Һәјатында дәјишиклик баш верәркән Аллаһын руһуна бел бағла
“Чалыш ки, өзүнү Аллаһа сынагдан чыхмыш... кими тәгдим едәсән” (2 ТИМОТЕЈӘ 2:15).
1. Һансы дәјишикликләр бизим руһани сағламлығымызы сынаға мә’руз гојур?
БИЗИ әһатә едән дүнја даима дәјишмәкдәдир. Елмин вә техниканын сүр’әтлә инкишаф етдијини, ејни заманда әхлаг нормаларынын кәскин сурәтдә ашағы дүшдүјүнү ҝөрүрүк. Әввәлки мәгаләдә, мәсиһчиләрә бу дүнјанын аллаһсыз руһуна гаршы мүгавимәт ҝөстәрмәләринин зәрурилији һаггында данышмышдыг. Лакин дәјишикликләр тәкҹә бу дүнјада дејил, бизим һәјатымызда да баш верир. Биз инкишаф едир вә бөјүјүрүк. Биз варлана вә касыблаша биләр, сағламлығымызы вә севдијимиз кимсәни итирә биләрик. Бу дәјишикликләрдән бир чохуна тә’сир ҝөстәрмәк гүввәсиндә дејилик, руһани сағламлығымыз исә јени, бә’зән тәһлүкәли сынаглара мә’руз гала биләр.
2. Давудун һәјатында һансы дәјишикликләр баш верди?
2 Јессе оғлу Давудун һәјатында баш верән әсаслы дәјишикликләр аз адамын һәјатында баш вермишдир. Әввәлҹә о, һеч кимин танымадығы бир чобандан гәфләтән халг гәһрәманына чеврилди. Сонрадан о, пахыллығындан ағлыны итирән падшаһ ону, санки јыртыҹы бир һејван кими тә’гиб едәндә гачаға чеврилди. Бундан сонра Давуд падшаһ вә галиб олду. О, ағыр ҝүнаһын изтираблы нәтиҹәләрини дадды. Онун аиләсиндә фаҹиәләр вә фикир ајрылыглары баш верди. О, вар-дөвләт топлады, гоҹалды вә тагәтсизлијә дүчар олду. Лакин бу гәдәр чох дәјишиклијә бахмајараг, Давуд Јеһоваја вә Онун руһуна бел бағламаға давам едирди. О, әлиндән ҝәлән һәр шеји едирди ки, өзүнү “Аллаһа сынагдан чыхмыш” кими тәгдим етсин, Аллаһ да она хејир-дуа верирди (2 Тимотејә 2:15). Бизим шәраитләримиз Давудун шәраитләриндән фәргләнсә дә, биз ондан һәјати чәтинликләрин өһдәсиндән ҝәлмәји өјрәнә биләрик. Онун нүмунәси, һәјатда баш верән дәјишикликләрлә гаршылашан заман даима Аллаһын руһуна бел бағламағын үсулуну баша дүшмәкдә бизә көмәк едәҹәк.
Давуд тәвазөкарлығын ҝөзәл нүмунәсидир
3, 4. Һеч кимин танымадығы бир чобан, Давуд, јүксәләрәк бүтүн өлкәдә неҹә танынды?
3 Ҝәнҹ вахтларында Давуд һәтта өз аиләсиндә белә ҝөркәмли јер тутмамышдыр. Самуел пејғәмбәр Бејт-леһемә ҝәләндә, Давудун атасы сәккиз оғлундан једдисини онун јанына ҝәтирди. Давуду, ән кичик оғулу гојунлары отармаг үчүн сахладылар. Буна бахмајараг, Јеһова гәрара алмышды ки, Исраилин падшаһы мәһз Давуд олаҹаг. Давуду чөлдән чағырдылар. Сонра баш верәнләр барәдә Мүгәддәс Китабда дејилир: “Самуел јағ бујнузуну алды вә гардашлары арасында ону мәсһ етди; вә о ҝүндән башлајараг, Давудун үзәринә Рәббин Руһу гүввәтлә ҝәлди” (1 Самуел 16:12, 13). Давуд бүтүн өмрү боју бу руһа бел бағламышдыр.
