Дәјишмәкдә олан дүнјанын руһуна мүгавимәт ҝөстәр
“Биз бу дүнјанын руһуну дејил, Аллаһдан ҝәлән Руһу гәбул етдик” (1 КОРИНФЛИЛӘРӘ 2:12).
1. Һәвва һансы саһәләрдә алданды?
“ИЛАН мәни алдатды” (Тәквин 3:13). Илк гадын олан Һәвва, Јеһова Аллаһа гаршы үсјан галдырмасынын сәбәбини бу гыса ифадә илә изаһ етмәјә чалышды. Онун дедикләри доғру иди, лакин бу онун сәһв һәрәкәтләринә бәраәт газандырмырды. Сонрадан һәвари Павел Аллаһдан илһам алараг јазмышдыр: “[Һәвва] алданыб” (1 Тимотејә 2:14). Һәвва, әҝәр Аллаһын сөзүндән чыхарса вә гадаған едилмиш мејвәдән јејәрсә, бунун онун хејринә олаҹағына вә онун Аллаһ кими олаҹағына инанараг алданды. О, һәмчинин јаланчынын шәхсијјәтинә даир јалана да инанды. Онун һеч ағлына да ҝәлмирди ки, иланы данышдыран Шејтан Иблисдир (Тәквин 3:1-6).
2. а) Шејтан бу ҝүн инсанлары неҹә алдадыр? б) “Дүнјанын руһу” нәдир вә биз һансы суаллары нәзәрдән кечирәҹәјик?
2 Адәм вә Һәвванын ҝүнләриндән башлајараг, Шејтан инсанлары алдатмаға давам едир. Дүзүнү десәк о, ‘бүтүн дүнјаны алдадыр’ (Вәһј 12:9). Онун тактикасы дәјишилмәјиб. Артыг һәгиги иланлардан истифадә етмәсә дә, о, өз симасыны маска алтында ҝизләтмәјә давам едир. Әјләнҹә сәнајесиндән, күтләви информасија васитәләриндән вә диҝәр үсуллардан истифадә едәрәк Шејтан инсанлары алдадыр ки, онлар Аллаһын севәрәк тәгдим етдији рәһбәрликдә ҝуја зәрурәтин вә фајданын олмадығына инансынлар. Һәр јердә јалан тохумларыны сәпәрәк, Иблис инсанларда Мүгәддәс Китаб ганунларына вә принсипләринә гаршы үсјанчы руһу ојатмышдыр. Мүгәддәс Китабда бу ҹүр әһвал-руһијјә “дүнјанын руһу” адланыр (1 Коринфлиләрә 2:12). Бу руһ, Аллаһы танымајан кәсләрә чох ҝүҹлү тә’сир ҝөстәрир: онларын бахышларыны, давранышларыны вә әтрафда баш верән шејләрә мүнасибәтләрини мүәјјән едир. Бу ҹүр руһ неҹә тәзаһүр олунур вә биз онун позғун тә’сиринә неҹә мүгавимәт ҝөстәрә биләрик? Ҝәлин бахаг.
Әхлаг дәјәрләринин ашағы дүшмәси
3. Нәјә ҝөрә бизим ҝүнләрдә “дүнјанын руһу” даһа ајдын ҝөрүнүр?
3 Бизим ҝүнләрдә “дүнјанын руһу” даһа ајдын ҝөрүнүр (2 Тимотејә 3:1-5). Јәгин ки, әхлаг дәјәрләринин ашағы дүшдүјүнә диггәт јетирмисән. Мүгәддәс Јазыларда бунун сәбәби изаһ едилир. 1914-ҹү илдә Аллаһын Падшаһлығы гурулдугдан сонра ҝөјдә мүһарибә олду. Шејтан вә онун мәләкләри, јә’ни ҹинләр мәғлубијјәтә уғрадылар вә јерин һүдудларына атылдылар. Гәзәбләнмиш Шејтан јаланы дүнја мигјасында даһа бөјүк сә’јлә јајмаға башлады (Вәһј 12:1-9, 12, 17). О, мүмкүн олан бүтүн имканлардан истифадә едир ки, “мүмкүнсә, сечилмиш оланлары да алдатсын” (Матта 24:24). Аллаһын хидмәтчиләри олан бизләр, онун башлыҹа һәдәфијик. О, бизи руһән мәһв етмәк истәјир ки, биз Аллаһын лүтфүндән мәһрум олаг вә әбәди јашамаг имканыны итирәк.
