Рәһбәрлик Шурасынын мәктубу
Һөрмәтли баҹы вә гардашлар!
СИЗӘ јазмаг неҹә дә хошдур! Сизи түкәнмәјән мәһәббәтинизә вә фәдакарлығыныза ҝөрә тә’рифләмәк истәјирик. Өтән хидмәт илиндә ҝөзәл наилијјәтләр әлдә едилмишдир: инсанлара тәблиғ едәрәк вә тә’лим верәрәк, онлары Јеһоваја јахынлашмаға дә’вәт едәрәк јенидән хидмәтдә милјарддан артыг вахт кечирдик. Мәҝәр гүдрәтли Аллаһымыз вә сәмави Атамызла әмәкдашлыг етмәк шәрәф дејилми? (1 Кор. 3:9).
Гаршыда ҝөрәҹәјимиз ишләрә нәзәр саланда әминик ки, сиз, Аллаһын Мүгәддәс Китабда хатырладылан хидмәтчиләрини фәргләндирән сә’ј вә иманла чалышмаға давам едәҹәксиниз. Мәсәлән, һәвари Павел Падшаһлығын мәнафеји уғрунда әлиндән ҝәлән һәр шеји етмәјә һазыр иди. Ҝөрүндүјү кими, о, Коринфдә јашајан мәсиһчиләрә биринҹи мәктубуну, Ефесдә јашадығы ахырынҹы ил әрзиндә јазмышдыр. О, ән зәрури планлары һаггында бунлары јазмышдыр: “Ефесдә исә пентикост бајрамына гәдәр галаҹағам. Чүнки мәним гаршымда бөјүк вә фәалијјәт үчүн ҝениш гапы ачылмышдыр вә мәнә гаршы чыханлар да чохдур” (1 Кор. 16:8, 9).
Павел Македонија вә Коринф шәһәрләринә сәјаһәт етмәји планлашдырмышды, лакин диггәт јетирди ки, Ефес шәһәриндә бир аз да артыг галарса, даһа чох фајдалы иш ҝөрә биләр. Павел вәзијјәти нәзәрә алды: Ефес шәһәриндә галаҹағы тәгдирдә Падшаһлығын мәнафеји уғрунда даһа чох ишләр ҝөрә биләҹәјини дәрк едәрәк, планларыны дәјишди. Онун гаршысында “фәалијјәт үчүн ҝениш гапы ачылмышдыр” вә Павел бу имкандан истифадә етмәк истәјирди.
Павели бөјүк ишләр ҝөзләјирди: о, һәм тәблиғ етмәли, һәм дә Ефес јығынҹағынын гајғысына галмалы иди. Бир гәдәр сонра Павел һәмән јығынҹағын ағсаггалларына јазмышды: “Сизә фајдалы олан һеч бир шеји бәјан етмәкдән, истәр ачыгҹа, истәрсә дә евдән-евә сизә тә’лим етмәкдән чәкинмәдим. Аллаһа төвбә вә Рәббимиз Иса Мәсиһә иман етмәји јәһудиләрә вә јунанлара ҹидди тапшырдым” (Һәв. иш. 20:20, 21).
Ејни тәрздә дә, әзиз баҹы вә гардашлар, сизләрдән әксәријјәти гаршысында ачылан имканлардан истифадә етмишдир. Өтән хидмәт илиндә орта һесабла 798 938 баҹы вә гардашларымыз ишләрини елә планлашдырмышдылар ки, пионер хидмәтиндә иштирак едә билсинләр. Бә’зиләриниз миссионер кими хидмәт етмәк үчүн чох узаг әразиләрә ҝетмисиниз. Сиз хош хәбәри сә’јлә тәблиғ едир вә јығынҹаглары мөһкәмләдирсиниз. Сизләрдән бә’зиләри әҹнәби дил өјрәниб ки, әразиләриндә јашајан әҹнәби дилли инсанлара тәблиғ етсинләр. Башгалары индијәдәк тә’јин олунмамыш әразиләрдә тәблиғ едир вә ја тәблиғчиләрә еһтијаҹ дујулан әразиләрдә хидмәт едирләр. Бә’зиләри ашкар етмишләр ки, мәктәбдә, иш јериндә, һәмчинин јахшы шаһидлик верилмәси мүмкүн олан һалларда, мәсәлән, телефон васитәсилә үнсијјәт заманы “фәалијјәт үчүн ҝениш гапы” ачылмышдыр. Үмумдүнја һесабаты ҝөстәрир ки, Аллаһын мүхтәлиф јашлы хидмәтчиләри һарада олмаларындан асылы олмајараг, Мүгәддәс Китаб һәгигәтләрини һамы илә бөлүшмәјә сә’јлә имкан ахтарыр вә тапырлар.