4 Ҝәнҹ чобан тезликлә бүтүн өлкәдә танынмалы иди. Ону падшаһа хидмәт етмәјә вә онун үчүн мусиги ифа етмәјә дә’вәт етдиләр. О, һәтта тәҹрүбәли Исраил дөјүшчүләринин үз-үзә ҝәлмәјә горхдуглары чох гүввәтли нәһәнҝ дөјүшчү олан Голјаты өлдүрдү. Давуду сәркәрдә тә’јин етдиләр, о да филистимлиләрлә мүвәффәгијјәтлә дөјүшдү. Халг ону севирди. Ону маһныларда мәдһ едирдиләр. Бир гәдәр әввәл Саул падшаһын мәсләһәтчиси Давуду јалныз “чәнҝ чалан” бири кими дејил, һәм дә “ҹәсур бир иҝид вә ҹәнҝ әри вә сөзүндә ағыллы вә јарашыглы бир адам” кими тәсвир етмишдир (1 Самуел 16:18; 17:23, 24, 45-51; 18:5-7).
5. Давуд нәјә ҝөрә гүррәләнә биләрди вә бунун баш вермәдијини һарадан билирик?
5 Шөһрәт, јарашыглы ҝөрүнүш, ҝәнҹлик, ҝөзәл данышыг габилијјәти, мусиги ифа етмәк баҹарығы, һәрби шүҹаәт, Аллаһын лүтфү — санки Давудун һәр шеји варды. Бунлардан һәтта биринә малик олмагла да Давуд гүррәләнә биләрди; лакин о белә давранмады. Саул гызы илә евләнмәји Давуда тәклиф едәндә онун вердији ҹаваба диггәт јетирәк. Давуд сәмими тәвазөкарлыгла деди: “Мән кимәм вә һәјатым вә Исраилдә атамын нәсли нәдир ки, падшаһын күрәкәни олум?” (1 Самуел 18:18). Бу ајәјә шәрһ верәрәк бир Мүгәддәс Китаб алими демишдир: “Давуд бу сөзләрлә анлатды ки, онун нә шәхси кејфијјәтләри, нә иҹтимаи вәзијјәти, нә дә әсли падшаһын күрәкәни олмаға ҹан атмагда она зәррә гәдәр дә олсун әсас вермирди”.
6. Биз нәјә ҝөрә тәвазөкарлығы инкишаф етдирмәлијик?
6 Давуд тәвазөкар иди, белә ки, Јеһованын һәр бир ҹәһәтҹә гејри-камил инсанлардан сон дәрәҹәдә үстүн олдуғуну е’тираф едирди. Һәтта Аллаһын инсана диггәт јетирмәси Давуду һејрәтләндирирди (Мәзмур 144:3). Давуд һәм дә билирди ки, о, јалныз Јеһованын тәвазөкарлығы сајәсиндә һансыса дәрәҹәдә танынмыш ола биләрди, чүнки Јеһова ону дәстәкләмәк, мүдафиә етмәк вә гајғысына галмаг үчүн тәвазөкарлыг ҝөстәрирди. О охујурду: “Лүтфүн [“тәвазөкарлығын”, ЈД] мәни бөјүк етди” (Мәзмур 18:35). Бизим үчүн неҹә дә ҝөзәл дәрсдир! Јол вермәли дејилик ки, баҹарығымыз, наилијјәтләримиз вә ја теократик тә’јинатларымыз уҹбатындан гүрурланаг. Һәвари Павел јазырды: “Алмадығын нәјин вар? Әҝәр алдынса, нә үчүн алмамыш кими өјүнүрсән?” (1 Коринфлиләрә 4:7). Мүгәддәс руһа вә Аллаһын лүтфүнә малик олмаг үчүн биз тәвазөкарлығы инкишаф етдирмәли вә горујуб сахламалыјыг (Јагуб 4:6).
“Гисас алмајын”
7. Һансы шәраитләрдә Давудун Саул падшаһы өлдүрмәк имканы јаранды?
