Һәјатда дәјәрли мәгсәдә ҹан атын

«Еј бүтүн ҹанлы варлыглар, Рәббә һәмд един!» (МӘЗМУР 150:6).

1. Бир ҝәнҹин һәјатын һәгиги мә’насыны неҹә ахтардығыны тәсвир един.

«ҺӘЈАТЫМЫ инсанлара көмәк етмәклә кечирмәк истәдијим үчүн тибби тәһсил алырдым. Һәм дә фикирләширдим ки, нүфузлу вә ҝәлирли һәким иши мәнә хошбәхтлик ҝәтирәҹәк», — дејә Корејада бөјүјүб-баша чатан Сәнг Жин хатырлајырa. «Әслиндә һәкимин көмәјинин нә гәдәр ҹүз’и олдуғуну анлајанда, мә’јуслуға гапылдым. Сонра рәссамлығы өјрәнмәјә башладым, амма әл ишләримин башгаларына аз хејри дәјирди, өзүмү лап егоист кими һисс едирдим. Мүәллимлијә үз тутдум, тезликлә баша дүшдүм ки, һәгиги хошбәхтлијә апаран рәһбәрлији дејил, анҹаг гуру фактлары чатдыра билирәм». Бир чохлары кими Сәнг Жин дә һәјатын һәгиги мә’насынын ахтарышында иди.

2. а) Һәјатымызын һәгигәтән мә’налы олмасы үчүн нә ҝәрәкдир? б) Һарадан билирик ки, һәјатын һәгиги мә’насы вар?

² Һәјатымызын һәгигәтән мә’налы олмасы үчүн јашамаг сәбәбинин, ајдын мәгсәдин вә бүтүн сә’јләримизи јөнәлтдијимиз әсас һәдәфин олмасы ҝәрәкдир. Инсанлар белә мә’налы һәјат сүрә биләрләрми? Бәли! Ағыл, шүур вә дәрракә илә јарадылмағымыз ҝөстәрир ки, бизи бурада јерләшдирмәкдә Јараданын мә’налы нијјәти вар. Буна ҝөрә дә мәнтигәујғундур ки, анҹаг Јараданын нијјәтинә ујғун јашамагла һәјатын һәгиги мә’насыны тапа биләрик.

3. Аллаһын инсанлар үчүн нијјәтинә нә дахилдир?

³ Мүгәддәс Китаб ачыглајыр ки, Аллаһын бизим үчүн олан нијјәтинә чох шеј дахилдир. Мәсәлән, әсрарәнҝиз јолла јарадылмағымыз доғрудан да Аллаһын тәмәннасыз мәһәббәтинин тәзаһүрүдүр (Мәзмур 40:5; 139:14). Беләликлә, Аллаһын нијјәтинә ујғун јашамаг инсанлары Аллаһын севдији кими, тәмәннасыз мәһәббәтлә севмәк демәкдир (1 Јәһја 4:7-11). Бу һәм дә о демәкдир ки, Аллаһын мәһәббәт долу нијјәтинә ујғун јашамаға көмәк едән рәһбәрлијинә табе олмалыјыг (Ваиз 12:13; 1 Јәһја 5:3).

4. а) Һәгиги мә’налы һәјат јашамаг үчүн нә лазымдыр? б) Инсанын гаршысына гоја биләҹәји ән али мәгсәд һансыдыр?

