Јеһова хаинлијә нифрәт едир
“Нә үчүн һәр кәс... гардашына хаинлик едир?” (МАЛАКИ 2:10).
1. Әбәди јашамаг үчүн Аллаһын һансы нормаларына риајәт етмәк лазымдыр?
ӘБӘДИ јашамаг истәјирсинизми? Әҝәр Мүгәддәс Китабын вә’дләринә иман едирсинизсә, чох ҝүман ки, мүсбәт ҹаваб верәҹәксиниз. Лакин Аллаһын өз јени дүнјасында сизә сонсуз һәјат бәхш етмәсини арзу едирсинизсә, Онун нормаларына риајәт етмәлисиниз (Ваиз 12:13; Јәһја 17:3). Бәс буну гејри-камил инсанлардан ҝөзләмәк мәнтигә ујғундурму? Әлбәттә, ахы Јеһова бизә тәсәлли верир: “Истәдијим гурбан дејил, јахшылыгдыр; вә јандырылан тәгдимәләрдән зијадә Аллаһ билҝисидир” (Һошеа 6:6). Демәли, һәтта сәһв ишләтмәјә мејлли инсанлар белә Аллаһын тәләбләринә риајәт едә биләрләр.
2. Исраиллиләрин бир чоху Јеһоваја гаршы неҹә хаинлик етдиләр?
2 Лакин Јеһованын ирадәсини јеринә јетирмәји һамы истәмир. Һошеанын сөзләриндән ҝөрүндүјү кими, һәтта исраиллиләрин дә бир чоху буну етмәк истәмирди. Вахтилә онлар бир халг кими Аллаһла әһд бағладылар вә бу әһд онларын үзәринә Аллаһын ганунларыны јеринә јетирмәк мәс’улијјәтини гојурду (Чыхыш 24:1-8). Лакин гыса вахтдан сонра онлар, ганунлары позараг, вердикләри “әһддән јан кечдиләр”. Буна ҝөрә дә Јеһова һәмин исраиллиләрин Она гаршы “хаинлик” етдикләрини сөјләди (Һошеа 6:7). Инсанларын чоху индијәдәк бу ҹүр давранмаға давам едирләр. Амма Јеһова истәр Өзүнә, истәрсә дә Ону севән вә Она хидмәт едәнләрә гаршы хаинлијә нифрәт едир.
3. Нөвбәти мәгаләдә нәји мүзакирә едәҹәјик?
3 Һошеа, хаинлијә гаршы Аллаһын нөгтеји-нәзәри барәдә данышан јеҝанә пејғәмбәр дејил. Әҝәр хошбәхт јашамаг истәјириксә, биз дә Аллаһын фикрини нәзәрә алмалыјыг. Әввәлки мәгаләдә Малакијанын пејғәмбәрлик китабынын биринҹи фәслини мүзакирә етдик. Инди исә ҝәлин икинҹи фәсли нәзәрдән кечирәк вә бурада Аллаһын хаинлијә гаршы олан нөгтеји-нәзәринә диггәт јетирәк. Бахмајараг ки, Малаки, исраиллиләрин Бабилдән гајытмасындан бир нечә ониллик сонра Аллаһын халгы арасында јаранан вәзијјәтдән данышыр, бу китабын икинҹи фәсли бизим үчүн дә там актуалдыр.
Каһинләр мәзәммәтә лајигдирләр
4. Јеһова каһинләри нә барәдә хәбәрдар едир?
4 Икинҹи фәсил, каһинләрин дүзҝүн јолдан чыхдыглары үчүн Јеһованын онлары мәзәммәт етмәсиндән башлајыр. Әҝәр онлар верилән нәсиһәтләрә үрәкдән јанашыб, јолларыны доғрултмазларса, нәтиҹәси чох ағыр олаҹагдыр. Илк ики ајәјә диггәт јетирин: “Еј каһинләр, бу әмр сизин үчүндүр. Әҝәр динләмәсәниз вә мәним исмимә иззәт вермәји үрәјинизә гојмасаныз, ордуларын Рәбби дејир, үзәринә лә’нәт ҝөндәрәрәм вә бәрәкәт дуаларыныза лә’нәт едәрәм”. Каһинләр Аллаһын ганунларыны халга өјрәдиб, өзләри дә онлара мүвафиг јашасајдылар, хејир-дуалара малик олардылар. Лакин Аллаһын ирадәсинә әһәмијјәт вермәдикләринә ҝөрә, онлары лә’нәт ҝөзләјирди. Һәтта онларын сөјләдикләри хејир-дуалар да лә’нәтә чевриләҹәкди.