7 Давудун шөһрәти ону үрәјиндә мәғрурлашдырмады, амма Аллаһын руһунун тәрк етдији Саул падшаһда исә мәғрурлуг һисси мәһведиҹи пахыллыг јаратды. Давуд һеч бир пислик етмәсә дә, гачмагла хилас олмаға вә сәһрада јашамаға мәҹбур олду. Бир дәфә Давуду амансызҹасына тә’гиб едән заман Саул падшаһ билмәдән Давудун вә адамларынын ҝизләндији мағараја ҝирди. Давудун адамлары ону тәшвиг етдиләр ки, ҝуја Аллаһ тәрәфиндән верилмиш Саулу өлдүрмәк имканындан истифадә етсин. Мағаранын гаранлығында онларын Давуда нөвбәти сөзләри неҹә пычылдадыгларыны тәсәввүр етмәк олар: “Будур, Рәббин сәнә: Будур, дүшмәнини сәнин әлинә верәҹәјәм вә ҝөзүндә хош ҝөрүнәни она едәҹәксән, дедији ҝүн бу ҝүндүр” (1 Самуел 24:2-6).
8. Давуд өзүнү гисас алмагдан нәјә ҝөрә сахлајырды?
8 Давуд Саула зијан вурмагдан бојун гачырды. О, иман вә сәбир ҝөстәрәрәк, һәр шеји Јеһованын әлинә вермәјә һазыр иди. Падшаһ мағарадан чыханда Давуд онун ардынҹа чығырды: “Сәнинлә мәним арамда Рәбб һөкм етсин вә Рәбб сәндән гисасымы алсын; фәгәт мәним әлим сәнә гаршы галхмајаҹагдыр” (1 Самуел 24:12). Саулун дүзҝүн давранмадығыны билсә дә, Давуд гисас алмады; Саулу тәһгир дә етмәди вә ја онун барәсиндә тәһгиредиҹи сөзләр данышмады. Давуд башга һалларда да өзүнү гисас алмагдан сахлајырды. О, Јеһованын әдаләти бәрпа едәҹәјинә бел бағлајырды (1 Самуел 25:32-34; 26:10, 11).
9. Гаршыдурма вә ја тә’гибләрлә гаршылашаркән нәјә ҝөрә бизи инҹидәнләрә гаршы ејни ҹүр давранмалы дејилик?
9 Давуда бәнзәр тәрздә сән дә чәтин вәзијјәтләрә дүшүрсән. Мәсәлән, мәктәб вә иш јолдашларын, аилә үзвләрин вә ја иманына шәрик олмајан башга киминсә тәрәфиндән гаршыдурмаја, јахуд тә’гибә мә’руз галырсан. Онлара гаршы ејни ҹүр давранма. Јеһованы ҝөзлә, сәнә мүгәддәс руһу илә көмәк етмәси үчүн дуа ет. Ола биләр ки, сәнин јахшы давранышын иманына шәрик олмајан инсанларда тәәссүрат ојадаҹаг вә онлар имана ҝәләҹәкләр (1 Петер 3:1). Истәнилән һалда әмин ол ки, Јеһова сәнин вәзијјәтини ҝөрүр вә вахты чатанда нә исә бир тәдбир ҝөрәҹәк. Һәвари Павел јазырды: “Еј севимлиләр, гисас алмајын, анҹаг Аллаһын гәзәбинә јол верин. Чүнки јазылмышдыр: “Рәбб дејир: Гисас Мәнимдир, әвәзини Мән верәҹәјәм” (Ромалылара 12:19).
“Тәрбијәјә гулаг асын”
10. Давуд ҝүнаһы неҹә ишләдир вә ишләтдији ҝүнаһы неҹә ҝизләтмәјә чалышыр?
10 Илләр өтдү. Давуд һамы тәрәфиндән севилмәјә башлады вә бөјүк шәрәфә саһиб олду. Онун һәјаты мәшһур садигликлә фәргләнирди, о, Јеһованы иззәтләндирмәк үчүн ҝөзәл мәзмурлар гошурду. Елә тәәссүрат јарана биләрди ки, бу ҹүр инсан һеч вахт ағыр ҝүнаһ ишләтмәз. Лакин о, ҝүнаһ ишләтди. Бир дәфә падшаһ, дамдан чимән ҝөзәл бир гадыны мүшаһидә едир. О, гадын һаггында мә’лумат топлајыр. Өјрәнәндә ки, бу гадын Бат-шебадыр вә онун әри Урија мүһарибәдәдир, Давуд гадынын далынҹа адам ҝөндәрир вә онунла јахынлыг едир. Сонрадан мә’лум олду ки, гадын һамилә галыб. Бу хәбәр ашкар оларса, неҹә дә бөјүк биабырчылыг олаҹаг! Мусанын ганунуна ҝөрә, әхлагсызлыг өлүмлә ҹәзаландырылырды. Јәгин падшаһ дүшүнүр ки, бу ҝүнаһы ҝизләтмәк мүмкүн олаҹаг. О, Уријаја Јерусәлимә гајытмағы әмр едир. Давуд үмид едир ки, Урија ҝеҹәни Бат-шеба илә кечирәҹәк, лакин белә олмур. Үмидсиз вәзијјәтдә Давуд Уријаны, сәркәрдә Јоаба јаздығы мәктубла бирликдә ҝери мүһарибәјә ҝөндәрир. Мәктубда дејилдији кими Уријаны елә јерә гојмалыдырлар ки, орада ону өлдүрсүнләр. Јоаб табе олур вә Урија һәлак олур. Бат-шеба о заманлар гәбул едилдији кими матәм мүддәтини баша вурандан сонра Давуд ону өзүнә арвад едир (2 Самуел 11:1-27).
