Јеһованын тәләбләринә риајәт етмәк Ону јүксәлдир
“Шүкранла ону јүксәлдәрәм” (МӘЗМУР 69:30).
1. а) Јеһова јүксәлдилмәјә нәјә ҝөрә лајигдир? б) Јеһованы миннәтдарлыг һисси илә неҹә јүксәлдә биләрик?
ЈЕҺОВА — Гадир Аллаһ, Јарадан вә Каинатын Али Һөкмдарыдыр. Буна ҝөрә дә Онун ады вә ишләри јүксәк тутулмаға лајигдир. Јеһованы јүксәлтмәк — Она дәрин һөрмәт бәсләмәк, Ону сөз вә әмәлләрлә мәдһ едиб јүксәлтмәк мә’насыны верир. Буну миннәтдарлыг һисси илә етмәк үчүн, индики вә ҝәләҹәкдә едәҹәји ишләринә ҝөрә Аллаһа һәмишә миннәтдар олмалыјыг. Вәһј 4:11 ајәсинә әсасән, биз, ҝөјдә нида едән садиг руһани варлыгларын малик олдуглары әһвал-руһијјәјә малик олмалыјыг: “Ја Рәббимиз вә Аллаһымыз, иззәти, һөрмәти вә гүдрәти алмаға лајигсән. Чүнки һәр шеји Сән јаратдын вә һәр шеј Сәнин ирадәнлә мөвҹуд олду вә јаранды”. Бәс Јеһованы биз неҹә јүксәлдә биләрик? Онун һаггында өјрәниб, бизә гаршы ирәли сүрдүјү тәләбләри јеринә јетирмәклә. Мәзмурчунун Јарадана ифадә етдији һиссләрә биз дә малик олмалыјыг: “Ирадәни јеринә јетирмәји мәнә өјрәт; чүнки сән мәним Аллаһымсан” (Мәзмур 143:10).
2. Јеһова Ону јүксәлдәнләрә вә јүксәлтмәјәнләрә неҹә јанашыр?
2 Јеһова, Ону јүксәлдән инсанлары гијмәтләндирир. Буна ҝөрә дә Аллаһ, “Ону ахтаранлара мүкафат верир” (Ибраниләрә 11:6). О, буну неҹә едир? Иса, сәмави Атасына дуасында деди: “Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар” (Јәһја 17:3). Бәли, “шүкранла ону [Јеһованы] јүксәлдәнләр” “јери мирас алар вә онда әбәдијјән јашајарлар” (Мәзмур 37:29). Амма “писин јохдур ахыры” (Сүлејманын мәсәлләри 24:20, МКШ). Биз, Јеһованы хүсусилә сон ҝүнләрдә јүксәлтмәлијик, чүнки О, тезликлә ганунсузлары мәһв едәҹәк, салеһләри исә сахлајаҹагдыр. “Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр” (1 Јәһја 2:17; Сүлејманын мәсәлләри 2:21, 22).
3. Биз Малакинин китабына нә үчүн диггәтлә јанашмалыјыг?
3 Јеһованын ирадәсини Мүгәддәс Китабдан өјрәнмәк олар, чүнки “һәр Мүгәддәс Јазы Аллаһдан илһам” алыб (2 Тимотејә 3:16). Аллаһын Кәламында тәсвир олунан чохлу нүмунәләр, Јеһованын Ону јүксәлдәнләрә неҹә хејир-дуа вердијини вә буну етмәјәнләрин башына нәләр ҝәлдијини ҝөстәрир. Бу һадисәләрдән бири, Малаки пејғәмбәрин ҝүнләриндә Исраилдә баш верән һадисәни нәгл едир. Неһемја Исраилин падшаһы олан заман, тәхминән б. е. ә. 443-ҹү илдә Малаки өз адыны дашыјан китабы јазды. Бу әзәмәтли вә һәјаҹанландырыҹы китаба, “сон әсрләрә чатан бизләр үчүн дә мәсләһәт олараг” гејд едилән мә’лумат вә пејғәмбәрликләр дахилдир (1 Коринфлиләрә 10:11). Малакинин сөзләринә диггәт јетирмәјимиз, Јеһованын индики натәмиз системи мәһв едәҹәји “бөјүк вә горхунҹ ҝүнүнә” һазырлашмагда бизә көмәк едәҹәк (Малаки 4:5).
