Рәһбәрлик Шурасы неҹә тәшкил олунуб?
ЈЕҺОВАНЫН ШАҺИДЛӘРИНИН Рәһбәрлик Шурасы Аллаһа һәср олунмуш вә мәсһ едилмиш кишиләрдән ибарәтдир. Онлар садиг вә ағыллы гулу тәмсил едирләр. Садиг вә ағыллы гулун Аллаһын халгыны руһани гида илә тәмин етмәк, она рәһбәрлик тәгдим етмәк вә Падшаһлыг һагда тәблиғ ишинин бүтүн дүнјада јајылмасынын гејдинә галмаг кими мәсулијјәти вар (Мат. 24:14, 45-47).
Рәһбәрлик Шурасынын иҹласлары һәр һәфтә, адәтән чәршәнбә ҝүнләри кечирилир. Бунун сајәсиндә бу гардашлар бирҝә әмәкдашлыг едә билирләр (Мәз. 133:1). Рәһбәрлик Шурасынын үзвләри һәм дә мүхтәлиф комитәләрдә хидмәт едирләр. Ашағыда гысаҹа ҝөстәрилдији кими, һәр комитә Падшаһлыг һаггында тәблиғ иши илә бағлы өз саһәсинә нәзарәт едир.
◼ КООРДИНАТОРЛАР КОМИТӘСИ. Бу комитә Рәһбәрлик Шурасынын диҝәр комитәләринин координаторларындан вә Рәһбәрлик Шурасынын үзвү олан катибдән ибарәтдир. Бу комитә бүтүн комитәләрин низамлы вә еффектив шәкилдә фәалијјәт ҝөстәрмәсинин гејдинә галыр. Бундан башга, бүтүн дүнјада Јеһованын Шаһидләринә тәсир ҝөстәрән фөвгәладә һаллар, тәгибләр, фәлакәтләр вә диҝәр тәхирәсалынмаз һаллар баш верәндә Шаһидләрин гајғысына галыр.
◼ КАДРЛАР КОМИТӘСИ. Бу комитәдә чалышан гардашлара бүтүн дүнјадакы Бет-Ел аиләсинин үзвләринин физики вә руһани фираванлығынын гајғысына галмаг һәвалә едилиб. Бу комитәнин нәзарәтчиләри Бет-Елләрин јени аилә үзвләрини тәјин вә дәвәт едир, һәмчинин онларын Бет-Ел хидмәтләри илә әлагәдар диҝәр мәсәләләри һәлл едир.
◼ НӘШРИЈЈАТ КОМИТӘСИ. Бу комитә бүтүн дүнјада Мүгәддәс Китаб әдәбијјатларынын чап едилмәсинә вә ҝөндәрилмәсинә, һәмчинин Јеһованын Шаһидләринин истифадә етдикләри мүхтәлиф һүгуги шәхсләрә мәхсус олан вә онлар тәрәфиндән идарә едилән мәтбәәләрә вә диҝәр әмлаклара нәзарәт едир. Нәшријјат комитәси Падшаһлығын үмумдүнја ишинә ианә едилән вәсаитләрин даһа сәмәрәли истифадә едилмәсинин гејдинә галыр.
◼ ХИДМӘТИ КОМИТӘ. Бу комитәдә хидмәт едән гардашлар тәблиғ ишинә, јығынҹагларын, пионерләрин, ағсаггалларын вә сәјјар нәзарәтчиләрин фәалијјәтинә вә «Бизим Падшаһлыг Хидмәтимиз»ин һазырланмасына нәзарәт едирләр. Бундан савајы, бу комитә Ҝилеад вә Хидмәти Тәкмилләшдирмә Мәктәбләринә шаҝирдләр дәвәт едир, сонра мәзунлара тәјинат верир.
◼ ТӘЛИМ КОМИТӘСИ. Бу комитә конгресләрдә вә јығынҹаг ҝөрүшләриндә тәгдим олунан материалын һазырланмасына нәзарәт едир. Бет-Ел аиләсинин үзвләри үчүн руһани програм һазырлајыр, һәмчинин Ҝилеад вә Пионер Хидмәти Мәктәбләри кими мүхтәлиф мәктәбләрә вә аудио/видео програмларынын һазырланмасына нәзарәт едир.
◼ ЈАЗЫ КОМИТӘСИ. Бу комитә руһани гиданын нәшр үчүн һазырланмасына, онун баҹы-гардашлара вә диҝәр охуҹулара чатдырылмасына рәһбәрлик едир. Бу комитә Мүгәддәс Китаб суалларына ҹаваб верир вә драм ссенариләрини вә мәрузәләрин планлары кими материаллары тәсдиг едир. Бүтүн дүнјада иҹра едилән тәрҹүмә ишинә дә нәзарәт едир.
Һәвари Павел мәсһ олунмуш мәсиһчиләрин јығынҹағыны инсан бәдәнинә бәнзәтди вә һәр үзвүн ваҹиблијини, бир-бириндән асылы олдуғуну, ҝөстәрдикләри мәһәббәти вә Аллаһын ишиндә етдикләри әмәкдашлығы вурғулады (Ром. 12:4, 5; 1 Кор. 12:12-31). Баш олан Иса Мәсиһ бәдән үзвләри арасында һәмаһәнҝлик вә әмәкдашлыг олмасы, руһән гидаланмасы үчүн лазым олан һәр шејлә тәмин едир (Ефес. 4:15, 16; Колос. 2:19). Ҝөрдүјүмүз кими, Рәһбәрлик Шурасы белә тәшкил олунмағын сајәсиндә Јеһованын мүгәддәс руһунун рәһбәрлијинә риајәт едәрәк Онун халгынын фәалијјәтинә мүвәффәгијјәтлә нәзарәт едир.