“Имтаһана уғрамајасыныз”

“Ојаг дуруб дуа един ки, имтаһана уғрамајасыныз” (МАТТА 26:41).

О ҺЕЧ заман бу ҹүр ҝәрҝинлик кечирмәмишди. Аллаһын Оғлу Иса Мәсиһин јер үзүндәки һәјаты сона чатырды. Иса билирди ки, тез бир заманда ону һәбсә атаҹаг, өлүмә мәһкум едиб ишҝәнҹә дирәји үзәриндә е’дам едәҹәкләр. О билирди ки, онун һәр бир гәрары вә ја һәрәкәти Атасынын адына тә’сир ҝөстәрир. Иса һәмчинин баша дүшүрдү ки, бәшәријјәтин ҝәләҹәји ондан асылыдыр. Бунунла әлагәдар ҝүҹлү ҝәрҝинлик кечирдији бир һалда, о нә етди?

² Иса өз шаҝирдләри илә бирликдә Ҝетсамани бағына јола дүшдү. Ора Исанын хошладығы јер иди. Баға чатдыгда о, шаҝирдләриндән бир гәдәр узаглашды. Тәк галдыгда, ҹошғун дуада үрәјини сәмави Атасына ачараг Ондан үч дәфә ҝүҹ истәди. Иса камил инсан олса да, имтаһан вә сынаглара тәкбашына таб ҝәтирә биләҹәјини дүшүнмүрдү (Матта 26:36-44).

³ Бу ҝүн биз дә тәзјигләрә мә’руз галырыг. Бу брошүранын әввәлиндә индики пис системин ахыр ҝүнләриндә јашадығымыза даир сүбутлар нәзәрдән кечирилирди. Шејтанын тә’сири алтында олан бу дүнјада сынаглар вә ҝәрҝинлик ҝет-ҝедә чохалыр. Аллаһа хидмәт етдијини сөјләјән һәр биримизин гәрарлары вә һәрәкәтләри, Онун адында әкс олунур вә Аллаһын јени дүнјасында јашамаг үмидимизә әһәмијјәтли дәрәҹәдә тә’сир ҝөстәрир. Биз Јеһованы севирик вә истәр һәјатымызын, истәрсә дә бу системин ‘ахырына гәдәр сәбр етмәк’ истәјирик (Матта 24:13). Бәс биз тә’хирәсалынмазлыг һиссини горумаға вә һәр вахт ојаг дурмаға неҹә наил ола биләрик?

⁴ Иса һәм I әсрдә, һәм дә бизим зәманәдә онун давамчыларына тәзјиг ҝөстәриләҹәјини анлајараг, дә’вәт едирди: “Ојаг дуруб дуа един ки, имтаһана уғрамајасыныз” (Матта 26:41). Һәмин сөзләр бу ҝүн бизим үчүн һансы мә’наны дашыјыр? Биз һансы имтаһан вә ја сынагларла гаршылашырыг? Һәр вахт ‘ојаг дурмагда’ бизә нә көмәк едәр?

Һансы сынаг нәзәрдә тутулур?

⁵ Һәр биримиз ҝүндәлик олараг ‘иблисин торуна’ дүшмәк тәһлүкәси јарадан сынагларла гаршылашырыг (2 Тимотејә 2:26). Мүгәддәс Китаб бизә хәбәрдарлыг едир ки, Шејтанын әсас һәдәфи Јеһованын хидмәтчиләридир (1 Петер 5:8; Вәһј 12:12, 17). Онун мәгсәди нәдир? Бу о демәк дејил ки, Шејтан бизи һөкмән һәјатдан мәһрум едәҹәк. Әҝәр биз Аллаһа садиглијимизи горујараг өлүрүксә, Шејтан зәфәр чала билмир. О билир ки, Јеһова тә’јин етдији вахтда өлүләри дирилдәҹәкдир (Лука 20:37, 38).