4. Малаки китабынын биринҹи фәсли диггәтимизи һансы алты фикрә јөнәлдир?
4 Малакинин 2 400 ил бундан әввәл јаздығы китабы, ХХI әсрдә јашајан бизләрә Јеһованын бөјүк вә горхунҹ ҝүнүнә һазырлашмагда неҹә көмәк едир? Бу китабын биринҹи фәслиндә азы алты фикир гејд етмәк олар. Биз һәмин фикирләрә риајәт етмәклә Аллаһы јүксәлдәр, Онун лүтфүнү газанар вә әбәди јашамаг имканы әлдә едә биләрик. Һәмин фикирләр бунлардыр: 1) Јеһова өз халгыны севир, 2) биз, мүгәддәс шејләри гијмәтләндирмәлијик, 3) Јеһова, малик олдуғумуз шејләрин ән јахшысыны Она верәҹәјимизи ҝөзләјир, 4) һәгиги ибадәтин архасында тамаһкарлыг дејил, тәмәннасыз мәһәббәт дурур, 5) Аллаһа мәгбул олан ибадәт — усандырыҹы вә әзијјәтли дејил, 6) һәр биримиз Аллаһа һесабат верәҹәјик. Ҝәлин, “Малаки” китабына әсасланан үч мәгаләдән биринҹини нәзәрдән кечирәк вә бу китабын биринҹи фәслиндә гејд олунан фикирләрин һәр биринә диггәт јетирәк.
Јеһова өз халгыны севир
5, 6. а) Јеһова Јагубу нәјә ҝөрә севирди? б) Јагубун малик олдуғу сәдагәти тәзаһүр етдирсәк, нәјә үмид бәсләјә биләрик?
5 Јеһованын мәһәббәти “Малаки” китабынын илк ајәләриндә ајдын ҝөстәрилир. Китаб белә сөзләрлә башлајыр: “Исраилә Рәбб сөзүнүн јүкү”. Даһа сонра Аллаһ дејир: “Сизи севдим”. Елә һәмин ајәдә Јеһова мисал чәкәрәк, бәјан едир: “Мән Јагубу севдим”. Јагуб Јеһоваја инанырды. Јеһова вахтилә Јагубун адыны Исраил адына дәјишмиш вә о, Исраил халгынын улу бабасы олмушду. Јагуб иманлы инсан олдуғу үчүн Јеһова ону севирди. Јеһова, Она гаршы Јагуб кими мүнасибәт бәсләјән инсанлары да севирди (Малаки 1:1, 2).
6 Әҝәр Јеһованы севир вә сәдагәтлә Онун халгы илә һәмрә’јликдә галырыгса, 1 Самуел 12:22 ајәсиндә јазылан сөзләрдән тәсәлли ала биләрик: “Рәбб халгыны өз бөјүк исми наминә бурахмајаҹагдыр”. Јеһова өз халгыны севир вә ону мүкафатландырыр, нәһајәтдә исә она әбәди һәјат бәхш едәҹәкдир. Мәзмур 37:3, 4 ајәләриндә охујуруг: “Рәббә ҝүвән вә јахшылыг ет; мәмләкәтдә отур вә онун сәдагәти илә бәслән. Рәбдән дә ләззәт ал; О да сәнә үрәјинин диләкләрини верәҹәкдир”. “Малаки” китабынын биринҹи фәсли диггәтимизи, Јеһоваја олан мәһәббәтлә бағлы икинҹи фикрә јөнәлдир.
Мүгәддәс шејләри гијмәтләндирмәк
7. Јеһова Есава нә үчүн нифрәт едирди?