4. Јеһованын хидмәтчиләри вә бу дүнја Мүгәддәс Китаба һансы нөгтеји-нәзәрлә јанашыр?
4 Шејтан Мүгәддәс Китабы — бизә севән Јараданымыз һагда билик верән гијмәтли китабы нүфуздан салмаға чалышыр. Јеһованын хидмәтчиләри Мүгәддәс Китабы севир вә јүксәк гијмәтләндирирләр. Биз билирик ки, о инсан сөзү дејил, Аллаһын Кәламыдыр вә Аллаһдан илһам алыб (1 Салониклиләрә 2:13; 2 Тимотејә 3:16). Лакин Шејтанын дүнјасы бизим башга ҹүр дүшүнмәмизи истәрди. Мәсәлән, Мүгәддәс Китабы тәнгид едән бир китабын ҝириш сөзләриндә дејилир: “Мүгәддәс Китаб һеч дә “мүгәддәс” вә һеч дә “Аллаһын кәламы” дејил. Ону мүгәддәс руһла һәрәкәтә ҝәтирилән инсанлар дејил, һакимијјәтә сусајан каһинләр јазмышдылар”. Бу ҹүр иддиалара инанан инсанлар, асанлыгла јаланын гурбаны ола биләр вә белә бир јанлыш фикрә ҝәлә биләрләр ки, Аллаһа хошларына ҝәлдији кими хидмәт етмәјә вә ја үмумијјәтлә хидмәт етмәмәјә азаддырлар (Сүлејманын мәсәлләри 14:12).
5. а) Бир публисист ән’әнәви сурәтдә Мүгәддәс Китабла бағлы олан динләрә даир нә дејир? б) Дүнјада һөкм сүрән бахышлары Мүгәддәс Китабда дејиләнләрлә мүгајисә един. (Нөвбәти сәһифәдәки чәрчивәдә олан фикирләри дахил един.)
5 Мүгәддәс Китаба бирбаша вә ја долајы һүҹумларын нәтиҹәсиндә, һәмчинин онун јаланчы мүдафиәчиләринин икиүзлүлүјү нәтиҹәсиндә инсанларын динә, о ҹүмләдән Мүгәддәс Китабла ән’әнәви сурәтдә бағлы олан дини е’тигадлара мүнасибәти писләшир. Күтләви информасија васитәләриндә вә елми даирәләрдә дин тәнгидә мә’руз галыр. Бир публисист белә гәнаәтә ҝәлир: “Иҹтимаијјәт үмумиликдә иудаизмә вә христианлыға пис јанашыр. Ән јахшы һалда онлар [һәмин динләр] антиквар бир шеј кими, ән пис һалда исә, әгли инкишафы јубандыран вә елми тәрәггијә әнҝәл јарадан көһнә бахышлар кими гәбул едилир. Сон илләр әрзиндә е’тинасызлыг әлә салынмаг вә ачыг дүшмәнчилик дәрәҹәсинә чатыб”. Бу ҹүр дүшмәнчилик чох вахт Аллаһын мөвҹудлуғуну инкар едән вә “дүшүнҹәләриндә батил олан” инсанлар тәрәфиндән әкс олунур (Ромалылара 1:20-22).
6. Аллаһын мүһакимә етдији әхлагсыз мәшғулијјәтләрә дүнја неҹә бахыр?
