Јегованы, онун гәзәб ҝүнү ҝәлмәздән әввәл ахтарын
“РӘББИ арајын; салеһлији арајын, тәвазөкарлығы арајын; РӘББИН гәзәб ҝүнүндә бәлкә ҝизләнә биләрсиниз” (ТСЕФАНЈА 2:3).
1. Тсефанја пејғәмбәрлик етмәјә башлајаркән Јәһуда халгынын руһани вәзијјәти неҹә иди?
ТСЕФАНЈА Јәһуда тарихинин чәтин вахтында пејғәмбәрлик етмәјә башлады. Халгын руһани вәзијјәти аҹынаҹаглы иди. Јегова Аллаһа ҝүвәнмәк әвәзинә, халг рәһбәрлик үчүн бүтпәрәст каһинләрә вә мүнәҹҹимләрә мүраҹиәт едирди. Өлкәдә, өзүнә мәһсулдарлыг ајинләрини дахил едән Баала ибадәт ҝенишләнирди. Халгы идарә едән рәһбәрләр - рәисләр, ә’јанлар вә һакимләр - мүдафиә етмәли олдуглары кәсләрә зүлм верирдиләр (Тсефанја 1:9; 3:3). Јегованын Јәһуда падшаһлығы үзәринә “әлини узадыб”, ону мәһв етмәји гәрара алмасынын сәбәби тамамилә ајдындыр! (Тсефанја 1:4).
2. Јәһуда дијарында Аллаһа садиг олан инсанларын һансы үмиди варды?
2 Вәзијјәтләринин аҹынаҹаглы олмасына бахмајараг, јәһудиләрин үмиди варды. Тахтда Аммонун оғлу Јошија отурмушду. О, ҝәнҹ јашларында Јегованы бүтүн үрәји илә севирди. Әҝәр тахта јени гәдәм гојан падшаһ Јәһуда дијарында тәмиз ибадәти бәрпа едәрдисә, бу вәзијјәт, Аллаһа сәдагәтлә хидмәт едән азсајлы инсанларын үрәјини неҹә дә мөһкәмләндирәрди! Вә ким билир, Јегованын гәзәб ҝүнүндә хилас ола биләҹәк башга инсанлар да онлара гошулмаздылармы.
Хилас олмаг үчүн тәләбләр
3, 4. “РӘББИН гәзәб ҝүнүндә” хилас олмаг үчүн һансы үч тәләби јеринә јетирмәк лазымдыр?
3 Бәс үмумијјәтлә Јегованын гәзәб ҝүнүндә хилас олмаг мүмкүн идими? Бәли, Тсефанја 2:2, 3-ҹү ајәләриндә јазылан үч шәртә әмәл едән инсанлар хилас ола биләрдиләр. Һәмин ајәләри охујаркән бу тәләбләрә хүсуси диггәт јетирәк. Тсефанја јазырды: “Фәрман чыхмадан өнҹә, ҝүн саман чөпү кими кечиб ҝетмәдән өнҹә, РӘББИН гызғын гәзәби үзәринизә ҝәлмәдән өнҹә, РӘББИН гәзәб ҝүнү үзәринизә ҝәлмәдән өнҹә топланын. РӘББИН һөкмләрини иҹра етмиш олан дүнјанын бүтүн тәвазөкарлары, РӘББИ арајын; салеһлији арајын, тәвазөкарлығы арајын; РӘББИН гәзәб ҝүнүндә бәлкә ҝизләнә биләрсиниз”.