7 Малаки 1:2, 3 ајәләринә әсасән, Јеһова “Јагубу севдим” дејә е’лан етдикдән сонра дејир: “Есава нифрәт етдим”. Онларын арасында нәјә ҝөрә белә бөјүк фәрг варды? Јагуб Јеһованы јүксәлдирди, онун әкиз гардашы Есав исә буну етмирди. Есавы, һәмчинин Едом да адландырырдылар. Малаки 1:4 ајәсиндә Едом хараба дијар адланыр, онун сакинләри исә мүһакимәјә мә’руз галырлар. Есав гијмәтли олан “илк оғуллуг һаггыны” Јагуба бир габ гырмызы шорбаја сатдығына ҝөрә, она Едом ады (мә’насы “гырмызы” демәкдир) верилмишди. Јарадылыш 25:34 (МКШ) ајәсиндә дејилир: “Есав илк оғуллуг һаггына е’тинасызлыг етди”. Һәвари Павел һәмиманлыларыны тәшвиг едирди ки, “һеч кимсә әхлагсыз вә јахуд Есав кими Аллаһдан узаг дүшән адам олмасын. Чүнки Есав илк доғулмуш олмағын һаггыны бир габ хөрәјә сатды” (Ибраниләрә 12:14-16).
8. Павел Есавы нә үчүн әхлагсызла мүгајисә едир?
8 Павел Есавын һәрәкәтини нә үчүн әхлагсызлыгла мүгајисә едир? Чүнки Есавын дүшүнҹә тәрзинә малик олан инсан, мүгәддәс шејләри гијмәтләндирмәјә сон гоја биләр. Бу исә өз нөвбәсиндә, әхлагсызлыг кими ҹидди ҝүнаһа ҝәтириб чыхара биләр. Буну нәзәрә алараг һәр кәс өзүндән сорушмалыдыр: һәрдән мәндә мәсиһчи мирасымы — әбәди һәјаты — бир габ мәрҹимәк шорбасына бәнзәр өтәри шејләрә дәјишмәк кими фикирләр јаранырмы? Өзүм дә дәрк етмәдән, мүгәддәс шејләрә е’тинасыз јанашыраммы? Есав физики арзуларыны тә’мин етмәјә тәләсирди. О, Јагуба деди: “[“Тез ол, хаһиш едирәм”, ЈД], бу гырмызы шорбадан бир аз вер, јејим” (Јарадылыш 25:30, МКШ). Әфсуслар олсун ки, Аллаһын бә’зи хидмәтчиләри дә, санки белә дејирләр: “Тез ол! Гануни никаһы ҝөзләмәк нәјә лазымдыр?” Нәјин баһасына олурса-олсун ҹинси арзуларыны тә’мин етмәјә ҹан атмаг, онлар үчүн бир габ мәрҹимәк шорбасына чеврилмишдир.
9. Јеһованын гаршысында еһтирамлы горхуну неҹә горуја биләрик?
9 Ҝәлин, һеч заман әхлаги тәмизлијә, салеһлијә вә руһани мирасымыза һөрмәтсиз јанашыб, мүгәддәс шејләрә е’тинасызлыг ҝөстәрмәјәк. Ҝәлин, Есав кими олмаг әвәзинә, сәдагәтли Јагуб кими Аллаһ гаршысында еһтирамлы горхуну горујаг вә мүгәддәс шејләрә ҝөрә дәриндән миннәтдар олаг. Буну неҹә едә биләрик? Јеһованын тәләбләрини дәгиглији илә јеринә јетирмәклә. Бурада биз мәнтиги олараг Малакинин биринҹи фәслиндәки үчүнҹү фикрә кечирик. Бу һансы фикирдир?
Малик олдуғумуз шејләрин ән јахшысыны Јеһоваја вермәк
10. Каһинләр һансы мә’нада Јеһованын сүфрәсинә е’тинасыз јанашырлар?
