Јегованын һөкм ҝүнү јахындыр!
“РӘББИН бөјүк ҝүнү јахындыр, јахындыр вә чох тәләсир” (ТСЕФАНЈА 1:14).
1. Аллаһ Тсефанја васитәсилә һансы хәбәрдарлығы бәјан етди?
ЈЕГОВА АЛЛАҺ тезликлә гәтијјәтли тәрздә писләрә гаршы чыхаҹагдыр. Динләјин! Бу Онун хәбәрдарлығыдыр: “Инсаны... сүпүрәҹәјәм... торпағын үзүндән инсаны кәсиб атаҹағам” (Тсефанја 1:3). Күлл-Ихтијар Рәбб Јегованын бу сөзләри Тсефанја пејғәмбәр тәрәфиндән сөјләнилмишди. Еһтимала ҝөрә, Тсефанја, садиг падшаһ Һизкијанын көтүкҹәси иди. Салеһ падшаһ Јошијанын ҝүнләриндә Јегованын бәјан едилән бу сөзләри, Јәһуданын ҝүнаһкар сакинләринә јахшы һеч бир шеј билдирмирди.
2. Нәјә ҝөрә Јошијанын ҝөрдүјү тәдбирләр Јегованын һөкм ҝүнүнүн гаршысыны алмады?
2 Ҝәнҹ падшаһ Јошија Тсефанјанын пејғәмбәрлијини ешидәркән, Јәһуда дијарыны бүтпәрәстликдән тәмизләмәјин ваҹиблијини даһа кәскин сурәтдә һисс етди. Лакин халг арасында төрәдилән пислијә тамамилә сон гојмаг ҝәнҹ падшаһа мүјәссәр олмады вә онун ҝөрдүјү тәдбирләр “Јерусәлими ҝүнаһсыз ганла долдур”ан бабасы Манассенин ҝүнаһларыны јумады (2 Краллар 24:3, 4; 2 Тарихләр 34:3). Буна ҝөрә дә, Јегованын һөкм ҝүнү гачылмаз иди.
3. Һарадан билирик ки, “РӘББИН гәзәб ҝүнүндә”н сағ чыхмаг мүмкүндүр?
3 Лакин бу горхулу ҝүндә һамы һәлак олмалы дејилди. Буна ҝөрә дә, Аллаһын пејғәмбәри чағырырды: “Фәрман чыхмадан өнҹә, ҝүн саман чөпү кими кечиб ҝетмәдән өнҹә, РӘББИН гызғын гәзәби үзәринизә ҝәлмәдән өнҹә, РӘББИН гәзәб ҝүнү үзәринизә ҝәлмәдән өнҹә топланын. РӘББИН һөкмләрини иҹра етмиш олан дүнјанын бүтүн тәвазөкарлары, РӘББИ арајын; салеһлији арајын, тәвазөкарлығы арајын; РӘББИН гәзәб ҝүнүндә бәлкә ҝизләнә биләрсиниз” (Тсефанја 2:2, 3). Ҝәлин, Јегованын һөкм ҝүнүндән сағ чыхмағын мүмкүн олдуғуну јадда сахлајараг, Мүгәддәс Китабын Тсефанја китабыны нәзәрдән кечирәк. Аллаһын “пејғәмбәрлик сөзү”нү тәшкил едән, һамымызын диггәтинә лајиг олан бу китаб, б. е. әввәл 648-ҹи илдә Јәһуда дијарында јазылыб (2 Петер 1:19, И—93).
Јегова әлини узатмышдыр
4, 5. Тсефанја 1:1—3 ајәләри, Јәһуда дијарынын ҝүнаһкар сакинләри үзәриндә неҹә јеринә јетди?
4 “Тсефанјаја ҝәлән РӘББИН сөзү” јухарыда ҝәтирилән хәбәрдарлыгла башланыр. Аллаһ бәјан едир: “Торпағын үзүндән һәр шеји силиб-сүпүрәҹәјәм, РӘББИН сөзү. Инсаны вә һејваны сүпүрәҹәјәм; ҝөјләрин гушлары илә дәнизин балыгларыны вә пис адамларла әнҝәлләри сүпүрәҹәјәм; вә торпағын үзүндән инсаны кәсиб атаҹағам, РӘББИН сөзү” (Тсефанја 1:1—3).
