Һиссә 9
“Ахыр ҝүнләрдә” јашадығымызы һарадан билирик?
1, 2. Ахыр ҝүнләрдә јашадығымызы һарадан өјрәнә биләрик?
АЛЛАҺЫН ПАДШАҺЛЫҒЫНЫН, инсан рәһбәрлијинин идарә етдији индики системә гаршы тәдбир ҝөрәҹәји бир вахтда јашадығымыза неҹә әмин ола биләрик? Аллаһын писликләрә вә изтираблара сон гојаҹағы заманын чох јахын олдуғуну һарадан өјрәнә биләрик?
2 Буну Иса Мәсиһин шаҝирдләри дә билмәк истәјирдиләр. Онлар Исадан, онун Падшаһлыг гүдрәтиндә иштиракы вә “дөврүн сонуна” ишарә едәҹәк “әламәт” барәдә сорушдулар (Матта 24:3). Иса ҹаваб верәрәк, бүтүн дүнјаны сарсыдаҹаг вә шәраитләрлә бирликдә бәшәријјәтин ‘сонун вахтына’, јә’ни индики дүнја системинин ‘ахыр ҝүнләринә’ дахил олдуғуну ҝөстәрәҹәк һадисәләри әтрафлы тәсвир етди (Даниел 11:40; 2 Тимотејә 3:1). Биз бу ҝүн бу әламәтин тәркиб һиссәсини ҝөрүрүкмү? Бәли, артыгламасы илә ҝөрүрүк!
Дүнја мүһарибәләри
3, 4. Бу әсрин мүһарибәләри Исанын пејғәмбәрлији илә неҹә ујғун ҝәлир?
3 Иса габагҹадан билдирди ки, “халг халга, дөвләт дөвләтә гаршы галхаҹаг” (Матта 24:7). 1914-ҹү илдә бүтүн дүнја, әввәлки мүһарибәләрдән халгларын вә падшаһлыгларын сәфәрбәрлији илә фәргләнән бир мүһарибәјә ҹәлб олунду. Бу факты е’тираф едәрәк, тарихчиләр бир заман ону “Бөјүк мүһарибә” адландырырдылар. Бу ҹүр мүһарибә тарихдә һеч вахт олмамышды; бу, Биринҹи Дүнја мүһарибәси иди. Һәмин мүһарибәдә 20 000 000-а јахын әсҝәр вә динҹ әһали һәјатыны итирди; бу исә әввәлки мүһарибәләрдәки иткиләрдән олдугҹа чохдур.
4 Биринҹи Дүнја мүһарибәси ахыр ҝүнләрин башланғыҹына бир әламәт иди. Иса деди ки, бу вә диҝәр һадисәләр ‘ағрыларын башланғыҹы’ олаҹаг (Матта 24:8). Бу сөзләр доғру чыхды, белә ки, Икинҹи Дүнја мүһарибәси әввәлкиндән даһа мәһведиҹи олду; 50 000 000-а јахын әсҝәр вә динҹ әһали һәјатыны итирди. Үмумијјәтлә, ХХ әсрдәки мүһарибәләрдә 100 000 000-дан чох адам өлдүрүлмүшдүр ки, бу да әввәлки 400 ил әрзиндә олан мүһарибәләрдә өләнләрин сајындан дөрд дәфә артыгдыр! Бу, инсан рәһбәрлијинин неҹә дә тутарсыз олдуғуну ҝөстәрир!
Диҝәр сүбутлар
5-7. Ахыр ҝүнләрдә јашадығымызы ҝөстәрән диҝәр сүбутлар һансылардыр?
5 Иса ахыр ҝүнләри мүшајәт едән диҝәр әламәтләри дә дахил етди: “Јер-јер ҝүҹлү зәлзәләләр, гытлыг вә гырғынлар [епидемик хәстәликләр]... олаҹагдыр” (Лука 21:11). Бу, 1914-ҹү илдән башланан һадисәләрә тамамилә мүвафигдир, чүнки белә фәлакәтләр изтирабларын һәддиндән артыг артмасына сәбәб олмушдур.
