“Бу дүнјанын сәһнәси дәјишир”

“Гардашлар, демәк истәјирәм ки, вахт азалмышдыр” (1 КОРИНФЛИЛӘРӘ 7:29).

1, 2. Јашадығыныз дөвр әрзиндә һансы дәјишикликләри ҝөрмүсүнүз?

ЈАШАДЫҒЫН дөвр әрзиндә һансы дәјишик­ликләри ҝөрмүсән? Онлардан бә’зиләрини садалаја биләрсәнми? Мәсәлән, тибб елминдәки инкишафлары ҝөтүрәк. Бу саһәдәки арашдырмаларын сајәсиндә мүхтәлиф өлкәләрдә инсан өмрүнүн орта мүддәти ХХ әсрин әввәлләриндә 50 илдән аз идисә, бу ҝүн 70 илдән чох олуб! Һәм дә истифадә етдијимиз радионун, телевизорун, ҹиб телефонларынын вә факсларын нә гәдәр фајдалы олдуғуну хатырлајаг. Тәһсилдә, нәглијјатын инкишафында вә инсан һүгугларынын мүдафиәсиндә олан наилијјәтләри дә унутмаг олмаз, бүтүн бунлар милјонларла инсанларын һәјатыны јахшылашдырыб.

² Сөзсүз ки, бүтүн дәјишикликләр бу гәдәр јахшы олмамышдыр. Ҹинајәтин артдығыны, мә’нәви дәјәрләрин ендијини, наркоманијанын јајылдығыны, бошанмаларын сајынын чохалдығыны, һәмчинин инфлјасијанын артдығыны вә терроризм тәһлүкәсинин һансы аҹынаҹаглы нәтиҹәләрә ҝәтириб чыхартдығыны ҝөрмәмәк гејри-мүмкүндүр. Һәр неҹә олса да, еһтимал ки, сән чох илләр бундан әввәл һәвари Павелин јаздығы сөзләрлә разылашаҹагсан: “Бу дүнјанын сәһнәси дәјишир” (1 Коринфлиләрә 7:31, ЈД).

3. Павел, “бу дүнјанын сәһнәси дәјишир” дедикдә нәји нәзәрдә тутурду?

³ Бу сөзләри дејәркән Павел дүнјаны тамаша илә мүгајисә едир. Тамашанын ифачылары — сијасәтин, динин вә мәдәнијјәтин ҝөркәмли нүмајәндәләри — сәһнәјә чыхыр, ролларыны ифа едир вә сонра исә јерләрини башгаларына верирләр. Бу ҹүр вәзијјәт әсрләрлә давам едир. Кечмиш вахтларда сүлаләләр онилликләр, һәтта јүзилликләр әрзиндә һөкмранлыг едәрдиләр вә дәјишикликләр чох јаваш-јаваш баш верирди. Бу ҝүн һәр шеј башга ҹүрдүр: гатил ҝүлләси тарихин ҝедишатыны бир ан ичиндә дәјишә биләр! Һәгигәтән дә, бу нараһат вахтларда сабаһкы ҝүнүн бизә нә ҝәтирәҹәјини билмирик.

4. а) Мәсиһчиләр дүнја һадисәләринә мүнасибәтдә һансы мүвазинәтли нөгтеји-нәзәрләрә малик олмалыдырлар? б) Инандырыҹы һансы ики сыра сүбутлары нәзәрдән кечирәҹәјик?

⁴ Әҝәр дүнја тамаша, онун рәһбәрләри исә ифачылардырса, онда мәсиһчиләр тамашачылардырa. Лакин онлар “дүнјадан” олмадыглары үчүн, онлары нә тамаша, нә дә ифачыларын шәхсијјәти марагландырыр (Јәһја 17:16). Әксинә, онлары даһа чох башга шеј — драмын өз сон һәддинә, фаҹиәли сонуна чатмасынын әламәтләри марагландырыр, чүнки онлар билирләр ки, Јеһова чохдан ҝөзләнилән әдаләтли јени дүнјаны бәрпа етмәздән әввәл бу систем өз сонуна чатмалыдырb. Буна ҝөрә дә ҝәлин сонун вахтында јашадығымызы вә јени дүнјанын јахын олдуғуну ҝөстәрән ики сыра сүбуту нәзәрдән кечирәк. Бунлар 1) Мүгәддәс Китаб хронолоҝијасы вә 2) дүнјадакы шәраитләрин писләшмәсидир (Матта 24:21; 2 Петер 3:13).