⁴ Аллаһ һәм дә нијјәт етмишди ки, инсанлар бир-бирилә вә башга варлыгларла хошбәхтлик вә әмин-аманлыг ичиндә јашасынлар (Јарадылыш 1:26; 2:15). Белә исә, хошбәхт, тәһлүкәсиз вә раһат јашамаг үчүн бизә нә лазымдыр? Өзүнү хошбәхт вә тәһлүкәсизликдә һисс етмәк үчүн валидејнләринин јанында олмасына еһтијаҹ дујан ушаг кими, биз дә һәјатда әсл мәгсәди вә һәгиги мә’наны тапмаг үчүн сәмави Атамызла јахшы мүнасибәтдә олмалыјыг (Ибраниләрә 12:9). Аллаһ бизим Она јахынлашмағымыза иҹазә вермәклә вә дуаларымызы ешитмәклә белә мүнасибәтләрин јаранмасыны мүмкүн едир (Јагуб 4:8; 1 Јәһја 5:14, 15). Әҝәр биз ‘Аллаһла јеријир’ вә Онун досту олуругса, сәмави Атамыза севинҹ бәхш едиб, Ону иззәтләндирә биләрик (Јарадылыш 6:9, КМ; Сүлејманын мәсәлләри 23:15, 16; Јагуб 2:23). Бу, инсанын гаршысына гоја биләҹәји ән али мәгсәддир. Мәзмурчу јазырды: «Еј бүтүн ҹанлы варлыглар, Рәббә һәмд един!» (Мәзмур 150:6).

Сәнин һәјатда мәгсәдин нәдир?

5. Мадди мараглары биринҹи јерә гојмаг нә үчүн мүдриклик дејил?

⁵ Аллаһын бизим үчүн олан ирадәси һәм дә ондан ибарәтдир ки, биз өзүмүзүн вә аиләмизин гајғысына галаг. Бура онларын һәм мадди, һәм дә руһани еһтијаҹларыны өдәмәк дахилдир. Анҹаг буну едәркән дүнјәви ишләрин даһа ваҹиб олан руһани ишләри көлҝәдә гојмамасы үчүн таразлығы горумаг лазымдыр (Матта 4:4; 6:33). Тәәссүф ки, чохлары һәјатыны, демәк олар, бүтүнлүклә мадди әшјалар әлдә етмәјә һәср едир. Анҹаг бүтүн еһтијаҹларымызы јалныз мадди әшјаларла өдәмәјә чалышмаг мүдриклик олмазды. Бу јахынларда Асијада варлы инсанлар арасында апарылан сорғу ҝөстәрмишди ки, онларын чоху «ҹәмијјәтдә тутдуглары мөвгејә вә мадди фираванлыг ичиндә јашамаларына бахмајараг, горху вә нараһатчылыг һисси кечирирләр» (Ваиз 5:11).

6. Вар-дөвләт архасынҹа гачанлара Иса һансы мәсләһәти верди?

⁶ Иса ‘зәнҝинлијин алдадыҹы’ олдуғу һаггында данышырды (Марк 4:19). Зәнҝинлик һансы мә’нада алдадыҹыдыр? Мәсәлән, адама елә ҝәлир ки, о, хошбәхтлик ҝәтирир, әслиндә исә бу һеч дә белә дејилдир. Мүдрик падшаһ Сүлејман демишдир: «Пул севән пулдан дојмаз» (Ваиз 5:10). Вар-дөвләт далынҹа гачмаг, ејни заманда Аллаһа там үрәкдән хидмәт етмәк мүмкүндүрмү? Хејр. Иса изаһ етмишди: «Һеч ким ики ағаја гуллуг едә билмәз. Чүнки ја биринә нифрәт едәҹәк, диҝәрини исә севәҹәк, ја да биринә бағлы галаҹаг, диҝәринә исә хор бахаҹагдыр. Сиз Аллаһа вә маммона гуллуг едә билмәзсиниз». Иса өз шаҝирдләрини јердә вар-дөвләт топламаға дејил, «ҝөјдә хәзинәләр» јығмаға, јә’ни ‘нәләрә еһтијаҹымыз олдуғуну Ондан диләмәздән әввәл билән’ Аллаһын јанында јахшы ад газанмаға тәшвиг едирди (Матта 6:8, 19-25).

7. «Һәгиги һәјата» наил олмаг үчүн нә едә биләрик?

