Мүгәддәс Китабын әхлаг нормаларыны өјрәнин вә башгаларына өјрәдин
“Нә үчүн сән башгаларыны өјрәдәрәк, өзүнү өјрәтмирсән?” (РОМАЛЫЛАРА 2:21).
1, 2. Һансы сәбәбләрә ҝөрә Мүгәддәс Китабы өјрәнмәјә биздә истәк олмалыдыр?
АЛЛАҺЫН КӘЛАМЫНЫ өјрәнмәк үчүн чох сәбәбләр мөвҹуддур. Јәгин ки, сиз инсанлар, һадисәләр, јерләр вә башга шејләр һагда фактлары билмәк истәјирсиниз. Мүгәддәс Китабын әслиндә нәји өјрәтдијини билмәк истәјирсиниз ки, онун тә’лимләрини дини јаланлардан, мәсәлән, Үч үгнум вә ҹәһәннәм оду кими тә’лимләрдән ајырд едә биләсиниз (Јәһја 8:32). Бундан әлавә, биздә Јеһованы даһа чох тәглид етмәк вә һәгигәтә мүвафиг давранараг гаршысында јеријә билмәк үчүн Ону даһа јахшы танымаг истәји олмалыдыр (1 Краллар 15:4, 5).
2 Аллаһын Кәламыны өјрәнмәјин башга бир ваҹиб сәбәби дә ону башгаларына: јахынларымыза, достларымыза, һәтта һәлә танымадығымыз кәсләрә өјрәтмәк үчүн һазырлашмагдыр. Мәсиһчиләр үчүн исә бу чох ваҹибдир. Иса шаҝирдләринә демишдир: “Ҝедин, бүтүн халглары шаҝирдим един... Сизә әмр етдијим һәр шејә риајәт етмәји онлара өјрәдин” (Матта 28:19, 20).
3, 4. Исанын әмринә әсасән өјрәтмәк нә үчүн тә’рифә лајигдир?
3 Башгаларына өјрәтмәк арзусу илә Мүгәддәс Китабы өјрәнмәк тә’рифә лајигдир вә инсана бөјүк мәмнунлуг ҝәтирә биләр. Мүәллимлик сәнәти кечмишдән бәри һөрмәт бәсләнилән сәнәтдир. Бир енсиклопедијада дејилир: “Јәһудиләр арасында бир чох јеткин инсанлар һесаб едирдиләр ки, мүәллимләр хилас јолуну ҝөстәрир вә ушаглара валидејнләрдән чох мүәллимләрә еһтирам бәсләмәји өјрәдирдиләр” (“Encarta Encyclopedia”). Мәсиһчиләрин Мүгәддәс Китабы әввәлҹә өзләри өјрәниб, сонра исә башгаларыны өјрәтмәләри хүсусилә тә’рифә лајигдир.
4 “Мүәллимләрин сајы һәр һансы башга сәнәтлә мәшғул оланлардан даһа чохдур. Бүтүн дүнјада тәхминән 48 милјон адам мүәллим ишләјир” (“The World Book Encyclopedia”). Мүәллимә ушаг бејинләрини е’тибар едирләр вә һәмин мүәллимин ҝөстәрдији тә’сир узун илләр өзүнү ҝөстәрә биләр. Лакин биз Исанын башгаларыны өјрәтмәк әмринә табе олдугда даһа бөјүк фајда әлдә едилир, чүнки онларын сонсуз һәјаты биздән асылы ола биләр. Буну, һәвари Павел Тимотеји тәшвиг едәрәк вурғулады: “Өзүнә вә вердијин тә’лимата диггәт јетир вә бу ишләри давам етдир. Чүнки буну етмәклә сән һәм өзүнү, һәм дә сәнә гулаг асанлары хилас едәрсән” (1 Тимотејә 4:16). Бәли, вердијимиз тә’лим инсанларын хиласы илә бағлыдыр.
5. Нәјә ҝөрә мәсиһчиләрин вердији тә’лим һәр һансы башга тә’лимләрдән үстүндүр?
