«Бөјүдән Аллаһдыр!»

«Мүһүм олан әкән јахуд суваран дејил, әкиләни бөјүдән Аллаһдыр» (1 КОР. 3:7).

1. Биз һансы ишдә ‘Аллаһын әмәкдашларыјыг’?

‘АЛЛАҺЫН әмәкдашлары’. Һәвари Павел Аллаһла бир ишдә чалышан бизләри мәһз белә адландырды. (1 Коринфлиләрә 3:5-9 ајәләрини оху.) Павел шаҝирд һазырламаг ишиндән данышырды. О буну тохум сәпиб суламагла мүгајисә етди. Бу ишдә мүвәффәгијјәтли олмаг үчүн бизә Јеһованын көмәји ҝәрәкдир, чүнки, Павелин сөзләринә әсасән, «бөјүдән Аллаһдыр».

2. ‘Бөјүдәнин Аллаһ’ олдуғуну билмәк хидмәтимизә дүзҝүн јанашмағымыза неҹә көмәк едир?

² Бу садә факт хидмәтимизә дүзҝүн јанашмағымыза көмәк едир. Тәблиғ вә өјрәтмәк ишиндә нә гәдәр чалышган олсаг да, шаҝирдин руһани инкишафына ҝөрә бүтүн иззәт нәтиҹә етибарилә Јеһоваја мәхсусдур. Нә үчүн? Чүнки бизләрдән һеч ким инкишаф просесини ахыра гәдәр баша дүшә билмир, галды ки ону идарә етсин. Сүлејман падшаһ да ејни фикри сөјләмишди: «Һәр шеји јарадан Аллаһын ишләриндән... хәбәрсизсән» (Ваиз 11:5).

3. Тохум сәпмәклә шаҝирд һазырламаг иши арасында һансы үмуми ҹәһәтләр вар?

³ Шаҝирдләрин руһани инкишаф просесини анлаја билмәмәјимиз бизи мәјус етмәлидирми? Гәтијјән. Әксинә, бунун сајәсиндә ишимиз даһа да мараглы олур. Сүлејман падшаһ демишди: «Тохумуну сәһәр вахты сәп, ахшама гәдәр дә әлин бош дурмасын. Чүнки билмирсән ки, әввәлки мәһсулдар олаҹаг јохса сонракы јахуд һәр икиси бирликдә» (Ваиз 11:6). Әкинчи тохум сәпәндә онун һарада вә ја үмумијјәтлә битиб-битмәјәҹәјини билмир. Чох шеј биздән асылы дејил. Ејни шеји шаҝирд һазырламаг иши барәдә дә демәк олар. Иса «Маркын Мүждәси»нин 4-ҹү фәслиндә јазылан ики мәсәли чәкмәклә диггәтимизи бу мәгама јөнәлтди. Ҝәлин ҝөрәк онлардан нә өјрәнә биләрик.

Мүхтәлиф торпаг нөвләри

4, 5. Исанын тохум сәпәләјән әкинчинин мәсәлини гысаҹа нәгл един.

⁴ Марк 4:1-9 ајәләриндә Иса тохум сәпәләјән әкинчидән данышыр: «Динләјин! Будур, бир әкинчи тохум сәпмәјә чыхды. Сәпәркән тохумлардан бәзиси јол кәнарына дүшдү вә гушлар ҝәлиб ону димдикләдиләр. Бәзиси торпағы чох олмајан дашлыға дүшдү вә тез битди, чүнки торпағын дәринлији јох иди; ҝүнәш доғанда солду вә көкү олмадығына ҝөрә гуруду. Бәзиси тиканлар арасына дүшдү. Тиканлар чыхыб ону боғдулар вә о, сәмәрә вермәди. Башгалары да бәрәкәтли торпаға дүшдү. Бөјүјүб чохалдылар вә сәмәрә вердиләр, бәзиси отуз, бәзиси алтмыш, бәзиси исә јүз гат сәмәрә верди».