5, 6. а) Каһинләр нәјә ҝөрә ҹидди мәзәммәтә лајиг идиләр? б) Јеһова каһинләрә гаршы нифрәтини неҹә билдирир?
5 Нәјә ҝөрә каһинләр бу ҹүр ҹидди мәзәммәтә лајиг идиләр? Бунун сәбәби 7-ҹи ајәдә ајдын ҝөстәрилир: “Билҝини каһинин додаглары горумалы вә инсанлар шәриәти онун ағзындан ахтармалы; чүнки ордулар Рәббинин хәбәр ҝәтирәнидир”. Аллаһын мин илдән чох әввәл Мусанын васитәсилә Исраилә вердији ганунларында каһинләрин вәзифәләринә “Рәббин... Исраил оғулларына сөјләмиш олдуғу бүтүн ганунлары” өјрәтмәк дахил иди (Левилиләр 10:11). Әфсуслар олсун ки, сонрадан 2 Тарихләр 15:3 ајәсиндә јазылдығы кими, Исраилин узун мүддәт һәгиги “Аллаһы... өјрәдиҹи каһини... вә шәриәти јох иди”.
6 Ерамыздан әввәл бешинҹи әсрдә, Малакинин ҝүнләриндә каһинлик вәзифәси дә ејни вәзијјәтдә иди. Каһинләр халгы Аллаһын Ганунуна өјрәтмирдиләр вә буна ҝөрә дә мәзәммәтә лајиг идиләр. Јеһованын онлары неҹә ҝүҹлү мүһакимә етдијинә диггәт јетирин. Малаки 2:3 ајәсиндә јазылыб: “Мән... үзләринизә пејин атаҹағам, бајрамлыг гурбанларынызын пејинини”. Неҹә дә алчалдыҹы ҹәзадыр! Гурбан үчүн тә’јин едилән һејванын пејини дүшәрҝәдән чыхарылмалы вә јандырылмалы иди (Левилиләр 16:27). Буна ҝөрә дә тамамилә ајдындыр ки, Јеһова каһинләрә “үзләринизә пејин атаҹағам” дедикдә, онлара гаршы нифрәт едир вә ҝәтирдикләри гурбанларла бәрабәр онларын өзләрини дә рәдд едир.
7. Јеһова Ганун мүәллимләринә нәјә ҝөрә гәзәбләнирди?
7 Јеһова, Малаки пејғәмбәрдән чох јүзилликләр өнҹә, сәјјар мә’бәдә сонрадан исә мә’бәдә гајғы ҝөстәриб, орада мүгәддәс хидмәти иҹра етмәји левилиләрә тапшырмышды. Онлар Исраил халгынын арасында мүәллим идиләр. Бу тапшырығын јеринә јетирилмәси һәм онлар, һәм дә халг үчүн һәјат вә сүлһ мә’насыны дашымалы иди (Сајлар 3:5-8). Лакин левилиләр әввәлләр малик олдуглары Аллаһа мәгбул горхуну итирдиләр. Буна ҝөрә дә Јеһова онлара деди: “Сиз јолдан сапдыныз; вә чох адамлары шәриәтдә бүдрәтдиниз; Левинин әһдини поздунуз. Сиз... мәним јолларымы тутмадыныз” (Малаки 2:8, 9). Јеһованын каһинләрә гәзәбләнмәјә там һаггы варды: онлар инсанлара һәгигәти өјрәтмир, пис нүмунә верир вә бунунла да бир чох исраиллиләри бүдрәдирдиләр.
Аллаһын нормаларына риајәт етмәк
8. Инсанлардан Аллаһын нормаларына риајәт етмәји ҝөзләмәк мәнтигә ујғундурму? Изаһ един.
