир. Маһијјәт е’тибарилә, Аллаһ Ејубдан, бу һејванлары, онларын сәҹијјәви хүсусијјәтләрини, вәрдишләрини вә һәјатларыны там сурәтдәми өјрәндијини сорушур. Әҝәр ат вә ја башга һејванлар хошунуза ҝәлирсә, бу фәсилләри нәјә ҝөрә сәрбәст олараг арашдырмајасыныз? (Мәзмур 50:10, 11).
12 Һәмчинин 40-ҹы вә 41-ҹи фәсилләри дә өјрәнмәк олар. Бу фәсилләрдә, Јегова Ејубу ики һејван һаггындакы суаллара ҹаваб вермәјә тәшвиг едир. Бурада сөһбәт, нәһәнҝ вә ҝүҹлү беҝемотдан вә ваһимә доғуран нил тимсаһындан (левиафандан) ҝедир. Онлардан һәр бири — диггәтимизә лајиг олан јарадылышын мө’ҹүзәсидир. Беләликлә, ҝәлин ҝөрәк бу варлыгларын үзәриндә дүшүнмәк бизи нәјә тәшвиг етмәлидир?
13. Аллаһын суаллары Ејуба неҹә тә’сир бағышлады вә онлар бизә неҹә тә’сир бағышламалыдыр?
13 Биз “Ејуб” китабынын 42-ҹи фәслиндән, Аллаһын суалларынын Ејуба неҹә тә’сир бағышладығыны өјрәнирик. Хатырлајаг ки, әввәлләр Ејуб өзүнә вә башгаларына һәддиндән артыг диггәт јетирирди. Лакин Јеговадан, суал формасында ифадә едилән мәсләһәти гәбул едәрәк, Ејуб өз дүшүнҹә тәрзини дәјишди. О, е’тираф етди: “Сән һәр шеји едә биләрсән, билирәм вә һеч бир мурадынын гаршысы алына билмәз. Тәгдири билҝисиз олараг гаралдан бу адам ким? Бундан өтрү анламадығым шејләри сөјләдим, мәндән үстүн олан билмәдијим валеһедиҹи шејләри” (Ејуб 42:2, 3). Јегованын тәәҹҹүблү ишләринә диггәт јетирдикдән сонра, Ејуб онлары “өзү үчүн валеһедиҹи” адландырды. Бу јарадылыш мө’ҹүзәләрини ҝөздән кечирәркән, Аллаһын бөјүк мүдриклији вә гүввәси ејни тәрздә бизә дә тәәссүрат бағышламалыдыр. Биз бөјүк гүввәт вә гүдрәт гаршысында садәҹә еһтирам һиссими дујмалыјыг? Јохса башга нәјәсә тәшвиг олунмалыјыг?
14. Аллаһын валеһедиҹи ишләри Давуду нәјә тәшвиг едирди?
14 Буна бәнзәр фикри, Давуд 86-ҹы мәзмурда ифадә етди. О, бундан әввәлки мәзмурларындан бириндә артыг белә сөзләр јазмышды: “Ҝөјләр Аллаһын иззәтини бәјан едәр; вә ҝөј гүббәси әлләринин ишини е’лан ејләр. Ҝүн ҝүнә сөз сөјләр вә ҝеҹә ҝеҹәјә билҝи ҝөстәрәр” (Мәзмур 19:1, 2). Анҹаг Мәзмур 86:10, 11 ајәләриндә Давуд давам едир: “Чүнки бөјүксән вә валеһедиҹи ишләр јарадан сәнсән; јалныз Аллаһ сәнсән. Ја РӘБ, јолуну мәнә өјрәт; сәнин һәгигәтиндә јеријим; исминдән горхмаг үчүн үрәјими мөһкәмләт”. Давуд мө’ҹүзәләрин, јә’ни валеһедиҹи ишләрин Јараданына валеһ олараг, буна бәнзәр һөрмәткар горху һисси кечирирди. Бунун сәбәби тамамилә ајдындыр. О, бу ҹүр валеһедиҹи ишләри јаратмаға гадир олан Шәхсә мәгбул олмајан шејләри етмәкдән горхурду. Белә ишләрдән биз дә чәкинмәлијик.