5 Бәли, Јегова Јәһуда дијарындакы ҝөрүнмәмиш писликләрә сон гојмаг нијјәтиндә иди. Јегова кимин васитәсилә “торпағын үзүндән һәр шеји силиб-сүпүрәҹәкди”? Ҝөрүндүјү кими, Тсефанја, б. е. әввәл 659-ҹу илдә тахта отурмуш Јошија падшаһын һөкмранлығынын әввәлиндә пејғәмбәрлик етмишди, демәли, бу пејғәмбәрлик сөзләри Јәһуда вә онун пајтахты Јерусәлимин б. е. әввәл 607-ҹи илдә бабиллиләр тәрәфиндән виран едилмәсинә ишарә едир. Јәһуда дијарында олан ҝүнаһкарлар мәһз о заман “кәсилиб атылмалы” идиләр.
6-8. Тсефанја 1:4—6 ајәләриндә габагҹадан нә дејилмишди вә бу пејғәмбәрлик гәдим Јәһуда падшаһлығы үзәриндә неҹә јеринә јетди?
6 Тсефанја 1:4—6 ајәләриндә, Аллаһын, јалан танрылара тапынанлары неҹә һөкм едәҹәји габагҹадан дејилир: “Јәһуда үзәринә вә Јерусәлимдә јашајанларын һамысы үзәринә әлими узадаҹағам; вә Баалын галыгларыны, каһинләрлә бәрабәр бүт каһинләринин адыны вә дамларын үзәриндә ҝөјләр ордусуна тапынанлары; РӘББӘ [“Јеговаја”, ЈД] анд едиб Малкам үзәринә дә анд едәрәк тапынанлары вә РӘББДӘН үз дөндәрәнләри вә РӘББИ арамамыш вә ону сормамыш оланлары бу јердән кәсиб атаҹағам”.
7 Јегованын әли Јәһуданын вә Јерусәлимин сакинләри үзәринә узанмышды. О, кән’анлыларын мәһсулдарлыг танрысы олан Баалын ибадәтчиләрини мәһв етмәјә һазыр иди. Бу јерләрдә ибадәт едилән мүхтәлиф танрылар Баал адланырдылар, чүнки онларын ибадәтчиләри бу танрылары мүәјјән әразиләрин саһибләри һесаб едир вә бу әразиләрә тә’сир ҝөстәрмәк габилијјәтини онлара аид едирдиләр. Мәсәлән, Пеор дағында моаблылар вә мидјаниләр бу тәрздә өз Баалларына ибадәт едирдиләр (Сајлар 25:1, 3, 6). Јегова, бүтүн Јәһуда падшаһлығында Баалын каһинләрини, ејни заманда Аллаһын ганунуна зидд олараг бу каһинләрлә достлуг мүнасибәтләри јарадан каһин левилиләри мәһв етмәк нијјәтиндә иди (Чыхыш 20:2, 3).
8 Аллаһ, һәмчинин “ҝөјләр ордусуна” ибадәт едәнләри - еһтимала ҝөрә астролоҝија илә мәшғул олан вә Ҝүнәшә ибадәт едәнләри дә мәһв етмәјә һазырлашырды (2 Краллар 23:11; Јеремја 19:13; 32:29). Бундан әлавә, Аллаһын гәзәби, һәгиги ибадәтлә јалан ибадәти бирләшдирмәјә сә’ј ҝөстәрәнләрин, “РӘББӘ [“Јеговаја”, ЈД] анд едиб Малкам үзәринә... анд едә”нләрин дә үзәринә ҝәләҹәкди. Еһтимал ки, Малкам, аммониләрин баш танрысы олан Молохун өзүдүр. Молохун ибадәтчиләри исә ушагларыны гурбан ҝәтирирдиләр (1 Краллар 11:5; Јеремја 32:35).
Христиан аләминин сону јахындыр
9. а) Христиан аләми нәдә ҝүнаһлыдыр? б) Јәһуданын вәфасыз сакинләринә бәнзәмәмәк үчүн, нәјә гәти гәрарлы олмалыјыг?
9 Бүтүн бунлар, јалан ибадәтә вә астролоҝијаја гәрг олан Христиан аләмини даһа чох хатырладыр. Руһаниләр мүһарибәләрин тәрәфдарыдырлар вә онлар бу мүһарибәләрин гурбанҝаһларына милјонларла инсан һәјаты ҝәтирирләр. Бу неҹә дә ијрәнҹдир! Биз, Јеговаја хидмәтә сојуг јанашан, Ону ахтармајан вә рәһбәрлик үчүн Она мүраҹиәт етмәкдән әл чәкән, “РӘББДӘН үз дөндәрән” Јәһуда сакинләринә бәнзәмәмәлијик. Биз Аллаһ гаршысында гүсурсуз галмалыјыг.