Сирр нәһајәт ки, ачылмышдыр!

5. “Диҝәр халгларын вахты” нә демәкдир вә бу вахт бизи нәјә ҝөрә марагландырыр?

⁵ Хронолоҝија мүхтәлиф һадисәләрин дәгиг вахтыны өјрәнир. Иса, дүнја рәһбәрләринин Аллаһын Падшаһлығынын мүдахиләси олмадан јерин ишләрини идарә едәҹәкләри бир вахт һаггында бәһс етмишдир. Иса бу дөврү “диҝәр халгларын вахты” адландырырды (Лука 21:24). Тә’јин олунмуш бу вахт баша чатанда һакимијјәтә, гануни Һөкмдар олан Исанын башчылығы алтында Аллаһын сәмави Падшаһлығы ҝәләҹәкдир. Әввәлҹә Иса “дүшмәнләринин арасында” рәһбәрлик едирди (Мәзмур 110:2). Сонра, Даниел 2:44-дә јазылан һадисә баш верир: “Падшаһлыг... бу падшаһлыгларын [инсан һакимијјәтләринин] һамысыны... парчалајаҹаг вә мәһв едәҹәк, өзү исә әбәдијјән дураҹаг”.

6. “Диҝәр халгларын вахты” нә заман башланды, нә гәдәр давам етди вә нә заман сона чатды?

⁶ “Диҝәр халгларын вахты” нә заман баша чатмалы вә Аллаһын Падшаһлығынын рәһбәрлији нә заман башламалыдыр? Бу суалын ҹавабы “сонун вахтына гәдәр... мөһүрлүдүр” вә Мүгәддәс Китаб хронолоҝијасы илә әлагәлидир (Даниел 12:9). “Сонун вахты”нын јахынлашмасы илә әлагәдар Јеһова аддымлар атды ки, бу суалын ҹавабы Мүгәддәс Китабын тәвазөкар Тәдгигатчылары групуна ајдын олсун. Аллаһын руһунун көмәји илә онлар баша дүшдүләр ки, “диҝәр халгларын вахты” ерамыздан әввәл 607-ҹи илдә Јерусәлим мәһв едиләндә башламыш вә һәмин “вахтын” узунлуғу 2 520 илдир. Бундан ирәли ҝәләрәк онлар мүәјјән етдиләр ки, “диҝәр халгларын вахты” 1914-ҹү илдә баша чатмышдыр. Онлар һәм дә баша дүшдүләр ки, 1914-ҹү ил бу пис системин сонунун башланғыҹы олмушдур. Сән Мүгәддәс Китабын тәдгигатчысы кими, 1914-ҹү илин неҹә һесабландығыны Мүгәддәс Јазыларын көмәји илә изаһ едә биләрсәнми?c

7. Даниел китабында хатырланан једди вахтын башланғыҹыны, давамыны вә сонуну мүәјјән етмәкдә Мүгәддәс Јазыларын һансы һиссәләри бизә көмәк едир?

⁷ Бу сиррин ачары Даниел китабында верилир. “Диҝәр халгларын вахты”нын әввәлиндә, Јеһова ерамыздан әввәл 607-ҹи илдә Јерусәлими мәһв етмәк үчүн Бабил падшаһы Навуходоносору истифадә етдијинә ҝөрә бу падшаһын васитәсилә билдирди ки, халглар једди символик вахт әрзиндә Аллаһын мүдахиләси олмадан јашајаҹаглар (Һезекиел 21:26, 27; Даниел 4:16, 23-25). Бу једди вахт нә гәдәр давам етмәли иди? Вәһј 11:2, 3 вә 12:6, 14 ајәләринә әсасән үч јарым вахт 1 260 ҝүнә бәрабәрдир. Демәли, једди вахт ики дәфә артыг, јә’ни 2 520 ҝүн чәкир. Бунунла һәр шеј битирми? Хејр, чүнки Јеһова Даниелин мүасири олан Һезекиел пејғәмбәрә белә бир изаһат верди: “Һәр ҝүн бир ил јеринә, сәнин үзәринә буну гојдум” (Һезекиел 4:6). Беләликлә, әслиндә једди вахт 2 520 ил давам етмәли иди. Ерамыздан әввәл 607-ҹи илдән 2 520 ил сајсаг белә нәтиҹәјә ҝәлә биләрик ки, “диҝәр халгларын вахты” 1914-ҹү илдә баша чатмалы иди.