⁶ Шејтан истәјир ки, һәјатымызда даһа гијмәтли олан шеји — Аллаһын гаршысында нөгсансызлығымызы мәһв етсин. Шејтан вар гүввәсилә сүбут етмәјә чалышыр ки, бизи Јеһовадан узаглашдыра биләр. Буна ҝөрә дә әҝәр Шејтан бизи хош хәбәри бәјан етмәк ишинә сон гојмаға вә ја мәсиһчи принсипләринә әкс давранмаға тәһрик едәрәк, Аллаһа сәдагәтсиз олмағымыза мүвәффәг оларса, бу, онун үчүн гәләбә олар! (Ефеслиләрә 6:11-13) Елә буна ҝөрә дә Шејтан бизи һәр ҹүр сынаға чәкмәјә ҹан атыр (Матта 4:3).

⁷ Шејтан мүхтәлиф ‘һијләләрдән’ истифадә едир (Ефеслиләрә 6:11). О, бизи мадди шејләрә һәвәс, горху һисси вә ја зөвг далынҹа дүшмәк мејли васитәсилә сынаға чәкә биләр. Лакин онун ән еффектли үсулларындан бири мә’јуслугдур. Шејтан, бу һиссин бизи ҝүҹдән сала биләҹәјини вә онун һүҹумларына гаршы зәифләдәҹәјини биләрәк, бу үсулдан һијләҝәрҹәсинә истифадә едир (Сүлејманын мәсәлләри 24:10). Буна ҝөрә биз хүсусилә дә емосионал ҹәһәтдән ‘әзилмиш’ оланда, о бизи тәслим олмаға мәҹбур едир (Мәзмур 38:8).

⁸ Ахыр ҝүнләр сона чатдығы тәгдирдә, мә’јуслуға гапылмаг үчүн сәбәбләр, санки, даһа да чохалыр вә биз онларын тә’сириндән мүһафизә олунмуруг. (“Руһ дүшкүнлүјүнә сәбәб олан бә’зи амилләр” адлы чәрчивәјә бах.) Мә’јуслуғун сәбәби һәр нә олурса-олсун, бизи тагәтдән сала биләр. Әҝәр сән, мисал үчүн, физики, емосионал вә әгли ҹәһәтдән зәифләмисәнсә, Мүгәддәс Китабы өјрәнмәк, мәсиһчи ҝөрүшләринә ҝетмәк вә тәблиғ етмәк кими руһани фәалијјәтдә иштирак етмәк үчүн ‘һәр фүрсәтдән истифадә етмәк’, јә’ни мүвафиг вахты сатын алмаг бир о гәдәр дә асан дејил (Ефеслиләрә 5:15, 16). Јадында сахла ки, Шејтан сәни мәғлуб етмәк истәјир. Инди сүр’әти азалтмағын вә һансы хүсуси дөврдә јашадығымызы унутмағын вахты дејил! (Лука 21:34-36) Сән сынаглара мүгавимәт ҝөстәрмәјә вә ојаг дурмаға неҹә давам едә биләрсән? Бу ишдә сәнә көмәк едә биләҹәк дөрд амили нәзәрдән кечирәк.

“Дуа един”

⁹ Дуа васитәсилә Јеһоваја ҝүвән. Исанын Ҝетсамани бағында вердији нүмунәни хатырла. Ҝүҹлү емосионал ҝәрҝинлик кечирән заман о нә етди? О, Јеһовадан көмәк диләјәрәк, о дәрәҹәдә үрәкдән дуа етди ки, “Онун тәри јерә даман ган дамлаларына бәнзәјирди” (Лука 22:44). Бу һагда дүшүн. Иса Шејтаны чох јахшы таныјырды. Аллаһын хидмәтчиләрини тәләјә салмаг мәгсәдилә Шејтанын истифадә етдији сынагларын һамысыны Иса ҝөјдән ҝөрүрдү. Лакин Иса һесаб етмирди ки, Шејтанын онун үчүн һазырладығы сынаға асанлыгла таб ҝәтирә биләҹәк. Әҝәр Аллаһын камил Оғлу сәмави Атасындан көмәк вә ҝүҹ алмаг үчүн дуа етмәјә еһтијаҹ дујурдуса, онда ҝөр бизим буна еһтијаҹымыз нә дәрәҹәдә бөјүкдүр! (1 Петер 2:21).