6 Даима чохсајлы инсан өлүмү илә нәтиҹәләнән ҝүҹлү зәлзәләләр баш верир. Биринҹи Дүнја мүһарибәсиндән сонра јаранан тәкҹә испанка грипиндән 20 000 000-а јахын, бә’зи һесабатлара ҝөрә исә 30 000 000 вә ја даһа артыг инсан өлмүшдүр. ГИЧС хәстәлији јүз минләрлә инсанын өлүмүнә сәбәб олмуш вә јахын ҝәләҹәкдә даһа милјонларла һәјаты мәһв едә биләр. Һәр ил милјонларла инсанлар үрәк хәстәлијиндән, хәрчәнҝ вә ја башга хәстәликләрдән өлүрләр. Диҝәр милјонлар исә аҹлыгдан өлүрләр. Шүбһәсиз ки, 1914-ҹү илдән е’тибарән өзү илә мүһарибәләр, гида гытлығы вә епидемик хәстәликләр ҝәтирән “Апокалипсис атлылары” бәшәр аиләсинин чохсајлы үзвләрини мәһв едирләр (Вәһј 6:3-8).
7 Иса һәм дә ҹинајәткарлығын артаҹағы барәдә хәбәрдарлыг етмишдир, бу исә һал-һазырда бүтүн дүнјада баш верир. О демишдир: “Ганунсузлуг артдығындан бир чохларынын севҝиси сојујаҹагдыр” (Матта 24:12).
8. Тимотејә јазылан 2-ҹи мәктубун 3-ҹү фәслиндәки пејғәмбәрлик бизим зәманәјә неҹә ујғун ҝәлир?
8 Бундан әлавә, Мүгәддәс Китаб пејғәмбәрлији бу ҝүн бүтүн дүнјада ајдын ҝөрүнән әхлаг дәјәрләринин тәнәззүлә уғрајаҹағыны габагҹадан билдирмишдир: “Ахыр ҝүнләрдә чәтин анлар ҝәләҹәкдир. Чүнки инсанлар худбин, пулпәрәст, ловға, тәкәббүрлү, күфр данышан, валидејнләринә итаәт етмәјән, нанкор, гүдсијјәтдән мәһрум, шәфгәтсиз, барышмаз, бөһтанчы, нәфсини сахламајан, азғын, рәһмсиз, јахшылығын дүшмәни, хаин, еһтијатсыз, мәғрур олаҹаг, зөвгү Аллаһдан чох севәҹәк, Аллаһ јолунда имиш кими ҝөрүнәҹәк, амма о јолун гүдрәтини инкар едәҹәкләр... Пис адамлар вә сахтакарлар исә, алдадыб алданараг, ҝетдикҹә даһа бетәр олаҹаглар” (2 Тимотејә 3:1-13). Бүтүн бунлар ҝөзүмүзүн өнүндә јеринә јетир.
Башга бир амил
9. Ҝөјдә олан һансы һадисә, јер үзүндә ахыр ҝүнләрин башланғыҹы илә бир вахта дүшдү?
9 Бу әсрдә изтирабларын һәдсиз дәрәҹәдә чохалмасына сәбәб олан башга бир амил дә мөвҹуддур. Сон ҝүнләрин башланғыҹы олан вә 1914-ҹү илә тәсадүф едән башга бир һадисә, бәшәријјәти даһа бөјүк бир тәһлүкә гаршысында гојду. Мүгәддәс Китабын ахырынҹы китабындакы пејғәмбәрлијә ҝөрә “ҝөјдә мүһарибә олду. Микајыл [сәмави гүдрәтли Мәсиһ] вә онун мәләкләри әждаһа [Шејтан] илә вурушдулар. Әждаһа вә онун мәләкләри онлара гаршы дөјүшдүләр, амма ҝүҹләри чатмады. Вә ҝөјдә онлара артыг јер тапылмады. Иблис вә шејтан адланан бөјүк әждаһа, бүтүн дүнјаны алдадан гәдим илан јер үзүнә атылды, мәләкләри дә онунла бирликдә атылдылар” (Вәһј 12:7-9).