11. Натан Давуда һансы әһвалаты данышыр вә Давуд неҹә реаксија ҝөстәрир?
11 Давудун планы, санки баш тутмушду, лакин о билмәли иди ки, Јеһовадан һеч нәји ҝизләтмәк олмаз (Ибраниләрә 4:13). Ајлар өтүр вә ушаг доғулур. Онда Аллаһын ҝөстәриши илә Натан пејғәмбәр Давудун јанына ҝәлир. Пејғәмбәр падшаһа чохлу гојуна малик олан варлы бир адамын касыб адамын она әзиз олан бир гузусуну әлиндән алыб кәсдирмәси һаггында әһвалат данышыр. Бу әһвалат Давудун әдаләтлилик һиссинә ҝүҹлү тә’сир едир, лакин бу әһвалатын ҝизли мә’насынын да олдуғундан падшаһын хәбәри олмур. Давуд тез варлы адама гаршы һөкм чыхарыр. Әсәби һалда Натана дејир: “Буну едән адам өлүм оғлудур” (2 Самуел 12:1-6).
12. Јеһова Давуда һансы һөкмү чыхармышды?
12 Пејғәмбәр ҹаваб верир: “О адам сәнсән”. Давуд өзү-өзүнү мүһакимә етди. Шүбһәсиз ки, Давудун гәзәби тез сојујур вә ҝүҹлү утанҹаглыг вә дәрин кәдәр һисси илә әвәз олунур. Чашгынлыг ичиндә галараг, Натанын она Јеһованын гачылмаз һөкмүнү неҹә сөјләдијини динләјир. Тәсәлли үчүн һеч бир сөз јохдур. Давуд пислик ишләдәрәк Јеһованын сөзүнү хор ҝөрдү. О, Уријаны дүшмәнин гылынҹы илә өлдүрмәмишдими? Гылынҹ Давудун евиндән әксик олмајаҹагды. Уријанын арвадыны хәлвәти олараг алмамышдымы? Буна бәнзәр пислик онун өзү илә баш верәҹәк, лакин хәлвәти јох, инсанлар гаршысында (2 Самуел 12:7-12).
13. Јеһова Давуда тәрбијә верәндә о өзүнү неҹә апарды?
13 Хошбәхтликдән Давуд өз ҝүнаһыны инкар етмәди. О, пејғәмбәр Натана гәзәбләнмәди вә еләдији әмәлә ҝөрә ҝүнаһы башгаларынын үстүнә атмаға вә ја өзүнә бәраәт газандырмаға башламады. Ону ифша едән сөзләри динләдикдән сонра, Давуд мәс’улијјәтини е’тираф едиб деди: “Рәббә гаршы ҝүнаһ етдим” (2 Самуел 12:13). Мәзмурун 51-ҹи фәсли, онун өз ҝүнаһына ҝөрә неҹә ҝүҹлү әзаб чәкдијини вә дәрин пешманчылыг кечирдијини ҝөстәрир. О, Јеһоваја јалварырды: “Мәни өнүндән атма; вә мүгәддәс Руһуну мәндән алма”. О инанырды ки, Јеһова Өз мәрһәмәтли олдуғундан ҝүнаһлара ҝөрә “гырылмыш вә әзилмиш үрәји хор ҝөрмәз” (Мәзмур 51:11, 17). Давуд Аллаһын руһуна бел бағламаға давам едирди. Јеһова Давуду ҝүнаһынын аҹы нәтиҹәләриндән мүдафиә етмәсә дә, ону бағышлады.