8 О дөврүн каһинләринин гејри-камиллик үзүндән Аллаһын нормаларыны јеринә јетирә билмәдикләри үчүн шәфгәтә вә бағышланмаға лајиг олдугларыны дүшүнмәјә дәјмәз. Инсан Аллаһын нормаларына риајәт едә биләр, чүнки Јеһова биздән мүмкүн олмајан ишләри тәләб етмир. Еһтимал ки, һәмин дөврүн каһинләриндән бә’зиләри Аллаһын нормаларына риајәт едирдиләр. Вә биз там әминик ки, сонралар “Баш каһин” Иса да бу ҹүр давранырды (Ибраниләрә 3:1). Онун һаггында доғруданда да демәк олар: “Һәгигәт шәриәти онун ағзында иди вә онун додагларында һагсызлыг тапылмады; мәнимлә сүлһдә вә доғрулугда јүрүдү вә чох адамлары ганунсузлугдан дөндәрди” (Малаки 2:6).
9. Бизим ҝүнләрдә һәгигәти даима јајан кимләрдир?
9 Буна бәнзәр тәрздә, Исанын сәмави үмидә малик олан мәсһ едилмиш гардашлары артыг бир әсрдән чохдур ки, “Аллаһа мәгбул олан руһани гурбанлар тәгдим” едәрәк “мүгәддәс каһинләр тајфасы” кими хидмәт едирләр (1 Петер 2:5). Онлар Мүгәддәс Китаб биликләринин јајылмасы ишинә рәһбәрлик едирләр, бүтүн руһани һәгигәтләри исә биз онларын сајәсиндә өјрәнмишик. Мәҝәр бу бизи һәгигәт шәриәтинин онларын дилиндә олдуғуна әмин етмирми? Мәсһ едилмиш мәсиһчиләр руһани мә’нада јолуну азмыш бир чох инсанлара дүзҝүн јолу тапмаға көмәк етмишләр. Һазырда бүтүн дүнјада милјонларла инсанлар Мүгәддәс Китаб һәгигәтләрини өјрәнмиш вә әбәди һәјата үмид әлдә етмишләр. Өз нөвбәсиндә бу инсанлар башгаларына һәгигәт ганунларыны өјрәтмәјә шаддырлар (Јәһја 10:16; Вәһј 7:9).
Еһтијатлы олмаг ҝәрәкдир
10. Биз нәдә еһтијатлы олмалыјыг?
10 Амма бизә еһтијатлы олмаг ҝәрәкдир. Әкс тәгдирдә Малаки 2:1-9 ајәләриндәки ибрәт дәрсләрини нәзәрдән гачыра биләрик. Дилимиздә һагсызлығын тапылмамасынын ваҹиб олдуғуну хатырлајырыгмы? Мәсәлән, аиләмизин үзвләри бизим сөзләримизә там е’тибарла јанаша биләрләрми? Бәс јығынҹагдакы баҹы-гардашлар неҹә? Рәсми нөгтеји-нәзәрдән дүзҝүн данышмаг, әслиндә исә башгаларыны аздырмаг вәрдиши биздә асанлыгла көк сала биләр. Амма ким исә, ола билсин, бизнеслә мәшғул олараг һәр һансы бир тәфсилаты ҝизләтмәјә вә ја шиширтмәјә мејллидир. Мәҝәр Јеһова бунлары ҝөрмүрмү? Әҝәр бу ҹүр ишләрлә мәшғул олуругса, О, бизим мәдһ гурбанларымызы гәбул едәҹәкми?
11. Кимләр хүсусилә еһтијатлы олмалыдырлар?
11 Малаки 2:7 ајәсиндәки сөзләр, јығынҹагда Аллаһын Кәламыны өјрәдән гардашлар үчүн хәбәрдарлыг кими хидмәт етмәлидир. Ајәдә дејилир ки, онларын додаглары “билҝини... горумалы вә инсанлар шәриәти” онларын ағзында ахтармалыдырлар. Бу мүәллимләрин үзәринә ҹидди мәс’улијјәт гојулмушдур ки, бу да, Јагуб 3:1 ајәсинә әсасән “даһа тәләбкар бир мүһакимәни” өзүнә дахил едир. Бахмајараг ки, онлар үрәкдән вә руһ јүксәклији илә өјрәтмәлидирләр, онларын тә’лимләри тамамилә Аллаһын Кәламы олан Мүгәддәс Китаба вә Јеһованын тәшкилатынын тәгдим етдији материала әсасланмалыдыр. О заман онлар башгаларыны өјрәтмәјә габилијјәтли олаҹаглар. Онлара мәсләһәт верилир: “Чалыш ки, өзүнү Аллаһа сынагдан чыхмыш, утанмаға әсасы олмајан вә һәгигәт сөзүнү доғрулугла өјрәдән бир ишчи кими тәгдим едәсән” (2 Тимотејә 2:2, 15).