⁵ Гәдимдә тохумлары әсас етибарилә сәпәләјәрәк әкирдиләр. Әкинчи тохумлары әтәјиндә, јахуд бир кисәдә дашыјырды вә әли илә ону һәр тәрәфә сәпәләјирди. Демәли, бу мәсәлдәки әкинчи тохуму гәсдән мүхтәлиф нөв торпагларда әкмир. Сәдәҹә онун сәпәләдији тохумлар мүхтәлиф торпаглара дүшүр.

6. Иса әкинчи мәсәлини неҹә изаһ етди?

⁶ Бу мәсәлин мәнасы бизим үчүн гаранлыг дејил. Марк 4:14-20 ајәләриндән ҝөрдүјүмүз кими, Иса ону изаһ едир: «Әкинчи Аллаһын кәламыны сәпир. Кәламын сәпилдији јолун кәнарындакылар бунлардыр: ешитдикләри заман, дәрһал шејтан ҝәлир вә үрәкләринә сәпилән кәламы ҝөтүрүб апарыр. Беләҹә дә, дашлыг јерләрә сәпиләнләр кәламы ешидиб дәрһал ону севинҹлә гәбул едәнләрдир; лакин онларда көк јохдур, онлар сәбатсыздырлар. Сонралар бу кәламдан өтрү сыхынты вә ја әзијјәт баш вердикдә, дәрһал бүдрәјирләр. Тиканлар арасында сәпиләнләр онлардыр ки, кәламы ешидирләр, лакин дүнјанын гајғылары, зәнҝинлијин алдадыҹылығы вә башга шејләрә һәвәс араја ҝириб кәламы боғур вә кәлам сәмәрәсиз олур. Бәрәкәтли торпаға сәпилмиш оланлар исә, кәламы ешидиб гәбул едәнләрдир. Вә бәзиси отуз, бәзиси алтмыш, бәзиси исә јүз гат сәмәрә верәр».

7. Тохум вә мүхтәлиф нөв торпаглар нәји тәмсил едир?

⁷ Диггәт јетир ки, Иса мүхтәлиф нөв тохумлардан истифадә едилдијиндән јох, сәмәрәси фәргли олан вә мүхтәлиф торпаглара дүшән бир нөв тохумдан данышыр. Торпағын биринҹи нөвү тапдаланмыш вә бәрк иди, икинҹиси дашлы, үчүнҹүсүнү тиканлар басмышды, дөрдүнҹүсү исә јахшы сәмәрә верән бәрәкәтли торпаг иди (Лука 8:8). Тохум нәји тәмсил едир? Бу, Аллаһын Кәламында јазылан Падшаһлыг һаггында хәбәрдир (Мат. 13:19). Бәс мүхтәлиф нөв торпаглар нәји тәмсил едир? Үрәкләри бир-бириндән фәргли олан инсанлары. (Лука 8:12, 15 ајәләрини оху.)

8. а) Әкинчи кими тәмсил едир? б) Нәјә ҝөрә инсанлар тәблиғә мүхтәлиф ҹүр һај верирләр?

⁸ Бәс әкинчи кими тәмсил едир? Падшаһлыг һаггында хош хәбәри тәблиғ едәнләри — Аллаһын әмәкдашларыны. Павел вә Аполлос кими, онлар әкир вә суварыр. Онлар сәјлә чалышсалар да, нәтиҹәләр мүхтәлиф олур. Нәјә ҝөрә? Чүнки хош хәбәри ешидән инсанларын үрәкләри бир-бириндән фәрглидир. Исанын мәсәлиндән ҝөрүндүјү кими, әкдији тохумун неҹә сәмәрә верәҹәји әкинчидән асылы дејил. Буну билмәк һәр биримиз үчүн, хүсусилә дә чох илләр, ола билсин, онилликләр әрзиндә чалышан вә хидмәтләри сәмәрәсиз кими ҝөрүнән садиг баҹы-гардашларымыз үчүн неҹә дә тәсәлливериҹидир!a Нәјә ҝөрә белә демәк олар?

9. Һәвари Павел вә Иса һансы тәсәлливериҹи фикри вурғуламышлар?