¹⁰ Һәмчинин јадына сал ки, шаҝирдләрини дуа етмәјә тәшвиг етдикдән сонра, Иса демишди: “Руһ гејрәтли, бәдән исә зәифдир” (Матта 26:41). Иса һансы бәдәни нәзәрдә тутурду? Әлбәттә ки, өз бәдәнини јох; онун камил инсан бәдәниндә һеч бир зәифлик јох иди (1 Петер 2:22). Амма шаҝирдләри илә һәр шеј тамамилә башга ҹүр иди. Онлар гејри-камиллији вә ҝүнаһлы мејлләри мирас алдыгларындан, сынаглара таб ҝәтирмәк үчүн көмәјә хүсусилә еһтијаҹ дујурдулар (Ромалылара 7:21-24). Мәһз буна ҝөрә Иса өз шаҝирдләрини вә онларла јанашы бүтүн мәсиһчиләри тәшвиг едирди ки, сынагла гаршылашдыглары заман дуа едиб көмәк диләсинләр (Матта 6:13). Јеһова бу ҹүр дуалара ҹаваб верир (Мәзмур 65:2). Неҹә? Ән азы ики үсулла.

¹¹ Биринҹиси, Аллаһ бизә сынаглары мүәјјән етмәјә көмәк едир. Шејтанын сынаглары гаранлыг ҹығырларда гурулмуш тәләләрә бәнзәјир. Әҝәр сән бу тәләләри ҝөрмәсән, онлара дүшә биләрсән. Јеһова Мүгәддәс Китабын вә онун әсасында һазырланмыш нәшрләрин васитәсилә Шејтанын тәләләрини үзә чыхарыр вә беләликлә сынаглара дүшмәмәјимизә көмәк едир. Узун илләрдир ки, биз нәшрләр вә конгресләр васитәсилә инсан гаршысында горху, ҹинси әхлагсызлыг, сәрвәт топламаг мејли кими тәһлүкәләр вә Шејтанын башга ширникдириҹи тә’сирләри һагда дәфәләрлә хәбәрдар олунуруг (Сүлејманын мәсәлләри 29:25; 1 Коринфлиләрә 10:8-11; 1 Тимотејә 6:9, 10). Јеһова бизи Шејтанын нијјәтләри һагда хәбәрдар етдији үчүн, Она миннәтдар дејиликми? (2 Коринфлиләрә 2:11). Бу ҹүр хәбәрдарлыгларын һамысы сынагларын өһдәсиндән ҝәлмәк үчүн етдијимиз дуаларын ҹавабыдыр.

¹² Икинҹиси, Јеһованын дуаларымыза ҹаваб вермәк үсулларындан бири — сынаглара таб ҝәтирмәјимиз үчүн бизә ҝүҹ вермәсидир. Онун Кәламында дејилир: “Аллаһ... ҝүҹүнүздән артыг имтаһан олунманыза разылыг вермәз, лакин имтаһан илә јанашы, гуртулушу да тә’мин едәҹәкдир” (1 Коринфлиләрә 10:13). Әҝәр биз даима Аллаһа ҝүвәнириксә, О һеч вахт јол вермәз ки, имтаһан о дәрәҹәдә ҝүҹлү олсун ки, мүгавимәт ҝөстәрмәк үчүн руһани ҝүҹүмүз чатмасын. Аллаһ бизи ‘гуртулушла’ неҹә тә’мин едир? О, ‘Ондан диләјәнләрә Мүгәддәс Руһ верир’ (Лука 11:13). Мисал үчүн, мүгәддәс руһ бизә, дүз давранмаг гәтијјәтимизи ҝүҹләндирә билән вә мүдрик гәрарлар гәбул етмәјимизә јардымчы олан Мүгәддәс Китаб принсипләрини хатырламаға көмәк едә биләр (Јәһја 14:26; Јагуб 1:5, 6). Һәмчинин о бизә пис мејлләрин өһдәсиндән ҝәлмәк үчүн лазыми кејфијјәтләр тәзаһүр етдирмәјә дә көмәк едә биләр (Галатијалылара 5:22, 23). Аллаһын мүгәддәс руһу һәтта һәмиманлыларымызы бизә ‘тәсәлли вермәјә’ дә тәшвиг едә биләр (Колослулара 4:11). Јеһоваја сәнин көмәк һагда дуаларына бу ҹүр мәһәббәтлә ҹаваб вердијинә ҝөрә миннәтдар дејилсәнми?