10 Малакинин ҝүнләриндә Јерусәлим мә’бәдиндә хидмәт едән каһинләр Јеһоваја јахшы гурбанлар ҝәтирмирдиләр. Малаки 1:6-8 ајәләриндә дејилир: “Оғул атаја вә гул ағасына һөрмәт едәр; исмими хор ҝөрән каһинләр, әҝәр мән атајамса, һаны мәним иззәтим? әҝәр мән ағајамса, һаны мәндән горху? ордуларын Рәбби сизә дејир”. “Исмини неҹә хор ҝөрдүк?” дејә каһинләр сорушурлар. Јеһова онлара ҹаваб верир: “Гурбанҝаһым үзәриндә мурдар чөрәк тәгдим едирсиниз”. Каһинләр јенидән сорушурлар: “Сәни нә илә мурдар етдик?” Јеһова исә онлара ҹаваб верир: “Рәббин сүфрәси хор ҝөрүләҹәк бир шејдир, демәјинизлә”. Бу каһинләр һәр дәфә гурбанҝаһа гүсурлу һејванлар ҝәтирмәкдә пис бир шеј ҝөрмәмәклә Јеһованын сүфрәсинә е’тинасыз јанашырдылар.
11. а) Јеһова мәгбул олмајан гурбанлар һаггында нә деди? б) Үмумијјәтлә Исраил халгы нәјә ҝөрә тагсыркар иди?
11 Јеһова даһа сонра мәгбул олмајан гурбанлар һаггында онлары дүшүнмәјә тәшвиг едәрәк дејир: “Һајды, өз валинә ону тәгдим ет; сәндән разы олармы? Јахуд сәнә е’тибар едәрми?” Хејр, бу ҹүр гурбанлар онларын валиләринин хошуна ҝәлмәзди! Гүсурлу гурбанлар Каинатын Али Һөкмдарына исә һеч мәгбул дејил! Гыса десәк, төһмәтә лајиг олан јалныз каһинләр дејилдиләр. Бәли, онлар гүсурлу һејванлары гурбан ҝәтирмәклә Јеһоваја һөрмәтсизлик едирдиләр. Бәс үмумијјәтлә Исраил халгынын тагсыркар олмадығыны демәк олармы? Әсла, јох! Ахы кор, топал вә хәстә һејванлары гурбан үчүн халгын өзү сечиб каһинләрин јанына ҝәтирирди. Исраиллиләр неҹә дә ағыр ҝүнаһа батырдылар!
12. Малик олдуғумуз шејләрин ән јахшысыны Јеһоваја вермәјә көмәк едән нәдир?
12 Малик олдуғумуз шејләрин ән јахшысыны Јеһоваја вермәклә, Ону һәгигәтән дә севдијимизи ҝөстәрмиш олуруг (Матта 22:37, 38). Малакинин ҝүнләриндә јашајан ганунсуз каһинләрдән фәргли олараг, Јеһованын тәшкилаты, Аллаһын тәләбләринә риајәт етмәјимиз вә бунунла да Ону јүксәлтмәјимиз үчүн Мүгәддәс Китаба әсасланан чохлу мәсләһәтләр верир. Бура, Малакинин биринҹи фәслиндәки дөрдүнҹү ваҹиб фикир аиддир.
Һәгиги ибадәтин архасында тамаһкарлыг дејил, мәһәббәт дурур
13. Каһинләрин өз хидмәтләрини тамаһкарлыгла иҹра етмәләри онларын һансы әмәлләриндән ҝөрүнүрдү?
13 Малакинин ҝүнләриндәки каһинләр мәнфәәт ҝүдән, рәһмсиз вә тамаһкар идиләр. Бу һарадан мә’лумдур? Малаки 1:10 ајәсиндә дејилир: “Каш ки, аранызда бири олајды вә гапылары бағлајајды, гурбанҝаһым үзәриндә бош јерә алов алышдырмајајдыныз! Мән сиздән мәмнун дејиләм, ордуларын Рәбби дејир вә әлиниздән тәгдимә алмаға разы олмарам”. Һәмин аҹҝөз каһинләр мә’бәддә иҹра етдикләри ән садә хидмәт үчүн пул тәләб едирдиләр! Онлар, һәтта гапылары өртмәк вә гурбанҝаһы алышдырмаг үчүн дә пул алырдылар. Онларын ҝәтирдикләри гурбанын Јеһоваја нәјә ҝөрә мәгбул олмадығы ајдындыр!
14. Нәјә ҝөрә демәк олар ки, Јеһованын Шаһидләринин хидмәти мәһәббәтдән ирәли ҝәлир?