10. Тсефанја 1:7-ҹи ајәсинин пејғәмбәрлик мә’насыны неҹә изаһ едәрдиниз?
10 Пејғәмбәрин нөвбәти сөзләри Јәһуданын ганунсуз сакинләринә олдуғу кими, мүасир әхлагсызлара да ујғун ҝәлир. Тсефанја 1:7-ҹи ајәсиндә дејилир: “РӘБ Јегованын өнүндә сус; чүнки РӘББИН ҝүнү јахындыр; чүнки РӘБ гурбан һазырлады, чағырдыгларыны тәгдис етди”. Ҝөрүндүјү кими, “чағырыланлар” сөзү алтында Јәһуданын дүшмәнләри олан ҝилданиләр нәзәрдә тутулур. Һазырланан “гурбан” исә Јәһуда падшаһлығыны вә онун пајтахтыны тәмсил едир. Беләликлә, Тсефанја, Аллаһын Јерусәлими мәһв етмәк нијјәти барәсиндә хәбәр верир, бу пејғәмбәрлик һәмчинин Христиан аләминин мәһвинә ишарә едир. Аллаһын һөкм ҝүнү јахын олдуғу үчүн, бүтүн дүнја Күлл-Ихтијар Јегованын гаршысында “сус”малы, Исанын руһла мәсһ едилмиш давамчыларынын “кичик сүрү”сү вә онларын јолдашлары олан “башга гојунлар” васитәсилә Јегованын дедикләринә гулаг асмалыдыр (Лука 12:32; Јәһја 10:16). Гулаг асмајыб, бунунла да Аллаһын Падшаһлығынын һөкмранлығына гаршы чыхдығыны ҝөстәрән һәр бир кәси һәлак ҝөзләјир (Мәзмур 2:1, 2).
Тезликлә фәрјад ҝүнү ҝәләҹәкдир
11. Тсефанја 1:8—11 ајәләриндә дејиләнләрин мәғзи нәдир?
11 Тсефанја 1:8—11 ајәләриндә Јегованын ҝүнү һаггында бунлар да дејилир: “РӘББИН гурбаны ҝүнү елә олаҹаг ки, рәисләри вә крал оғулларыны вә әҹнәби палтары ҝејәнләрин һамысыны јохлајаҹағам. Вә кандар үзәриндән сычрајанларын һамысыны о ҝүн јохлајаҹағам, онлар ки, зоракылыг вә һијлә илә әфәндиләринин евини долдурмагдадырлар. Вә о ҝүн балыглар гапысындан фәрјад сәси вә икинҹи мәһәлләдән улама вә тәпәләр тәрәфдә бөјүк гырғын олаҹаг, РӘББИН сөзү. Улајын, еј сизләр, Мактешдә јашајанлар; чүнки бүтүн таҹир дәстәси јох олду; ҝүмүш јүклү оланларын һамысы кәсилиб атылдылар”.
12. Инсанлар “әҹнәби палтары” ҝејиндикләрини неҹә ҝөстәрирләр?
12 Јошијадан сонра Јеһоаһаз, Јеһојаким вә Јеһојакин падшаһлыг едәҹәкләр. Онлардан сонра исә Тседекија һөкмранлыг едәҹәкди вә Јерусәлим онун вахтында виран едиләҹәкди. Ҝөрүнүр ки, Падшаһ сарајынын бә’зи үзвләри, онлары фәлакәт ҝөзләдијинә бахмајараг, “әҹнәби палтары” ҝејинәрәк, гоншу халгларын рәғбәтини газанмаға чалышырдылар. Бизим ҝүнләрдә дә инсанларын чоху Јегованын тәшкилатына мәхсус олмадыгларыны һәр васитә илә ҝөстәрирләр. Шејтанын дүнјасына мәхсус олдугларыны ачыг-ачығына ҝөстәрдикләри үчүн, онлары ҹәза ҝөзләјир.
13. Тсефанјанын пејғәмбәрлијинә ҝөрә, бабиллиләрин Јерусәлимә һүҹуму заманы нә баш вермәли иди?