12. Јығынҹагда тә’лим верәнләр нәдән чәкинмәлидирләр?
12 Әҝәр еһтијатлы олмасаг, Аллаһын тә’лимләринә үстүн һесаб етдијимиз идеја вә мүлаһизәләримизи әлавә етмәк һәвәси ојана биләр. Бу ҹүр дүшүнҹә тәрзи, Јеһованын тәшкилатынын өјрәтдикләринә зидд олса белә, өзләринин дүзҝүн олдугларына һеч заман шүбһә етмәјән инсанларда даһа чох јараныр. Лакин биз, “Малаки” китабынын икинҹи фәслиндә гејд едилдији кими, јығынҹагдакы мүәллимләрдән мәсиһчиләр үчүн манеә ола биләҹәк шәхси нөгтеји-нәзәрләри дејил, мәһз Аллаһын Кәламына әсасланан биликләри тәгдим етмәләрини ҝөзләмәкдә там һаглыјыг. Иса демишдир: “Ким Мәнә иман едән бу кичикләрдән бирини пис јола чәкәрсә, бојнуна ири бир дәјирман дашы асыб дәнизин дибинә атылмаг онун үчүн даһа јахшы олар” (Матта 18:6).
Бир иманда олмајанларла никаһ
13, 14. Малаки исраиллиләрин һансы илк јанлыш һәрәкәтләрини ҝөстәрир?
13 Малаки 2-ҹи фәслин 10-ҹу ајәсиндән башлајараг, хаинлик мөвзусуна даһа чох диггәт јетирилир. Пејғәмбәр диггәти, дәфәләрлә “хаинлик” адландырдығы ики гаршылыглы давраныша јөнәлдир. Лакин әввәлҹә фикир верин ки, Малаки өз нәсиһәтләрини суалла башлајыр: “Һамымызын атасы бир дејилми? Бизи бир Аллаһ јаратмадымы? Нә үчүн һәр кәс аталарымызын әһдини позараг гардашына хаинлик едир?”. О, 11-ҹи ајәдә әлавә едир ки, исраиллиләр өз хаинликләри илә Јеһованын мүгәддәслијини мурдарлајырлар. Онларын һансы һәрәкәтләри бу ҹүр ҹидди мәзәммәтә лајиг иди? Бу ајәдә онларын етдикләри јанлыш һәрәкәтләрдән бири ҝөстәрилир — онлар “әҹнәби танрынын” гызлары илә евләнирдиләр.
14 Башга сөзләрлә десәк, бә’зи исраиллиләр — Јеһоваја һәср олунмуш халгын үзвләри — иманларына шәрик олмајан кәсләрлә евләнирдиләр. Контекст, бу һәрәкәтин нәјә ҝөрә бу дәрәҹәдә ҹидди олдуғуну ҝөстәрир. 10-ҹу ајәдә дејилир ки, исраиллиләрин тәк бир Атасы варды. Сөһбәт нә Јагубдан (сонрадан Исраил ады алмышды), нә Ибраһимдән, нә дә ки, Адәмдән ҝедир. Малаки 1:6 ајәсиндә дејилир ки, һаггында бәһс олунан бир Ата Јеһовадыр. Исраиллиләрин Аллаһла хүсуси гаршылыглы мүнасибәтләри варды, онлар аталарынын Аллаһла бағладыглары әһдә дахил идиләр. Һәмин әһдә дахил олан ганунлардан бири исә белә иди: “Онларла [бүтпәрәстләрлә] гоһумлуг етмәјәҹәксән; гызыны онун оғлуна вермәјәҹәксән вә онун гызыны оғлуна алмајаҹагсан” (Тәснијә 7:3).