15. Давуд, Аллаһын өнүндә нәјә ҝөрә һөрмәткар горху һисси тәзаһүр етдирирди?
15 Ҝөрүнүр, Давуд чох ваҹиб бир шеји дәрк едирди: Аллаһ фөвгәл’адә гүввәјә малик олдуғу үчүн, бу тәбии гүввәләри Онун һөкмүнә лајиг олан кәсләрә тәрәф јөнәлдә биләр. Бунун нәтиҹәси онлар үчүн һеч дә јахшы олмаз. Аллаһын Ејубдан сорушдугларыны хатырлајын: “Гарын хәзинәләринә ҝирдинми вә долунун хәзинәләрини ҝөрдүнмү? Мән онлары сыхынты вахты үчүн, ҹәнҝ вә һәрб ҝүнү үчүн сахлајырам” (Ејуб 38:22, 23). Гар, долу, фыртына, күләк вә илдырым Аллаһын силаһыдыр. Бу үнсүрләр неҹә дә фөвгәл’адә бир гүввәјә саһибдирләр!
16, 17. Аллаһын горху доғуран гүввәјә малик олдуғуну һансы нүмунәдә ҝөрмәк олар вә О, бу гүввәдән кечмишдә неҹә истифадә едирди?
16 Еһтимал ки, јашадығыныз әразидә баш верән гасырға, тајфун, сиклон, долу вә дашгынларын төрәтдији фаҹиәли һадисәләри хатырлајырсыныз. Мисал үчүн: 2000-ҹи илин әввәлиндә Авропанын ҹәнуб-гәрбиндә, мүтәхәссисләри белә тәәҹҹүбләндирән ҝүҹлү фыртына олду. Сүр’әти саатда 200 километрә чатан фыртыналы күләк минләрлә евләрин дамларыны гопарды, јүксәкволтлу хәтләри јыхды вә јүк машынларыны чевирди. Бирҹә тәсәввүр един: фыртына 270 милјон ағаҹы көкүндән гопарды вә ја сындырды. Парис јахынлығында јерләшән јалныз Версал паркында 10 000-ә јахын ағаҹ сындырды. Милјонларла евләр ишыгсыз галды. Тәхминән 100-ә јахын адам һәлак олду. Вә бүтүн бунларын һамысы гыса мүддәтли фыртынанын нәтиҹәсидир. Һәгигәтән дә бөјүк гүввәдир!
17 Инсанлар белә һадисәләри һаванын тәрслији вә ја идарә олунмајан үнсүрләр адландырырлар. Бәс валеһедиҹи ишләр едән Гадир Аллаһ бу гүввәләри идарә едәрәк онлары мәгсәдјөнлү тәрздә тәтбиг етсәјди, онда неҹә оларды? О, буна бәнзәр иши Ибраһимин ҝүнләриндә етмишди. Ибраһим бу һадисәдән өјрәнди ки, бүтүн јер үзүнүн Һакими, бу ики шәһәрин — Содом вә Һоморранын ганунсузлугларынын нә гәдәр чох олдуғуну өлчүб-бичмишдир. Бу шәһәрләр мә’нәви ҹәһәтдән о дәрәҹәдә позғун идиләр ки, онлара гаршы олан фәрјад Аллаһа чатырды. Гадир Аллаһ гајғы ҝөстәрди ки, бүтүн салеһләр мүһакимә олунмуш бу шәһәрләрдән чыхмаға маҹал тапсынлар. Тарихи бир сәнәддә јазылыр: “Вә РӘБ Содом үзәринә вә Һоморра үзәринә РӘБ тәрәфиндән ҝөјләрдән күкүрд вә атәш јағдырды”. Бу да салеһләрин хиласына вә ислаһ олунмајан ганунсузларын мәһв олунмасына тәрәф Аллаһын јөнәлтдији мө’ҹүзә иди (Тәквин 19:24).
18. “Ишаја” китабынын 25-ҹи фәсли диггәтимизи һансы валеһедиҹи ишләрә јөнәлдир?