13 Јәһуда дијары үзәриндәки һөкмүн “о ҝүнү”, Јегованын өз дүшмәнләри үзәриндәки һөкмүнү јеринә јетирәҹәк ҝүнүнә мүвафигдир. О заман О, ганунсузлуға сон гојаҹаг вә али һөкмдар олдуғуну сүбут едәҹәкдир. Бабиллиләрин Јерусәлимә һүҹуму заманы “балыглар гапысы” дејилән јердән чығырты гопаҹагды. Ҝүман ки, бу ад јахынлыгда балыг сатылан базарын олмасы илә изаһ едилир (Неһемја 13:16). Бабил гошунлары шәһәрә “икинҹи мәһәллә” тәрәфдән дахил олаҹаглар, “тәпәләр тәрәфдә бөјүк гырғын” исә, јахынлашан ҝилданиләрин һај-күјүнү ҝөстәрә биләр. Мактешдә - бурада, јәгин ки, Туропеон вадиси нәзәрдә тутулур - јашајанлар “улајаҹаглар”. Нәјә ҝөрә? Она ҝөрә ки, “ҝүмүш јүклү оланларын”, јә’ни ҝүмүш чәкәнләрин һамысынын тиҹарәти баша чатаҹагды.
14. Өзүнү Онун ибадәтчиләри адландыранлары Аллаһ нә гәдәр диггәтлә јохлајаҹагдыр?
14 Өзүнү Јегованын ибадәтчиләри адландыранлары, Јегова нә гәдәр диггәтлә јохлајаҹагдыр? Пејғәмбәрликдә дејилир: “О вахт елә олаҹаг ки, Јерусәлими чырагла арајаҹағам. Вә чөкүнтүләри үзәриндә гатылашмыш адамлары јохлајаҹағам, онлар ки, үрәкләриндә: РӘБ јахшылыг да етмәз, пислик дә етмәз, дејирләр. Вә онларын малы гәнимәт вә евләри виранә олаҹаг; вә евләр тикәҹәкләр, фәгәт ичиндә јашамајаҹаглар; вә бағлар салаҹаглар, фәгәт шәрабыны ичмәјәҹәкләр” (Тсефанја 1:12, 13).
15. а) Јерусәлимин дөнүк каһинләри илә нә баш вермәли иди? б) Јалан динләрин мүасир тәрәфдарларыны нә ҝөзләјир?
15 Јерусәлимин дөнүк каһинләри Јеговаја ибадәти јалан динлә гарышдырырлар. Онлар, санки ҝеҹә гаранлығында һәрәкәт едирмиш кими, өзләрини тәһлүкәсиз санырлар, лакин Јегова, онларын ҝизләндикләри руһани гаранлығы чырагла ајдынлашдырыр кими, онлары тапаҹагды. Аллаһын һөкмләринин е’лан олунмасыны һамы ешидәҹәк вә Аллаһын һөкмүндән һеч ким јаха гуртара билмәјәҹәк. Өзүндән разы олан бу дөнүкләр санки шәраб чәлләјинин дибинә енмишләр. Онлар истәмирләр ки, Аллаһын инсанларын ишинә мүдахилә едәҹәји һаггындакы пејғәмбәрликләрлә онлары нараһат етсинләр, лакин онлар Аллаһын һөкмүндән јаха гуртара билмәјәҹәкләр. Јалан динләрин мүасир тәрәфдарлары, һәмчинин Јеговаја ибадәтдән үз дөндәрәнләр дә хилас ола билмәјәҹәкләр. “Ахыр ҝүнләрдә” јашадығымызы инкар едәрәк, онлар үрәкләриндә дејирләр: “РӘБ јахшылыг да етмәз, пислик дә етмәз”. Лакин онлар һәддиндән артыг јанылырлар! (2 Петер 3:3, 4, 10; 2 Тимотејә 3:1—5).
16. Јәһуда үзәриндә һәјата кечирилән һөкм заманы нә баш вермәли иди вә буну билмәјимиз бизә неҹә тә’сир едир?