4 Беләликлә, сағ галмаг үчүн 1) Јегованы ахтармаг, 2) салеһлији ахтармаг вә 3) тәвазөкарлығы ахтармаг ваҹиб иди. Бу тәләбләр бизим үчүн дә бөјүк әһәмијјәт тәшкил едир. Нәјә ҝөрә? Она ҝөрә ки, б. е. әввәл једдинҹи әсрдә Јәһуда вә Јерусәлим һагг-һесаб ҝүнүндән гача билмәдикләри кими, гаршыдан ҝәлән “бөјүк мәшәггәт” заманы да, Јегова Христиан аләминин халгларыны вә үмумијјәтлә бүтүн ҝүнаһкарлары мәс’улијјәтә ҹәлб едәҹәкдир (Матта 24:21). О заман хилас олмаг истәјәнләр артыг индидән ҹидди фәалијјәт ҝөстәрмәлидирләр. Онлар нә етмәлидирләр? Һәлә ки, ҝеҹ дејил Јегованы ахтармалы, салеһлији ахтармалы вә тәвазөкарлығы ахтармалыдырлар!
5. Јегованы бу ҝүн ахтармаг нә демәкдир?
5 Ким исә дејә биләр: “Ахы мән өзүмү Аллаһа һәср едиб вәфтиз олунмушам, мән Она Јегованын Шаһиди кими хидмәт едирәм. Мәҝәр мән бу тәләбләрә мүвафиг дејиләм?” Әслиндә Јеговаја һәср едилмәклә, һәр шеј һәлл олунмур. Исраил Аллаһа һәср едилмиш халг олса да, Тсефанјанын ҝүнләриндә Јәһуданын сакинләри өзләрини мүвафиг тәрздә апармырдылар. Буна ҝөрә дә, халг нәтиҹәдә рәдд едилди. Бу ҝүн Јегованы ахтармаг, Онун јер үзүндәки тәшкилатынын үзвү олараг, Онунла меһрибан, сәмими мүнасибәтләри инкишаф етдирмәк вә бу мүнасибәтләри горујуб сахламаг демәкдир. Бу, Онун мүәјјән шејләрә олан мүнасибәтини өјрәнмәк вә һиссләрини нәзәрә алмаг демәкдир. Биз Јегованы, Онун Кәламыны чалышганлыгла өјрәнәрәк, өјрәндикләримизин үзәриндә дүшүнәрәк вә Онун тә’лимләрини практикада тәтбиг едәрәк ахтармыш олуруг. Бундан әлавә, биз Јеговајанын рәһбәрлијини, Она үрәкдән дуа едәрәк вә Онун мүгәддәс руһунун тә’сиринә табе олараг ахтармыш олуруг. Бунун сајәсиндә Јегова илә олан мүнасибәтимиз мөһкәмләнир вә Она бүтүн үрәјимизлә, ҹанымызла вә бүтүн гүввәтимизлә хидмәт етмәјә тәшвиг олунуруг (Тәснијә 6:5; Галатијалылара 5:22—25; Филипилиләрә 4:6, 7; Вәһј 4:11).
6. Биз салеһлији неҹә ахтарырыг вә нәјә ҝөрә һәтта буҝүнкү дүнјада да буну етмәк мүмкүндүр?
6 Тсефанја 2:3-ҹү ајәсиндә хатырланан икинҹи тәләб - салеһлији ахтармагдыр. Бизләрдән чохумуз вәфтиз олунмаға мүвафиг олмаг үчүн ҹидди дәјишикликләр етмишик, анҹаг Јегованын әдаләтли нормаларына өмрү боју бағлы галмаг лазымдыр. Бә’зиләри Јегованын нормаларына мәсиһчи јолунун башланғыҹында бағлы галмышлар, лакин ахырда өзләрини бу дүнја илә мурдарламышлар. Бәли, салеһлији горумаг асан дејил, чүнки бизи әһатә едән инсанлар ҹинси әхлагсызлыгда, јалан данышмагда вә алдатмагда һеч бир пис шеј ҝөрмүрләр. Лакин бу дүнјанын нүфузуну газанмаг - јә’ни һамы кими олмаг һәвәси илә мүбаризәдә, Јеговаја мәгбул олмаг истәји бизә көмәк едә биләр. Јәһудеја падшаһлығы, аллаһсыз гоншуларына бәнзәмәк истәдији үчүн Јегованын рәғбәтини итирди. Ҝәлин дүнјаја бәнзәмәк әвәзинә, “Аллаһын бәнзәјишинә ҝөрә һәгиги салеһлик вә мүгәддәсликлә јарадылмыш јени мәнлији ҝејинмәјә” дурмадан сә’ј ҝөстәрәрәк, “Аллаһы тәглид” едәк (Ефеслиләрә 4:24; 5:1).
