ФӘСИЛ 38

Аллаһа ибадәтдән неҹә севинҹ дуја биләрәм?

16 јашлы Елвин чарпајысында узаныб. Анасы гапынын ағзында дајанараг: «Елвин, дур! Билирсән ки, ахшам јығынҹаг вар!» — дејә сәсләнир. Елвинин аиләси Јеһованын Шаһидидир вә мәсиһчи ҝөрүшләри онларын һәјатынын ајрылмаз бир һиссәсидир. Анҹаг сон вахтлар Елвинин јығынҹаглара ҝетмәјә һеч һәвәси јохдур.

— Е-е-е... ана, олар, мән ҝетмәјим? — дејә о мызылданыр.

— Бәсдир, дејиндин. Ҝет ҝејин, јенә ҝеҹикмәк истәмирәм! — дејиб, анасы отагдан чыхыр.

Елвин өзүнү сахлаја билмәјиб анасынын архасынҹа дејир:

— Билирсән, ана, бу, сәнин дининдир, мәним јох.

Елвин аддым сәсләринин кәсилмәсиндән баша дүшүр ки, анасы онун дедикләрини ешитди. Амма анасы һеч нә демәјиб ҝедир.

Елвин өзүнү ҝүнаһкар һисс едир. О, анасынын хәтринә дәјмәк истәмирди. Анҹаг үрәјиндән үзр истәмәк дә кечмир. Белә вәзијјәтдә едә биләҹәји јеҝанә шеј...

Аһ чәкәрәк, Елвин ҝејинмәјә башлајыр. Сонра өз-өзүнә дејинәрәк: «Ҝеҹ-тез өз гәрарымы вермәлијәм. Өзүмү јығынҹагда јад кими һисс едирәм. Бәлкә, мән һеч мәсиһчи олмаг истәмирәм!»

БУ ҸҮР һиссләр сәнә дә танышдырмы? Бәзән елә ҝәлирми ки, башгалары руһани ишләрдән зөвг алдығы һалда, сән өзүнү буна мәҹбур едирсән? Мәсәлән:

● Мүгәддәс Китабы өјрәнмәк сәнә дәрс охумаг кими ҝәлир?

● Евдән-евә тәблиғ етмәкдән хошун ҝәлмир?

● Јығынҹаг ҝөрүшләри чох вахт сәнә дарыхдырыҹы ҝәлир?

Әҝәр бу суаллара «һә» ҹавабы вермисәнсә, руһдан дүшмә. Сән Аллаһа хидмәтдән севинҹ дујмағы өјрәнә биләрсән. Ҝәл ҝөрәк неҹә.

ПРОБЛЕМ 1 Мүгәддәс Китабы өјрәнмәк

Нәјә ҝөрә чәтиндир? Ола билсин, сән охумағы севмирсән. Јәгин, бир јердә отуруб узун мүддәт диггәтини бир шејә ҹәмләмәк сәнин үчүн чәтиндир. Үстәлик, дәрсләрин дә чохдур.

Нәјә ҝөрә ваҹибдир? Мүгәддәс Китаб Аллаһдан илһам алмагла јанашы, «тәлим, тәнбеһ, ислаһ вә салеһлик јолунда тәрбијә үчүн фајдалыдыр» (2 Тимотејә 3:16). Мүгәддәс Китабы өјрәнмәјин вә охудугларын үзәриндә дәриндән дүшүнмәјин сајәсиндә өзүн үчүн јени бир дүнја кәшф едәҹәксән. Унутма ки, һеч нә асанлыгла әлдә олунмур. Неҹә дејәрләр, ишләмәјән дишләмәз. Әҝәр јахшы бир идманчы олмаг истәјирсәнсә, ојунун гајдаларыны өјрәнмәли вә мәшг етмәлисән. Мөһкәм вә сағлам олмаг истәјирсәнсә, идманла мәшғул олмалысан. Ејнилә, Јарадан һаггында өјрәнмәк үчүн дә Онун Кәламыны арашдырмаг лазымдыр.

Һәмјашыдларын дејир: «Јухары синифдә охујанда сечим гаршысында галмышдым. Ушаглар һәр ҹүр налајиг ишләрлә мәшғул олурдулар. Мән дә бир гәрар вермәлијдим: “Онлар кими олмаг истәјирәм? Валидејнләримин мәнә өјрәтдикләри һәгигәтдирми?” Бу суаллара өзүм ҹаваб тапмалыјдым» (Тшедза).