6 Инсанларын Аллаһын мүәјјән етдији давраныш нормаларындан ҝетдикҹә даһа да узаглашмаларына тәәҹҹүб етмәјә дәјмәз. Мәсәлән, һомосексуал әлагәләр барәдә Мүгәддәс Китаб “рүсвајчылыг” кими бәһс едир (Ромалылара 1:26, 27). Һәм дә орада дејилир ки, әхлагсызлыг вә зина илә мәшғул оланлар Аллаһын Падшаһлығыны мирас алмајаҹаглар (1 Коринфлиләрә 6:9, И–93). Лакин бир чох өлкәләрдә бу ҹүр һәрәкәтләр нәинки мүнасиб сајылыр, һәтта китабларда, журналларда, маһныларда, филмләрдә вә телевизија програмларында ҹәлбедиҹи тәрздә тәгдим едилир. Бунларын әлејһинә данышанлары дөзүлмәз, дар дүшүнҹәли вә ҝеридә галмыш сајырлар. Аллаһын нормаларына Онун гајғысынын тәзаһүрү кими бахмаг әвәзинә, дүнја бу нормалара, шәхсијјәтин азадлығыны мәһдудлашдыран вә имканларыны һәјата кечирмәјә мане олан бир шеј кими бахыр (Сүлејманын мәсәлләри 17:15; Јәһуда 4).
7. Биз өзүмүзү һансы суалларла јохламалыјыг?
7 Ҝетдикҹә Аллаһа даһа ҝүҹлү мүгавимәт ҝөстәрән дүнјада јашајараг, һансы руһу әкс етдирдијимизә вә һансы принсипләри рәһбәр тутдуғумуза диггәт јетирмәк мүдриклик оларды. Вахташыры олараг өзүмүзү виҹданла вә дуа едәрәк јохламалыјыг ки, ахынын бизи тәдриҹән Јеһованын дүшүнҹә тәрзиндән вә Онун нормаларындан ајырыб-ајырмадығыны мүәјјән едәк. Мәсәлән, биз өзүмүздән соруша биләрдик: “Бир нечә ил габаг гачындығым мөвзулар мәнә инди әјләнҹәли ҝөрүнүрмү? Аллаһын мүһакимә етдији мәшғулијјәтләрә даһа сәбирлә јанашыраммы? Руһани мәсәләләри әввәл олдуғундан даһа аз ҹиддиликлә гәбул етмәјә мејллијәмми? Һәјат тәрзим мәним үчүн Падшаһлығын марагларынын даһа ваҹиб олдуғуну ҝөстәрирми?” (Матта 6:33). Бу суаллар үзәриндә дәриндән дүшүнмәјимиз бизә дүнјанын руһуна мүгавимәт ҝөстәрмәјә көмәк едәр.
‘Ахын бизи ајырмасын’
8. Инсан Јеһовадан неҹә ајрыла биләр?
8 Һәвари Павел һәмиманлыларына јазырды: “Биз ешитдикләримизә даһа чох диггәтлә гулаг асмалыјыг ки, ахын бизи онлардан ајырмасын” (Ибраниләрә 2:1). Далғалар ҝәмини јолундан ајырарса, ҝәми мүәјјән олунмуш јерә ҝедиб чыхмајаҹаг. Әҝәр капитан күләјә вә ахына диггәт јетирмәзсә, онун ҝәмиси асанлыгла тәһлүкәсиз лимандан јан кечә вә гајалы саһилдә саја отура биләр. Буна бәнзәр тәрздә, әҝәр биз Аллаһын Кәламындан олан гијмәтли һәгигәтләрә диггәтсиз јанашарыгса, Јеһовадан асанлыгла ајрылыб, руһани ҹәһәтдән ҝәми гәзасына уғраја биләрик. Бу ҹүр аҹы агибәт, һәгигәти ачыг-ајдын инкар етмәјин нәтиҹәсиндә јаранмыр. Әслиндә аз адам гәфләтән вә биләрәкдән Јеһовадан узаглашыр. Адәтән инсанлар тәдриҹән онларын диггәтини Аллаһын Кәламындан јајындыран шејләрә долашыб галырлар. Демәк олар ки, онлар һисс олунмадан ҝүнаһа доғру истигамәт алырлар. Јухуја далмыш капитан кими, бу ҹүр адамлар чох ҝеҹ ајылырлар.