Үмидләриндә реалист ол

¹³ Ојаг дурмаға давам етмәк үчүн, үмидләримиздә реалист олмаг ҝәрәкдир. Һәјат ҝәрҝин олдуғу үчүн бә’зән һамымыз ҝүҹдән дүшүрүк. Лакин јадда сахламалыјыг ки, Аллаһ һеч вахт бу көһнә системдә проблемләрдән азад һәјата малик олаҹағымызы вә’д етмәјиб. Һәтта Мүгәддәс Китабда тәсвир олунан дөврләрдә белә Аллаһын хидмәтчиләри тә’гибләрә, јохсуллуға, руһ дүшкүнлүјүнә, хәстәликләрә вә бу кими изтираблара мә’руз галырдылар (Һәвариләрин ишләри 8:1; 2 Коринфлиләрә 8:1, 2; 1 Салониклиләрә 5:14; 1 Тимотејә 5:23).

¹⁴ Бу ҝүн биз дә проблемләрлә гаршылашырыг. Ола билсин, биз тә’гибләрә мә’руз галыр, мадди ҹәһәтдән чәтинликләр чәкир, депрессија вә ја һәр һансы башга бир хәстәликлә мүбаризә апарыр, јахуд да даһа нәдәнсә әзијјәт чәкирик. Әҝәр Јеһова бизи мө’ҹүзәләр васитәсилә бүтүн бәдбәхтликләрдән азад етсәјди, мәҝәр бу, Шејтанын Јеһованы писләмәсинә сәбәб олмаздымы? (Сүлејманын мәсәлләри 27:11). Бәли, Јеһова Өз хидмәтчиләринин мүхтәлиф сынаглара вә имтаһанлара, бә’зи һалларда исә тә’гибчиләрин әлиндән өлүмә мә’руз галмаларына јол верир (Јәһја 16:2).

¹⁵ Белә исә Јеһова бизи нәјә әмин едир? Әввәлдә гејд етдијимиз кими, нә гәдәр ки, биз Она там ҝүвәнирик, һәр бир сынаға таб ҝәтирмәјимиз үчүн О бизи кифајәт гәдәр гүввә илә тә’мин едәҹәк (Сүлејманын мәсәлләри 3:5, 6). Јеһова бизи Өз Кәламы, руһу вә тәшкилаты васитәсилә руһани ҹәһәтдән мүһафизә едәрәк, Онунла олан гаршылыглы мүнасибәтләримизи поза биләҹәк һәр бир шејдән горумаға көмәк едир. Әҝәр бизим Онунла бу ҹүр гаршылыглы мүнасибәтләримиз варса, һәтта өлсәк белә галиб ҝәләҹәјик. Һеч бир шеј, һәтта өлүм белә Аллаһын Өз садиг хидмәтчиләрини мүкафатландырмасына мане ола билмәз (Ибраниләрә 11:6). Артыг бу гәдәр јахын олан јени дүнјада исә, Јеһова Өз вә’дләринин һамысыны һөкмән јеринә јетирәҹәк вә һејрәт доғуран хејир-дуаларыны Ону севәнләрин үзәринә төкәҹәк (Мәзмур 145:16).