14 Гәдим Јерусәлимин ҝүнаһ ичиндә олан каһинләринин тамаһкарлығы вә худбинлији, Мүгәддәс Китаба әсасән тамаһкарларын Аллаһын Падшаһлығыны мирас алмајаҹагларыны хатырладыр (1 Коринфлиләрә 6:9, 10). Каһинләрин өзләрини мәмнун етмәјә чалышмаларынын үзәриндә дүшүнмәк, бизи, Јеһованын Шаһидләринин үмумдүнја тәблиғ фәалијјәтинә даһа бөјүк һөрмәтлә јанашмаға тәшвиг едир. Тәблиғ көнүллү кечирилир вә биз, хидмәтимизә ҝөрә пул алмырыг. Хејр, биз, “Аллаһ кәламынын хырдаватчылары дејилик” (2 Коринфлиләрә 2:17). Павел кими, һәр биримизин: “Аллаһын хош хәбәрини сизә мүфтә олараг мәмнунлугла тәблиғ етдим” демәјә һаггы вар (2 Коринфлиләрә 11:7, ЈД). Павелин хош хәбәри мәмнунлугла тәблиғ етмәсинә диггәт јетирин. Бу бизи, Малакинин биринҹи фәслиндәки бешинҹи фикрә ҝәтириб чыхарыр.
Аллаһа хидмәт етмәк усандырыҹы вә әзијјәтли дејил
15, 16. а) Каһинләр гурбанын ҝәтирилмәсинә неҹә јанашырдылар? б) Јеһованын Шаһидләри өз гурбанларыны неҹә тәгдим едирләр?
15 Гәдим Јерусәлимдә хаин каһинләр гурбан ҝәтирмәји усандырыҹы вә әзијјәтли иш һесаб едирдиләр. Бу онлар үчүн јүк иди. Малаки 1:13 ајәсиндә гејд олундуғу кими, Аллаһ онлара деди: “Бу нә јорғунлуг! дејирсиниз вә она төвшүјүрсүнүз”. Бу каһинләр, Аллаһ үчүн мүгәддәс олан шејләрә нифрәтлә јанашырдылар. Ҝәлин, онлара бәнзәмәмәк үчүн дуа едәк. Ҝәлин, һәмишә 1 Јәһја 5:3 ајәсинин руһуна әсасән давранаг: “Чүнки Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир”.
16 Ҝәлин, Аллаһа руһани гурбанлары севинҹлә ҝәтирәк вә буну һеч заман ағыр јүк санмајаг! Ҝәлин, пејғәмбәрлик сөзләринә диггәт јетирәк: “Она [Јеһоваја] дејин: Һәр ганунсузлуғу бағышла вә бизи инајәтинлә гәбул ет; буғалар јеринә додагларымызын тәгдимәләрини өдәјәҹәјик” (Һошеа 14:2). “Додагларымызын тәгдимәләри” ифадәси, Јеһоваја һәмд едәрәк вә Онун нијјәтләрини тәблиғ едәрәк ҝәтирдијимиз руһани гурбанлары, јә’ни сөзләри нәзәрдә тутур. Ибраниләрә 13:15 ајәсиндә дејилир: “Бу сәбәбдән, һәмишә Иса васитәсилә Аллаһа һәмд гурбаныны, јә’ни Онун адыны играр едән додагларын бәһрәсини тәгдим едәк”. Ҝәтирдијимиз руһани гурбанларын садәҹә рәсмијјәтчилик дејил, Аллаһа олан һәгиги мәһәббәтимизин ифадәси олмасына неҹә дә шадыг! Бурада биз Малакинин биринҹи фәслиндәки алтынҹы фикрә јетиширик.
Һәр биримиз һесабат верәҹәјик
17, 18. а) Јеһова “алдадыҹыны” нә үчүн лә’нәтләди? б) Дүзҝүн давранмајанлар нәји нәзәрә алмырдылар?