15. а) Бә’зиләри ејни имана шәрик олмајан кәсләрлә никаһа ҝирмәјә неҹә һагг газандыра биләрләр? б) Јеһова никаһ һаггында нә дүшүнүр?
15 Ким исә бу ҝүн белә дүшүнә биләр: “Мәним хошума ҝәлән инсан башгалары кими дејил. Вахт кечдикҹә о (киши вә ја гадын), чох ҝүман ки, һәгиги Аллаһа ибадәт етмәјә башлајаҹаг”. Бу ҹүр дүшүнҹә тәрзи Мүгәддәс Китабда јазылан хәбәрдарлығын дүзҝүн олдуғуну тәсдигләјир: “Үрәк һәр шејдән зијадә алдадыҹыдыр вә чох чүрүкдүр” (Јеремја 17:9). Башга имана саһиб олан кәслә аилә гурмаға гаршы Аллаһын нөгтеји-нәзәри Малаки 2:12 ајәсиндә ифадә олунур: “Буну едән адамы... Рәбб кәсиб атаҹагдыр”. Буна ҝөрә дә, мәсиһчиләр јалныз Рәббә бағлы олан шәхслә аилә гурмаға тәшвиг олунурлар (1 Коринфлиләрә 7:39). Мәсиһчи јығынҹағында бир иманда олмајанларла никаһа ҝирәнләр “кәсилиб атылмырлар”. Амма әҝәр иманына шәрик олмајан һәјат јолдашы һәгигәти гәбул етмәзсә, Аллаһ тезликлә индики пис системә сон гојан заман онунла нә баш верәҹәк? (Мәзмур 37:37, 38).
Һәјат јолдашы илә ләјагәтсиз давраныш
16, 17. Бә’зиләри неҹә хаинлик едирдиләр?
16 Малаки хаин давранышын диҝәр нөвүнүн тәсвиринә кечир. Бу, һәјат јолдашы илә ләјагәтсиз давраныш, хүсусилә дә сәбәбсиз бошанмадыр. 2-ҹи фәслин 14-ҹү ајәсиндә дејилир: “Ҝәнҹлијинин арвады илә сәнин аранда Рәбб шаһид олду, о гадын ки, сәнин рәфигән вә өзү илә әһд етдијин гадын олдуғу һалда сән она хаинлик етдин”. Јәһуди әрләри арвадлары илә хаинҹәсинә даврандыглары үчүн, Јеһованын гурбанҝаһы ҝөз јашлары илә долмушду (Малаки 2:13). Бу јәһудиләр, ола билсин ки, даһа ҝәнҹ, һәтта бүтпәрәст гадынларла евләнмәк үчүн, ҝәнҹликдә евләндикләри гадынлары јолверилмәз сәбәбләр үзүндән әдаләтсиз олараг бошајырдылар. Әхлагсыз каһинләр исә буна јол верирдиләр. Малаки 2:16 ајәсиндә дејилир: “Исраилин Аллаһы Рәбб дејир: Мән бошанмаја... нифрәт едирәм”. Сонралар Иса изаһ етди ки, бошаныб, јенидән никаһа ҝирмәк үчүн јеҝанә сәбәб, һәјат јолдашынын ҹинси әхлагсызлығы ола биләр (Матта 19:9).
17 Малакинин сөзләринә диггәт јетирәк: мәҝәр онлар үрәјә тә’сир етмирми, мәҝәр ади мәрһәмәтә тәшвиг етмирми? Малаки “ҝәнҹлијин арвады вә әһд едилән гадын” һаггында бәһс едир. Хаинликдә ҝүнаһкар олан һәр киши өз һәмиманлысына — исраилли гызы илә евли иди. Ҝөрүндүјү кими, онун ҝәнҹлик илләриндә евләнмәсинә бахмајараг, өтән илләр вә гоҹалыг чағынын ҝәлмәси бағланылан әһди, јә’ни гануни никаһы һеч дә дәјишмир.
18. Малакинин хаинлик һаггында вердији мәсләһәт бу ҝүн неҹә тәтбиг едиләндир?