⁷ Әмәкдашы Тимотејә мәктуб јазаркән һәвари Павел бу барәдә бә’зи ҹидди мәсләһәтләр верди. О, Тимотејә деди: «Индики зәманәдә варлы оланлара тапшыр ки... ҝүвәнилә билмәјән вар-дөвләтә бел бағламасынлар, лакин зөвг үчүн бизә һәр шеји фираванлыгла верән Аллаһа үмид бәсләсинләр... Әлиачыг вә өз малыны диҝәрләри илә бөлүшдүрмәјә һазыр олуб, өзләринә ҝәләҹәк үчүн јахшы тәмәл олаҹаг бир хәзинә топласынлар ки, һәгиги һәјата наил олсунлар» (1 Тимотејә 6:17-19, И–93).

‘Һәгиги һәјат’ нәдир?

8. а) Нә үчүн чохлары вар-дөвләтә вә ҹәмијјәтдә мөвге тутмаға ҹан атыр? б) Белә адамлар нәји баша дүшмүрләр?

⁸ ‘Һәгиги һәјат’ дедикдә бир чох инсанларын дүшүнҹәсиндә тәм-тәраглы, кефдә-дамагда кечән һәјат ҹанланыр. Асијада чыхан бир журналда гејд едилир: «Телевизор вә ја филмләр тамашачыларда ҝөрдүкләри јени-јени шејләри әлдә етмәк арзусу ојадыр». Чохларына елә ҝәлир ки, белә шејләри әлдә етмәк доғрудан да јашамаг демәкдир вә онлар вар-дөвләти вә ҹәмијјәтдә мөвге тутмағы һәјатларынын мәгсәди едирләр. Чохлары бунлара наил олмаг үчүн ҝәнҹлијини, сағламлығыны, аилә һәјатыны вә руһани дәјәрләрини гурбан верирләр. Телевизорда ҝөстәрилән белә шејләрин «дүнјанын руһуну», јә’ни милјардларла инсаны өз тә’сири алтына алан вә онлары Аллаһын инсанлар үчүн олан нијјәтинә зидд давранмаға тәһрик едән дүшүнҹә тәрзини әкс етдирдији һаггында ајаг сахлајыб дүшүнәнләр чох аздыр (1 Коринфлиләрә 2:12; Ефеслиләрә 2:2). Буна ҝөрә дә бу ҝүн дүнјада бу гәдәр чох инсанын бәдбәхт олмасы тәәҹҹүблү дејил! (Сүлејманын мәсәлләри 18:11; 23:4, 5).

9. Инсанлар нәјә һеч вахт наил ола билмәјәҹәкләр вә нә үчүн?

⁹ Бәс аҹлыг, хәстәлик вә әдаләтсизлији арадан галдырмаға чалышараг инсанларын рифаһы наминә фәдакарлыгла зәһмәт чәкәнләр һаггында нә демәк олар? Онларын нәҹиб вә фәдакар сә’јләри чохларына фајда ҝәтирир. Анҹаг әлләриндән ҝәләни етмәләринә бахмајараг, онлар һеч заман бу дүнјаны нә әдаләтли едәҹәк, нә дә јахшылыға доғру дәјишә биләҹәкләр. Нә үчүн? Чүнки әслиндә бүтүн дүнја шәририн, јә’ни Шејтанын һакимијјәти алтындадыр, о исә бу дүнјанын јахшылыға доғру дәјишмәсини истәмир (1 Јәһја 5:19).

10. Садиг инсанлар «һәгиги һәјата» нә заман наил олаҹаглар?

¹⁰ Јазыг о кәсә ки, үмидини анҹаг бу дүнјаја бағлајыр! «Әҝәр биз јалныз бу һәјат үчүн Мәсиһә үмид бәсләмишиксә, бизә бүтүн инсанлардан чох аҹымаг лазымдыр», — дејә Павел јазырды. Әҝәр һәр шеј бу һәјатдадырса, Павел демишкән, «ҝәлин јејәк вә ичәк, чүнки сабаһ өләҹәјик!» (1 Коринфлиләрә 15:19, 32). Амма «биз Онун [Аллаһын] вә’динә ҝөрә јени ҝөјләр вә јени јер ҝөзләјирик ки, онларда салеһлик өмүр сүрүр» (2 Петер 3:13). О заман мәсиһчиләр ‘һәгиги һәјатдан’, ҝөјләрдә вә ја Аллаһын Падшаһлығынын мәһәббәт долу рәһбәрлији алтында камил ‘әбәди һәјатдан’ зөвг алаҹаглар (1 Тимотејә 6:12).