5 Өзүнү вә башгаларыны өјрәтмәк әмри каинатын Һөкмдарындан, ән јүксәк Мәнбәдән изһар олур. Буну билмәјимиз һәмин тә’лими, истәр орта мәктәбдә, истәрсә дә мүтәхәссисләрин, һәтта һәкимләрин алдығы тә’лимдән јүксәлдир. Мәсиһчиләрин вердији тә’лим о демәкдир ки, инсан Аллаһын Оғлу Иса Мәсиһи тәглид етмәји өјрәнмәли вә буну башгаларына да өјрәтмәлидир (Јәһја 15:10).
Нәјә ҝөрә әввәлҹә өзүмүзү өјрәтмәлијик?
6, 7. а) Нә үчүн илк нөвбәдә биз өзүмүзү өјрәтмәлијик? б) Биринҹи әсрдә јашајан јәһудиләр нә үчүн мүәллим олмаға јарарлы дејилдиләр?
6 Нәјә ҝөрә әввәлҹә өзүмүзү өјрәтмәлијик? Чүнки белә олмазса, башгаларыны да өјрәдә билмәјәҹәјик. Павелин дүшүнмәјә тәшвиг едән сөзләри бу һәгигәти бир даһа вурғулајыр. Павел бу сөзләри о заман јашајан јәһудиләр үчүн демиш олса да, һәмин сөзләр буҝүнкү мәсиһчиләр үчүн дә бөјүк әһәмијјәт кәсб едир. Павел сорушурду: “Нә үчүн сән башгаларыны өјрәдәрәк, өзүнү өјрәтмирсән? Оғурламамағы вә’з едиб, оғурлајырсанмы? “Зина етмә”, — дејәрәк, зина едирсәнми? Бүтләрә нифрәт едиб, мә’бәдләри сојурсанмы? Мүгәддәс Ганунла өјүнүб, гануну позараг, Аллаһы шәрәфсиз едирсәнми?” (Ромалылара 2:21-23).
7 Бу риторик суаллары вермәклә, Павел Он әмрдә бирбаша мүһакимә едилән ики ҝүнаһа — оғурлуға вә зинаја диггәт јетирир (Чыхыш 20:14, 15). Павелин ҝүнләриндә бә’зи јәһудиләр Аллаһын Ганунуна саһиб олдуглары үчүн фәхр едирдиләр. Онлар Ганундан тә’лим алараг әмин идиләр ки, корларын бәләдчисидирләр, гаранлыгда оланларын ишығы, ағылсызларын мүрәббиси вә көрпәләрин мүәллимидирләр (Ромалылара 2:17-20). Лакин ҝизлиндә оғурлуг вә зина илә мәшғул олан икиүзлүләр дә варды. Бу һәм Гануна, һәм дә онун сәмави Мүәллифинин адына ләкә ҝәтирирди. Ајдындыр ки, онлар мүәллим олмаға јарарлы дејилдиләр, чүнки онлар һеч өзләрини белә өјрәдә билмирдиләр.
8. Павелин ҝүнләриндә бә’зи јәһудиләр һансы мә’нада мә’бәдләри гарәт едә биләрдиләр?
8 Павел мә’бәдләрин гарәт едилмәсиндән данышырды. Доғруданмы бә’зи јәһудиләр оғурлугла мәшғул идиләр? Павел нә демәк истәјирди? Ачығыны десәк, бу һиссәдә олан мә’лумат азлығындан, јәһудиләрин мә’бәдләри һансы мә’нада гарәт етдијини там әминликлә дејә билмәрик. Бир гәдәр өнҹә Ефес шәһәринин мирзәси, Павелин јолдашларынын мә’бәди гарәт етмәдикләрини бәјан етди. Онун бу сөзләриндән белә бир нәтиҹәјә ҝәлмәк олар ки, бә’зи јәһудиләр буна гадир идиләр (Һәвариләрин ишләри 19:29-37). Ишғалчылар, јахуд дини фанатикләр тәрәфиндән бүтпәрәстләрин мә’бәдләриндән оғурланмыш баһалы әшјалары, ола билсин ки, јәһудиләр ја өзләри истифадә едир, ја да сатырдылар. Амма Аллаһын вердији Гануна әсасән, бүтләрә мәхсус олан гызыл вә ҝүмүшләри мәһв етмәк лазым иди, онлары шәхси истифадә үчүн сахламаг олмазды (Тәснијә 7:25)a. Буна ҝөрә дә, еһтимал ки, Павел, Аллаһын әмринә е’тинасыз јанашыб бүтпәрәстләрин мә’бәдләриндән ҝөтүрүлән шејләри истифадә едән вә ја онлардан газанҹ әлдә едән јәһудиләри нәзәрдә тутурду.