«Өјрәндикләримин һәгигәт олдуғуна һәмишә инанмышам, амма јенә дә өзүм буна әмин олмалыјдым. Мән аиләм истәдији үчүн јох, өзүм истәдијим үчүн Аллаһа ибадәти сечмәлијдим» (Намиг).

Нә едә биләрсән? Өз тәләбатларына вә марағына ујғун шәхси өјрәнмә планы гур. Арашдыраҹағын мөвзулары өзүн сеч. Нәдән башламаг олар? Нијә дә Мүгәддәс Китабы вә инандығын тәлимләри дәриндән арашдырмајасан? Бунун үчүн сән «Мүгәддәс Китаб әслиндә нә өјрәдир?» китабындан истифадә едә биләрсәнa.

Һәрәкәтә кеч! Даһа чох өјрәнмәк истәдијин ики вә ја үч мөвзунун гаршысына ✔ ишарәси гој. Әҝәр истәсән, сәнин үчүн мараглы олан диҝәр мөвзулары да гејд едә биләрсән.

□ Аллаһ вармы?

□ Мүгәддәс Китабы јазанларын Аллаһдан илһам алдығына неҹә әмин ола биләрәм?

□ Нәјә ҝөрә тәкамүлә дејил, јарадылыша инанмалыјам?

□ Аллаһын Падшаһлығы нәдир вә онун мөвҹудлуғуну неҹә сүбут едә биләрәм?

□ Инсан өләндә нә баш вердијинә даир нөгтеји-нәзәрими неҹә изаһ едә биләрәм?

□ Өлүләрин дирилмәсинә неҹә әмин ола биләрәм?

□ Һансы динин һәгигәт олдуғуна неҹә әмин ола биләрәм?

․․․․․

ПРОБЛЕМ 2 Хидмәтә чыхмаг

Нәјә ҝөрә чәтиндир? Ола билсин, башгаларына Мүгәддәс Китаб һагда данышмаг сәнә чәтин ҝәлир, јахуд да тәблиғ едән заман синиф јолдашларынла гаршылашмагдан горхурсан.

Нәјә ҝөрә ваҹибдир? Иса Мәсиһ өз давамчыларына демишди: «Шаҝирд һазырлајын,.. сизә әмр етдијим һәр шејә риајәт етмәји онлара өјрәдин» (Матта 28:19, 20). Анҹаг бунун үчүн башга сәбәбләр дә вар. Арашдырмалара әсасән, бир чох јерләрдә ҝәнҹләрин әксәријјәти Аллаһа вә Мүгәддәс Китаба инаныр. Амма һәмин ҝәнҹләрин ҝәләҹәјә реал үмидләри јохдур. Сән исә Мүгәддәс Китабы өјрәнмәјин сајәсиндә бир чох ҝәнҹләрин ахтардығы вә еһтијаҹ дујдуғу дәјәрли биликләрә јијәләнмисән! Өјрәндикләрини башгалары илә бөлүшмәклә өзүнү даһа јахшы һисс едәҹәк, ән әсасы, Јеһованын үрәјини севиндирәҹәксән (Сүлејманын мәсәлләри 27:11).

Һәмјашыдларын дејир: «Достумла еффектив тәгдимәләр һазырладыг, етиразларын өһдәсиндән ҝәлмәји вә тәкрар башчәкмәләр етмәји өјрәндик. Хидмәтдә нә гәдәр чох сәј ҝөстәрирдимсә, бир о гәдәр дә севинҹ дујурдум» (Намиг).

«Алты јаш мәндән бөјүк олан бир баҹы мәнә чох көмәк едир. О, мәни өзү илә хидмәтә апарыр, бәзән дә сәһәр јемәјинә дәвәт едир. Баҹы мәнә дүшүнҹә тәрзими дәјишмәјә көмәк едән Мүгәддәс Китаб ајәләри ҝөстәрди. Инди онун ҝөзәл нүмунәси сајәсиндә инсанлара сәмими мараг ҝөстәрмәји баҹарырам. Өмрүм боју она борҹлу олаҹағам!» (Шәһла).

Нә едә биләрсән? Валидејнләринин разылығы илә јығынҹагда јашҹа сәндән бөјүк олан вә хидмәтдә сәнинлә әмәкдашлыг едә биләҹәк бир нәфәр тап (Һәвариләрин ишләри 16:1—3). Мүгәддәс Китабда дејилир: «Дәмир дәмири итиләр, инсан инсанын ағлыны ити едәр» (Сүлејманын мәсәлләри 27:17). Јашҹа бөјүк вә зәнҝин тәҹрүбәси олан инсанларла үнсијјәтин фајдасы чохдур. «Онларын јанында инсан өзүнү даһа раһат һисс едир», — дејә 19 јашлы Арзу гејд едир.

