Јеһованын Кәламы ҹанлыдыр
Коринфлиләрә биринҹи вә икинҹи мәктубдан диггәтәлајиг фикирләр
ҺӘВАРИ Павел Коринф јығынҹағынын руһани вәзијјәтиндән чох нараһатдыр. Гардашларын арасында фикир ајрылығынын олмасы онун гулағына чатыб. Јығынҹагда әхлагсызлыға ҝөз јумулур. Һәмчинин гардашлар Павелә мәктуб јазыблар вә орадакы бәзи мәсәләләрә ајдынлыг ҝәтирмәји хаһиш едирләр. Беләликлә, Павел тәхминән ерамызын 55-ҹи илиндә үчүнҹү миссионер сәјаһәти заманы Ефесдә оларкән коринфлиләрә ики мәктубундан биринҹисини јазыр.
Ҝөрүнүр, икинҹи мәктуб биринҹи мәктубун давамы кими бир нечә ајдан сонра јазылыб. Биринҹи әсрдә Коринф јығынҹағында, еләҹә дә ондан кәнарда мөвҹуд олан вәзијјәт бир чох саһәләрдә бизим ҝүнләрдәки вәзијјәтә охшадығы үчүн биз дә Павелин коринфлиләрә јаздығы мәктубларында өзүмүзә фајдалы мәсләһәтләр тапа биләрик (Ибр. 4:12).
‘АЈЫГ ОЛУН, САБИТ ДУРУН, МӨҺКӘМ ОЛУН
«Һамыныз ејни дүшүнҹәдә олун», — дејә Павел чағырыр (1 Кор. 1:10). Мәсиһчи хүсусијјәтләрини јетишдирмәк үчүн «Иса Мәсиһдән башга бир тәмәл» јохдур (1 Кор. 3:11-13). Јығынҹагдакы әхлагсыз адам һаггында Павел дејир: «Пис адамы сыраныздан кәнара атын» (1 Кор. 5:13). О һәмчинин гејд едир ки, «бәдән... әхлагсызлыг үчүн дејил, лакин Рәбб үчүндүр» (1 Кор. 6:13).
Гардашларын она ‘јаздыгларына ҝәлинҹә’, Павел евлилијә вә субајлыға даир практики мәсләһәтләр верир (1 Кор. 7:1). Башчылыг принсипини, мәсиһчи ҝөрүшләринин кечирилмә гајдасыны вә дирилмәнин әсаслы олдуғуну мүзакирә етдикдән сонра Павел чағырыр: «Ајыг олун, иманда сабит дурун, мәрданә вә мөһкәм олун» (1 Кор. 16:13).
Мүгәддәс Китаб суалларына ҹаваблар:
1:21 — Доғруданмы Јеһова иман едәнләри хилас етмәк үчүн ‘ағылсызлыгдан’ истифадә едир? Тәбии ки, јох! «Дүнја... өз мүдриклији илә Аллаһы танымадығы үчүн» Аллаһын инсанлары хилас етмәк үчүн истифадә етдији үсул бу дүнјанын ҝөзүндә ағылсызлыгдыр (Јәһ. 17:25).
5:5 — Пис «адамы, бәдәнинин һәлак олмасы үчүн шејтана тәслим етмәлисиниз ки, Рәббимиз Иса Мәсиһин ҝүнүндә... [«руһ», ЈД] хилас олсун» сөзләринин мәнасы нәдир? Ҹидди ҝүнаһ ишләдиб төвбә етмәдијинә ҝөрә јығынҹагдан кәнар едилән адам јенидән Шејтанын пис дүнјасынын һиссәсинә чеврилир (1 Јәһ. 5:19). Буна ҝөрә онун һаггында дејилир ки, о, Шејтана тәслим едилир. Белә адамын јығынҹагдан кәнар едилмәси сајәсиндә јығынҹаг пис тәсирдән тәмизләнир. Буна ҝөрә дә руһ, јәни јығынҹагда үстүнлүк тәшкил едән әһвал-руһијјә горунуб сахланылыр (2 Тим. 4:22).
7:33, 34 — Евли инсанларын гајғы чәкдији ‘дүнјәви ишләр’ нәдир? Павел евли мәсиһчиләрин ҝүндәлик гајғыларындан данышырды. Бураја јемәк, палтар вә ев дахилдир. Лакин о, мәсиһчиләрин узаг дурдуглары бу дүнјанын пис ишләрини нәзәрдә тутмурду (1 Јәһ. 2:15-17).
11:26 — Исанын өлүмү илдә нечә дәфә вә нә вахтадәк гејд едилмәлидир? Павел Исанын өлүмүнү нә гәдәр тез-тез гејд етмәк лазым олуб-олмадығындан данышмырды. Бурада «һәр заман» кими тәрҹүмә олунан јунан ифадәси «нә заман ки» мәнасыны верир. Садәҹә олараг, Павел мәсһ олунмуш мәсиһчиләрин Хатирә Ҝеҹәсиндә символлардан гәбул едән заман ‘Рәббин өлүмүнү елан етмиш олдугларындан’ данышырды. Бу исә илдә бир дәфә — 14 нисанда баш верир. Мәсһ олунмушлар буну ‘онун ҝәлишинәдәк’, јәни ҝөјләр һәјатына дирилдиләнәдәк етмәлидирләр (1 Салон. 4:14-17).