11. Аллаһын Падшаһлығынын марагларынын ирәлиләмәси үчүн чалышмаг нәјә ҝөрә мәгсәдәујғундур?

¹¹ Јалныз Аллаһын Падшаһлығы инсанларын проблемләрини там мүвәффәгијјәтлә һәлл едәҹәк. Буна ҝөрә, һәр кәсин ҹан ата биләҹәји ән дәјәрли мәгсәд Аллаһын Падшаһлығынын марагларынын ирәлиләмәсиндә әлиндән ҝәләни етмәкдир (Јәһја 4:34). Нә гәдәр ки, бу ишлә мәшғулуг, сәмави Атамызла мүнасибәтимиз сых олаҹаг. Биз һәм дә һәјатда ејни мәгсәдә ҹан атан милјонларла руһани баҹы-гардашларымызла чијин-чијинә хидмәт етмәкдән севинҹ дујуруг.

Дүзҝүн гурбанлар ҝәтирин

12. Индики һәјатла ‘һәгиги һәјат’ арасындакы фәрги ҝөстәрин.

¹² Мүгәддәс Китаб дејир ки, индики «дүнја вә онун еһтирасы кечиб ҝедир». Шејтанын дүнјасындан һеч нә, нә онун шөһрәти, нә дә вар-дөвләти галаҹаг, «амма Аллаһын ирадәсини јеринә јетирән әбәди» јашајаҹаг (1 Јәһја 2:15-17). Индики дүнјанын е’тибарсыз вар-дөвләтинин, өтәри иззәтинин вә јаланчы мәмнунлуғунун әксинә олараг ‘һәгиги һәјат’, јә’ни Аллаһын Падшаһлығы алтында әбәди һәјат кечиб ҝетмәјәҹәк. Вә әҝәр дүзҝүн гурбанлар ҝәтиририксә, бу һәр шејә дәјәр.

13. Бир әр-арвад һансы дүзҝүн гәрары гәбул етди?

¹³ Һенри вә Сјузанын нүмунәсинә нәзәр салаг. Онлар инанырдылар ки, Аллаһын Падшаһлығыны һәјатларында биринҹи јерә гојан инсанлар Онун көмәјини алаҹаглар (Матта 6:33). Онлар уҹуз гијмәтә ев тапмаг гәрарына ҝәлдиләр ки, икиси дә дүнјәви ишдә ишләмәкдәнсә, ики гызлары илә бирликдә руһани ишләрә даһа чох вахт ајыра билсинләр (Ибраниләрә 13:15, 16). Онларын јахшылығыны истәјән бир достлары бу гәрары баша дүшә билмирди. О, Сјузана демишди: «Сјузан, әҝәр јахшы евдә јашамаг истәјирсәнсә, ҝәрәк нәјисә гурбан верәсән». Анҹаг Һенри вә Сјузан билирди ки, Јеһованы биринҹи јерә гојмаг «индики вә ҝәләҹәк һәјат үчүн үмид верир» (1 Тимотејә 4:8; Титуса 2:12). Онларын гызлары бөјүјүб, таммүддәтли хидмәтә башладылар. Онлар аиләликҹә һеч бир шеј итирмәдикләрини дүшүнүрләр; әксинә, ‘һәгиги һәјаты’ әлдә етмәји гаршыларына мәгсәд гојмаг онлара бөјүк фајда ҝәтириб (Филипилиләрә 3:8; 1 Тимотејә 6:6-8).

‘Дүнјадан там истифадә етмәјин’

14. Һәјатын һәгиги мә’насыны нәзәрдән гачырмаг һансы фәлакәтләрә сәбәб ола биләр?