⁹ Әкинчинин өз ишини виҹданла ҝөрүб-ҝөрмәмәси онун зәһмәтинин нәтиҹәси илә өлчүлмүр. «Һәр бири өз әмәјинә ҝөрә мүкафат алаҹагдыр» сөзләрини јазмагла, Павел мәһз буну нәзәрдә тутурду (1 Кор. 3:8). Мүкафат әмәјин нәтиҹәсинә ҝөрә јох, әмәјә ҝөрә верилир. Иса да бу фикрә диггәт јетирмишди. Бир дәфә шаҝирдләри тәблиғдән севинҹ ичиндә гајытмышдылар. Исанын адыны чәкәндә ҹинләрин онлара итаәт етмәси бу севинҹә сәбәб олмушду. Амма Иса шаҝирдләринә деди: «Руһларын сизә итаәт етмәсинә севинмәјин, лакин сизин адларынызын ҝөјләрдә јазылдығына севинин» (Лука 10:17-20). Һәтта әкинчи өз әмәјини сәмәрәсиз кими ҝөрсә дә, бу онун диҝәрләриндән аз чалышган вә јахуд иманынын аз олмасы демәк дејил. Нәтиҹә, әсас етибары илә, кәламы ешидән инсанын үрәјинин вәзијјәтиндән асылыдыр. Әввәл-ахыр тохуму бөјүдән Аллаһдыр!

Мәсулијјәти кәламы ешидәнләр дашыјыр

10. Кәламы ешидән инсанын үрәјинин бәрәкәтли олуб-олмајаҹағыны нә мүәјјән едир?

¹⁰ Кәламы ешидәнләр һаггында нә демәк олар? Онларын хош хәбәрә һај вериб-вермәјәҹәкләри габагҹадан мүәјјән олунубму? Хејр. Үрәкләринин бәрәкәтли торпаг олуб-олмајаҹағы онларын өзләриндән асылыдыр. Инсанын үрәјинин вәзијјәти ја јахшылыға, ја да пислијә доғру дәјишә биләр (Ром. 6:17). Иса өз мәсәлиндә деди ки, бәзиләри кәламы «ешитдикләри заман» Шејтан ҝәлир вә ону ҝөтүрүб апарыр. Амма бу һеч дә һәмишә белә олмур. Јагуб 4:7 ајәсиндә мәсиһчиләр тәшвиг олунурлар: «Иблисә исә гаршы дурун вә о, сиздән гачаҹагдыр». Сонра Иса, әввәлҹә кәламы севинҹлә гәбул едән, амма ‘көкләри олмадыглары’ үчүн бүдрәјән инсанлар һаггында данышыр. Лакин Аллаһ хидмәтчиләрини ‘Мәсиһин мәһәббәтинин нә гәдәр ҝениш, узун, уҹа вә дәрин олдуғуну баша дүшмәк’ үчүн ‘көк салыб, тәмәл гојмаға’ тәшвиг едир (Ефес. 3:17-19; Колос. 2:6, 7).

11. Гајғылар вә зәнҝинлик кәламы боғмасын дејә хош хәбәри ешидән инсан нә едә биләр?

¹¹ Һәмчинин кәламы ешидән, анҹаг ‘дүнјанын гајғыларынын, зәнҝинлијин алдадыҹылығынын’ араја ҝириб кәламы боғмасына јол верән инсанлар да вар (1 Тим. 6:9, 10). Онлар бунун гаршысыны неҹә ала биләрләр? Бу суалын ҹавабыны һәвари Павелин сөзләриндән ҝөрмәк олар: «Һәјатыныз пулпәрәстликдән азад олсун, өзүнүздә олан шејләрлә кифајәтләнин; чүнки О Өзү демишдир: “Сәни һеч бурахмајаҹағам вә әсла тәрк етмәјәҹәјәм”» (Ибр. 13:5).

12. Нәјә ҝөрә бәрәкәтли торпаға дүшән тохумун сәмәрәси мүхтәлиф олур?