13:13 — Мәһәббәт һансы мәнада иман вә үмиддән үстүндүр? ‘Үмид едилән шејләрә етимад’ ҝерчәкләшәндә артыг иман вә үмидин әввәлки кими бөјүк ролу олмајаҹаг (Ибр. 11:1). Мәһәббәтин иманла үмидин үзәриндә үстүнлүјү ондадыр ки, о, әбәдидир.
15:29 — ‘Өлүләр үчүн вәфтиз олунмаг’ нә демәкдир? Павел демәк истәмирди ки, дири инсанлар, вәфтиз олунмамыш өләнләрин әвәзинә вәфтиз олунмалыдырлар. Бурада о, руһла мәсһ едилмиш мәсиһчиләрин өләнәдәк Аллаһа садиг галмасы вә ҝөјләр һәјатына дирилдилмәси барәдә данышырды.
Бизим үчүн ибрәт дәрсләри:
1:26-31; 3:3-9; 4:7. Өзүмүзлә дејил, тәвазөкарлыгла Јеһова илә өјүнсәк, јығынҹагда сүлһ һөкм сүрәҹәк.
2:3-5. Јунаныстанын фәлсәфә вә елм мәркәзи олан Коринфдә тәблиғ едән Павели динләјиҹиләрини инандыра билиб-билмәјәҹәји суалы нараһат едә биләрди. Амма о, һансыса чатышмамазлығын, јахуд горхунун Аллаһын она һәвалә етдији хидмәти иҹра етмәјә манечилик јаратмасына јол вермирди. Биз дә чәтин вә өјрәшмәдијимиз шәраитин Аллаһын Падшаһлығы һагда хош хәбәри бәјан етмәјимизә әнҝәл төрәтмәсинә јол вермәмәлијик. Павел кими биз дә әминликлә Јеһованын көмәјинә архалана биләрик.
2:16. «Мәсиһин ағлына» малик олмаг — онун дүшүнҹә тәрзини билмәк, онун кими дүшүнмәк, хасијјәтинә бәләд олмаг вә нүмунәсини изләмәк демәкдир (1 Пет. 2:21; 4:1). Буна ҝөрә Исанын һәјат вә хидмәтини диггәтлә арашдырмаг олдугҹа ваҹибдир.
3:10-15; 4:17. Тәлим вермәк вә шаҝирд һазырламаг баҹарығымызы јохламалы вә јахшылашдырмалыјыг (Мат. 28:19, 20). Јахшы өјрәтмириксә, Мүгәддәс Китабы өјрәтдијимиз инсан иман сынағындан чыха билмәз вә бу итки бизим үчүн о гәдәр ағыр ола биләр ки, өз хиласымыз да «атәш ичиндән кечәр кими» (И–93) олаҹаг.
6:18. ‘Ҹинси әхлагсызлыгдан чәкинмәк’ јалныз порнеја алтында нәзәрдән тутулан әмәлләрдән дејил, һәм дә порнографијадан, әхлаги натәмизликдән, сексуал фантазијалардан вә ешгбазлыгдан, бир сөзлә, әхлагсызлыға апаран һәр бир шејдән гачмаг демәкдир (Мат. 5:28; Јаг. 3:17).
7:29. Евли инсанлар диггәт јетирмәлидирләр ки, Падшаһлығын марагларыны икинҹи јерә гојаҹаг дәрәҹәдә өзләринә алудә олмасынлар.
10:8-11. Исраиллиләр Мусаја вә Һаруна гаршы дејинәндә Јеһова буну тәһгир кими гәбул етмишди. Өзүмүзү ҝилеј-ҝүзар етмәк вәрдишиндән ҝөзләмәлијик.
16:2. Әҝәр ианә едәҹәјимиз мәбләғи габагҹадан мүәјјәнләшдирсәк вә мүтәмади олараг ианә етсәк, Падшаһлыг марагларынын ирәлиләмәсини мүнтәзәм шәкилдә дәстәкләјәҹәјик.
«КАМИЛЛӘШИН»
Павел коринфлиләрә дејир ки, онлар төһмәт алмыш, лакин төвбә етмиш ҝүнаһкары ‘бағышлајыб, тәсәлли вермәлидирләр’. Павелин илк мәктубу онлары кәдәрләндирсә дә, о севиндијини јазыр, чүнки бу кәдәр онлары төвбә етмәјә тәшвиг етди (2 Кор. 2:6, 7; 7:8, 9).