“Сонун вахты” тәсдиг едилмишдир

8. Дүнјадакы вәзијјәтин 1914-ҹү илдән писләшдијинә даир сиз һансы дәлилләри ҝәтирә биләрсиниз?

⁸ 1914-ҹү илдән башлајараг дүнјада баш вермиш һадисәләр, јухарыда верилән Мүгәддәс Китаб хронолоҝијасынын изаһынын доғрулуғуну тәсдиг едир. Иса өзү демишдир ки, “дөврүн сону” заманы мүһарибәләр, аҹлыг вә хәстәликләр олаҹагдыр (Матта 24:3-8; Вәһј 6:2-8). Вә 1914-ҹү илдән башлајараг мәһз бу һадисәләр баш верир. Һәвари Павел инсанларын бир-бирләринә мүнасибәтләринин әмәлли дәрәҹәдә дәјишәҹәјини билдирәрәк, башга мә’луматлары әлавә етмишдир. Дәјишикликләрә даир онун вердији тәсвир, бизим мүшаһидә етдијимиз кими олдугҹа дәгигдир (2 Тимотејә 3:1-5).

9. Мүшаһидәчиләр 1914-ҹү илдән башлајараг дүнјада баш верән вәзијјәт барәдә нә дејирләр?

⁹ “Бу дүнјанын сәһнәси” 1914-ҹү илдән башлајараг һәгигәтәнми олдугҹа чох дәјишилмишдир? “1914-ҹү илин нәсли” китабында профессор Роберт Вол гејд едир: “Мүһарибәдән сағ чыханлар, 1914-ҹү илин август ајында бир дүнјанын мөвҹудлуғуна сон гојулдуғуна вә башга бир дүнјанын башладығына инанмагдан һеч заман ваз кечмәјәҹәкләр” (“The Generation of 1914”). Буну тәсдиг едәрәк, Үмумдүнја Сәһијјә Тәшкилатында психи сағламлыг шө’бәсинин директору доктор Жорж Коста-и-Силва јазырды: “Биз, һәддиндән артыг сүр’әтли дәјишикликләр дөврүндә јашајырыг, бу исә индијә гәдәр бәшәријјәтә мә’лум олмајан дәрәҹәдә һәјәҹан вә стрессин әмәлә ҝәлмәсинә сәбәб олур”. Сән буна шәхси тәҹрүбәндә әмин олмусанмы?

10. 1914-ҹү илдән башлајараг дүнјадакы вәзијјәтин писләшмәсинин сәбәбини баша дүшмәкдә Мүгәддәс Китаб бизә неҹә көмәк едир?

¹⁰ Дүнјадакы вәзијјәтин писләшмәсинин сәбәбкары кимдир? Вәһј 12:7-9 ајәләри ҝүнаһкары ифша едир: “Ҝөјдә мүһарибә олду. Микајыл [Иса Мәсиһ] вә онун мәләкләри әждаһа илә вурушдулар. Әждаһа [Шејтан Иблис] вә онун мәләкләри онлара гаршы дөјүшдүләр. Амма ҝүҹләри чатмады. Вә ҝөјдә онлара артыг јер тапылмады. Иблис вә шејтан... бүтүн дүнјаны алдадан... јер үзүнә атылды”. Демәли, асајиши позан Шејтан Иблисдир вә онун 1914-ҹү илдә ҝөјдән говулмасы нөвбәти вәзијјәтә сәбәб олду: “Јерә вә дәнизә вај олсун! Чүнки иблис, вахтынын аз олдуғуну биләрәк, бөјүк гәзәблә јаныныза енди” (Вәһј 12:10, 12).