9. Јерусәлим мә’бәдиндә баш верән һансы гәбаһәтли һәрәкәтләри әсл мә’нада мә’бәди гарәт етмәк адландырмаг олар?
9 Диҝәр тәрәфдән Иосиф Флави Ромада баш верән галмагал һаггында хәбәр верир. Һәмин галмагала Ганун мүәллиминин башчылыг етдији дөрд јәһуди сәбәб олмушду. Бу дөрд нәфәр, јәһуди динини гәбул едән ромалы гадыны Јерусәлим мә’бәдинә гызыл вә башга баһалы шејләри ианә етмәјә разы салмыш, сонра исә ианәни алыб мәнимсәмишләрb. Мәҝәр бу, мә’бәди гарәт етмәк дејилми? Башгалары исә дәјәрсиз гурбанлары ҝәтирмәклә вә мә’бәдин әразисиндә тиҹарәтлә мәшғул олмагла, ону “гулдур јувасына” дөндәриб мә’бәди башга мә’нада гарәт едирдиләр (Матта 21:12, 13; Малаки 1:12-14; 3:8, 9).
Мүгәддәс Китабын әхлаг нормаларына өјрәдирик
10. Павелин Ромалылара 2:21-23 ајәләриндә дедији сөзләрин мәғзи нәдир вә нәјә ҝөрә һәмин сөзләрә диггәт јетирмәлијик?
10 Павел оғурлуг, мә’бәдләри гарәт етмәк вә зина дедикдә һәр нәји нәзәрдә тутса да, онун дедијинин мәғзини нәзәрдән гачырмалы дејилик. О сорушурду: “Нә үчүн сән башгаларыны өјрәдәрәк, өзүнү өјрәтмирсән?”. Диггәт јетирәк ки, Павелин ҝәтирдији нүмунәләр әхлаг нормалары илә бағлыдыр. Павел бурада нә Мүгәддәс Китабын тә’лимләриндән, нә дә тарихдән бәһс едир. Өзүнү вә башгаларыны өјрәтмәк барәдә онун сөјләдији сөзләр, мәсиһчијә хас олан әхлаг нормалары илә әлагәдардыр.
11. Мүгәддәс Китабы өјрәнән заман онун әхлаг нормаларына диггәт јетирмәк нә үчүн лазымдыр?
11 Ромалылара 2:21-23 ајәләриндә јазылмыш сөзләрә риајәт етмәк үчүн, биз әввәлҹә Аллаһын Кәламындан мәсиһчијә хас олан әхлаг нормаларыны өјрәнмәли, она мүвафиг јашамалы, сонра исә һәмин шејләри башгаларына өјрәтмәлијик. Буна ҝөрә дә, Мүгәддәс Китабы өјрәнән заман, Јеһованын мәсиһчијә хас олан әхлаг дәјәрләринин әсасландығы нормаларына диггәт јетирин. Мүгәддәс Китабда раст ҝәлинән өјүдләрин вә ибрәт дәрсләринин үзәриндә дүшүнүн. Сонра өјрәндикләринизи сә’јлә тәтбиг един. Бәли, Мүгәддәс Китабда јазыланлара риајәт етмәк үчүн ҹәсарәт вә гәтијјәт тәләб олунур. Гејри-камил инсанлара бу вә ја диҝәр һалларда Мүгәддәс Китабын әхлаг нормаларына нә үчүн риајәт етмәдикләринә бәраәт газандырмаг вә сәбәбләр ахтарыб тапмаг чәтин олмајаҹаг. Јәгин ки, Павелин һаггында бәһс етдији јәһудиләр өзләринә һагг газандырмагда вә ја башгаларыны аздырмаг мәгсәди илә һијләҝәр сүбутлар ҝәтирмәкдә уста идиләр. Лакин Павелин сөзләриндән ҝөрүндүјү кими, Мүгәддәс Китабын әхлаг нормаларыны шәхси мүлаһизәјә ҝөрә дәјәрсиз етмәк вә ја позмаг олмаз.