Мүбаһисәли суаллары унутма

¹⁶ Ахыра кими таб ҝәтирмәк үчүн Аллаһын һансы ваҹиб мүбаһисәли суаллара ҝөрә пислијә јол вердијини унутмалы дејилик. Әҝәр бә’зән проблемләримиз ашылмаз кими ҝөрүнүрсә вә артыг тәслим олмаг үзрәјиксә, јахшы олар ки, өзүмүзә хатырладаг ки, Шејтан Аллаһын һөкмранлығынын әдаләтли олдуғуну шүбһә алтына гојур. Бу Јаланчы һәмчинин Аллаһын хидмәтчиләринин сәдагәтли вә нөгсансыз олдугларыны да шүбһә алтына гојур (Ејуб 1:8-11; 2:3, 4). Бу мүбаһисәли суаллар вә Јеһованын онлары һәлл етмәк үчүн сечдији үсул һәр ­биримизин һәјатындан даһа ваҹибдир. Һансы мә’нада?

¹⁷ Аллаһын чәтинликләрә мүвәггәти јол вермәси сајәсиндә инсанларын һәгигәти өјрәнмәк имканы јараныр. Ҝәл бир мәсәлә үзәриндә дүшүнәк: Иса бизим әбәди һәјата малик олмағымыз үчүн әзијјәт чәкмишдир (Јәһја 3:16). Биз буна ҝөрә миннәтдар дејиликми? Даһа чох инсанларын хилас ола билмәси үчүн, биз чәтинликләрә бир мүддәт дә таб ҝәтирмәјә һазыр дејиликми? Ахыра гәдәр дөзмәк үчүн баша дүшмәлијик ки, Јеһованын мүдриклији бизимкиндән гат-гат үстүндүр (Ишаја 55:9). О, бизим дә әбәди фираванлығымыз үчүн гајғы ҝөстәрмәклә, мүбаһисәли суалларын һәлли үчүн мүнасиб бир вахтда пислијә сон гојаҹаг. Мәҝәр Јеһова башга ҹүр давранармы? Аллаһда һагсызлыг јохдур! (Ромалылара 9:14-24).

“Аллаһа јахынлашын”

¹⁸ Тә’хирәсалынмазлыг һиссини горумаг үчүн, биз Јеһова илә сых мүнасибәтдә галмалыјыг. Һеч вахт унутмајаг ки, Аллаһла олан мүнасибәтләримизи позмаг үчүн Шејтан һәр шејә һазырдыр. Шејтан бизи инандырмаг истәјәрди ки, сон һеч заман ҝәлмәјәҹәк вә хош хәбәри бәјан етмәјин вә Мүгәддәс Китаб нормаларына мүвафиг јашамағын һеч бир мә’насы јохдур. Лакин Иблис “јаланчыдыр вә јаланын атасыдыр” (Јәһја 8:44). ‘Иблисә гаршы дурмаға’ гәти гәрарлы олмалыјыг. Јеһова илә олан мүнасибәтләримизи һәмишә јүксәк гијмәтләндирмәлијик. Мүгәддәс Китабда мәһәббәтлә долу чағырыш јазылыб: “Аллаһа јахынлашын, О да сизә јахынлашар” (Јагуб 4:7, 8). Сән Јеһоваја неҹә јахынлаша биләрсән?