18 Бир дәфә Аллаһ гәдим Бабили буна бәнзәр шәкилдә мүһакимә етди; еһтимал ки, “Ишаја” китабынын 25-ҹи фәслиндә бу шәһәр һаггында данышылыр. Аллаһ габагҹадан билдирди ки, Бабили виранәјә чевирәҹәк: “Чүнки сән шәһәри бир даш јығынына; диварлы шәһәри бир виранәјә чевирдин, әҹнәбиләрин сарајыны шәһәр вәзијјәтиндән чыхардын; әбәдијјән гурулмајаҹагдыр” (Ишаја 25:2). Бу сөзләрин доғрулуғуну, гәдим Бабилин јерләшдији јери зијарәт едән кәсләр тәсдиг едә биләрләр. Бу һадисәни тарихи тәсадүф адландырмаг олармы? Хејр. Биз Ишајанын сөзләринә е’тибар едә биләрик: “Ја РӘБ, Аллаһым сәнсән; сәни јүксәлдәрәм, сәнин исминә һәмд едәрәм; чүнки сән валеһедиҹи шејләр јаратдын, әзәлдән гурулмуш нијјәтләр, сәдагәт вә һәгигәт” (Ишаја 25:1).
Ҝәләҹәкдә баш верәҹәк валеһедиҹи ишләр
19, 20. Ишаја 25:6—8 ајәләриндәки пејғәмбәрлик неҹә јеринә јетәҹәк?
19 Бабил һаггында јухарыда гејд олунан пејғәмбәрлији, Аллаһ кечмишдә иҹра етди вә буна бәнзәр валеһедиҹи ишләри ҝәләҹәкдә дә етмәк нијјәтиндәдир. Аллаһын “валеһедиҹи ишләри” барәдә хатырладылан сөзләрин контекстиндә, ҝәләҹәкдә јеринә јетәҹәк е’тибарлы пејғәмбәрлик тапырыг вә шүбһә етмәмәк олар ки, Аллаһын Бабил үзәриндә јеринә јетән һөкмү кими бу пејғәмбәрлик дә ејни дәгигликлә јеринә јетәҹәкдир. Бу пејғәмбәрликдә һансы валеһедиҹи иш һаггында вә’д верилир? Ишаја 25:6 ајәсиндә дејилир: “Бу дағда ордуларын РӘББИ бүтүн халглара јағлы шејләрдән бир зијафәт, көһнә шәраблардан, иликлә долу јағлы шејләрдән, сүзмә көһнә шәраблардан зијафәт верәҹәк”.
20 Бу сөзләр Аллаһын вә’д етдији вә артыг астана ағзында дуран јени дүнјада мүтләг јеринә јетәҹәкдир. О заман бәшәријјәт, бу гәдәр инсана әзијјәт верән изтираблардан азад едиләҹәкдир. Ишаја 25:7, 8 ајәләринин пејғәмбәрлик сөзләри бизи әмин едир ки, Аллаһ, бүтүн дөврләрин ән валеһедиҹи ишләриндән бирини һәјата кечирмәк үчүн, өзүнүн јарадыҹылыг габилијјәтиндән истифадә едәҹәкдир: “Бүтүн халглары өртән өртүјүн үзүнү, бүтүн милләтләр үзәринә чәкилмиш пәрдәни бу дағда јох едәҹәк. Өлүмү әбәдијјән удду; вә РӘБ Јегова бүтүн үзләрдән ҝөз јашларыны силәҹәк; вә бүтүн дүнја үзәриндән халгынын рүсвајчылығыны галдыраҹаг; чүнки РӘБ сөјләди”. Даһа сонра һәвари Павел бу пејғәмбәрлији, Аллаһын дирилмә васитәсилә өлүләри һәјата гајтараҹағыны ҝөстәрмәк үчүн ситат ҝәтирди. Бу һәгигәтән дә валеһедиҹи иш олаҹагдыр! (1 Коринфлиләрә 15:51—54).
21. Өлүләр үчүн Аллаһ һансы валеһедиҹи ишләри едәҹәкдир?