12. Јахшы, јахуд пис давраныш Јеһованын адына неҹә тә’сир едир вә буну јадда сахламаг нә үчүн фајдалыдыр?
12 Һәвари Павел, Мүгәддәс Китабын әхлаг принсипләрини мәнимсәјиб она риајәт етмәјин әсас сәбәбинә диггәт јетирди. Јәһудиләрин пис давранышы Јеһованын адына ләкә ҝәтирирди: “Мүгәддәс Ганунла өјүнүб, гануну позараг, Аллаһы шәрәфсиз едирсәнми? Чүнки јазылдығы кими, сизин үзүнүздән диҝәр халглар арасында Аллаһын адына күфр едилир” (Ромалылара 2:23, 24). Бу сөзләр бизим дөврдә дә актуалдыр. Әҝәр биз Мүгәддәс Китабын әхлаг нормаларына е’тинасыз јанашырыгса, онун Мәнбәјини рүсвај етмиш олуруг. Әксинә, Аллаһын нормаларына риајәт едириксә, Она еһтирам бәсләдијимизи ҝөстәририк (Ишаја 52:5; Һезекиел 36:20). Буну билмәјимиз, Мүгәддәс Китабын әхлаг нормаларыны позмаға асанлыгла јол ачан мүхтәлиф һалларда ҝүзәштә ҝетмәмәк гәрарымызы мөһкәмләдәҹәк. Павелин сөзләри бизә даһа бир шеји өјрәдир. Давранышымызын Аллаһын адына тә’сир едәҹәјини биләрәк, бу билији башгаларына да чатдырын. Јениҹә таныш олдуглары әхлаг нормаларына неҹә риајәт етмәләринин Јеһованын адына тә’сир едә биләҹәјини анламагда онлара да көмәк един. Мүгәддәс Китабын әхлаг нормаларына риајәт етмәк јалныз сағламлыг вә хошбәхтлик ҝәтирмир. Ејни заманда, һәмин нормаларын Мәнбәји олан вә онлара риајәт етмәјә тәшвиг едән Шәхсин адына да тә’сир ҝөстәрир (Мәзмур 74:10; Јагуб 3:17).
13. а) Мүгәддәс Китаб әхлаг мәсәләләриндә бизә неҹә көмәк едир? б) 1 Салониклиләрә 4:3-7 ајәләриндә јазылан сөзләрин мәғзини изаһ един.
13 Әхлаг нормаларына риајәт едиб-етмәмәјимиз әтрафымыздакы инсанлара да тохунур. Буну, Мүгәддәс Китабда Аллаһын әхлаг нормаларына риајәт етмәјин дәјәрини вә онлара е’тинасыз јанашмағын нәтиҹәсини ҝөстәрән нүмунәләрдән ҝөрә биләрик (Тәквин 39:1-9, 21; Јешу 7:1-25). Мүгәддәс Китабда әхлаг бахымындан ачыг өјүдләр дә верилир, мәсәлән: “Аллаһын ирадәси будур ки, мүгәддәс оласыныз, ҹинси әхлагсызлыгдан имтина едәсиниз. Һәр бириниз өз бәдәнинә гүдсијјәт вә һөрмәтлә һаким олсун. Аллаһы танымајан халглар кими шәһвәт еһтирасы илә һәрәкәт етмәмәлисиниз. Бу мәсәләдә һеч ким өз гардашы илә һагсыз вә тәҹавүзкарҹасына рәфтар етмәмәлидир... Чүнки Аллаһ бизи мурдарлыға дејил, мүгәддәслијә чағырмышдыр” (1 Салониклиләрә 4:3-7).