Сонунҹу сәһнәнин ифа едилмә тәрзи

11. а) Шејтан “бүтүн дүнјаны” һансы үсулларла алдадыр? б) Павел диггәти Шејтанын мәгсәдләриндән һансына јөнәлтди?

¹¹ Һәлакынын јахынлашдығыны баша дүшәрәк, Шејтан 1914-ҹү илдән башлајараг “бүтүн дүнјаны” даһа сә’јлә алдатмаға чалышыр. Һәмишә алдатмагда маһир олан Шејтан, сәһнә архасындан һәрәкәт едир, сәһнәјә исә ифачылары — дүнја лидерләрини вә јени идеја тәблиғатчыларыны бурахыр (1 Јәһја 5:19; 2 Тимотејә 3:13). Онун мәгсәдләриндән бири — инсанлары јалан васитәсилә онун рәһбәрлик тәрзинин инсанлара һәгиги сүлһ ҝәтирәҹәјинә инанмаға мәҹбур етмәкдир. Үмуми ҝөтүрдүкдә онун тәблиғаты баш тутур, чүнки инсанлар дүнјадакы вәзијјәтин писләшдијини ҝөстәрән сүбутларын чохлуғуна бахмајараг, никбинлији горујуб сахлајырлар. Һәвари Павел габагҹадан демишдир ки, бу пис системин мәһв едилмәсиндән әввәл Шејтанын тәблиғаты хүсусилә ајдын шәкилдә әкс олунаҹаг. О јазмышдыр: “Инсанлар: “Сүлһ вә тәһлүкәсизлик”, — дејәндә гәфләтән һамилә гадыны доғуш ағрылары тутдуғу кими, онлар да һәлака уғрајаҹаг” (1 Салониклиләрә 5:3; Вәһј 16:13).

12. Бизим дөврдә сүлһү бәргәрар етмәк үчүн һансы сонсуз ҹәһдләр едилир?

¹² Сон илләрдә сијаси хадимләр мүхтәлиф програмлары тәсвир етмәк үчүн тез-тез “сүлһ вә тәһлүкәсизлик” ифадәсини истифадә етмишләр. Онлар һәтта 1986-ҹы или Бејнәлхалг сүлһ или адландырмышдылар, һалбуки һәмин ил өз адыны доғрултмады. Дүнја лидерләринин тәтбиг етдикләри бу ҹүр тәдбирләри 1 Салониклиләрә 5:3 ајәсиндәки сөзләрин там иҹрасы адландырмаг олармы, јохса Павел бүтүн дүнјанын диггәтини ҹәлб едәҹәк даһа конкрет вә даһа ајдын һадисәләр һаггында данышырды?

13. “Сүлһ вә тәһлүкәсизлик” һаггында габагҹадан хәбәр верәркән бунун ардынҹа ҝәлән һәлакы Павел нә илә мүгајисә етди вә бундан биз нә өјрәнә биләрик?

¹³ Чох вахт Мүгәддәс Китаб пејғәмбәрликләрини ја онлар јеринә јетдикдән, ја да јеринә јетмәјә башладыгдан сонра тамамилә баша дүшмәк мүмкүн олдуғу үчүн, биз ҝөзләмәли вә мүшаһидә етмәлијик. Анҹаг мараглыдыр ки, Павел “сүлһ вә тәһлүкәсизлик” е’лан олунандан сонра онун ардынҹа ҝәләҹәк гәфил һәлакы һамилә гадынын доғум ағрылары илә мүгајисә етди. Ҝәләҹәк ана тәхминән доггуз ај әрзиндә бәтниндә ушағын инкишаф етдијинә даир әламәтләри даһа ҝүҹлү сурәтдә һисс едир. О, еһтимал ки, ушағын үрәјинин дөјүнтүсүнү ешидир вә ја онун һәрәкәтләрини һисс едир. Көрпә һәтта тәпик дә ата биләр. Әламәтләр адәтән ҝетдикҹә даһа ајдын тәрздә тәзаһүр олунур вә нәһајәт гадын бир гәфил, сәбирсизликлә ҝөзләнилән һадисәјә — ушағын доғум вахтына шәһадәт едән ҝүҹлү ағрылары јашамаға башлајыр. Буна бәнзәр тәрздә, “сүлһ вә тәһлүкәсизлик” һаггында габагҹадан дејиләнләр һансы сурәтдә јеринә јетсә дә, онун ардынҹа гәфил, ағрылы, лакин сон мәрһәләдә севиндириҹи һадисә — пислијин мәһв едилмәси вә јени дүнја системинин бәрпасы башланаҹагдыр.