14. Јеһовадан ҝәлән тәрбијәјә неҹә реаксија ҝөстәрмәлијик?
14 Биз һамымыз гејри-камилик вә һамымыз ҝүнаһ ишләдирик (Ромалылара 3:23). Нә вахтса, Давуд кими, биз дә ағыр ҝүнаһ ишләдә биләрик. Севән ата ушагларыны тәрбијәләндирдији кими, Јеһова да Она хидмәт етмәјә чалышанлары ислаһ едир. Тәрбијә фајдалы олса да, ону гәбул етмәк асан дејил. Бә’зән тәрбијә һәтта “кәдәр верән бир шеј” дә олур (Ибраниләрә 12:6, 11). Лакин биз ‘тәрбијәјә гулаг асарыгса’, Јеһова илә барыша биләрик (Сүлејманын мәсәлләри 8:33, МКШ). Јеһованын руһу бундан сонра да бизә јахшы тә’сир етсин дејә, биз ислаһ олунанда ону гәбул етмәли вә Аллаһа мәгбул олмаға чалышмалыјыг.
Ҝүвәнилә билмәјән вар-дөвләтә бел бағламајын
15. а) Бә’зи инсанлар өз вар-дөвләтләрини неҹә хәрҹләјирләр? б) Давуд өз вар-дөвләтиндән неҹә истифадә етмәји арзулајырды?
15 Давудун аиләсинин танынмыш вә ја варлы олмасына даир һеч бир шаһидлик јохдур. Лакин падшаһлыг етдији илләрдә Давуд бөјүк вар-дөвләт саһиби олмушдур. Билдијимиз кими, бир чох инсанлар пул топлајыр, хәсисликлә өз вар-дөвләтләрини артырмаг истәјир вә ја онлары худбинҹәсинә хәрҹләјирләр. Диҝәрләри үчүн пул, өзләринә шөһрәт газандырмаг үсулудур (Матта 6:2). Давуд өз вар-дөвләтиндән башга ҹүр истифадә едирди. О, Јеһоваја еһтирам ҝөстәрмәјә ҹан атырды. Давуд Јеһоваја мә’бәд тикмәк арзусуну Натана билдирди вә о истәјирди ки, һәмин вахт Јерусәлимдә “пәрдәләр ичиндә” дуран әһд сандығы һәмин мә’бәддә сахланылсын. Давудун нијјәти Јеһованын хошуна ҝәлди, лакин О, Натанын васитәсилә Давуда чатдырды ки, мә’бәди онун оғлу Сүлејман тикәҹәкдир (2 Самуел 7:1, 2, 12, 13).
16. Мә’бәдин тикилмәси үчүн Давуд нә һазырлады?
16 Давуд бу бөјүк лајиһәли тикинти үчүн материал топлады. О, Сүлејмана деди: “[Мән] Рәббин еви үчүн јүз мин талант алтун вә мин мин талант ҝүмүш вә өлчүсүз тунҹла дәмир һазырладым, чүнки лап чохдур; ағаҹлар вә дашлар да һазырладым; вә сән онларын үзәринә әлавә едә биләрсән”. Давуд өз вар-дөвләтиндән 3 000 талант гызыл вә 7 000 талант ҝүмүш ианә етмишдирa (1 Тарихләр 22:14; 29:3, 4). О, өзүнү ҝөстәрмәк үчүн әлиачыглыг етмирди, бу, онун Јеһова Аллаһа олан иманынын вә сәдагәтинин тәзаһүрү иди. Давуд вар-дөвләтинин Мәнбәјинин ким олдуғуну дәрк едәрәк, Јеһоваја дејирди: “Һәр шеј сәндәндир вә сәнин әлиндән сәнә вердик” (1 Тарихләр 29:14). Давудун сәхавәтли үрәји ону тәмиз ибадәтин мараглары уғрунда баҹардығы һәр шеји етмәјә тәшвиг едирди.
17. 1 Тимотејә 6:17-19 ајәләриндән олан нәсиһәт һәм варлылара, һәм дә касыблара неҹә тәтбиг едиләндир?