14. 1 Салониклиләрә 4:3-7 ајәләриндәки мәсләһәтләрә әсасән өзүмүзә һансы суаллары верә биләрик?
14 Бу парчадан ҝөрүнүр ки, ҹинси әхлагсызлыг Мүгәддәс Китабын әхлаг нормаларына зиддир. Лакин даһа дәринә ҝетмәк олар. Бә’зи мәтнләри даһа диггәтлә арашдырыб, үзәриндә хејли дүшүнмәк олар. Онда биз һәмин ајәләри даһа дәгиг баша дүшәр вә дәрин анлајыша саһиб оларыг. Мәсәлән, ҝәлин, Павелин зинакар “өз гардашы илә һагсыз вә тәҹавүзкарҹасына рәфтар етмәмәлидир” дедикдә нәји нәзәрдә тутдуғунун үзәриндә дүшүнәк. Бурада сөһбәт һансы һагсызлыгдан ҝедир вә бу мәтнин даһа дәрин анлајышы Мүгәддәс Китабын әхлаг нормаларына садиг галмагда истәјимизи неҹә ҝүҹләндирә биләр? Бу ҹүр арашдырманын нәтиҹәси бизи башгаларыны даһа јахшы өјрәтмәјә вә онлара Аллаһа еһтирам бәсләмәјә көмәк етмәкдә неҹә имкан јарадыр?
Өјрәнин ки, өјрәдәсиниз
15. Шәхси өјрәнмә заманы һансы вәсаитләрдән истифадә етмәк олар?
15 Јеһованын Шаһидләри олан бизләр, өзүмүзү вә ја башгаларыны өјрәдән заман ортаја чыхан суаллары вә ја мәсәләләри арашдырмаг үчүн көмәкчи вәсаитләрә маликик. Бир чох дилләрдә нәшр едилән вәсаитләрдән бири, “Ҝөзәтчи Гүлләси нәшрләринин индекси”дир. Онун көмәклији илә Јеһованын Шаһидләри тәрәфиндән Мүгәддәс Китаба әсасланан нәшрләрдән мә’луматлар әлдә етмәк олар. Ахтарышы һәм мөвзу үзрә, һәм дә ајәләр үзрә апармаг олар. Бундан әлавә, Јеһованын Шаһидләринин истифадә едә биләҹәји даһа бир вәсаит, бир чох әсас дилләрдә чыхан “Ҝөзәтчи Гүлләси”нин електрон китабханасыдыр. Компакт-дискә електрон формада јазылмыш бу компүтер програмынын тәркибинә бир чох нәшрләр дахилдир. Бу програм мүхтәлиф мөвзулары арашдырмаға вә ајәләрин изаһыны тапмаға имкан верир. Әҝәр бу вәсаитләрин һамысына вә ја бә’зиләринә маликсинизсә, башгаларына Аллаһын Кәламыны өјрәтмәк мәгсәди илә шәхси өјрәнмәниздә онлардан мүнтәзәм сурәтдә истифадә един.
16, 17. а) 1 Салониклиләрә 4:6 ајәсиндә нәзәрдә тутулан һагг барәсиндә верилән шәрһләр һарада јерләшир? б) Зинакар башгаларынын һаггына неҹә тохунур?
16 Ҝәлин нүмунә кими, өнҹә хатырланан 1 Салониклиләрә 4:3-7 ајәләрини ҝөтүрәк. Бурада һагга даир суал јараныр. Кимин һаггына? Вә бу һагга неҹә тәҹавүз етмәк олар? Јухарыда хатырлатдығымыз вәсаитләрин көмәји илә бу ајәләри ишыгландыран вә Павелин һансы һагдан данышдығыны анламаға көмәк едән бир сыра шәрһләр тапмаг мүмкүндүр. Бу ҹүр шәрһләри, “Мүгәддәс Јазыларын дәрк едилмәси” әсәринин I ҹилдинин 863, 864-ҹү сәһифәләриндә (инҝ.), “Һәгиги сүлһ вә тәһлүкәсизлији неҹә тапмаг олар?” китабынын 145-ҹи сәһифәсиндә (инҝ.) вә “Ҝөзәтчи Гүлләси”нин 1989-ҹу ил, 15 нојабр сајынын 31-ҹи сәһифәсиндә тапмаг олар (инҝ.).