10, 11. Шејтан вә онун ҹинләринин јер үзүнә атылмасы бәшәријјәтә неҹә тә’сир етди?
10 Бу, бәшәр аиләсинә неҹә тә’сир ҝөстәрди? Даһа сонра пејғәмбәрликдә дејилир: “Јерә вә дәнизә вај олсун! Чүнки иблис, вахтынын аз олдуғуну биләрәк, бөјүк гәзәблә јаныныза енди”. Бәли, Шејтан өз системинин сона чатмаг үзә олдуғуну билир, буна ҝөрә дә өз системи илә бирликдә мәһв едилмәздән әввәл инсанлары Аллаһдан дөндәрмәк үчүн әлиндән ҝәләни едир (Вәһј 12:12; 20:1-3). Бу руһани варлыглар өз ирадә азадлыгларындан суи-истифадә етдикләри үчүн, әхлаги ҹәһәтдән неҹә дә позғунлашмышлар! Хүсусилә дә 1914-ҹү илдән е’тибарән, дүнјада онларын тә’сири алтында неҹә дә дәһшәтли һадисәләр баш верир!
11 Исанын бизим зәманә илә әлагәдар “Дәһшәтли һадисәләр вә ҝөјдән бөјүк әламәтләр олаҹагдыр” дејә хәбәрдарлыг етмәси тәәҹҹүблү дејил (Лука 21:11).
Инсан вә Шејтан рәһбәрлијин сону јахындыр
12. Бу системин сону ҝәлмәздән әввәл јеринә јетәҹәк ахырынҹы пејғәмбәрликләрдән бири һансыдыр?
12 Мөвҹуд олан системин Аллаһ тәрәфиндән мәһв едилмәсиндән өнҹә, Мүгәддәс Китабын јеринә јетмәмиш нә гәдәр пејғәмбәрлији галыб? Чох аз! Ахырынҹы пејғәмбәрликләрдән бири, 1 Салониклиләрә 5:3 ајәсиндә јазылыб. Орада дејилир: “Инсанлар: “Сүлһ вә тәһлүкәсизлик” — дејәндә гәфләтән... һәлака уғрајаҹаг”. Бу ону ҝөстәрир ки, индики системин сону “инсанлар... дејәндә” башлајаҹаг. Фәлакәт дүнјанын ҝөзләмәдији бир вахтда, бәшәријјәтин диггәти инсанлардан сүлһ вә тәһлүкәсизлик ҝөзләмәк үмидинә јөнәлдији бир анда ҝәләҹәк.
13, 14. Иса мәшәггәтин һансы вахтыны габагҹадан демишди вә бу нә илә сона јетәҹәкдир?
13 Шејтанын тә’сири алтында олан бу дүнјанын вахты сона чатыр. Мәшәггәт заманы сона чатаҹаг бу дүнја һаггында Иса демишдир: “О заман елә бөјүк мәшәггәт олаҹагдыр ки, беләси дүнјанын башланғыҹындан индијәдәк олмамышдыр вә һеч олмајаҹагдыр” (Матта 24:21).
14 “Бөјүк мәшәггәтин” ән јүксәк зирвәси Аллаһын Һар-Меҝидон мүһарибәси олаҹагдыр. Даниел пејғәмбәрин дедијинә ҝөрә, бу, Аллаһын ‘падшаһлыгларын һамысыны парчалајаҹағы вә мәһв едәҹәји’ бир вахтда олаҹагдыр. Бу, инди мөвҹуд олан Аллаһдан асылы олмајан бүтүн инсан һакимијјәтләринин сонуну ҝөстәрәҹәкдир. Онун ҝөјдәки Падшаһлыг һакимијјәти инсанларын бүтүн ишләрини там нәзарәт алтына алаҹагдыр. Даниел габагҹадан хәбәрдарлыг етмишди ки, рәһбәрлик сәлаһијјәти бир даһа “башга бир халга” верилмәјәҹәкдир (Даниел 2:44; Вәһј 16:14-16).
15. Шејтан вә онун ҹинләринин инсанлара ҝөстәрдикләри тә’сирлә нә баш верәҹәкдир?