9. Јеһова Сүлејмана һансы хејир-дуалары вермишди?
9 Нүмунә үчүн Сүлејманын һәјатыны ҝөтүрәк. Јеһова ону Исраил үзәринә падшаһ тә’јин етмишди. Аллаһ Сүлејмана мә’бәд тикмәк үчүн иҹазә вермиш вә Мүгәддәс Китабын бә’зи һиссәләрини јазмағы тапшырмышды. Јеһова онунла ики дәфә данышмыш вә она вар-дөвләт, иззәт, һәмчинин онун һөкмранлығы әрзиндә әмин-аманлыг вермишдир. Һәр шејдән әлавә, Јеһова Сүлејманы бөјүк мүдрикликлә хејир-дуаландырмышды. Мүгәддәс Китаб билдирир: “Аллаһ Сүлејмана, дәниз саһилиндә олан гум кими, боллуҹа һикмәт вә анлајыш вә үрәк ҝенишлији верди. Вә Сүлејманын һикмәти бүтүн шәрг оғулларынын һикмәтиндән вә бүтүн Мисирин һикмәтиндән үстүн иди” (1 Краллар 4:21, 29, 30; 11:9). Шүбһәсиз ки, ким исә дүшүнә биләр ки, Аллаһа садиг галмаг шансы олан кәс анҹаг Сүлејман иди. Лакин ахын Сүлејманы ајырды, о, һәгиги ибадәтдән узаглашды. Бу неҹә баш верди?
10. Сүлејман һансы ҝөстәришә гулаг асмады вә нәтиҹәдә нә олду?
10 Сүлејман Аллаһын Ганунуну јахшы билир вә баша дүшүрдү. Еһтимал ки, Исраилдә падшаһ олан кәсләр үчүн јазылмыш нәсиһәтләри хүсуси марагла охујурду. Бу нәсиһәтләрин арасында беләси дә варды: “Үрәји сапмасын дејә [падшаһ] өзү үчүн арвадлар чохалтмајаҹаг” (Тәснијә 17:14, 17). Бу ҹүр ајдын ҝөстәришә бахмајараг, Сүлејман једди јүз арвад вә үч јүз ҹаријә алды. Бу гадынлардан чоху өзҝә аллаһлара хидмәт едирдиләр. Сүлејманын бу гәдәр арвад алмасынын сәбәбләрини, һәм дә онун өз һәрәкәтләринә неҹә бәраәт газандырдығыны билмирик. Лакин ону дәгиг билирик ки, о, Аллаһын ајдын ҝөстәришинә гулаг асмады. Нәтиҹәдә, Јеһованын хәбәрдар етдији иш баш верди. Биз охујуруг: “Арвадлары онун үрәјини башга илаһиләрин ардынҹа сапдырдылар” (1 Краллар 11:3, 4). Тәдриҹән Сүлејман Аллаһын она вердији мүдриклији итирирди. Ахын ону ајырырды. Вахт өтдүкҹә, бүтпәрәст арвадлары разы салмаг арзусу, Аллаһа табе олмаг вә Ону разы салмаг арзусундан үстүн олду. Неҹә дә кәдәрлидир! Ахы бир гәдәр әввәл мәһз Сүлејманын өзү бу ҹүр сөзләр јазмышдыр: “Оғлум, һикмәтли ол вә үрәјими севиндир ки, мәни писләјәнә ҹаваб верим” (Сүлејманын мәсәлләри 27:11).
Дүнјанын руһу ҝүҹлүдүр
11. Бејнимизи гидаландырдығымыз шејләр дүшүнҹәмизә неҹә тә’сир ҝөстәрир?