18 Һәмин мәсләһәтләрин бизим ҝүнләр үчүн дә гүввәдә олдуғу ајдындыр. Әфсуслар олсун ки, бә’зиләри Аллаһын “јалныз Рәбдә” аилә гурмаг мәсләһәтинә е’тинасыз јанашырлар! Һәмчинин, бә’зиләринин өз никаһларыны мөһкәмләтмәјә сон гојмалары да кәдәрли һалдыр. Онлар, әксинә олараг, Аллаһын нифрәт етдији һәрәкәтләрә һагг газандырмаға чалышыр вә јенидән евләнмәк мәгсәдилә, Мүгәддәс Китаба әсасланмајан сәбәбләр үзүндән бошанырлар. Бүтүн бу һәрәкәтләрлә онлар Аллаһы гәзәбләндирирләр. Малакинин ҝүнләриндә Аллаһын мәсләһәтләринә е’тинасыз јанашан кәсләр елә дүшүнүрдүләр ки, Јеһова әдаләтсиз мүһакимә едир. Онлар әслиндә дејирдиләр: “Әдаләт Аллаһы һарададыр?” Неҹә дә јанлыш дүшүнҹә тәрзидир! Ҝәлин бу ҹүр тәләјә һеч заман дүшмәјәк! (Малаки 2:17).
19. Әр вә арвадлар мүгәддәс руһу неҹә ала биләрләр?
19 Малаки, о дөврдә јашајан бә’зи кишиләрин өз арвадларына хаинлик етмәдикләрини ҝөстәрәрәк, мүасирләринин мүсбәт ҹәһәтләрини дә гејд едир. Онларда һәлә “руһун галығы” варды (Малаки 2:15). Хошбәхтликдән, бу ҝүн Аллаһын тәшкилатында арвадларына “һөрмәт ҝөстәрән” бу ҹүр чохлу әрләр вар (1 Петер 3:7). Онлар арвадлары илә пис давранмыр, онлары тәһгир етмир, ҹинси позғунлуға мәҹбур етмир, башга гадынларла ешгбазлыгла мәшғул олараг, јахуд порнографијаја тамаша едәрәк онлары алчалтмырлар. Һәмчинин, Јеһованын тәшкилаты Аллаһа вә Онун ганунларына садиг олан чохсајлы сәдагәтли мәсиһчи гадынлары илә дә хејир-дуалыдыр. Бу ҹүр киши вә гадынлар Аллаһын нәјә нифрәт етдијини билир вә буна мүвафиг тәрздә дүшүнүр вә давранырлар. Аллаһа итаәт етмәкдә онларын нүмунәсини тәглид един вә мүгәддәс руһу бол-бол алын (Һәвариләрин ишләри 5:29).
20. Бәшәријјәти нә ҝөзләјир?
20 Тезликлә Јеһова бүтүн дүнјаны мүһакимә едәҹәкдир. Һәр бир инсан өз һәрәкәти вә иманы үчүн Аллаһын гаршысында ҹаваб вермәли олаҹаг. “Һәр биримиз өзү үчүн Аллаһа һесабат верәҹәкдир” (Ромалылара 14:12). Буна ҝөрә дә белә бир һәјаҹанландырыҹы суал галхыр: Јеһованын ҝүнүндә кимләр сағ галаҹаглар? Бу суал сон үчүнҹү мәгаләдә мүзакирә олунаҹаг.
Изаһ едә биләрсинизми?
• Һансы әсас сәбәбә ҝөрә Јеһова Исраилин каһинләрини мәзәммәт етди?
• Аллаһын ганунларынын риајәт етмәк үчүн һәддиндән артыг јүксәк олдуғуну иддиа етмәк нәјә ҝөрә дүзҝүн дејил?
• Инсанлары өјрәдән заман биз нә үчүн еһтијатлы олмалыјыг?
• Јеһова хүсусилә һансы ики давранышы мүһакимә едир?
[25-ҹи сәһифәдәки шәкил]
Каһинләр, Малакинин ҝүнләриндә Јеһованын ганунларындан чыхдыгларына ҝөрә мәзәммәт олунмаға лајиг идиләр.
[26-ҹы сәһифәдәки шәкилләр]
Бүтпәрәст гадынларла евләнмәк үчүн арвадларыны бош шејләрин үстүндә бошајан исраиллиләри Јеһова мүһакимә етди.
[26-ҹы сәһифәдәки шәкил]
Мүасир мәсиһчиләр никаһа һөрмәт едирләр.