14. Әҝәр үмумиликдә десәк, ҝәләҹәк һадисәләр һансы ардыҹыллыгла ҹәрәјан едәҹәк вә сону неҹә олаҹаг?

¹⁴ Садиг мәсиһчиләр гаршыдан ҝәлән һәлакы кәнардан һәјәҹанла мүшаһидә едәҹәкләр. Әввәлҹә јерин падшаһлары (Шејтанын тәшкилатынын сијаси һиссәси) Бөјүк Бабилин тәрәфдарларынын (онун дини һиссәсинин) үзәринә һүҹум едәҹәк вә онлары мәһв едәҹәкләр (Вәһј 17:1, 15-18). Сүжетин бу ҹүр ҝөзләнилмәз сурәтдә дәјишилмәси илә Шејтанын падшаһлығы өзү-өзлүјүндә бөлүнмүш олаҹаг, бир һиссә диҝәр һиссәјә гаршы дураҹаг вә Шејтан бунун гаршысыны алмаг гүввәсиндә олмајаҹаг (Матта 12:25, 26). Јеһова јерин падшаһларынын үрәјинә гојаҹаг ки, Онун “мәгсәдини јеринә јетирсинләр”, јә’ни јер үзүнү Онун дини дүшмәнләриндән тәмизләсинләр. Јалан дин мәһв едилдикдән сонра, Иса Мәсиһ өзүнүн сәмави ордуларыны Шејтанын тәшкилатынын галан һиссәсини — коммерсија вә сијаси һиссәсини тамамилә дармадағын етмәк үчүн апараҹаг. Сонда Шејтан өзү тәрк-силаһ едиләҹәкдир. Бунунла бирликдә пәрдә салынаҹаг вә чохәсрлик драм баша чатаҹаг (Вәһј 16:14-16; 19:11-21; 20:1-3).

15, 16. “Вахт азалмышдыр” хәбәрдарлығы бизим һәјатымыза неҹә тә’сир етмәлидир?

¹⁵ Бүтүн бунлар нә заман баш верәҹәк? Биз нә ҝүнү, нә дә сааты билирик (Матта 24:36). Лакин ону билирик ки, “вахт азалмышдыр” (1 Коринфлиләрә 7:29). Буна ҝөрә дә, галан вахтымыздан мүдрикликлә истифадә етмәк олдугҹа ваҹибдир. Буну неҹә етмәк олар? Павелин вердији изаһата әсасән, биз лазымсыз ишләрин һесабына даһа ваҹиб ишләр үчүн ‘һәр фүрсәтдән истифадә етмәли’, јә’ни мүвафиг вахты сатын алмалы вә һәр ҝүнү гијмәтләндирмәлијик. Нәјә ҝөрә? “Чүнки јашадығымыз ҝүнләр шәрдир”. Вә ‘Рәббин ирадәси нәдирсә, ону гаврамагла’ галан гыса, гијмәтли вахты һәдәр јерә сәрф етмәјәҹәјик (Ефеслиләрә 5:15-17; 1 Петер 4:1-4).

¹⁶ Бүтүн дүнја системинин парчаланаҹағыны билмәк шәхсән бизә неҹә тә’сир етмәлидир? Бизим рифаһымыз үчүн һәвари Петер јазырды: “Әҝәр бүтүн бунлар бу ҹүр мәһв едиләҹәксә, сиз неҹә инсанлар олмалысыныз... мүгәддәс вә Аллаһа ихласкар бир һәјат јашамалысыныз” (2 Петер 3:11). Һәгигәтән биз неҹә инсанлар олмалыјыг? Петерин мүдрик нәсиһәтинә әсасән биз диггәтли олмалыјыг ки, 1) давранышымыз мүгәддәс олсун вә 2) сә’јли хидмәтимиздә һәмишә Јеһоваја дәрин мәһәббәт әкс олунсун.

17. Садиг мәсиһчиләр Шејтанын һансы тәләләриндән горунмалыдырлар?