11 Сүлејманын нүмунәси бизи өјрәдир ки, бу ҹүр фикир јүрүтмәк тәһлүкәлидир: әҝәр биз һәгигәти билириксә, дүнја бизә әсаслы сурәтдә тә’сир едә билмәз. Ади гиданын бәдәнә тә’сири олдуғу кими, бејин үчүн олан гиданын да дүшүнҹәмизә тә’сири олур. Бејнимизи нә илә гидаландырырыгса, һәмин гида бизим бахышларымызы формалашдырыр вә әһвал-руһијјәмизи мүәјјән едир. Буну дәрк едәрәк фирмалар һәр ил өз мәһсулларынын реклам едилмәсинә милјардларла доллар хәрҹләјирләр. Мүвәффәгијјәтли рекламларда ширникдириҹи, истеһлакчыларын еһтирас вә арзуларыны ҹәлб едән сөзләр вә шәкилләр истифадә олунур. Рекламчылар һәм дә билирләр ки, реклама бир вә ја ики дәфә бахмагла инсанлар чәтин ки, онларын мәһсулларыны алмаға ҹан атсынлар. Лакин вахт өтдүкҹә реклама тәкрар-тәкрар бахараг, истеһлакчылар адәтән реклам едилән мала даһа мүсбәт нөгтеји-нәзәрлә јанашырлар. Реклам тә’сир едир, әкс тәгдирдә исә һеч ким она сәрмајә гојмазды. Реклам инсанларын дүшүнҹәсинә ҝүҹлү тә’сир ҝөстәрир.
12. а) Шејтан инсанларын дүшүнҹәләринә неҹә тә’сир ҝөстәрир? б) Бунун мәсиһчиләрә дә тә’сир ҝөстәрә билдијини нәдән ҝөрмәк олар?
12 Рекламчыја бәнзәр тәрздә Шејтан да өз бахышларыны ҹәлбедиҹи формаја салараг тәблиғ едир, чүнки билир ки, беләликлә вахт өтдүкҹә өз дүшүнҹә тәрзини инсанлара гәбул етдирмәјә наил ола биләҹәк. Әјләнҹә саһәси вә диҝәр үсулларла Шејтан инсанлары алдадыр ки, онлар писи јахшы, јахшыны исә пис һесаб етсинләр (Ишаја 5:20). Һәтта Мәсиһин һәгиги давамчылары белә Шејтанын сә’јлә истифадә етдији јалан мә’луматын гурбаны олурлар. Мүгәддәс Китаб хәбәрдар едир: “Руһ исә ајдын шәкилдә дејир ки, ахыр заманларда бә’зиләри имандан дөнәҹәк, јолдан чыхаран руһлара вә ҹинләрин тә’лимләринә гулаг асаҹаглар. Бу тә’лимләр јаланчыларын ријакарлығы илә јајылыр. Онларын виҹданларына санки дағ басылмышдыр” (1 Тимотејә 4:1, 2; Јеремја 6:15).
13. Пис достлуг нәдир вә бизим үнсијјәт етдијимиз адамлар бизә неҹә тә’сир едир?
13 Бизләрдән һеч биримиз дүнјанын руһундан мүдафиә олунмамышыг. Шејтан системинин күләк вә ахынлары ҝүҹлүдүр. Мүгәддәс Китаб мүдрик өјүд верир: “Алданмајын: пис достлуг јахшы әхлагы позар” (1 Коринфлиләрә 15:33). Пис достлуг өзүнә, һәтта јығынҹагда белә дүнјанын руһуну әкс етдирән һәр бир шеји вә ја һәр бир кәси дахил едә биләр. Әҝәр дүшүнсәк ки, пис достлуг бизә тә’сир ҝөстәрә билмәз, демәли елә алыныр ки, јахшы достлуг да бизә көмәк едә билмәз? Неҹә дә јанлыш фикирдир! Мүгәддәс Китаб олдугҹа ајдын сурәтдә дејир: “Һикмәтли илә отуруб-дуран һикмәт газанар, ахмагларла ајаглашан бәдбәхт олар” (Сүлејманын мәсәлләри 13:20, МКШ).