7. Тәвазөкарлығы неҹә ахтармалыјыг?
7 Тсефанја 2:3-ҹү ајәсиндә јазылан үчүнҹү әсас фикир ондан ибарәтдир ки, әҝәр Јегованын гәзәб ҝүнүндә хилас олмаг истәјириксә, тәвазөкарлығы ахтармалыјыг. Биз һәр ҝүн, тәвазөкар адландырылмасы мүмкүн олмајан кишиләр, гадынлар вә ушагларла тәмасда олуруг. Тәвазөкарлыг онлар үчүн чатышмазлыг әламәтидир. Онлар, ҝүзәштә ҝетмәји зәифлик һесаб едирләр. Бу инсанларын тәләбатларынын һәдди-һүдуду јохдур, онлар худбин вә инадҹылдырлар. Онлар нәјин баһасына олурса-олсун, зәнн етдикләри кими “һүгуглары чатдығы” вә истәдикләри һәр шејә наил олмаға һазырдырлар. Әҝәр буна бәнзәр бахышлар бизим дә дүшүнҹәмизә тә’сир етсәјди, неҹә дә аҹынаҹаглы оларды! Инди биз, тәвазөкарлығы әввәлкиндән даһа артыг ахтармалыјыг. Неҹә? Аллаһын өјүдләрини гәбул едәрәк вә ирадәсинә табе олараг Она итаәткар олмалыјыг.
Нәјә ҝөрә “бәлкә”?
8. Нәјә ҝөрә Тсефанја 2:3-ҹү ајәсиндә “бәлкә” ифадәси ишләнир?
8 Тсефанја 2:3-ҹү ајәсиндә дејиләнләрә диггәт јетирин: “РӘББИН гәзәб ҝүнүндә бәлкә ҝизләнә биләрсиниз”. Нәјә ҝөрә Тсефанја “дүнјанын бүтүн тәвазөкарлары”на мүраҹиәт едәркән “бәлкә” әдејир? Тәвазөкар инсанлар дүзҝүн аддымлар атсалар да, өзләринә әмин олмалы дејилдиләр. Онлар һәлә ки, өз һәјат јолларыны сәдагәтлә баша вурмамышдылар. Еһтимал олунурду ки, онлардан ким исә ҝүнаһ ишләдә биләрди. Бу шејләр бизә дә аиддир. Иса деди: “Ахыра гәдәр сәбр едән хилас олаҹагдыр” (Матта 24:13). Јегованын гәзәб ҝүнүндә хилас олмаг үчүн, һәгигәтә әсасән јашамағы давам етдирмәк лазымдыр. Сиз буну етмәјә гәти гәрарлысынызмы?
9. Ҝәнҹ падшаһ Јошија һансы дүзҝүн аддымлары атды?
9 Ҝөрүндүјү кими, пејғәмбәрин сөзләри Јошија падшаһы Јегованы ахтармаға тәшвиг етди. Мүгәддәс Јазыларда дејилир: “Падшаһлығынын сәккизинҹи илиндә, һәлә ҝәнҹ икән [тәхминән 16 јашында] атасы Давудун Аллаһыны арамаға башлады” (2 Тарихләр 34:3). Бундан әлавә, Јошија салеһлији ахтармаға давам едирди. Биз охујуруг: “Вә он икинҹи илдә Јәһуданы вә Јерусәлими јүксәк јерләрдән вә Ашерләрдән вә ојма бүтләрдән вә төкмә бүтләрдән тәмизләмәјә башлады. Вә онун өнүндә Баалларын гурбанҝаһларыны јыхдылар” (2 Тарихләр 34:3, 4). Јошија тәвазөкарлығы, һәм дә торпағы бүтпәрәстликдән вә јалан динлә бағлы олан һәр шејдән тәмизләјәрәк, һәлимликлә Јеговаја мәгбул олмаға сә’ј ҝөстәрәрәк ахтарырды. Бу һадисәләр диҝәр тәвазөкар инсанлары неҹә дә севиндирирди!