16 Јәһуди дөнүкләрини хәбәрдар едирләр ки, бабиллиләр онларын мүлкүнү талан едәҹәк, евләрини виранә гојаҹаг вә бағларынын бәһрәләрини апараҹаглар. Аллаһ Јәһуда үзәриндә һөкмүнү һәјата кечирәндә, мадди әмлак көмәк етмәјәҹәкди. Јегованын бу әшјалар системи үзәриндәки һөкм ҝүнүндә дә һәмин вәзијјәт олаҹагдыр. Буна ҝөрә дә, ҝәлин руһани әһвал-руһијјәмизи горујуб сахлајаг вә Јеговаја етдијимиз хидмәтә һәјатымызда биринҹи јери ајырараг “өзүмүзә ҝөјдә хәзинәләр јығаг”! (Матта 6:19—21, 33).
“РӘББИН бөјүк ҝүнү јахындыр”
17. Тсефанја 1:14—16 ајәләринә әсасән, Јегованын һөкм ҝүнү нә гәдәр јахындыр?
17 Јегованын бөјүк һөкм ҝүнү нә гәдәр јахындыр? Тсефанја 1:14—16 ајәләриндә Аллаһ әмин едир: “РӘББИН бөјүк ҝүнү јахындыр, јахындыр вә чох тәләсир, РӘБ ҝүнүнүн сәси! Иҝид орада аҹы-аҹы бағырыр. О ҝүн гәзәб ҝүнүдүр, сыхынты вә мәшәггәт ҝүнү, харабалыг вә виранәлик ҝүнү, гаранлыг вә гаралты ҝүнү, булудлар вә гаты гаранлыг ҝүнү, диварлы шәһәрләрә гаршы, јүксәк гала гүлләләринә гаршы бору вә нә’рәләр ҝүнүдүр”.
18. Нәјә ҝөрә биз дүшүнмәли дејилик ки, Јегованын ҝүнү һәлә узагдадыр?
18 Ҝүнаһкар каһинләри, рәисләри вә Јәһуданын халгыны хәбәрдар едирдиләр: Јегованын “бөјүк ҝүнү јахындыр”. Јегованын Јәһуда үзәриндә һәјата кечәҹәк ҝүнү “чох тәләсирди”. Еләҹә дә бу ҝүн: гој һеч ким Јегованын писләр үзәриндә һәјата кечирәҹәји һөкм ҝүнүнүн узаг ҝәләҹәкдә олаҹағыны дүшүнмәсин. Аллаһ Јәһуда халгынын ҝүнләриндә јубанмадығы кими, инди дә һөкмүнү иҹра едәҹәји ҝүнү “тәләсдирәҹәкдир” (Вәһј 16:14, 16). Шаһидләри тәрәфиндән Јегованын бәјан едилән хәбәрдарлығына диггәт јетирмәјән, һәмчинин һәгиги ибадәтин тәрәфини тутмајан кәсләр үчүн бу дөвр неҹә дә кәдәрли олаҹагдыр!
19, 20. а) Аллаһ Јәһуда вә Јерусәлимин үзәринә гәзәбини төкәркән нә баш верди? б) Бу әшјалар системинин башына ҝәләҹәк сечкили виранәликлә әлагәдар һансы суаллар гаршыја чыхыр?
19 Аллаһын, Јәһуда вә Јерусәлим үзәринә төкдүјү гәзәб ҝүнү, “сыхынты вә мәшәггәт ҝүнү” олду. Бабил истилачылары Јәһуда сакинләринә чох әзијјәт верирдиләр, онлар да өлүм вә мәһв едилмә гаршысында үрәк ағрысы һисс едирдиләр. Истисна дејил ки, “харабалыг вә виранәлик ҝүнү” јалныз мәҹази мә’нада дејил, һәгиги мә’нада да гаранлыг, булуд вә зүлмәт ҝүнү олмушдур, чүнки әтрафда һәр шеј түстүјә бүрүнмүшдү вә һәр јердә ганлы дөјүш ҝедирди. Бу, “бору вә нә’рәләр ҝүнү” иди, лакин һарај салмаг артыг әһәмијјәтсиз иди.
20 Һүҹум едән дүшмән, көмәксиз ҝөзәтчиләрин топлашдыглары “јүксәк гала гүлләләрини” гочбашы адланан аләтләрлә дағытды. Бизим ҝүнләрдә дә, Аллаһ, сәмави силаһы васитәсилә сечкили виранәлик ҝәтирәркән, бу силаһа гаршы дурмагда дүнјаја һеч бир истеһкам көмәк едә билмәјәҹәк. Һәмән ҝүн хилас олмаға үмид едирсинизми? “Ону севәнләрин һамысыны горујуб... бүтүн писләри һәлак едән” Јегованын тәрәфиндә мөһкәмми дурмусунуз? (Мәзмур 145:20).