17 Арашдырма апардыгда Павелин сөзләринин нә гәдәр доғру олдуғуну ҝөрәҹәксиниз. Зинакар Аллаһа гаршы ҝүнаһ етмәклә бәрабәр, һәр һансы хәстәлијә дә тутула биләр (1 Коринфлиләрә 6:18, 19; Ибраниләрә 13:4). Зинакар, ҝүнаһ ишләтдији гадынын бә’зи һагларына тәҹавүз едир. О, һәмин гадыны јахшы аддан, тәмиз виҹдандан мәһрум едир. Әҝәр гадын әрдә дејилсә, зинакар онун бакирә олараг никаһа дахил олмасы вә ҝәләҹәк әринин буну ондан ҝөзләмәси һаггына тәҹавүз едир. Белә адам гадынын валидејнләринә, әҝәр әрә ҝедибсә, әринә әзаб верир. Үстәлик, зинакар өз аиләсини јүксәк әхлаглы һесаб олунмаг һүгугундан мәһрум едир. Вә әҝәр о, мәсиһчи јығынҹағынын үзвүдүрсә, јығынҹағын адына ләкә ҝәтирир, ону һөрмәтдән салыр (1 Коринфлиләрә 5:1).
18. Мүгәддәс Китабын әхлаг нормалары илә бағлы өјрәнмә һансы фајданы ҝәтирир?
18 Инсан һүгугуна даир бу ҹүр шәрһләр, јухарыда ҝәтирилән ајәләрин дәрин мә’насыны ҝөстәрир. Бу ҹүр өјрәнмә, шүбһәсиз ки, чох гијмәтлидир. Өјрәнмә илә мәшғул оларкән өзүмүз өјрәнирик. Аллаһын сөзүнүн һәгиги вә тә’сирли олдуғуна әминлијимиз даһа да артыр. Һәр һансы сынаглара бахмајараг, Мүгәддәс Китабын әхлаг нормаларына садиг галмагда даһа гәтијјәтли олуруг. Бир мүәллим кими нә гәдәр фајдалы ола биләҹәјинизи дә дүшүнүн! Мәсәлән, башгаларына Мүгәддәс Китабын һәгигәтләрини өјрәдәркән, биз 1 Салониклиләрә 4:3-7 ајәләринин мә’насыны даһа дәрин ачыглаја биләр вә бунунла да һәмин инсанларын мәсиһчијә хас олан әхлаг нормаларыны дәриндән анлајыб, гијмәтләндирмәләринә көмәк етмиш олуруг. Беләликлә, өјрәнмә Аллаһа еһтирам бәсләмәкдә һәм бизә, һәм дә башгаларына көмәк едә биләр. Јухарыда садәҹә бир нүмунәни, Павелин салониклиләрә јаздығы мәктубун бир парчасыны нәзәрдән кечирдик. Амма мәсиһчијә хас олан әхлаг нормаларынын бир чох башга тәрәфләри дә вар вә буна мүвафиг олараг Мүгәддәс Китабда өјрәнмәли, һәјатда тәтбиг етмәли вә башгаларына өјрәтмәли чохлу нүмунәләр вә өјүдләр вар.
19. Мүгәддәс Китабын әхлаг нормаларына садиг галмағымыз нәјә ҝөрә олдугҹа ваҹибдир?