10. Б. е. әввәл 607-ҹи илдә Јәһуда дијарында нә баш верди вә о заман кимләр хилас олунду?
10 Јошијанын падшаһлығы заманы јәһудиләрин чоху јенидән Јеговаја тәрәф дөндүләр. Лакин падшаһын өлүмүндән сонра халгын әксәријјәти әввәлки јолуна гајытды вә Аллаһа гәтијјән мәгбул олмајан ишләрлә мәшғул олмаға башлады. Јегованын бәјан етдији кими, Бабил гошунлары Јәһуда падшаһлығына галиб ҝәлди вә б. е. әввәл 607-ҹи илдә онун пајтахты олан Јерусәлими виран етди. Лакин вәзијјәт чыхылмаз дејилди. Јеремја пејғәмбәр, һәбәшистанлы Әбәд-мәләк, Јонадабын нәслиндән оланлар вә Аллаһа садиг олан башга инсанлар “РӘББИН гәзәб ҝүнү” хилас олмушдулар (Јеремја 35:18, 19; 39:11, 12, 15—18).
Аллаһын дүшмәнләри, динләјин!
11. Нәјә ҝөрә бу ҝүн Аллаһа садиг галмаг асан дејил вә Јегованын халгынын дүшмәнләри нәјә диггәт јетирсәләр јахшы оларды?
11 Јегованын гәзәб ҝүнүндә бу дүнјанын мәһв олунаҹағыны ҝөзләјәрәк, “мүхтәлиф имтаһанларла” гаршылашырыг (Јагуб 1:2). Дин азадлығыны гәбул едән бир сыра өлкәләрдә, руһаниләр Аллаһын халгыны амансыз тә’гибләрә дүчар етмәк арзусу илә һакимијјәтә олан тә’сирләриндән һијләҝәрҹәсинә истифадә едирләр. Принсипсиз инсанлар Јегованын хидмәтчиләринә бөһтан атыр, онлары “тәһлүкәли тәригәт” кими гәләмә верирләр. Јегова онларын әмәлләрини ҝөрүр вә онлары ҹәзасыз гојмајаҹагдыр. Јахшы оларды ки, Аллаһын дүшмәнләри, кечмишдә Онун халгынын дүшмәнләри илә, мәсәлән, филистимлиләрлә баш верән һадисәјә диггәт јетирсинләр. Пејғәмбәрликдә дејилир: “Газа шәһәрини бурахыб гачаҹаглар вә Ашкелон виран олаҹаг; Ашдоду исә, ону ҝүнорта вахты говаҹаглар вә Екрон көкүндән дағылаҹаг” (Тсефанја 2:4—7).
12. Филистија, Моаб вә Аммонла нә баш верди?