Павел коринфлиләри Македонијадакы гардашларын сәхавәтини тәглид етмәјә тәшвиг едир: «Һәр шејдә үстүн олдуғунуз кими, чалышын ки, бу лүтфкарлыг ишиндә дә үстүн оласыныз». Она гаршы чыханлара ҹаваб вердикдән сонра Павел һамыја мәсләһәт едир: «Севинин! Камилләшин, тәсәлли тапын, һәмфикир олун, сүлһдә јашајын» (2 Кор. 8:1, 2, 4, 7; 13:11).
Мүгәддәс Китаб суалларына ҹаваблар:
2:15, 16 — Нәјә ҝөрә демәк олар ки, биз «Мәсиһин хош әтријик»? Чүнки биз Мүгәддәс Китабда дејиләнләрә риајәт едир вә орада јазылан хәбәри бәјан едирик. Белә «әтир» гејри-салеһләрдә икраһ доғурса да, Јеһова вә сәмими инсанлар үчүн хошдур.
5:16 — Мәсһ олунмуш мәсиһчиләр һансы мәнада ‘һеч кими ҹисмани бахымдан танымырлар’? Онлар башгаларына инсан нөгтеји-нәзәрилә бахмырлар, јәни инсанлар арасында имкана, иргә, етник вә ја милли мәншәјә ҝөрә ајры-сечкилик етмирләр. Онлар үчүн һәмиманлыларла сых мүнасибәт ән мүһүм рол ојнајыр.
11:1, 16; 12:11 — Доғруданмы Павел коринфлиләрлә өзүнү ағылсыз кими апарырды? Хејр. Лакин һәвари адланмаг һүгугуну мүдафиә етмәјә мәҹбур олдуғу үчүн онун дедикләри бәзиләринә ловғалыг вә ағылсызлыг кими ҝөрүнә биләрди.
12:1-4 — ‘Ҹәннәтә апарылан’ ким иди? Мүгәддәс Китабда буна бәнзәр һадисә илә гаршылашан башга һеч ким һаггында бәһс едилмәдији вә бу парча, Павелин өзүнүн һәвари адланмаг һүгугуну мүдафиә етдији ајәләрдән дәрһал сонра ҝәлдији үчүн бу рөјанын мәһз Павелә верилдији ҝүман едилир. Еһтимал ки, Павел рөјада, «ахыр заманда» мәсиһчи јығынҹағынын јашадығы руһани ҹәннәти ҝөрмүшдү (Дан. 12:4).
Бизим үчүн ибрәт дәрсләри:
3:5. Бу ајәдән белә бир нәтиҹәјә ҝәлә биләрик ки, Јеһова мәсиһчини Өз Кәламы, мүгәддәс руһу вә тәшкилатынын јер үзүндәки һиссәси васитәсилә хидмәт үчүн ‘габилијјәтли’ едир (Јәһ. 16:7; 2 Тим. 3:16, 17). Буна ҝөрә биз Мүгәддәс Китабы вә она әсасланан әдәбијјатлары чалышганлыгла өјрәнмәли, даима мүгәддәс руһ үчүн дуа етмәли вә мәсиһчи ҝөрүшләринә мүнтәзәм олараг ҝетмәли вә онларда иштирак етмәлијик (Мәз. 1:1-3; Лука 11:10-13; Ибр. 10:24, 25).
4:16. Јеһова ‘дахили варлығымызы ҝүндән-ҝүнә тәзәләдији’ үчүн Онун тәгдим етдији һәр шејдән даима истифадә етмәлијик, јәни руһани шејләрә диггәт јетирмәдијимиз бир ҝүн белә олмамалыдыр.
4:17, 18. ‘Сыхынтыларымызын јүнҝүл вә мүвәггәти’ олдуғуну јадда сахламаг чәтин анларда Јеһоваја садиг галмағымыза көмәк едәр.
5:1-5. Павел мәсһ олунмуш мәсиһчиләрин ҝөјләр һәјатына олан үмидләрини вә бунунла бағлы кечирдикләри һиссләри неҹә дә ҝөзәл ифадә едир!
10:13. Бир гајда олараг, еһтијаҹ олан јердә хидмәт етмәјә тәјинат алмамышыгса, јығынҹағымыза тәјин едилән әразидә тәблиғ етмәлијик.
13:5. ‘Иман јолунда’ олуб-олмадығымызы јохламаг, давранышымызын Мүгәддәс Китаб принсипләринә вә тәләбләринә ујғун ҝәлиб-ҝәлмәдијини јохламаг демәкдир. ‘Өзүмүзү имтаһан етмәк’, Аллаһла мүнасибәтимизин нә дәрәҹәдә мөһкәм, ‘һиссләримизин’ нә дәрәҹәдә ити вә иман ишләримизин нә гәдәр мүхтәлиф вә чох олдуғуну јохламагдыр (Ибр. 5:14; Јаг. 1:22-25). Павелин практики мәсләһәтләрини тәтбиг етмәклә һәгигәт јолунда јеримәји давам едәҹәјик.
[26-ҹы сәһифәдәки шәкил]
«Бу чөрәји једијиниз вә бу касадан ичдијиниз һәр заман» сөзләри нә демәкдир? (1 Кор. 11:26)