¹⁴ Һәјатын һәгиги мә’насыны нәзәрдән гачырмаг вә ‘һәгиги һәјаты бәрк тутмамаг’ чох тәһлүкәлидир. ‘Бизи һәјатын гајғылары, зәнҝинлији, зөвгләри боға’ биләр (Лука 8:14). Гаршысыалынмаз арзулар вә «һәјатын гајғылары» она ҝәтириб чыхара биләр ки, башымыз һәддиндән артыг бу дүнјанын ишләринә гарышар (Лука 21:34). Әфсуслар олсун ки, бә’зиләри варланмаг арзусуна дүшмүш вә ‘иман јолундан узаглашыб, өзләринә бир чох әзаблар чәкдирмиш’, һәтта Јеһова илә гијмәтли мүнасибәтләрини белә итирмишләр. ‘Әбәди һәјаты бәрк тутмамаг’ неҹә дә баһа баша ҝәлир! (1 Тимотејә 6:9, 10, 12; Сүлејманын мәсәлләри 28:20).

15. Дүнјадан там истифадә етмәмәк бир аиләјә һансы фајданы ҝәтирди?

¹⁵ Павел ‘дүнјадан истифадә едәнләрә, там истифадә етмәјәнләр кими олмағы’ мәсләһәт ҝөрүрдү (1 Коринфлиләрә 7:31). Кит вә Бони бу мәсләһәтә гулаг асдылар. Кит хатырлајыр: «Јеһованын Шаһиди оланда стомотолоҝијаны тәзәҹә битирмишдим. Сечим гаршысында идим. Чохлу хәстә гәбул едиб, пул газана биләрдим, анҹаг бу бизим Јеһоваја ибадәтимизә мане олаҹагды. Аиләмизин руһани вә емосионал рифаһына даһа чох вахт галсын дејә, иш вахтымы азалтдым. Сонралар бизим беш гызымыз дүнјаја ҝәлди. Чох аз һалларда артыг пулумуз галса да, гәнаәтҹил олмағы өјрәндијимиз үчүн һеч нәјә еһтијаҹымыз олмурду. Аиләмиз меһрибан, мөһкәм вә севинҹлә долу иди. Вахт кечдикҹә һамымыз таммүддәтли хидмәтә башладыг. Инди гызларымыз хошбәхт аилә гурублар вә онларын үчүнүн ушаглары вар. Онларын аиләси дә хошбәхтдир, чүнки Јеһованын ирадәсини биринҹи јерә гојурлар».

Аллаһын ирадәсини һәјатынызда биринҹи јерә гојун

16, 17. Мүгәддәс Китабда һансы исте’дадлы инсанларын нүмунәләри јазылыб вә онлар јаддашларда неҹә галыблар?

¹⁶ Мүгәддәс Китабда Аллаһын ирадәсинә ујғун јашајан вә јашамајан инсанларын нүмунәләри вар. Бу нүмунәләрдән олан дәрсләр јашындан, мәдәнијјәтиндән вә һарада јашамасындан асылы олмајараг һамы үчүндүр (Ромалылара 15:4; 1 Коринфлиләрә 10:6, 11). Нәмруд бөјүк шәһәрләр тикирди, о бунунла Јеһоваја гаршы чыхырды (Јарадылыш 10:8, 9). Амма бир чохлары исә јахшы нүмунә гојмушлар. Мәсәлән, Муса Мисир задәҝаны мөвгејини горумаға чалышмырды. Әксинә, о, Аллаһын вердији тапшырыглары «Мисирин хәзинәләриндән даһа бөјүк сәрвәт» кими гијмәтләндирди (Ибраниләрә 11:26). Һәким Лука, ҝөрүнүр, Павел вә башгалары хәстәләнәндә онлара көмәк едирди. Анҹаг о, инсанлара ән бөјүк јахшылығы мүждәчи вә Мүгәддәс Китаб јазычысы кими едиб. Павелә ҝәлдикдә исә о, гануншүнас кими дејил, миссионер, «гејри-јәһудиләрә һәвари» кими таныныр (Ромалылара 11:13).