14. Дүнјанын руһуна неҹә мүгавимәт ҝөстәрә биләрик?
14 Бу дүнјанын руһуна мүгавимәт ҝөстәрмәк үчүн мүдрик инсанларла — Јеһоваја хидмәт едән кәсләрлә үнсијјәт етмәк лазымдыр. Биз ағлымызы иманымызы инкишаф етдирән фикирләрлә долдурмалыјыг. Һәвари Павел јазырды: “Доғру, еһтирамлы, әдаләтли, пак, ҹазибәли, е’тибарлы олан нә варса, әҝәр бир фәзиләт вә тә’рифә лајиг бир шеј варса, бунлары дүшүнүн” (Филипилиләрә 4:8). Ирадә азадлығына малик олдуғумуз үчүн нә барәдә дүшүнәҹәјимизи өзүмүз сечә биләрик. Ҝәлин һәмишә дәриндән дүшүнмәк үчүн бизи Јеһоваја јахынлашдыран мөвзулар сечәк.
Аллаһын руһу даһа ҝүҹлүдүр
15. Гәдим Коринфдәки мәсиһчиләр бу шәһәрин диҝәр сакинләриндән нә илә фәргләнирдиләр?
15 Бу дүнјанын руһунун алдатдығы инсанлардан фәргли олараг, Мәсиһин һәгиги давамчыларына Аллаһын мүгәддәс руһу рәһбәрлик едир. Павел Коринфдәки јығынҹаға јазырды: “Биз бу дүнјанын руһуну дејил, Аллаһдан ҝәлән Руһу гәбул етдик ки, Аллаһын бизә вердији ән’амлары дәрк едә биләк” (1 Коринфлиләрә 2:12). Гәдим Коринф шәһәри дүнјанын руһуна гәрг олмушдур. Әһалинин әксәријјәти о дәрәҹәдә әхлагсыз олмушдур ки, “коринфҹәсинә јашамаг” ифадәси “әхлагсыз давранмаг” мә’насыны вермәјә башламышды. Шејтан онларын ағылларыны кор етмишдир. Бу сәбәбдән онларын һәгиги Аллаһ һаггында тәсәввүрләри вардыса да, ҹүз’и иди (2 Коринфлиләрә 4:4). Лакин Јеһова мүгәддәс руһунун васитәсилә бә’зи коринфлиләрин ҝөзләрини ачды ки, онлар һәгигәти дәрк едә билсинләр. Аллаһын руһу илә тәшвиг вә идарә олунараг онлар һәјатларында бөјүк дәјишикликләр етдиләр, белә ки, инди Аллаһын лүтфүнү вә хејир-дуасыны ала биләрдиләр (1 Коринфлиләрә 6:9-11). Дүнјанын руһу ҝүҹлү олса да, Јеһованын руһу даһа ҝүҹлү иди.
16. Биз Аллаһын руһуну неҹә әлдә едә вә сахлаја биләрик?
16 Һәмин шеј бу ҝүн дә баш верир. Јеһованын мүгәддәс руһу Каинатда ән ҝүҹлү гүввәдир вә Јеһова бу гүввә барәдә хаһиш едәнләрин һамысына ону бол-бол верир (Лука 11:13). Лакин Аллаһын руһуна малик олмаг үчүн садәҹә дүнјанын руһуна мүгавимәт ҝөстәрмәк кифајәт дејил. Биз һәм дә мүнтәзәм олараг Аллаһын Кәламыны өјрәнмәли вә ону һәјатымызда тәтбиг етмәлијик ки, руһумуз — дүшүнҹә тәрзимиз — Аллаһын дүшүнҹә тәрзинә мүвафиг олсун. Әҝәр белә давранырыгса, Шејтанын бизим руһанилијимизә етдији һәр бир һүҹума таб ҝәтирә билмәјимиз үчүн Јеһова бизи мөһкәмләдәҹәк.
17. Лутун әһвалаты бизә неҹә тәскинлик верә биләр?