Әмин олун ки, Јеһова сизин әмәјинизи ҝөрүр вә јүксәк гијмәтләндирир. Мүгәддәс Китабда јазылыр: “Аллаһ һагсыз дејилдир ки, сизин ишинизи... Онун ады наминә ҝөстәрдијиниз мәһәббәти унутсун” (Ибр. 6:10). Ајыг олмаға давам един ки, һәгиги Аллаһ һаггында һарада вә нә заман шаһидлик етмәјин мүмкүн олдуғуну ҝөрә биләсиниз. Ким исә хидмәтдәки фәалијјәтини артыра биләр. Бизим һамымыз хидмәтимизи баҹардыгҹа даһа кејфијјәтли етмәјә чалышмалыјыг.
Тәблиғ едәркән, сөзсүз ки, мүгавимәтлә гаршылашырыг. Јадыныза салын ки, гаршысында “фәалијјәт үчүн ҝениш гапы” ачылдығы һагда јаздыгдан сонра, Павел әлавә етмишдир: “Мәнә гаршы чыханлар да чохдур”. Павелә гаршы чыханлар һәм јәһудиләр, һәм дә диҝәр халгларын нүмајәндәләри идиләр вә она ја ачыг һүҹум едир, ја да һијлә илә тәлә гурурдулар (Һәв. иш. 19:24-28; 20:18, 19).
Бу ҝүн биз дә ејни вәзијјәтлә гаршылашырыг. Пис системин ахыры јахынлашыр, буна ҝөрә дә мүгавимәтин ҝүҹләнмәси бизи тәәҹҹүбләндирмир. Шејтан “бөјүк гәзәблә” долудур вә гәзәбини илк нөвбәдә Аллаһын хидмәтчиләринин үзәринә төкүр (Вәһј 12:12). Һеч заман унутмајын ки, “бу дүнјанын рәиси” Шејтандыр. Иса шаҝирдләринә демишдир: “Әҝәр дүнјадан олсајдыныз, дүнја ондан оланы севәрди. Һалбуки дүнјадан дејилсиниз, Мән сизи дүнјадан сечдим; бунун үчүн дүнја сизә нифрәт едир” (Јәһ. 14:30; 15:19).
Биз јол вермәли дејилик ки, ким исә Аллаһа олан иманымызы вә ја тәблиғ хидмәтиндәки фәалијјәтимизи зәифләтсин. Баша дүшүрүк ки, бундан сонра да ачыг һүҹумларла вә бизә гаршы һазырланмыш гәсдләрлә гаршылашаҹағыг. Буна бахмајараг, Исанын Шејтаны вә онун тәрәфдарларыны Јеһованын тә’јин етдији вахтда мәһв едәҹәјини дәгиг биләрәк, Падшаһлыг һаггында хош хәбәри тәблиғ етмәјә давам едәҹәјик. Дүшмәнләр Павели сусдура билмәдиләр. Онлар Јеһованын мүасир хидмәтчиләрини дә сусдура билмәјәҹәкләр. Шејтанын гәзәби вә дүнјанын нифрәти Јеһованын ҝүҹлү руһунун Онун халгы арасында фәалијјәт ҝөстәрмәсинә мане ола билмәјәҹәк. Хош хәбәри тәблиғ едәнләрин јени јүксәк сајынын 6 304 645-ә чатдығыны ҝөрмәк неҹә дә севиндириҹидир!
Дуа едирик ки, бундан сонра да Јеһованын әзәмәтли Падшаһлығынын мәнафеји наминә сә’јлә чалышасыныз. Јеһова Аллаһа сизинлә бирликдә “бир үрәклә” хидмәт едәрәк, сизи өз мәһәббәтимизә әмин едирик (Тсеф. 3:9).
Сизин гардашларыныз,
Јеһованын Шаһидләринин Рәһбәрлик Шурасы