¹⁷ Давуд әсасән орду башчысы, мусигичи вә ја бәстәкар кими дејил, Аллаһын ‘үрәјинә јатан бир адам’ кими јадда галыб (1 Шамуел 13:14). Биз Даниели Бабилин сарај мә’муру кими ҝөрдүјү ишләрә ҝөрә дејил, Јеһоваја садиг пејғәмбәр кими хидмәт етдијинә ҝөрә, Естери Фарс мәләкәси кими дејил, иман вә ҹәсарәт нүмунәси кими, Петер, Андреј, Јагуб вә Јәһјаны јахшы балыгчы кими дејил, Исанын һәвариләри кими таныјырыг. Ән нәһајәт, Иса бизим хатиримиздә «дүлҝәр» кими дејил, ‘Мәсиһ’ кими галыб (Марк 6:3; Матта 16:16). Онларын һамысы јахшы баша дүшүрдү ки, малик олдуглары баҹарыг, вар-дөвләт вә ја мөвгеләри дүнјәви ишә дејил, Аллаһа хидмәтә јөнәлдилмәлидир. Онлар билирдиләр ки, гаршыларына гоја биләҹәкләри ән дәјәрли вә ән чох севинҹ ҝәтирән мәгсәд Аллаһдан горхан инсан олмагдыр.

18. Бир ҝәнҹ мәсиһчи һәјатыны нәјә сәрф етмәк гәрарына ҝәлди вә о нәји баша дүшдү?

¹⁸ Мәгаләнин әввәлиндә ады чәкилән Сәнг Жин дә буну баша дүшдү. «Мән гәрара ҝәлдим ки, бүтүн ҝүҹүмү тиббә, рәссамлыға вә ја мүәллимлијә һәср етмәк әвәзинә, һәјатымы Аллаһа һәср олунмағыма ујғун гурум», — дејә о данышыр. «Инди Мүгәддәс Китаб мүәллимләринә даһа чох еһтијаҹ олан јердә хидмәт едәрәк, инсанлара әбәди һәјата апаран јолу тапмаға көмәк едирәм. Әввәлләр дүшүнүрдүм ки, таммүддәтли хидмәт чох сә’ј тәләб етмәјәҹәк. Анҹаг инди һәјатым әввәлкиндән даһа долғундур, чүнки һәм өз хасијјәтими, һәм дә мүхтәлиф мәдәнијјәтләрдән олан инсанлары өјрәтмәк баҹарығымы јахшылашдырмаға чалышырам. Баша дүшүрәм ки, Јеһованын ирадәсинә ујғун јашамаг јеҝанә мә’налы һәјат јолудур».

19. Һәјатын әсл мә’насыны неҹә тапа биләрик?

¹⁹ Биз мәсиһчиләр һәјаты хилас едән билијә вә гуртулуш үмидинә маликик (Јәһја 17:3). Буна ҝөрә дә, ҝәлин ‘Аллаһын лүтфүнү бош јерә гәбул етмәјәк’ (2 Коринфлиләрә 6:1). Әксинә, ҝәлин һәјатымызын гијмәтли илләрини вә ҝүнләрини Јеһоваја иззәт ҝәтирмәклә кечирәк. Ҝәлин инди һәгиги хошбәхтлик ҝәтирән вә әбәди һәјата апаран билији һамыја чатдыраг. Белә етмәклә биз Исанын сөзләринин һәгигилијини өз үзәримиздә һисс едәҹәјик: «Вермәк алмагдан даһа бөјүк бәхтијарлыг ҝәтирир» (Һәвариләрин ишләри 20:35). Биз һәм дә һәјатын әсл мә’насыны тапмыш олаҹағыг.

[Һашијә]

Изаһ едә биләрсинизми?

• Һәјатда гаршымыза гоја биләҹәјимиз ән али мәгсәд нәдир?

• Нәјә ҝөрә мадди әшјалар үчүн јашамаг мүдриклик олмазды?

• Аллаһын вә’д етдији ‘һәгиги һәјат’ нәдир?

• Аллаһын ирадәсинә ујғун неҹә јашаја биләрик?