17 Ҝәлин биз дә мадди имканларымызы јахшылыг етмәк үчүн сәрф едәк. Вар-дөвләт јығмаға алудә олмагданса, Аллаһа мәгбул олмаға чалышмаг јахшыдыр, бу, һәгиги мүдриклик вә хошбәхтлик јолудур. Павел јазырды: “Индики зәманәдә варлы оланлара тапшыр ки, ловғалыг етмәсинләр вә ҝүвәнилә билмәјән вар-дөвләтә бел бағламасынлар, лакин зөвг үчүн бизә һәр шеји фираванлыгла верән Аллаһа үмид бәсләсинләр. Гој онлар хејирхаһлыг етсинләр, јахшы ишләрлә варлы олсунлар, әлиачыг вә өз малыны диҝәрләри илә бөлүшдүрмәјә һазыр олуб, өзләринә ҝәләҹәк үчүн јахшы тәмәл олаҹаг бир хәзинә топласынлар ки, һәгиги һәјата наил олсунлар” (1 Тимотејә 6:17-19). Игтисади вәзијјәтимиз һәр неҹә олса да, ҝәлин Аллаһын руһуна бел бағлајаг вә елә јашајаг ки, “Аллаһ гаршысында зәнҝин” олаг (Лука 12:21). Бизи севән сәмави Атамыза мәгбул олмагдан дәјәрли һеч нә јохдур.
Өзүнү Аллаһа сынагдан чыхмыш кими тәгдим ет
18. Давуд нәјә ҝөрә мәсиһчиләр үчүн ҝөзәл нүмунәдир?
18 Бүтүн һәјаты боју Давуд Аллаһа мәгбул олмаға чалышмышдыр. О, маһныда нида едирди: “Мәнә аҹы, еј Аллаһ, мәнә аҹы; чүнки ҹаным сәнә сығынды” (Мәзмур 57:1). О, Јеһоваја әбәс јерә бел бағламырды. Давуд ‘ҝүнләрә дојараг’ гоҹалмышдыр (1 Тарихләр 23:1). Ҹидди сәһвләринә бахмајараг, Давуду Аллаһын имана даир ҝөзәл нүмунә ҝөстәрән бир чох хидмәтчиләриндән бири кими хатырлајырлар (Ибраниләрә 11:32).
19. Өзүмүзү Аллаһа сынагдан чыхмыш кими неҹә тәгдим едә биләрик?
19 Һәјатда дәјишикликләрлә гаршылашаркән јадда сахла ки, Јеһова Давудун һадисәсиндә етдији кими, сәнә дәстәк ола, сәни мөһкәмләдә вә ислаһ едә биләр. Давуда бәнзәр тәрздә һәвари Павел дә һәјатында чох дәјишикликләр ҝөрмүшдүр. Лакин о да, Аллаһын руһуна бел бағлајараг садиг галды. О јазырды: “Мәни Мөһкәмләндирән васитәсилә һәр шеји етмәјә гадирәм” (Филипилиләрә 4:12, 13, И–93). Әҝәр биз Јеһоваја бел бағлајырыгса, Она садиг галмағымыза көмәк едәҹәкдир. О истәјир ки, биз мүвәффәг олаг. Әҝәр биз Она гулаг асыр вә Она јахынлашырыгса, ирадәсини јеринә јетирмәк үчүн бизә гүввә верәҹәкдир. Вә әҝәр һәмишә Аллаһын руһуна бел бағлајырыгса, һәм инди, һәм дә әбәдијјәт боју ‘өзүмүзү Аллаһа сынагдан чыхмыш’ кими тәгдим едә биләҹәјик (2 Тимотејә 2:15).
[Һашијә]
a Буҝүнкү өлчүләрлә, Давудун ианә етдији мәбләғ 1,2 милјарддан артыг АБШ долларына бәрабәрдир.
Неҹә ҹаваб верәрдиниз?
• Өзүмүзү мәғрурлугдан неҹә горуја биләрик?
• Нә үчүн гисас алмаг олмаз?
• Тәрбијәјә даир һансы бахыша малик олмаг лазымдыр?
• Нәјә ҝөрә вар-дөвләтә дејил, Аллаһа бел бағламаг лазымдыр?
[24 вә 25-ҹи сәһифәләрдәки шәкил]
Давуд Аллаһын руһуна бел бағлајыр вә Она мәгбул олмаға чалышырды. Сән дә бу ҹүр давранырсанмы?