19 Мүгәддәс Китабын әхлаг нормаларына риајәт етмәјин мүдрик олдуғуна шүбһә ола билмәз. Јагуб 3:17 ајәсиндә дејилир ки, “јухарыдан назил олан һикмәт”, јә’ни Јеһовадан ҝәлән һикмәт “әввәлән сафдыр”. Ајдындыр ки, бурада Аллаһын әхлаг нормаларына риајәт нәзәрдә тутулур. Бундан башга, Јеһова тәләб едир ки, Мүгәддәс Китабын өјрәнмәсиндә ону тәгдим едән кәсләрин өзләри “пак” олсунлар (1 Тимотејә 4:12). Бу, Павел вә Тимотеј кими Исанын илк шаҝирдләринин јашадыглары һәјатын тәмиз олдуғундан ҝөрүнүр. Онлар өзләрини әхлаг позғунлуғундан горујурдулар, Павел исә, һәтта белә јазмышдыр: “Ҹинси әхлагсызлығын вә һәр ҹүр натәмизлијин, јахуд тамаһын гој аранызда ады белә чәкилмәсин, чүнки бунлар мүгәддәсләрә јарашмаз. Әдәбсизлик вә бошбоғазлыг, јахуд кобуд зарафат да олмасын” (Ефеслиләрә 5:3, 4).
20, 21. Биз һәвари Јәһјанын 1 Јәһја 5:3 ајәсиндә јаздығы сөзләрлә нә үчүн разыјыг?
20 Аллаһын Кәламына дахил олан әхлаг нормалары ајдын вә бирмә’налыдыр, ағыр јүк дејил. Бу, башга һәвариләрдән чох јашајан Јәһја үчүн ајдын иди. Узун өмүр сүрмүш вә тәҹрүбә саһиби олан Јәһја билирди ки, Аллаһын әхлаг нормалары һеч бир зәрәр ҝәтирмир. Әксинә, һәмин нормалар фајдалыдыр, хејирхаһдыр, хејир-дуадыр. Јәһја буну белә вурғулајыр: “Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир” (1 Јәһја 5:3).
21 Бунунла бәрабәр она да диггәт јетирәк ки, Јәһјанын сөзләринә ҝөрә, Аллаһа табе олуб, Онун әхлаг нормаларына садиг галмаг, илк нөвбәдә она ҝөрә мүдриклик дејил ки, бизи хошаҝәлмәз һадисәләрдән горујаҹаг. Јәһја бизә һәр шеји дүзҝүн шәкилдә ҝөрмәјә көмәк едир. Ән әввәл, о гејд едир ки, Мүгәддәс Китабын әхлаг нормаларына садиг галмагла Јеһова Аллаһы севдијимизи билдирир вә Она өз мәһәббәтимизи ифадә етмәк үчүн гијмәтли имканлардан истифадә едирик. Доғрудан да, Аллаһы севмәји өјрәнмәк вә ја буну башгаларына өјрәтмәк, Онун јүксәк нормаларыны е’тираф едиб, онлара мүвафиг јашамағы өзүнә дахил едир. Бу исә о демәкдир ки, Мүгәддәс Китабын әхлаг нормаларыны әввәл өзүмүз өјрәнмәли, сонра башгаларына өјрәтмәлијик.
[Һашијәләр]
a Иосиф Флави јәһудиләри кафирликдән узаг шәкилдә тәсвир етсә дә, Аллаһын ганунларындан бирини өз сөзләри илә белә изаһ едир: “Гој һеч ким, башга дөвләтләрдә еһтирам бәсләнилән танрылара күфр етмәсин. Һәмчинин өзҝә мә’бәдләри гарәт етмәк, јахуд һансыса танрыја һәср едилмиш гијмәтли шејләри мәнимсәмәк дә гадағандыр” (Редаксијамызын курсиви) (“Јәһуди археолоҝијасы”, 4-ҹү китаб, 8-ҹи фәсил, 10-ҹу параграф) (“Jewish Antiquities”).
b “Јәһуди археолоҝијасы” 18-ҹи китаб, 3-ҹү фәсил, 5-ҹи параграф.
Хатырлајырсынызмы?
• Башгаларыны өјрәтмәздән әввәл нәјә ҝөрә өзүмүз өјрәнмәлијик?
• Давранышымыз Јеһованын адына неҹә тә’сир едир?
• Зинакар кимләрин һаггына тохунур?
• Мүгәддәс Китабын әхлаг нормалары илә бағлы сиз нә етмәјә гәрарлысыныз?
[18-ҹи сәһифәдәки шәкил]
“Онун әмрләри... ағыр дејилдир”.