¹⁷ Әҝәр Аллаһы севириксә, дүнја нә гәдәр ҹәлб етмәјә чалышса да, биздә она гаршы бағлылыг инкишаф етмәјәҹәк. Бу пис системин башына ҝәләҹәк һадисәләри нәзәрә алараг, зөвг вә сәфаја ҹәлб едән дүнјәви һәјат тәрзинин бизи ҹәлб етмәсинә вә овсунламасына јол вермәк тәһлүкәлидир. Бу дүнјада јашамағымыза вә ишләмәјимизә бахмајараг, дүнјадан там истифадә етмәмәк кими мүдрик мәсләһәтә гулаг асмалыјыг (1 Коринфлиләрә 7:31). Бундан әлавә, вар гүввәмизлә чалышмалыјыг ки, дүнјәви тәблиғат бизи аздырмасын. Бу дүнја өз проблемләрини һәлл едә билмәјәҹәк. О, әбәдијјән мөвҹуд ола билмәјәҹәк. Нәјә ҝөрә бу гәдәр әминик? Чүнки Аллаһдан илһам алмыш Мүгәддәс Јазыларда дејилир: “Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр” (1 Јәһја 2:17).

Ән јахшысы һәлә гаршыдадыр!

18, 19. Јени дүнјадан һансы дәјишикликләри ҝөзләјирсиниз вә нәјә ҝөрә ҝөзләмәјә дәјәр?

¹⁸ Јеһова тезликлә Шејтаны вә онун тәрәфдар­ларыны мәһв едәҹәк. Бундан сонра, бу системин сонундан сағ чыхан садиг инсанлар Аллаһын хејир-дуасы алтында әбәдијјән мөвҹуд олаҹаг јени декорасијалар гурмаға башлајаҹаглар. Мүһарибә бир даһа һәјаты кәдәрләндирмәјәҹәк; Аллаһ ‘јерин уҹуна гәдәр ҹәнҝләри дурдураҹагдыр’ (Мәзмур 46:9). Әрзаг чатышмазлығы әвәзинә “буғда боллуғу” олаҹагдыр (Мәзмур 72:16). Һәбсханалар, полис мәнтәгәләри, ҹинсијјәт органлары васитәсилә өтүрүлән хәстәликләр, наркобаронлар, бошанма ишләри илә әлагәдар мәһкәмәләр, мүфлисләшмә вә терроризм арадан галдырылаҹагдыр (Мәзмур 37:29; Ишаја 33:24; Вәһј 21:3-5).

¹⁹ Гәбирләр бошалаҹаг вә сәһнәјә јени ифачылар — милјардларла дириләнләр галхаҹаглар. Бир нәсил диҝәри илә бирләшәндә вә јахын адамлар узун ајрылыгдан сонра бир-бирләрини мүлајимлик вә сәмимиликлә бағырларына басанда, неҹә дә севиндириҹи олаҹаг! Нәтиҹәдә бүтүн јашајанлар Јеһоваја ибадәт едәҹәкләр (Вәһј 5:13). Декорасијалар дәјишдикдән сонра пәрдә јенидән галдырылаҹаг вә јер үзүндәки Ҹәннәтә мәнзәрә ачылаҹаг. Јени сәһнәни нәзәрдән кечирәркән һансы һиссләри јашајаҹагсан? Шүбһәсиз ки, уҹадан бу сөзләри демәјә тәшвиг олунаҹагсан: “Мән буну артыг чохдан ҝөзләјирдим, лакин ҝөзләмәјә дәјәрмиш!”

[Һашијәләр]

Неҹә ҹаваб верәрдиниз?

• Павелин “бу дүнјанын сәһнәси дәјишир” сөзләри бизим дөврүмүзү дәгигликлә неҹә тәсвир едир?

• Мүгәддәс Китаб хронолоҝијасы “диҝәр халгларын вахты”нын сонуну неҹә ҝөстәрир?

• Дүнјадакы вәзијјәтин дәјишилмәси 1914-ҹү илдә “сонун вахты”нын баш­ландығыны неҹә тәсдиг едир?

• ‘Вахтын азалмасы’ бизә неҹә тә’сир етмәлидир?