Һәрәкәтә кеч! Јығынҹағыныздан хидмәтдә сәнә дәстәк олаҹаг бир нәфәрин адыны (валидејнләриндән савајы) јаз.

․․․․․

ПРОБЛЕМ 3 Мәсиһчи јығынҹагларында иштирак етмәк

Нәјә ҝөрә чәтиндир? Бүтүн ҝүнү синифдә отурдугдан сонра бир саатдан чох јығынҹагда мәрузәләрә гулаг асмаг бир өмүр кими ҝәлә биләр.

Нәјә ҝөрә ваҹибдир? Мүгәддәс Китаб мәсиһчиләри тәшвиг едир: «Ҝәлин бир-биримизә гаршы диггәтҹил олуб бир-биримизи мәһәббәтә вә хејирхаһ ишләрә тәшвиг едәк, бәзиләринин вәрдиш етдији кими, јығынҹагларымыздан галмајаг, әксинә, о ҝүнүн јахынлашдығыны ҝөрдүкҹә бир-биримизи даһа чох руһландыраг» (Ибраниләрә 10:24, 25).

Һәмјашыдларын дејир: «Јығынҹаг ҝөрүшләринә һазырлашмаг олдугҹа ваҹибдир. Бәзән өзүнү мәҹбур етмәк лазым ҝәлир. Анҹаг јығынҹаға һазырлыглы ҝәләндә ҝөрүшдән даһа чох севинҹ әлдә едирсән, чүнки сөһбәтин нәдән ҝетдијини билирсән, һәтта ҹаваб вермәк имканын да олур» (Елда).

«Фикир вермишәм ки, ҹаваб верәндә јығынҹаг мәним үчүн даһа мараглы олур» (Ҹессика).

Нә едә биләрсән? Һазырлашмаға вахт ајыр вә имкан дахилиндә ҹаваб вермәјә чалыш. Бунун сајәсиндә јығынҹағын фәал үзвү олдуғуну һисс едәҹәксән.

Сәнҹә, нә даһа мараглыдыр — идман ојунуна телевизорда бахмаг, јохса мејданчада ојнамаг? Ајдындыр ки, иштиракчы олмаг тамашачы олмагдан даһа мараглыдыр. Нәјә ҝөрә јығынҹаг ҝөрүшләринә дә бу ҹүр јанашмајасан?

Һәрәкәтә кеч! Һәр һәфтә јығынҹаға һазырлашмаға нә заман, ән азы, 30 дәгигә вахт ајыра биләҹәјини јаз.

․․․․․

Бир чох ҝәнҹләр Мәзмур 34:8 ајәсиндәки: «Дадын, ҝөрүн Рәбб нә гәдәр шириндир», — сөзләринин һәгигәт олдуғуна әмин олмушлар. Мәҝәр бир јемәјин неҹә ләззәтли олдуғуну ешитмәкдәнсә, ону дадмаг даһа јахшы дејил? Ејни шеји Аллаһа ибадәтә дә шамил етмәк олар. Руһани ишләрлә мәшғул олмағын неҹә хејир-дуалар ҝәтирдијини өзүн дад вә ҝөр. Мүгәддәс Китабда дејилир ки, дејиләнләри ешитмәклә кифајәтләнмәјиб, онлары јеринә јетирән инсан «өз ишиндә хошбәхт олаҹаг» (Јагуб 1:25).

[Һашијә]

АЧАР АЈӘ

“Индән белә бу зәманәјә ујғунлашмајын. Әксинә, ағлынызы јениләшдирәрәк бүсбүтүн дәјишин ки, Аллаһын ирадәсинин фајдалы, хош вә камил олдуғуна әмин ола биләсиниз” Ромалылара 12:2

МӘСЛӘҺӘТ

Бир дәфтәр ҝөтүр вә јығынҹагда сәсләнән әсас фикирләри гејд ет. Беләҹә, вахт тез ҝәлиб кечәҹәк вә өјрәнмәк сәнин үчүн даһа асан олаҹаг!

БИЛИРСӘН... ?

Иманыны јохламагда сәһв һеч нә јохдур. Әслиндә, суаллар вермәк вә арашдырма апармаг Аллаһ һаггында билдикләринин һәгигәт олуб-олмадығыны анламағын ән јахшы үсулудур (Һәвариләрин ишләри 17:11).

ҺӘРӘКӘТ ПЛАНЫ!