¹² Иса мәсәлин сонунда дејир ки, бәрәкәтли торпаға дүшән тохумун «бәзиси отуз, бәзиси алтмыш, бәзиси исә јүз гат сәмәрә верәр». Кәлама һај верәнләрин үрәјинин вәзијјәти јахшы олса да вә онлар сәмәрә версәләр дә, тәблиғ ишиндә һәр бири өз шәраитиндән асылы олараг әлиндән ҝәләни едир. Мәсәлән, гоҹалыг, јахуд үзүҹү хәстәлик инсанын тәблиғ ишини мәһдудлашдыра биләр. (Марк 12:43, 44 ајәләри илә мүгајисә ет.) Демәк олар ки, әкинчидән чох аз шеј асылыдыр, лакин о, Јеһованын бу тохуму бөјүтдүјүнү ҝөрәндә севинир. (Мәзмур 126:5, 6 ајәләрини оху.)

Јатан әкинчи

13, 14. а) Исанын тохум сәпән инсан һаггындакы мәсәлини гысаҹа данышын. б) Әкинчи кими тәмсил едир вә тохум нәдир?

¹³ Марк 4:26-29 ајәләриндә әкинчи һаггында башга бир мәсәли охујуруг: «Аллаһын Сәлтәнәти јерә тохум сәпән адам кимидир. Ҝеҹә-ҝүндүз јатар, дурар [«ҝеҹә јатар, ҝүндүз дурар», ЈД] вә тохум битәр, бөјүјәр, өзү исә бунун неҹә олдуғуну билмәз. Чүнки торпаг өз-өзүнә әввәл оту, сонра сүнбүлү, даһа сонра исә сүнбүлдә долу дәни верир. Мәһсул јетишдији заман, дәрһал орағы ишә салар. Чүнки бичин вахты ҝәлмишдир».

¹⁴ Әкинчи кимдир? Бәзи христиан илаһијјатчылары фикирләширләр ки, бу, Исанын өзүдүр. Лакин демәк олармы ки, Иса јатыр вә тохумун неҹә бөјүдүјүнү билмир? Әлбәттә, Иса бөјүмә просесиндән бихәбәр дејил! Өнҹә чәкилән мәсәлдә олдуғу кими, бу мәсәлдәки әкинчи дә, сәјлә тәблиғ едәрәк Падшаһлыг тохуму әкән һәр бир тәблиғчини ајры-ајрылыгда тәмсил едир. Сәпилән тохум исә онларын тәблиғ етдикләри кәламдырb.

15, 16. Иса әкинчи һаггындакы мәсәлдә һәрфи вә руһани инкишафла бағлы һансы фикри вурғулады?

¹⁵ Исанын дедијинә әсасән, әкинчи ‘ҝеҹә јатыр, ҝүндүз дурур’. Бу онун өз ишинә лагејд јанашдығына ишарә етмир. Садәҹә олараг бу сөзләрлә әксәр инсанларын ҝүндәлик һәјаты тәсвир едилир. Бу ајәдә мүәјјән вахт әрзиндә давам едән арамсыз просесдән — ҝүндүз ишләмәкдән вә ҝеҹә јатыб истираһәт етмәкдән данышылыр. Һәмин вахт баш верәнләри изаһ едәрәк Иса деди: «Тохум битәр, бөјүјәр, өзү [әкинчи] исә бунун неҹә олдуғуну билмәз». Бурада бөјүмә просесинин «өз-өзүнә» баш вердији вурғуланырc.

¹⁶ Иса бурада нәји нәзәрдә тутурду? Фикир вер ки, бурада бөјүмә просеси вә онун тәдриҹән баш вердији вурғуланыр. «Чүнки торпаг өз-өзүнә әввәл оту, сонра сүнбүлү, даһа сонра исә сүнбүлдә долу дәни верир» (Марк 4:28). Тохум јаваш-јаваш вә мүхтәлиф мәрһәләләрлә бөјүјүр. Онун бөјүмәсини тезләшдирмәк гејри-мүмкүндүр. Ејни шеји шаҝирдләрин руһани инкишафы һаггында да демәк олар. Һәгигәтин кәлама һај верәнләрин үрәјиндә бөјүмәси Јеһованын јол вердији сәвијјәдә тәдриҹән баш верир (Һәв. иш. 13:48; Ибр. 6:1, 2).

17. Һәгигәт тохуму сәмәрә верәндә кимләр севинир?