12 Пејғәмбәрликдә даһа сонра дејилир: “Халгымы тәһгир етмиш вә онларын мәмләкәтләринә гаршы өзләрини бөјүтмүш олан Моабын етдији һәгарәти вә Аммон оғулларынын ситәмләрини ешитдим” (Тсефанја 2:8). Доғрудур ки, Мисир вә Һәбәшистан Бабил истилачыларынын әлиндән әзијјәт чәкмишдир. Бәс Аллаһ Ибраһимин гардашы оғлу Лутдан төрәнән халглара - Моаба вә Аммона һансы һөкмү кәсди? Јегова габагҹадан хәбәр верди: “Моаб Содом кими вә Аммон оғуллары Һоморра кими олаҹаг”. Өзләринин улу валидејнләри олан - Содом вә Һоморранын мәһвиндән сағ чыхан - Лутун гызларындан фәргли олараг, мәғрур Моаб вә Аммон, Аллаһын һөкмүнүн иҹрасындан хилас ола билмәјәҹәкләр (Тсефанја 2:9—12; Тәквин 19:16, 23—26, 36—38). Бу ҝүн Филистија вә онун шәһәрләри һарададыр? Бир заманлар мәғрур олан Моаб вә Аммон һарададырлар? Нә гәдәр истәјирсиниз ахтарын - онлары тапмаг гејри-мүмкүндүр.
13. Археологлар Ниневијада нә тапмышлар?
13 Тсефанјанын ҝүнләриндә Ассурија империјасы өз гүдрәтинин зирвәсинә јүксәлди. Археолог Остен Лејард Ассуријанын пајтахты Ниневија шәһәриндә ашкар етдији падшаһ сарајынын бир һиссәсини белә тәсвир едир: “Таванлар... боја илә ишләнмиш чичәк сурәтләри вә ја һејван фигурлары илә квадрата бөлүнмүшдүр. Квадратлардан бә’зиләри фил сүмүјү илә бәзәдилмишдир, һәм дә һәр бири зәриф чәрчивә вә јапма нахышларла һашијәләнмишдир. Тирләр, һәмчинин имарәтләрин диварлары, еһтимал ки, гызыл вә ја ҝүмүш сујуна чәкилмиш, һәтта бәлкә дә гызыл вә ҝүмүшлә өртүлмүшдүр; имарәтләрин ичәрисинин тахтадан олан һиссәләри надир ағаҹ нөвләриндән, хүсусилә дә арасында сечилән сидр ағаҹларындан ишләнмишдир”. Лакин, Тсефанјанын пејғәмбәрлијиндә габагҹадан дејилдији кими, Ассурија мәһв едилмәли иди, пајтахты Ниневија исә “гураглыға” чеврилмәли иди (Тсефанја 2:13).
14. Тсефанјанын пејғәмбәрлији Ниневија үзәриндә неҹә јеринә јетди?
14 Тсефанјанын бу пејғәмбәрлији дедији вахтдан ҹәми 15 ил сонра, гүдрәтли Ниневија виран едилди, падшаһ сарајынын јериндә исә јалныз харабалыглар галды. Бәли, мәғрур шәһәр күллүјә чеврилмишди. Нөвбәти сөзләр дағынтынын мигјасы барәдә ајдын тәрздә шәһадәтлик едир: “Һәм гутан гушу, һәм дә кирпи онун дирәк башлыгларында ҝеҹәләјәҹәкләр; пәнҹәрәләрдә онларын сәси ешидиләҹәк; харабалыг астанада олаҹаг; чүнки сидр ағаҹы өртүкләри сөкүлдү” (Тсефанја 2:14, 15). Ниневијанын мөһтәшәм тикилиләри кирпиләрин вә гутан гушларынын далдаланаҹағы јерә чевриләҹәкдир. Шәһәрин күчәләриндә таҹирләрин сәси, әсҝәрләрин чығыртысы, бүтләрә хидмәт едән каһинләрин нәғмәләри артыг ешидилмәјәҹәкдир. Бир заманлар ҝедишли-ҝәлишли шәһәрдә, пәнҹәрәләрдән јалныз түкүрпәрдиҹи сәс - еһтимал ки, гушларын гүссәли нәғмәси вә ја күләјин выјылтысы ешидиләҹәкдир. Гој Аллаһын бүтүн дүшмәнләринин агибәти белә олсун!
15. Моабын, Аммонун, Филистија вә Ассуријанын башына ҝәләнләрдән нә өјрәнмәк олар?