Һәр ҝүн Мүгәддәс Китабы охумаға ․․․․․ дәгигә вә һәр һәфтә јығынҹаг ҝөрүшләринә һазырлашмаға ․․․․․ вахт ајыраҹағам. ․․․․․

Јығынҹагда диггәтлә гулаг асмаг үчүн мән... ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Нәјә ҝөрә руһани ишләрлә мәшғул олмаг ҝәнҹләрә дарыхдырыҹы ҝәлә биләр?

● Бу фәсилдә Аллаһа ибадәтлә бағлы садаланан үч саһәдән һансынын үзәриндә ишләмәк истәјәрдин?

[278–ҹи сәһифәдәки јазы]

“Мән валидејнләримин јох, өз истәјимлә бу дини сечмишәм. Јеһова мәним Аллаһымдыр вә мән Ону кәдәрләндирмәк истәмирәм” Саманта

[280 вә 281–ҹи сәһифәләрдәки чәрчивә/шәкилләр]

Онлар гаршыларына мәгсәдләр гојдулар

Мүгәддәс Китабда дејилир: «Билмирсиниз сабаһ башыныза нә ҝәләҹәк» (Јагуб 4:14). Өлүм гашла ҝөз арасындадыр. Ҝөзләмәдијимиз анда, һәтта ҹаван јашда белә һәјатымызы итирә биләрик. Катрина вә Кајлын һәјат һекајәсини охујаркән јашадыглары гыса өмүр јолунда гојдуглары руһани мәгсәдләрә наил олмагла Јеһованын гаршысында неҹә јахшы ад газандыгларына диггәт јетир (Ваиз 7:1).

Катрина һәјатла видалашанда ҹәми 18 јашы варды, амма о, артыг 13 јашындан «һәјат планыны» гурмуш, наил олмаг истәдији мәгсәдләрин сијаһысыны тутмушду. О, Аллаһын таммүддәтли хидмәтчиси олмаг, Мүгәддәс Китаб мүәллимләринә тәләбат олан әразидә хидмәт етмәк вә атасы илә бирликдә Падшаһлыг залларынын тикинтисиндә иштирак етмәк арзусунда иди. «Мән һәјатымы Јеһова Аллаһа һәср етмишәм! — дејә Катрина јазмышды. — Башлыҹа мәгсәдим Аллаһын нормаларына ујғун јашајыб, Онун үрәјини севиндирмәкдир». Дәфн мәрасиминдә Катрина «һәјатында јеҝанә амалы Јеһоваја хидмәт етмәк олан ҝөзәл ҝәнҹ бир гыз» кими анылды.

Мәгсәдләр гојмағын нә гәдәр ваҹиб олдуғуну Кајла ушаг јашларындан өјрәтмишдиләр. О, 20 јашында дәһшәтли автомобил гәзасынын гурбаны олду. Онун өлүмүндән сонра јахынлары һәлә дөрд јашында икән анасы илә бирликдә тәртиб етдији «мәгсәдләр китабы»ны тапдылар. Кајлын вәфтиз олунмаг, јығынҹагда мәрузәләр сөјләмәк, Јеһованын Шаһидләринин мәркәзи идарәсиндә хидмәт етмәк кими мәгсәдләри варды. О, мәркәзи идарәдә инсанлара Аллаһ һаггында өјрәнмәјә көмәк едән әдәбијјатлар чап етмәк истәјирди. Кајлын илләр өнҹә гәләмә алдығы арзуларыны охудугдан сонра анасы белә сөзләр деди: «О, бу мәгсәдләринин һәр биринә наил олду».

Бәс сәнин һансы мәгсәдләрин вар? Һеч ким билмир сабаһ башына нә ҝәләҹәк. Буна ҝөрә дә, һәр ҝүнүн гәдрини билмәк лазымдыр! Катрина вә Кајл кими, сән дә вахтындан мүмкүн гәдәр сәмәрәли истифадә ет. Һәјатынын сонуна јахын нөвбәти сөзләри дејән һәвари Павелдән нүмунә ҝөтүр. О демишди: «Мән ҹәсарәтлә вурушдум, гаршымдакы мәсафәни ахырадәк гачдым вә иман јолундан кәнара чыхмадым» (2 Тимотејә 4:7). Нөвбәти фәсил бу саһәдә сәнә көмәк едәҹәк.

[274 вә 275–ҹи сәһифәләрдәки шәкил]

Физики ҹәһәтдән сағлам олмаг истәјирсәнсә, идманла мәшғул ол. Руһән сағлам олмаг истәјирсәнсә, Аллаһын Кәламыны арашдыр