15 О заман Шејтан вә ҹинләрин һәр ҹүр тә’сиринә дә сон гојулаҹагдыр. Үсјан едән бу руһани варлыглар, “бир дә халглары аздырмасын” дејә, тә’сирсиз вәзијјәтә салынаҹаглар (Вәһј 12:9; 20:1-3). Онлар өлүмә мәһкум олунублар вә онлары һәлак ҝөзләјир. Онларын позуҹу тә’сириндән гуртармаг бәшәријјәт үчүн неҹә дә бөјүк гуртулуш олаҹагдыр!
Кимләр сағ галаҹаг? Кимләр һәлак олаҹаг?
16-18. Бу системин сонунда кимләр сағ галаҹаг, бәс кимләр һәлак олаҹаг?
16 Аллаһ бу дүнја үзәриндә өз һөкмүнү јеринә јетирән заман кимләр сағ галаҹаг? Бәс кимләр һәлак олаҹаг? Мүгәддәс Китаб ҝөстәрир ки, Аллаһын һөкмранлығыны арзу едән инсанлар горунаҹаг вә сағ галаҹаглар. Аллаһын һөкмранлығыны арзу етмәјәнләр исә горунмајаҹаглар, анҹаг Шејтанын дүнјасы илә бирликдә мәһв едиләҹәкләр.
17 Сүлејманын мәсәлләри 2:21, 22 ајәләриндә дејилир: “Мәмләкәтдә доғру адамлар [Аллаһын һөкмранлығына табе оланлар] јашајаҹаглар вә камилләр орада галаҹаглар. Фәгәт пис адамлар [Аллаһын һөкмранлығына табе олмајанлар] мәмләкәтдән атылаҹаглар вә хаинләр ондан јох едиләҹәкләр”.
18 Һәмчинин Мәзмур 37:10, 11 ајәләриндә дејилир: “Бир аз ҝөзлә вә пис јох олаҹагдыр... Фәгәт һәлимләр дүнјаны мирас алаҹаглар вә сүлһ боллуғунда ләззәт тапаҹаглар”. 29-ҹу ајәдә исә әлавә олунур: “Салеһләр јери мирас алар вә онда әбәдијјән јашајарлар”.
19. Биз һансы мәсләһәти үрәкдән гәбул етмәлијик?
19 Биз, Мәзмур 37:34 ајәсиндә дејилән мәсләһәти үрәкдән гәбул етмәлијик: “Рәбби ҝөзлә вә онун јолуну тут вә јери мирас алмаг үчүн сәни јүксәлдәҹәкдир; писләрин кәсилиб атылаҹағы заман буну ҝөрәҹәксән”. Бу фәслин 37-ҹи вә 38-ҹи ајәләриндә дејилир: “Камил инсана ҝөз гој вә доғру адама бах; чүнки агибәт сүлһ әһлининдир. Фәгәт ганунсузлар бирликдә јох олаҹаглар; писләрин сону кәсиләҹәкдир”.
20. Биз нәјә ҝөрә дејә биләрик ки, дөврүн һәјәҹанлы вахтында јашајырыг?
20 Аллаһын һәгигәтән дә гајғы ҝөстәрдијини, бүтүн пислијә вә изтираблара тезликлә сон гојаҹағыны билмәк неҹә дә тәсәлливериҹи вә руһландырыҹыдыр! Бу валеһедиҹи пејғәмбәрликләрин јеринә јетәҹәји вахтын јахын олдуғуну дәрк етмәк неҹә дә һәјәҹанландырыҹыдыр!
[20-ҹи сәһифәдә олан шәкил]
Мүгәддәс Китаб ахыр ҝүнләрин “әламәтини” тәшкил едәҹәк һадисәләри габагҹадан билдирмишдир.
[22-ҹи сәһифәдә олан шәкил]
Аллаһын һакимијјәтинә табе олмајанлар тезликлә Һар-Меҝидонда мәһв едиләҹәкләр. Она һәгигәтән табе оланлар исә сағ галыб, әдаләтли јени дүнјада јашајаҹаглар.