15 Моаб, Аммон, Филистија вә Ассурија илә баш верәнләрдән һансы нәтиҹәјә ҝәлмәк олар? Белә бир нәтиҹәјә ҝәлмәк олар ки, биз дүшмәнләримиздән горхмамалыјыг. Аллаһ, Онун халгына гаршы дуранларын нә етдикләрини ҝөрүр. Јегова кечмиш заманларда өз дүшмәнләринә гаршы чыхырды вә Онун мәһкәмәси бизим ҝүнләрдә дә бүтүн сакин олунмуш әразиләрин үзәринә ҝәләҹәкдир. Лакин һамы мәһв олмајаҹагдыр, “бүтүн... халглардан... олан... бөјүк бир издиһам” сағ галаҹагдыр (Вәһј 7:9). Әҝәр Јегованы, салеһлији вә тәвазөкарлығы ахтармаға давам едәрсинизсә, о заман онларын арасында сиз дә ола биләрсиниз.
Әдәбсиз ганунсузлара вај олсун!
16. Тсефанјанын пејғәмбәрлијиндә Јәһуда дијарынын рәисләри вә дин рәһбәрләри һаггында нә дејилир вә нәјә ҝөрә пејғәмбәрин сөзләри Христиан аләминә јарашыр?
16 Тсефанијанын пејғәмбәрлијиндә диггәт јенидән Јәһуда вә Јерусәлимә јөнәлдилир. Тсефанја 3:1, 2 ајәләриндә дејилир: “О үсјанкарын, о писин, о гәддар шәһәрин вај башына! Сөз динләмәди; дәрс алмады; РӘББӘ ҝүвәнмәди; Аллаһына јахынлашмады”. Тәәссүфләр олсун ки, халг Јегованын өјүдүнә һај вермәди! Рәисләрин, ә’јанларын вә һакимләрин гәддарлыглары ијрәнҹдир. Тсефанја абырсыз дин рәһбәрләрини ифша етди: “Пејғәмбәрләри ојнаг [“әдәбсиз”, ЈД] вә хаин адамлар; каһинләри мүгәддәси мурдарладылар, шәриәти поздулар” (Тсефанја 3:3, 4). Бу сөзләр Христиан аләминин буҝүнкү пејғәмбәрләрини вә каһинләрини неҹә дә дәгиг тәсвир едир! Онлар Аллаһын адыны Мүгәддәс Китабын өзләри етдикләри тәрҹүмәләриндән әдәбсиз тәрздә чыхардыблар вә өзләрини хидмәтчиләри адландырдыглары Шәхсин тә’лимләрини јанлыш тәрздә тәблиғ едирләр.
17. Бизә гулаг асыб-асмамаларындан асылы олмајараг, хош хәбәри нәјә ҝөрә бәјан етмәлијик?
17 Гәдим заманларда Јегова, етмәк истәдији ишләр һагда өз халгыны гајғыкешликлә хәбәрдар едирди. О, өз хидмәтчиләрини, пејғәмбәрләрини, о ҹүмләдән Тсефанјаны вә Јеремјаны ҝөндәрирди ки, онлар халгы төвбә етмәјә чағырсынлар. Бәли, “РӘБ... һагсызлыг етмәз; һәр сабаһ әдаләтини ишыға чыхармагда ҝери галмаз”. Бәс неҹә реаксија ҝөстәрилир? “Фәгәт һагсыз адам утанмаг билмәз”,- деди Тсефанја (Тсефанја 3:5). Буна бәнзәр хәбәрдарлыг бизим ҝүнләрдә дә сәсләнир. Сизин һамыныз - хош хәбәрин тәблиғчиләри - бу хәбәрдарлыг ишиндә иштирак едирсиниз. Буна ҝөрә дә хош хәбәри дурмадан бәјан един! Сизи динләјиб динләмәмәләри ваҹиб дејил: нә гәдәр ки, Аллаһа сәдагәтлә хидмәт едирсиниз, хидмәтиниз Онун ҝөзүндә әбәс дејил. Аллаһын ирадәсини сә’јлә јеринә јетирирсинизсә, утанмаға һеч бир сәбәбиниз јохдур.