¹⁹ Дуа едәрәк дәриндән дүшүнмәк олдугҹа ваҹибдир. Һәјатда гаршылашдығын проблемләрин өһдәсиндән ҝәлмәкдә чәтинлијин јаранырса, үрәјини Јеһоваја ач. Дуаларында нә гәдәр конкрет олсан, Јеһованын ҹавабыны бир о гәдәр ајдын ҝөрәҹәксән. Ола билсин, ҹаваб һәр дәфә сән тәсәввүр етдијин кими олмајаҹаг, лакин әҝәр Јеһоваја иззәт вермәк вә нөгсансызлығыны горумаг үчүн сә’ј ҝөстәрирсәнсә, О, һәр шејә таб ҝәтирә билмәјин үчүн лазым олан көмәји сәнә тәгдим едәҹәк (1 Јәһја 5:14). Һәјатымызда Аллаһын рәһбәрлијинә диггәт јетирсәк, Она даһа јахын оларыг. Һәмчинин Мүгәддәс Китабы охумаг вә охудугларымызын әсасында Јеһованын хүсусијјәтләри вә јоллары һаггында дүшүнмәк чох ваҹибдир. Бу ҹүр дүшүнмәк сәнә көмәк едәҹәк ки, Аллаһы даһа јахшы таныјасан; бу сәнин үрәјини тә’сирләндирәҹәк вә Она олан мәһәббәтини артыраҹаг (Мәзмур 19:14). Мәһз бу ҹүр дәрин мәһәббәт сынаглара мүгавимәт ҝөстәрмәјинә вә бундан сонра да ојаг дурмағына һәр шејдән даһа јахшы көмәк едәҹәк (1 Јәһја 5:3).

²⁰ Јеһова илә јахын мүнасибәтләри горумаг үчүн, һәмиманлыларымызла јахын мүнасибәтләрдә олмаг да зәруридир. Бу мөвзуну әлиниздәки брошүранын сонунҹу һиссәсиндә мүзакирә едәҹәјик.

ӨЈРӘНМӘ ҮЧҮН СУАЛЛАР

• Иса јер үзүндәки һәјатынын сонунда ҝүҹлү ҝәрҝинлик кечирдији бир һалда нә етди вә өз шаҝирдләрини нәјә тәшвиг етди? (абз. 1-4).

• Шејтан нәјә ҝөрә Јеһованын хидмәтчиләрини тә’гиб едир вә онлары сынаға неҹә чәкир? (абз. 5-8).

• Биз нәјә ҝөрә сынаға уғрамамаг үчүн даима дуа етмәлијик (абз. 9-12), үмидләримиздә реалист олмалыјыг (абз. 13-15), мүбаһисәли суаллары јадда сахламалыјыг (абз. 16, 17) вә ‘Аллаһа јахынлашмалыјыг’ (абз. 18-20)?

[25-ҹи сәһифәдә олан чәрчивә]

Руһ дүшкүнлүјүнә сәбәб олан бә’зи амилләр

Сағламлыг/гоҹалыг. Хроники хәстәлик вә ја гоҹалыг Јеһоваја хидмәтимизи мәһдудлашдыра биләр вә биз буна ҝөрә сыхынты кечирә биләрик (Ибраниләрә 6:10).

Мә’јуслуг. Тәблиғ етдијимиз хош хәбәрә һај верән кәсләрин сајынын чох аз олдуғуну ҝөрәндә биз руһдан дүшә биләрик (Сүлејманын мәсәлләри 13:12).

Ҝәрәксизлик һисси. Әҝәр киминләсә узун илләр әрзиндә пис рәфтар едилибсә, она елә ҝәлә биләр ки, һеч ким, һәтта Јеһова белә ону севмир (1 Јәһја 3:19, 20).

Инҹиклик һисси. Әҝәр кимсә өз һәмиманлысы тәрәфиндән ҝүҹлү инҹидилибсә, онда онун мәсиһчи ҝөрүшләринә ҝәлмәк вә тәблиғ хидмәтиндә иштирак етмәк һәвәси сөнә биләр (Лука 17:1).

Тә’гиб. Иманына шәрик олмајанлар сәнә һәр ҹүр мүгавимәт ҝөстәрә, тә’гиб вә ја истеһза едә биләрләр (2 Петер 3:3, 4; 2 Тимотејә 3:12).

[26-ҹы сәһифәдә олан шәкил]

Иса сынагларла мүбаризә апармаг үчүн бизи даима ‘дуа етмәјә’ тәшвиг едир.