17 Малакинин ҝүнләриндә јашајан инсанлар әмәлләринә ҝөрә мәс’улијјәт дашыјырдылар, бу, бизә дә аиддир (Ромалылара 14:12; Галатијалылара 6:5). Бунунла әлагәдар Малаки 1:14 ајәсиндә дејилир: “Сүрүсүндә еркәк һејван варкән, вә’д вериб Рәббә гүсурлу оланы гурбан едән алдадыҹы лә’нәтли олсун”. Әҝәр бир адамын сүрүсү вардыса, демәли, бирдән артыг һејвана малик иди вә онун гаршысында сечмәк имканы варды. О, гурбан ҝәтирмәк үчүн кор, топал вә хәстә һејван сечмәк мәҹбуријјәтиндә дејилди. Лакин әҝәр һәмин инсан гүсурлу һејван сечирдисә, бу, онун Јеһова тәрәфиндән гурбан үчүн тә’сис едилән тәләбләрә е’тинасыз јанашдығыны ҝөстәрирди, ахы сүрүдә һәмишә сағлам һејван тапмаг оларды!
18 Бу сәбәбдән, сүрүсүндә мүвафиг еркәк һејван ола-ола каһинә кор, топал вә хәстә һејванлары гурбан ҝәтирдијинә ҝөрә, еһтимал ки, сүрүјүб ҝәтирдијинә ҝөрә, Јеһованын һәмин “алдадыҹыны” лә’нәтләмәјә там һаггы варды. Малакинин пејғәмбәрлијиндә, каһинләрдән бир нәфәрин Гануна истинад едәрәк ҝәтирилән һејванын мәгбул олмадығыны онлара изаһ етмәси барәдә бир кәлмә дә дејилмир (Левилиләр 22:17-20). Һәр бир ағыллы инсан баша дүшүр ки, бу ҹүр гурбаны валисинә ҝәтирәрсә, башы саламат галмаз. Онларын гаршысында исә, јер үзүндә јашајан һәр һансы вали дејил, Каинатын Али Һөкмдары Јеһова дурурду. Малаки 1:14 ајәсиндә Јеһованын сөзләри тәгдим едилир: “Мән бөјүк Падшаһам, ордуларын Рәбби дејир вә милләтләр арасында исмим горхунҹдур”.
19. Биз, сәбирсизликлә нәји ҝөзләјир вә нә етмәлијик?
19 Аллаһын һәдсиз сәдагәтли хидмәтчиләри олан бизләр, бүтүн бәшәријјәтин бөјүк Падшаһа — Јеһоваја дәрин еһтирам бәсләјәҹәји ҝүнү сәбирсизликлә ҝөзләјирик. О заман “сулар дәнизи неҹә долдурурса, дүнја да Рәбб билҝиси илә долу олаҹаг” (Ишаја 11:9). Һәләлик исә ҝәлин, Аллаһын тәләбләринә риајәт етмәк үчүн әлимиздән ҝәләни едәрәк: “Шүкранла ону јүксәлдәрәм” дејән мәзмурчуну тәглид едәк (Мәзмур 69:30). Малакинин пејғәмбәрлијиндә бизим хејримизә олан диҝәр мәсләһәтләр дә вар. Ҝәлин, “Малаки” китабынын галан фәсилләрини мүзакирә едән нөвбәти ики мәгаләјә диггәтлә јанашаг.
Хатырлајырсынызмы?
• Биз, Јеһованы нә үчүн јүксәлтмәлијик?
• Малакинин ҝүнләриндә каһинләрин ҝәтирдији гурбанлар Јеһоваја нә үчүн мәгбул дејилди?
• Биз, Јеһоваја һәмд гурбанларыны неҹә ҝәтиририк?
• Һәгиги ибадәт неҹә олмалыдыр?
[18-ҹи сәһифәдәки шәкил]
Малакинин пејғәмбәрлији бизим ҝүнләрә ишарә едирди.
[19-ҹу сәһифәдәки шәкил]
Каһинләр вә халг мәгбул олмајан гурбанлар ҝәтирирдиләр.
[20-ҹи сәһифәдәки шәкил]
Есав мүгәддәс шејләри гијмәтләндирмирди.
[21-ҹи сәһифәдәки шәкил]
Бүтүн дүнјада Јеһованын Шаһидләри көнүллү сурәтдә һәмд гурбанлары ҝәтирирләр.