18. Тсефанја 3:6 ајәси неҹә јеринә јетәҹәкдир?
18 Јегованын мәһкәмәси Христиан аләминин виран едилмәси илә мәһдудлашмыр. Јегова һәмчинин бүтүн Јер үзүнүн сакинләрини мүһакимә едир: “Милләтләр кәсиб атдым; онларын дивар гүлләләрини виранәләр; күчәләрини хараб етдим, кимсә кечмир; шәһәрләри виран олду, кимсә галмады, јашајан јох” (Тсефанја 3:6). Бу сөзләр о гәдәр һәгигидир ки, Јегова халгларын һәлакы барәсиндә артыг јеринә јетмиш кими данышыр. Моабын, Аммонун вә Филистијанын шәһәрләри илә нә баш верди? Бәс Ассуријанын пајтахты Ниневија илә? Бу шәһәрләрин мәһви буҝүнкү халглара хәбәрдарлыг кими хидмәт едир. Аллаһа истеһза едиб, ҹәзасыз галмаг олмаз.
Јегованы ахтармаға давам един
19. Һансы дүшүндүрүҹү суаллары өзүмүзә вермәк мүнасиб оларды?
19 Тсефанјанын вахтында Аллаһын гәзәби, ҝүнаһкар тәрздә “бүтүн ишләрини чүрүдән” инсанларын үзәринә ҝәлмишди (Тсефанја 3:7). Һәмән вәзијјәт бизим ҝүнләрдә дә баш верәҹәкдир. Јегованын гәзәб ҝүнүнүн јахын олдуғуна даир сүбутлары ҝөрүрсүнүзмү? Јегованын Кәламыны мүнтәзәм - һәр ҝүн охујараг, Ону ахтарырсынызмы? Аллаһын нормаларына ујғун јүксәк әхлаглы һәјат сүрәрәк, салеһлији ахтарырсынызмы? Һәр шејдә Аллаһа гулаг асараг вә хиласымыз үчүн Онун етдикләрини итаәткарлыгла гәбул едәрәк, тәвазөкарлығы ахтарырсынызмы?
20. Сонунҹу мәгаләдә Тсефанјанын пејғәмбәрлији һаггында һансы суаллары нәзәрдән кечирәҹәјик?
20 Әҝәр Јегованы, салеһлији вә тәвазөкарлығы сәдагәтлә ахтармаға давам етсәк, әмин ола биләрик ки, артыг инди, иманымызын сынаға чәкилдији бу “ахыр ҝүнләрдә” чохлу хејир-дуалар алаҹағыг (2 Тимотејә 3:1—5; Сүлејманын мәсәлләри 10:22). Лакин бир нечә суал јараныр: Јегова бизи - өзүнүн мүасир хидмәтчиләрини неҹә хејир-дуаландырыр вә Тсефанјанын пејғәмбәрлијинә әсасән, Јегованын сүр’әтлә јахынлашан гәзәб ҝүнүндән хилас олаҹаг кәсләр һансы хејир-дуалара үмид бәсләјә биләрләр?
Сиз неҹә ҹаваб верәрдиниз?
• Инсанлар Јегованы неҹә ахтарырлар?
• “Салеһлији ахтармаг” анлајышы өзүнә нәји дахил едир?
• Биз тәвазөкарлығы неҹә ахтарырыг?
• Нәјә ҝөрә биз дурмадан Јегованы, салеһлији вә тәвазөкарлығы ахтармалыјыг?
[15-ҹи сәһифәдәки шәкил]
Бөјүк издиһам Јегованы ахтармагда давам едир, буна ҝөрә дә Онун гәзәб ҝүнүндән сағ чыхаҹагдыр.