21, 22. Тсефанја 1:17, 18-ҹи ајәләри бизим ҝүнләрдә неҹә јеринә јетәҹәкдир?
21 Тсефанја 1:17, 18 ајәләриндә габагҹадан сөјләнилән һөкм ҝүнү дәһшәт доғурур! “Инсанлар үзәринә сыхынты ҝәтирәҹәјәм вә корлар кими јеријәҹәкләр, чүнки РӘББӘ гаршы ҝүнаһ ишләтдиләр; вә ганлары тоз кими вә әтләри ҝүбрә кими төкүләҹәк. РӘББИН гәзәб ҝүнүндә ҝүмүшләри дә гызыллары да онлары гуртармајаҹаг; анҹаг онун гысганҹлыг атәши бүтүн мәмләкәти јејиб битирәҹәк; чүнки мәмләкәтдә јашајанларын һамысыны сона, һәм дә горхунҹ бир сона ҝәтирәҹәкдир” (Тсефанја 1:17, 18).
22 Тсефанјанын ҝүнләриндә олдуғу кими, Онун хәбәрдарлыгларына гулаг асмаг истәмәјәнләрә Јегова тезликлә “сыхынты” ҝәтирәҹәк. Аллаһын гаршысында ҝүнаһ ишләтдикләри үчүн, кор адамлар кими, көмәксиз олаҹаглар, хилас јолу тапмадан вејлләнәҹәкләр. Јегованын һөкм ҝүнүндә онларын “ганлары тоз кими”, јә’ни һеч нәјә јарамајан бир шеј кими төкүләҹәкдир. Онлары шәрәфсиз сон ҝөзләјир: Аллаһ бу ҝүнаһкарларын бәдәнләрини, һәтта дахили органларыны “ҝүбрә кими” бүтүн јер үзүнә сәпәләјәҹәкдир.
23. Ганунсузлар “РӘББИН гәзәб ҝүнүндә” хилас олмасалар да, Тсефанјанын пејғәмбәрлијиндә һансы үмиддән данышылыр?
23 Аллаһла вә Онун халгы илә дүшмәнчилик едәнләри һеч ким хилас едә билмәјәҹәкдир. Јәһуданын ганунсуз сакинләрини нә ҝүмүш, нә дә гызыл хилас едә билмәди. Ејни тәрздә дә, Христиан аләми вә бу әшјалар системинин галан һиссәси “РӘББИН гәзәб ҝүнүндә” тәләф едиләндә, топланмыш вар-дөвләт вә рүшвәтләр һеч кәсә көмәк етмәјәҹәк. Һөкмүн сон ҝүнүндә, Аллаһ писләри мәһв едәркән “онун гысганҹлыг атәши бүтүн мәмләкәти јејиб битирәҹәк”дир. Биз Аллаһын пејғәмбәрлик сөзүнә инанырыг, буна ҝөрә дә әминик ки, “сонун вахтын”ын баша чатаҹағы ҝүн јахынлашыр (Даниел 12:4). Јегованын һөкм ҝүнү јахындыр вә О, тезликлә дүшмәнләринә әмәлләринә ҝөрә верәҹәкдир. Лакин Тсефанјанын пејғәмбәрлији ҝөстәрир ки, хилас олмаг үчүн үмид вар. Јегованын гәзәб ҝүнүндә ҝизләнә билмәјимиз үчүн һансы тәләбләрә мүвафиг олмалыјыг?
Сиз неҹә ҹаваб верәрдиниз?
• Тсефанјанын пејғәмбәрлији Јәһуда вә Јерусәлим үзәриндә неҹә јеринә јетди?
• Бизим ҝүнләрдә Христиан аләмини вә бүтүн писләри нә ҝөзләјир?
• Нәјә ҝөрә биз дүшүнмәмәлијик ки, Јегованын һөкм ҝүнүнә һәлә чох вар?
[9-ҹу сәһифәдәки шәкил]
Тсефанја, Јегованын һөкм ҝүнүнүн јахын олдуғуну ҹәсарәтлә бәјан едирди.
[Иҹазә илә]
From the Self-Pronouncing Edition of the Holy Bible, containing the King James and the Revised versions
[10-ҹу сәһифәдәки шәкил]
Јегова писләри мәһв едәркән хилас олмаға үмид едирсинизми?