¹⁷ Әкинчи «мәһсул јетишдији заман» бичиндә неҹә иштирак едир? Јеһова Падшаһлыг һаггында һәгигәти јени шаҝирдләрин үрәјиндә јетишдирир вә онлар јеткинлијин мүәјјән сәвијјәсинә чатанда Аллаһа мәһәббәтләриндән ирәли ҝәләрәк өз һәјатларыны Она һәср едирләр. Аллаһа һәср олунмаларыны вәфтизлә ҝөстәрирләр. Јеткинлијә доғру ҝедән гардашлар јығынҹагда јаваш-јаваш даһа чох тапшырыглар алырлар. Падшаһлығын сәмәрәсини әкинчи илә јанашы, шаҝирдин бөјүмәси үчүн тохум сәпмәјән диҝәр тәблиғчиләр дә бичир. (Јәһја 4:36-38 ајәләрини оху.) Һәгигәтән дә, ‘әкән дә, бичән дә бирликдә севинир’.

Бизим үчүн дәрс

18, 19. а) Исанын мәсәлләрини арашдырмағымыз сәни неҹә мөһкәмләндирди? б) Нөвбәти мәгаләдә сөһбәт нәдән ҝедәҹәк?

¹⁸ «Маркын Мүждәси»нин 4-ҹү фәслиндә јазылан ики мәсәлдән нә өјрәндик? Биз ајдын ҝөрүрүк ки, бизә ваҹиб иш — Падшаһлыг тохумуну сәпмәк һәвалә едилиб. Һеч вахт бәһанәләрин, проблемләрин вә чәтинликләрин бизи бу ишдән узаглашдырмасына јол вермәмәлијик (Ваиз 11:4). Биз Аллаһын әмәкдашлары олмаг кими ҝөзәл шәрәфә лајиг ҝөрүлмүшүк. Падшаһлыг һаггында һәгигәтин үрәкләрдә бөјүмәсинә јол верән јалныз Јеһовадыр. О буну һәм бизим сәјимизә, һәм дә хош хәбәри гәбул едән инсанларын сәјләринә хејир-дуа вермәклә едир. Биз анлајырыг ки, киминсә руһани инкишафыны сүрәтләндирмәк һеч биримизин әлиндә дејил. Бөјүмә ләнҝијәндә вә јахуд баш вермәјәндә руһдан дүшмәмәлијик. Мүвәффәгијјәтимизин Јеһоваја сәдагәтимизлә вә бизә һәвалә олунан ‘Сәмави Сәлтәнәт һаггында олан Мүждәни халгларын һамысына тәблиғ’ етмәк ишини шәрәф саныб-санмамағымызла мүәјјән едилмәсини билмәк неҹә дә тәсәлливериҹидир! (Мат. 24:14).

¹⁹ Иса јени шаҝирдләрин бөјүмәси вә Падшаһлыг ишинин ҝенишләнмәси һагда даһа нәји өјрәтмишди? Бу суалын ҹавабыны Мүждәләрдә јазылан диҝәр мәсәлләрдә тапмаг олар. Онлардан бәзиләри нөвбәти мәгаләдә арашдырылаҹаг.

[Һашијәләр]

Јадыныздадырмы?

• Тохум сәпмәклә Падшаһлыг һаггында хош хәбәри бәјан етмәк арасында һансы охшарлыглар вар?

• Јеһованын нөгтеји-нәзәринҹә һансы тәблиғчи садиг сајылыр?

• Иса һәрфи вә руһани инкишаф арасында һансы охшарлыглары вурғуламышды?

• Нә үчүн ‘әкән дә, бичән дә бирликдә севинир’?

[13-ҹү сәһифәдәки шәкилләр]

Иса нәјә ҝөрә Аллаһын Падшаһлығыны тәблиғ едәнләри тохум сәпән әкинчи илә мүгајисә етди?

[15-ҹи сәһифәдәки шәкилләр]

Бәрәкәтли торпагла мүгајисә едиләнләр Падшаһлығын тәблиғиндә иштирак етмәк үчүн әлләриндән ҝәләни едирләр

[16-ҹы сәһифәдәки шәкилләр]

Бөјүдән Аллаһдыр