17 Мәсиһчиләр бу дүнјадан олмасалар да, бу дүнјада јашајырлар (Јәһја 17:11, 16). Бизләрдән һеч бир кәс дүнјанын руһундан бүтүнлүклә ҝизләнә билмәз, чүнки биз Аллаһ вә Онун јолларына мәһәббәти олмајан инсанларла ишләмәли вә ја јашамалы олуруг. Өзүмүзү Содомун сакинләри арасында јашајараг, онларын ганунсуз әмәлләриндән әзијјәт чәкән Лут кими һисс едирикми? (2 Петер 2:7, 8). Әҝәр беләдирсә, Лутун әһвалаты бизә тәскинлик верә биләр. Јеһова Луту мүдафиә, һәтта хилас етди, һәмин шеји бизим үчүн дә едә биләр. Севән Атамыз бизим шәраитләримизи ҝөрүр вә билир, һәм дә бизә руһанилијимизи горумаг үчүн көмәк едиб, ҝүҹ верә биләр (Мәзмур 33:18, 19). Әҝәр биз Она ҝүвәнир,е’тибар едир вә Ону чағырырыгса, вәзијјәтимизин нә гәдәр чәтин олмасына бахмајараг, О бизә дүнјанын руһуна гаршы мүгавимәт ҝөстәрмәкдә көмәк едәҹәк (Ишаја 41:10).
18. Јеһова илә мүнасибәтләримизи нәјә ҝөрә јүксәк гијмәтләндирмәлијик?
18 Аллаһдан узаглашдырылмыш вә Шејтан тәрәфиндән алдадылмыш дүнјада Јеһованын Шаһидләри олан бизләр һәгигәт билији илә хејир-дуаланмышыг. Биз, бу дүнјадакы инсанларда олмајан севинҹ вә сүлһә маликик (Ишаја 57:20, 21; Галатијалылара 5:22). Өлмәк үзрә олан бу дүнјанын руһунун артыг мөвҹуд олмајаҹағы Ҹәннәтдә ҝөзәл әбәди һәјатда јашамаг үмидини чох гијмәтләндиририк. Ҝәлин Аллаһла олан дәјәрли мүнасибәтләримизи јүксәк гијмәтләндирәк вә әҝәр бирдән ахын бизи Аллаһдан ајырарса, тә’ҹили тәдбирләр ҝөрәрәк. Ҝәлин Јеһоваја даһа чох јахынлашаг, О да бизә дүнјанын руһуна мүгавимәт ҝөстәрмәкдә көмәк едәҹәк (Јагуб 4:7, 8).
Изаһ едә биләрсинизми?
• Шејтан инсанлары һансы саһәләрдә алдатмыш вә јолдан чыхармышдыр?
• Ахын бизи Јеһовадан ајырмасын дејә нә етмәк лазымдыр?
• Дүнјанын руһунун ҝүҹлү олдуғу нәдән ҝөрүнүр?
• Аллаһын руһуну неҹә ала вә сахлаја биләрик?
[21-ҹи сәһифәдәки ҹәдвәл]
ДҮНЈАНИН МҮДРИКЛИЈИ ВӘ АЛЛАҺИН МҮДРИКЛИЈИ
Һәгигәт нисбидир — һәгигәтин нә олдуғуну инсанлар өзләри һәлл едирләр.
‘[Аллаһын] сөзү һәгигәтдир’ (Јәһја 17:17).
Јахшыны вә писи мүәјјән етмәк үчүн өз һиссләрини рәһбәр тут.
“Үрәк һәр шејдән зијадә алдадыҹыдыр вә чох чүрүкдүр” (Јеремја 17:9).
Истәдијини ет.
“Аддымларыны доғрултмаг јеријән инсанын әлиндә дејилдир” (Јеремја 10:23).
Вар-дөвләт хошбәхтлијин ачарыдыр.
“Һәр ҹүр пислијин көкү пулпәрәстликдир” (1 Тимотејә 6:10).