21 Инсанлар изтираблардан азад едиләҹәкләри үчүн, кәдәр јашлары да бир даһа мөвҹуд олмајаҹаг. Хатырлајаг ки, јер үзүндә оланда Иса чохларына шәфа верирди: корларын ҝөзләри, карларын гулаглары ачылырды, шикәстләр сағалырдылар. Биз, Јәһја 5:5—9 ајәләриндә, артыг 38 ил әрзиндә ифлиҹ олан бир адамын сағалмасы һаггында охујуруг. Һадисәнин шаһиди оланлар, буну мө’ҹүзә, јә’ни валеһедиҹи иш һесаб едирдиләр. Бу һәгигәтән дә белә иди! Лакин Иса өлүләрин дирилмәсинин даһа валеһедиҹи иш олаҹағыны сөјләди: “Буна тәәҹҹүбләнмәјин, чүнки елә бир саат ҝәлир ки, гәбирләрдә оланларын һамысы Онун сәсини ешидәҹәкләр вә гәбирләриндән чыхаҹаглар. Јахшылыг едәнләр дирилиб һәјата говушаҹаглар, пислик едәнләр исә дирилиб һөкмә дүчар олаҹаглар” (Јәһја 5:28, 29).
22. Јохсуллар вә мәзлумлар нәјә үмид едә биләрләр?
22 Бунларын һәјата кечәҹәјинә шүбһә етмәмәк олар, чүнки Јегованын ирадәси беләдир. Биз әмин ола биләрик ки, Аллаһын Өз һәјатвериҹи гүввәсини гәнаәтҹил тәрздә тәтбиг етмәси ҝөзәл сәмәрәләр ҝәтирәҹәкдир. 72-ҹи мәзмурда Онун өз Оғлу, Падшаһ Иса Мәсиһ васитәсилә һәјата кечирәҹәји ишләр барәдә данышылыр. О ҝүнләрдә сүлһ боллуғу олаҹагдыр. Аллаһ јохсуллары вә мәзлумлары хилас едәҹәкдир. О вә’д едир: “Јердә, дағлар башында, буғда боллуғу олсун; сәмәрәси Ливан кими далғалансын; вә шәһәрдән оланлар јерин оту кими чичәкләнсин” (Мәзмур 72:16).
23. Аллаһын валеһедиҹи ишләри бизи нәјә тәшвиг етмәлидир?
23 Бәли, Аллаһын валеһедиҹи ишләринә — Онун кечмишдә етдији, инди етмәк үзрә олдуғу вә јахын ҝәләҹәкдә һәјата кечирмәји вә’д етдији ишләрә гаршы диггәтли олмаға сәбәбләримиз чохдур. “РӘБ Аллаһ, Исраилин Аллаһы, мүбарәк олсун; валеһедиҹи ишләр јарадан анҹаг одур; вә иззәтли исми әбәдијјән мүбарәк олсун; вә бүтүн јер үзү онун иззәтилә долсун. Амин вә амин” (Мәзмур 72:18, 19). Ҝәлин, һәмишә бу валеһедиҹи ишләр һаггында гоһумларымыза вә башга инсанлара һәвәслә данышаг. Бәли, “Онун иззәтини милләтләр арасында, валеһедиҹи ишләрини бүтүн халглар арасында е’лан” едәк (Мәзмур 78:3, 4; 96:3, 4).
Сиз неҹә ҹаваб верәрдиниз?
• Ејуба верилән суаллар, инсан билијинин мәһдуд олдуғуну неҹә ҝөстәрир?
• “Ејуб” китабынын 37-дән 41-ә кими олан фәсилләриндә тәсвир едилән Аллаһын һансы валеһедиҹи ишләри сизи даһа чох валеһ етди?
• Аллаһын валеһедиҹи ишләрини нәзәрдән кечирмәк бизи нәјә тәшвиг етмәлидир?
[10-ҹу сәһифәдәки шәкилләр]
Гар дәнәләринин гејри-ади мүхтәлифлији вә илдырымын горху доғуран ҝүҹү барәдә дүшүнәркән, сиз һансы нәтиҹәјә ҝәлирсиниз?
[Иҹазә илә]
snowcrystals.net
[13-ҹү сәһифәдәки шәкилләр]
Ҝәлин, даима Аллаһын валеһедиҹи ишләри барәдә башгаларына данышаг.