Мүгәддәс Китаб әсасында ҹаваб вер

БИЗДӘН етигадымыз, һәјат тәрзимиз, ҹари һадисәләрә мүнасибәтимиз, ҝәләҹәјә үмидимиз һагда сорушанда Мүгәддәс Китаба әсасән ҹаваб вермәјә чалышырыг. Нә үчүн? Чүнки о, Аллаһын Кәламыдыр. Бизим етигадларымыз мәһз Мүгәддәс Китаба әсасланмышдыр. Һәјатымызы орадакы принсипләрә ујғун сүрүрүк. О, бизим дүнјаја олан бахышымызы формалашдырыр. Ҝәләҹәјә үмидимиз Мүгәддәс Китабын Аллаһдан илһам алмыш вәдләринә әсасланыр (2 Тим. 3:16, 17).

Дашыдығымыз адын үзәримизә гојдуғу мәсулијјәти јахшы дәрк едирик. Биз Јеһованын Шаһидләријик (Јешаја 43:12). Буна ҝөрә дә суаллара ҹаваб верәркән инсан фәлсәфәсинә јох, илһамланмыш Кәламында Јеһованын дедији сөзләрә әсасланырыг. Дүздүр, һансыса мәсәләјә даир һәр биримизин өз нөгтеји-нәзәри вар. Анҹаг буна бахмајараг, Аллаһын Кәламынын һәгигәт олдуғуна там әмин олдуғумуз үчүн онун бахышларымызы формалашдырмасына јол веририк. Сөзсүз, Мүгәддәс Китаб бир чох мәсәләләрдә бизә өз сечимимизи етмәјә имкан верир. Биз өз фикримизи башгасына јеритмирик, әксинә, инсанлара көмәк едирик ки, Мүгәддәс Китабдакы принсипләри өјрәнсинләр вә беләликлә, бизим кими өз сечимләрини етсинләр. Һәвари Павел кими биз дә инсанларын ‘иман ҝәтириб итаәт етмәләрини’ истәјирик (Ром. 16:26).

Иса Мәсиһ Вәһј 3:14 ајәсиндә «садиг вә һәгиги Шаһид» адланыр. О, суаллара неҹә ҹаваб верир, дүшдүјү вәзијјәтләрин өһдәсиндән неҹә ҝәлирди? Һәрдән инсанлары дүшүндүрән нүмунәләрдән истифадә едирди. Диҝәр һалларда суал верәнин өзүндән ајәни неҹә баша дүшдүјүнү сорушурду. Иса чох вахт бунун үчүн ајәләри ја ситат ҝәтирир, ја өз сөзләри илә дејир, јахуд да долајысы илә онлара истинад едирди (Мат. 4:3-10; 12:1-8; Лука 10:25-28; 17:32). Биринҹи әсрдә Мүгәддәс Јазыларын тумарлары адәтән синагогларда сахланылырды. Елә бир дәлил јохдур ки, она әсасән Исада һәмин тумарларын олдуғуну сөјләјәк. Буна бахмајараг, о, Мүгәддәс Јазылары чох јахшы билирди вә башгаларыны өјрәдәркән тез-тез онлара истинад едирди (Лука 24:27, 44-47). О, һаглы олараг өзүндән өјрәтмәдијини дејә билмишди. Иса Атасындан ешитдикләрини сөјләјирди (Јәһ. 8:26).

Биз дә Иса кими давранмаг истәјирик. Исадан фәргли олараг, биз Аллаһын дедикләрини шәхсән ешитмәмишик. Анҹаг Мүгәддәс Китаб Аллаһын Кәламыдыр. Ҹавабларымызы Мүгәддәс Китаба әсасландырсаг, диггәти өзүмүзә ҹәлб етмәјәҹәјик. Белә етмәклә ҝөстәрәҹәјик ки, гејри-камил инсанын нөгтеји-нәзәрини ифадә етмәк әвәзинә, нәјин һәгигәт олдуғуну Аллаһын сөјләмәсинә јол веририк (Јәһ. 7:18; Ром. 3:4).

Әлбәттә, бизим мәгсәдимиз садәҹә Мүгәддәс Китабдан истифадә етмәк дејил. Буну һәмсөһбәтимизә мүмкүн гәдәр чох фајда ҝәтирәҹәк тәрздә етмәлијик. Биз истәјирик ки, о, бизә һеч бир гәрәзли фикрин тәсири олмадан гулаг ассын. Инсанын әһвал-руһијјәсиндән асылы олараг ајәни охумаздан әввәл демәк олар: «Сизҹә, бизи илк нөвбәдә Аллаһын фикри марагландырмалы дејилми?» Јахуд сорушмаг олар: «Сиз билирдинизми ки, Мүгәддәс Китабда мәһз бу суала ҹаваб вар?» Мүгәддәс Китаб һәмсөһбәтин үчүн нүфузлу мәнбә дејилсә, башга тәгдимәдән истифадә етмәк лазым ҝәлә биләр. Бу заман демәк олар: «Иҹазә верин гәдимдә дејилмиш бу пејғәмбәрлик барәдә сизә данышым», јахуд «Бәшәр тарихиндә ән ҝениш јајылмыш бу китабда дејилир ки...».

Бәзи һалларда ајәни садәҹә өз сөзләринлә демәк гәрарына ҝәлә биләрсән. Анҹаг мүмкүн олан һалларда јахшы олар ки, Мүгәддәс Китабын өзүнү ачыб орада јазыланлары охујасан. Әҝәр һәмсөһбәтинин Мүгәддәс Китабы варса, ајәни онун өз китабындан ҝөстәр. Мүгәддәс Китабдан бу ҹүр истифадә етмәк инсанлара чох вахт ҝүҹлү тәсир ҝөстәрир (Ибр. 4:12).

Мәсиһчи ағсаггаллара ҹавабларыны Мүгәддәс Китаба әсасландырмаг хүсусилә ваҹибдир. Ағсаггал кими хидмәт етмәк үчүн олан тәләбләрдән бири ‘алдығы тәлимә ујғун вә етимада лајиг кәлама ҹидди риајәт етмәкдир’ (Тит. 1:9). Јығынҹағын үзвү ағсаггалдан мәсләһәт алдыгдан сонра һәјатында ҹидди гәрар гәбул едә биләр. Буна ҝөрә дә һәмин мәсләһәтин Мүгәддәс Китаба әсасланмасы сон дәрәҹә ваҹибдир! Ағсаггалын бу саһәдә вердији нүмунә башгаларыны да белә тәлим вермәјә тәшвиг едә биләр.